#عشقت_توأم_روحي
#نهاد_نسيم
#بقلم_فريال
الجزء 73
امو حاطة في بالها كي يمدولو السكنة يحول حتى ولوكان يبقى يخدم في ولايتي بصح انا نروح لهيه نسكن بصح هو فاجئها قالها والفت بداري وبناتي مانقدرش نخليهم لثم وانا نبقى خدام منشوفهمش، هبلت هي خلاص ملي صرات حكاية بنتها من تم مابقاتش تعيطلي وتسمعني هدرات جبدت عليا نهائيا وكما تدين تدان هي حرمتني ندخل دارها حرمها ربي من انو تدخل بنتها لدارها كي شيخي كي نسيم قالو ماتدخلش حتى في جنازتنا مانسحقوهاش نسيم قالهم لوكان نلقاها حتى جنب الباب تنساوني وتنساو بلي عندكم طفل اسمو نسيم ، ونساها تاع الصح من نهار هذاك قالي عندي ثلاثة خواتات فرات مش ربعة هي تعيط تحكي مع امها فالتليفون ولعجوز تحكي معاها ورا راجلها اما قدامو ماتجبدش علاها خلاه تخاف منو شيخي قد ماهو عاقل قد ماهو واعر ، كون لقاوها فيارج ممكن يسامحوها اما هي لقاوها مح.......... وزيد مش اول مرة يعني موالفة تخرج معاه وزيد لفامي تاعهم بعد ولد عم باباها. بقات امو وراه تظل تحكي وتحاول تقنعو باه كي يمدولو السكنة يسكن تم هو والو قالها وين نكون انا تكون عائلتي الحاجة لي تعجبني فيه مايتحرشش واحد مايقدر يحرشو ويقدر يبدلو قرارو يدير رايو يالوكان غالط مايسمع لحتى واحد وعندو كلمة وقص مرات نحب نتناقش معاه يخليني نهدر ونهدر وهو يسمع فالآخر يغمزني ويخرج ويخليني نوكل روحي يعني عييتي روحك برك بالهدرة وانا ندير وش كان في راسي وليت نسكت وخلاه هو يدير غير رايو. من اليوم قررت نبدل شوي نرجع كيف كنت نهتم اكثر بروحي الماكلة مع التربية والله تاع الصح غير نحط برك والفت نرقد مع بناتي باه نخليه يرتاح هنا صايي هملتو لازم نرجع كيما كنت واكثر والفت لبنات يرقدو مع بعض في شومبرة وانا معاهم باه نعسهم ونشوف فرح اما نورسين كبرت شوي ولات تفيق شوي مش حاجة قولت نخلي البيبان محلولين كي نسمعها نروح لعندها. درتلو عشاء الله الله نفضت داري وفحفحتها مليح نتواييت كوري ودوشت من ليوم هك هو هامل وبعيد على والديه وكمل عليه هم الخدمة نزيد نهملو انا والله ماتصرى، عدلت مليح وفحفحت روحي بالبارفا والمكياج كالعادة خاطيني بصح درت غوجالاف برك. كي دخل والله تاع الصح دهش فيا جاني ديراكت قالي علبالك توحشتك بقى غير يشوف معايا عشيتو وهو والله الفرحة باينة من عينيه قوتلو تربية لبنات لي بعدتني عليك انا خاطية لوكان نلقى ديما نقعد معاك منبعدش طول. انا نمشي وهو غير يشوف معايا رقدت فرح و روحت لميت الكوزينة ودخلت عندو قالي راح ترقدي هنا معايا الليلة _من اليوم نرقد هنا توحشتك _ وفرح _ خليت الباب محلول نسمعها كي تبكي. بقيت ليلة كاملة معاه هبلني وحشو كامل خرجو ليلة هذيك. تفيق فرح نديرلها بيبرون ونعطيها سوسات ترجع ترقد ونرجع عندو يلمني في حضنو. رقدنا مع بعض بعد مدة من لفراق الي يشوفنا يقول كنا بعاد على بعض كل واحد في بلاد وانا وياه فنفس الدار اما لبنات مخلاوش فيا وهو الخدمة هلكاتو ، والله اليوم تاع الصح رقدت هانية للصباح استحليت حضنو لوكان نلقى مانوضش خلاص نجيب عمري كامل راقدة عندو بصح لازم عليا نوض على جال بناتي شكون بيهم.
#فريال
