My Beautiful SPOUSE [[ Complete ]]

အပိုင်း - (၁၈)

မေ့မြောနေသည့် နေးနေးကို ဘုန်းခန့်ပိုင် ငေးကြည့်နေမိသည်။ ခဏကြာတော့ မေ့မြောနေရာကနေ အနည်းငယ်လူးလွန့်လာတဲ့ နေးနေးကြောင့် ဘုန်းခန့်ပိုင် ထိုင်နေရာကနေ မတ်ခနဲဖြစ်သွားသည်။

ဆေးအရှိန်ကြောင့် ခေါင်းကိုက်နေပုံရတဲ့ နေးနေးက မျက်လုံးတွေကိုဖိမှိတ်ကာ မျက်မှောင်ကြုတ်ထားသည်။ လက်ချောင်းလေးတွေနဲ့ နားထင်ကို ဖိနှိပ်နေတာကြောင့် ဘုန်းခန့်ပိုင် စိတ်ပူသွားရသည်။

" နေး . နေးနေး... အဆင်ပြေရဲ့လား... ခေါင်းအရမ်းကိုက်နေလို့လား "

သူ့ပယောဂမကင်းတာကြောင့် မသက်မသာဖြစ်နေပုံရတဲ့နေးနေးကိုကြည့်ရင်း ဘုန်းခန့်ပိုင် စိတ်ပူလာရသည်။ ပခုံးလေးကို အသာအယာ ဆုပ်ကိုင်ယမ်းခါရင်းမေးတော့ အခုမှ သေသေချာချာ သတိဝင်လာပုံရတဲ့ နေးနေးက ဆတ်ခနဲ ထထိုင်သည်။

" ကို . ကိုခန့် ... "

" အင်း နေးနေး... ကိုခန့်လေ "

" ကျွန်တော်ဘယ်ရောက်နေတာလဲ ကိုခန့် ... အခု ဘယ်ရောက်နေတာလဲ "

အခြေအနေကို အနည်းငယ် ရိပ်မိသွားပုံရတဲ့ နေးနေးက ဖင်ထိုင်လျက်သားလေး ကုတင်ခေါင်းရင်းဆီ တိုးကပ်သွားသည်။ ဘုန်းခန့်ပိုင်က ကုတင်နားကို တိုးကပ်သွားလေလေ နေနေးက ကုတင်ခေါင်းရင်းကို ရွှေ့သွားလေဖြစ်သည်။

" ဒါ ကိုခန့်ရဲ့အပန်းဖြေအိမ်ပဲ... ကိုခန့်တို့ သေချာစကားပြောဖို့လိုတယ် နေးနေး "

ထွက်ပြေးဖို့အရိပ်အခြေကြည့်နေတဲ့ နေးနေးကြောင့် ဘုန်းခန့်ပိုင်လည်း ကုတင်တစ်ဖက်ကိုသွားရင်း တံခါးဝကိုကျောပေးကာ နေးနေးရှေ့ကနေ ပိတ်ထားလိုက်သည်။

" ကျွန်တော့်ကို ဒီလိုမလုပ်ပါနဲ့ ကိုခန့် ... ကျွန်တော်မကြိုက်ဘူး "

" ကိုယ့်ကို စိတ်ဆိုးမပြေသေးဘူးလား နေးနေး "

" ကိုခန့်ကို ကျွန်တော်စိတ်ဆိုးနေတာ မဟုတ်ဘူး "

နေးစကားအဆုံး သက်ပြင်းချကာ ကုတင်အဖျားကို ဝင်ထိုင်လိုက်တဲ့ ကိုခန့်က နေးရဲ့ လက်ဖျားတွေကို အုပ်ကိုင်လာသည်။ ဆတ်ခနဲရုန်းလိုက်တာကြောင့် ကိုခန့် မျက်နှာပျက်သွားတာ မြင်လိုက်ပေမယ့် နေးမျက်နှာလွှဲလိုက်သည်။