سامح :مش هترجعى معايا بقى يا رحمة بقالك شهر هنا
رحمة :ارجع فين سامح طلقنى
سامح :مش هطلقك انتى كل ده اعصابك مهديتش
رحمة :مهديتش ولا هتهدى غير لما نطلق وانت هتطلقنى يا سامح لانك مش عايزنى لانك مش شايفنى اصلا
سامح :مش شايفك ازاى بس واحنا عايشين فى بيت واحد
رحمة :مش شايفنى يا سامح ومنتاش عايش معايا انت عايش مع نفسك ومع ذكريات حب قديم مش عارف ولا عايز تنساه ايه مستغرب ليه اه انا عرفت عرفت انك مش زى ما كنت مفكرة معندكش قلب لأ عندك قلب بس خلاص اديته لواحدة تانية واحدة معاها قلبك وعقلك واحدة ذكريات ماضيكم اهم واغلى عندك من حاضر بشاركك فيه ومن مستقبل مش عايز تعيشه معايا ولا مع اي حد انا عارفة ان المشكلة فيك انت مش فيا انا وانا تعبت انت جبت اخرى وخلاص مبقاش عندى حاجة تانية اعملهالك ولا بقي عندى طاقة اتحمل بيها الحياة دى معاك
سامح :انا مخونتكيش يا رحمة والله ما حاولت اشوفها من وقت ما سيبنا بعض احترمت انها بقت على ذمة واحد تانى ولما اتجوزنا احترمت ان انتى بقيتى مراتى انا عارف انها خلاص طلعت من حياتى
رحمة :بس مطلعتش من قلبك يا سامح ولا من عقلك هى موجودة جواك ومطرح ما تروح هتكون معاك حتى لو مبتحاولش تشوفها
انت مخونتنيش بس كمان انت مدتنيش فرصة غمضت عينك عن اي حاجة بعملها سديت ودنك عن اي حاجة بقولها مفكرتش فيا لان عقلك مشغول بغيرى ومحبتنيش لان قلبك اتقغل عليها وانا مليش فيه مكان
انت عمرك مقولتلي حاجة حلوة ولا وحشة فى الحقيقة انت معملتليش حاجة خالص خالص
كأنى مش مهمة لا مش كأنى انا فعلا مش مهمة عندك انا اصلا مش موجودة
انا حاولت اقربلك حاولت اهد اسوارك اللى مكنتش عارفة بانيها حواليك ليه وبعد سنتين عرفت
عرفت ان فى واحدة واقفة بينى وبينك فى واحدة انت موقف حياتك عليها
وبقولها لنفسي قبل ما اكون بقولهالك خلاص انا مش هحاول علشانك تانى
مش هفضل جنب واحد قلبه وعقله مش معايا مش هبقي جنبك وانت بتحبها هيا وبتفكر فيها هيا ولما نجيب بنت تسميها علي اسمها علشان اكره اسم بنتى
عارف عندى واحدة صاحبتى امها بتكره اسمها علشان كده علشان عارفة ان ابوها سماها على اسم حبيبته القديمة والنتيجة ايه هى بتكره اسم بنتها ومبتندهلهاش بيه ابدا بتندهها باسم الدلع بس حتى لو بتتخانق معاها لانها مش قادرة تندهها باسمها لانها بتكره اسمها
مش هسيبك تعمل فيا كده ومش هسمحلك تحولنى وتخلينى زيك جثة ماشية وسط الناس
واحد لا بيضحك ولا بيتكلم كتير لا بيفرح ولا بيتألم عيونه مطفية وروحه تعبانة
مش هبقي زيك هنفد بجلدى وهبدء من جديد
سامح :بس انا عايزك معايا البيت وحش من غيرك
رحمة :لا انت مش عايزنى انت بس بقيت لوحدك وعلشان كده عايزنى انا او غيرى الفكرة مش فيا
انت ممكن تتغير ممكن ترجع تعيش من تانى قلبك فى واحدة تقدر تسكنه وروحك فى واحدة تقدر تفرحها
انسي اللى فات ودور عليها ولو لقيتها متضيعهاش من ايدك
سامح :طيب ما تبقي انتى الواحدة دى
رحمة :لو كنت انا كان زمانك اتغيرت كان زمانك حبتنى حتى لو قلبك مقفول
اظن بعد عشرة تلت سنين مقدرتش اغيرك فيهم اقدر افهم كويس ان مش انا هيا
كمان انا مبقتش قادرة احاول علشانك اتقفلت منك
سامح :بقيتى بتكرهينى
رحمة :لا مبكرهكش بس فعلا اتقفلت منك وجودك بيضغط عليا وبيحسسنى انى فاشلة وانى مستحقش اتحب وانى مش كفاية بتصعب عليا نفسي
ابدء من جديد يا سامح انساها وانسانى
طلع نفسك بره دايرة ظلمها ليك وبعدها عنك وحبك ليها
وبره دايرة ظلمك ليا ووجعى منك
ابدء مع الانسانة الصح
سامح :وانتى
رحمة :انا غلطت فى حق نفسي انت مبينتش فرحة بيا ولا اى لهفة عليا
انا اللى فكرت مع نفسي فى قصة وخليتك بطلها وعشت مع افكارى دى
انا اللى كان المفروض مكملش فى الخطوبة بس انا كملت وخليتها جواز
انا غلطت ودفعت تمن غلطى
سامح :وتمن غلطى انا
رحمة :مش عارفة الله اعلم باللى هيجرالك بس انا مش هفكر فيك تانى يا سامح انا مش هعمل زيك ومش هعيش على الذكريات
بس بجد اتمنى انك ترتاح وتفرح انت مش انسان وحش من اللى عرفته عنك لانى مع انى عشت معاك تلت سنين جواز وسنة خطوبة الا انى معرفش عنك حاجات كتير لانك مخبى نفسك عنى وعن الناس كفاية تستخبى افتح قلبك لانه تعب
على فكرة انا فعلا متمناش تحصلك حاجة وحشة يمكن علشان انت مش انسان وحش ويمكن علشان عايزة تبقي مش فارق معايا نهائى ولا باى شكل
ويمكن علشان عايزة ربنا يعوضنى على قد صبرى ورضايا
سامح :ويمكن علشان قلبك ابيض وزى الورد
رحمة :تخيل دى اول مرة تقول عنى كلام حلو وتشكر فيا
سامح :انا غبى وهندم ندم عمرى انى محبتكيش
رحمة :محدش بيختار يحب مين الحب رزق ومحدش بيختار رزقه وان شاء الله ربنا يبعتلك رزقك ويعوضنى برزقى
سامح :طيب فكرى تانى انا مش عايز اخسرك وهحاول اتغير علشانك
رحمة :لو كان ممكن تتغير كان زمانك اتغيرت لو كان فيه حاجة ممكن تحصل بنا كان زمانها حصلت
متبقاش انانى يا سامح وعاوزنى جنبك علشان بس مستخسرنى اضيع من ايدك
تخيل لو قابلت واحدة وقلبك اتفتحلها هتعمل ايه
هتتجوزها عليا ولا هتضحى بحبك وتتعذب تانى بسبب حبك وتكرهنى انا لانك هتشوفنى السبب
بلاش انت افرض انا حبيت حد تانى
سيبنى انهى اللى بينا علشان كل واحد فينا يبدء مع الشخص الصح المرة دى
سامح :طيب خدى وقت فكرى
رحمة :مش محتاجة انا خلاص حسمت قرارى وواثقة انى بعمل الصح
سامح :خلاص هكلم عمى عبدالرحمن واتفق معاه هجيب المأذون امتى
