အချိန်တို့သည် ကုန်ဆုံးလေ့ ရှိကြသည်။
လူ့ဘဝသက်တမ်းမှာလည်း အချိန်၏တိုက်စားမှုကြောင့် ကုန်ဆုံးစမြဲရှိကြသည်။
သို့သော် ဘဝတစ်ချိုးတစ်ကွေ့မှာ မတူညီသော ကွဲပြားမှုနဲ့ ဖြတ်တိုက်စားသွားသော အချိန်၊ အမှတ်တမဲ့ ခေတ္တခဏသာ ဖြတ်သန်းသွားမှုဆိုပေမယ့် ထိုသူ၏ မှတ်ဥာဏ်ထဲ၌အမှတ်ရလေ့ သို့မဟုတ် ဘဝတစ်ခုလုံး၌ ပြောင်းလဲမှုတို့ ရှိတတ်ကြသည်။
⌚
"အခုထိမပြီးကြသေးဘူးလား မြန်မြန်လုပ်လေ"
အခန်းတံခါး၀ကနေ Olivia လှမ်းအော်လိုက်တဲ့ စိတ်မရှည်ခြင်းဟူသည့် အသံစွတ်စွတ်။
"နေပါဦး ဟေ့..မတွန်းနဲ့လေ ဒီမှာပျက်ကုန်တော့မယ်!!"
ပခုံးကို ဝင်တိုက်လိုက်တဲ့ Olivia ကြောင့် Eyeliner ညီအောင် ဆိုးနေတဲ့ Lisa ဒေါသတကြီး အော်ပြောလိုက်သည်။ ဘေးနားမှာ ရပ်နေတဲ့ Emily နဲ့ Kirsten နှစ်ယောက်ကလည်း Olivia ဝင်တိုက်မှုကြောင့် အကုန်ယိုင်သွားကာ ပွစိ ပွစိနဲ့ ပြောနေကြလေရဲ့။ သို့သော် Olivia ဟာ စိတ်မဆိုးဘဲ မှန်ကနေတစ်ဆင့် အကုန်လုံးကိုကြည့်ကာ စပ်ဖြဲဖြဲရယ်နေလေတယ်။
ဒီနေ့ဟာ သောကြာနေ့။ ရက်သတ္တပတ်ရဲ့ နောက်ဆုံး ရုံးဖွင့်ရက်။ တစ်နည်းအားဖြင့် ပိတ်ရက်တို့ စတင်တဲ့ညမှာ သူငယ်ချင်းတွေ ညဘက်အပြင်ထွက်လည်လေ့ရှိကြတယ်။
အခုလဲ မှန်တင်ခုံရှေ့မှာ မိတ်ကပ်အပြိုင် ခြယ်သနေကြတဲ့ Lisa တို့ကို Olivia ဟာ သူစောစောကြိတ်ပြင်ဆင်ပြီးတိုင်း စနောက်နေတယ်လေ။
အခန်းထဲက ရေဒီယိုအသံဟာ ကျယ်လောင်လွန်းနေတယ်။ မိန်းကလေးတွေရဲ့ ရယ်သံဟာ တစ်ချက် တစ်ချက် ပျံလွန့်နေသည်။ ခပ်မြူးမြူးသီချင်းသံကြောင့် မိတ်ကပ်လိမ်းနေရင်း ခြေဖျားကလေးတွေလှုပ်ကာ စီးချက် တစ်ချက်တစ်ချက်လိုက်မိကြသည်။ အပြင်ထွက် ပျော်ပါးရမည်ဆိုသောကြောင့် အခန်းထဲရှိ မိန်းကလေးတွေရဲ့ မျက်နှာဟာ ပြုံးယောင်သန်းပြီး မျက်လုံးအရောင်များ ဝင်းလက်နေကြသည်။
စားဝတ်နေရေးအတွက် စိတ်ပျက်စရာကောင်းလှတဲ့ အလုပ်အကိုင်တွေ၊ ရုံးကိစ္စတွေနဲ့လုံးပန်းပြီးနောက် နေ့တစ်ပတ်အဆုံးမှာတော့ သူမတို့ ပိတ်ရက်ကို အနိုင်ပိုင်းရမည်လေ။ ပျင်းပျင်းရိရိ အိမ်ထဲမှာတင် ကုန်ဆုံးဖို့ဟာ သူမတို့အတွက် အလွန်မတန်ရာ၊ ဖြုန်းတီးရာကျ နေသည်။ ပိတ်ရက်ရဲ့ နေ့တွေ၊ ညတွေဟာ သူမတို့အပိုင်ဖြစ်ကိုဖြစ်ရမည်။
