في المشفي كان رامي يجلس خلف مكتبه مستند بذراعيه ورأسه علي مكتبه يفكر في كيفية حل هذه المشكلات وبدون سابق إنذار وجد من يقتحم الغرفة ويمسكه من تلابيبه (يمسكه من الياقة بتاعة الهدوم ) أيمن بغضب : بقي أنت تهدد اختي عشان تتجوزك يا حيوان انت
إياد وهو يحاول إبعاد أيمن عن رامي : اهدي يا أيمن الحاجات دي متتحلش كده
رامي بعصبية : انت مجنون ازاي تدخل مكتبي وتمسكني بالشكل ده. انا هطلبلك الأمن
أيمن : أنا بقي هوريك الجنان علي أصوله وناوله لكمة قوية بوجهه سقط إثرها أرضا
إياد وهو يمسك أيمن بصعوبة : بس بقي اللي بتعمله ده مش هينفع هيعقد الدنيا اكتر
في الخارج
كان يقف الممرضين والممرضات وبعض الأشخاص الذين تجمعوا إثر صوت الشجار النابع من الداخل .
وصلت حور المشفي فصعدت إلي المكتب المشترك ولكن لاحظت صوت ضجيج و تجمع بعض الأشخاص حور وهي تسأل أحد الأشخاص : هو في ايه يا نهاد
نهاد : في اتنين جم وعمالين يتخانقوا مع دكتور رامي
حور : طب مشي الناس دي وانا هروح أشوف في ايه
نهاد : حاضر يا دكتور
توجهت حور لمكتب رامي وسمعت صوت الشجار
حور : يا نهار اسود ده صوت أيمن وده ايه اللي جابه هنا ده
دخلت حور سريعا الغرفة فوجدت أيمن و رامي يتشاجرون معا وإياد بالمنتصف يحاول الفصل بينهما
حور بصراخ : باااااس
نظروا لها جميعا
حور بغضب : ممكن أفهم إيه اللي بيحصل هنا و وجهت حديثها ل إياد وأيمن : وانتوا بتعملوا ايه هنا وجايين تتخانقوا معاه ليه
أيمن : عشان في أستاذة بيهددها وهيتجوزها غصب وهي مش عايزة تقول
حور : ومين اللي قالك أنه بيهددني واحد واتقدملي و وافقت عملت جريمة كله عمال يقولي اتجننتي اتهبلتي في ايه كل ده عشان هنتجوز بسرعة عارفة انكوا عارفين اني مبخودش قرار بسرعة و اتجهت و وقفت بجوار رامي وقالت : احنا اتفقنا نعمله بسرعة عشان عندنا مؤتمر بره هنحضر المؤتمر ونقضي شهر العسل هناك أظن كده جاوبت علي كل الاسئلة اللي انتوا جايين عشانها ويا ريت تيجوا تقولولي بعد كده بلاش الطريقة الهمجية دي
إياد : ماشي يا حور ده كان مجرد استنتاج للي حصل مش أكتر
حور : لو سمحت يا إياد خد أيمن وأمشي لاني مش هقدر أدافع عنكوا قدامه دلوقتي وانت يا أيمن المفروض تعتذر ليه
أيمن باستنكار : أعتذر ل ده
رامي : أنا عامل احترام ليها لولا كده كنت دفنتك مكانك
أيمن : لا يا خويا تعالي وريني هتعمل ايه
حور : بس بقي خد يا إياد أيمن وامشوا استنوني بره قدام المستشفي
خرج كلاً من أيمن وإياد إلي الخارج
في الغرفة
حور : أسفة علي اللي حصل
رامي بعدم تصديق : انتي بتعتذري عنهم عادي كده
حور : اه عادي في حاجة
رامي : أصل كنت فاكرك من الناس المغرورة اللي مهما حصل عمرها ما تشوف نفسها غلطانة
حور بغموض : بكرة تتعرف عليا كويس ما انت كلها يومين و هتبقي جوزي آه صح شوفت القاعة انت ونور
رامي : آه شوفناها
حور : شوفتوها ولا شوفتها
رامي : نور روَّح وانا اللي حجزت
حور : تمام عن إذنك معادنا يوم الخميس الساعة 7 سلام وغادرت الغرفة وتوجهت لمكتب دكتور نور
جاء اتصال لرامي
رامي : أيوه
عادل : معاد العملية هيتحدد انهارده في نفس المكان والمعاد
رامي : تمام
___________________________________
في مكتب دكتور نور
طرقت حور الباب فأذن الجد بالدخول
الجد : اتفضل
دخلت حور
حور : السلام عليكم ازي حضرتك عامل ايه وطنط هدي
الجد : وعليكم السلام الحمد لله كويسين انتي عاملة ايه
حور : الحمد الله أديني مشغولة في تجهيز حاجة الفرح
الجد : حور انتي متأكدة من الجوازة دي
حور : أيوه متأكدة انا كنت جاية أدي لحضرتك تلت أظرف
الجد باستغراب : ايه الاظرف دول
حور : الاول دعوة الفرح والتاني استقالتي
الجد مقاطعاً : استقالة ؟!
حور : عشان مش ضامنة بعد الفرح هشتغل تاني ولا لأ
الجد : ليه يا حور
حور بضحك : بفكر أستقر وابقي ست بيت وامسك الشبشب لجوزي وعيالي
ضحك الجد ثم قال : بس انتي دكتورة شاطرة وليكي مستقبل
حور : معلش حضرتك ريَّحني
الجد : ماشي مش هضغط عليكي
حور : التالت ده بقي هطلب من حضرتك تفتحه بعد الفرح ومش قبله لو سمحت وعايزة حضرتك توعدني
الجد : حاضر يا ستي وعد مش هفتحه غير بعد الفرح
حور بإبتسامة : شكرا إن حضرتك وافقت ومردتنيش عن إذنك وغادرت الغرفة بل المشفي بأكملها
____________________________________
في مركز العمليات الخاصة
في مكتب اللواء كان يجتمع اللواء بعمر ونادر
اللواء : عندنا فرح تبع حد مهم عندنا وعايزين نأمنه كويس جدا مش عايز غلطة
نادر : تمام يا فندم فرح مين بالظبط
اللواء : فرح النسر فرح حور الشرقاوي
عمر بصدمة : حور هتتجوز
اللواء : آه مستغرب ايه
نظر عمر بغضب لنادر : وانت طبعا عمرك ما كنت هتقولي بس علي جثتي الجوازة دي تتم
اللواء : عمممررر انت عارف كويس أن شغلنا مفيهوش مشاعر انت تنفذ اللي يتقالك عليه وبس
نادر ببرود : من غير ما حضرتك تقول يا فندم حور أختي و خطيبها صاحبي.
نادر بداخله : صاحبي ايه استغفر الله العظيم ده انا لو اطول أولع فيه كنت عملتها
عمر : بعد إذنك يا فندم اعفيني من المهمة دي
اللواء : مفيش إعفاء وكلامي هيتنفذ مفهوم
نادر : مفهوم يا فندم
عمر وهو يجز علي أسنانه : مفهوم يا فندم
بعد خروج اللواء
عمر : ممكن تفهمني ليه مقولتوليش على الحوار ده
نادر ببرود : يمكن لأنها لو كانت عايزة تعرفك كانت عرفتك بنفسها
عمر : مفيش حد هيتجوز حور غيري انت فاهم
نادر وهو يجز أسنانه : عمر انا اقسم بالله من ساعة ما حور قالتلي علي اللي حصل وانا ماسك نفسي عنك بالعافية فلم الدور
عمر : ويا تري بقي الهانم طلعت نفسها الشريفة العفيفة واحنا قافشينها مع واحد في شقة لوحدهم صح
إلي هنا وكفى لم يقدر نادر علي كبح نفسه أكثر من ذلك و أنقض عليه يسدد له العديد من اللكمات الشديدة حتي أصبحت ملامح وجه عمر غير واضحة من كثرة الدماء التي تغطي وجهه حاولوا كثيراً إبعاده عنه حتي نجحوا بالنهاية ولكن بعد أن أصبح وجه عمر خريطة غير واضحة المعالم
___________________________________
أمام المشفي توجهت حور لإياد وأيمن
حور : ممكن أفهم إيه الجنان اللي عملتوه ده
أيمن : كنا بنأدبه عشان يعرف أن وراكي رجالة مش لوحدك
حور : انت اتجننت يا أيمن بقي عشان توصله كده تضرب الراجل هات السبب الحقيقي من غير لف ولا دوران
إياد :الصراحة انا اللي زرعت الشك ده جوا دماغه لأن انتي عمرك ما تعملي كده نهائي إلا في حالة أنه بيهددك بحد وانتي بتحمي الحد ده
حور : يعني ميمشيش معاكوا أنه اتقدملي عادى وانا وافقت عادي وعشان المشاكل قولنا نتجوز بسرعة غير المؤتمر وبعدين انت يا إياد ؟! مكنتش متوقعة منك الأفكار الهبلة دي انت علي طول بتوزن الأمور وتحسبها واحدة واحدة لا وكمان بيهددني انت تعرف عني اني بتهدد
إياد : شخصيتك الغريبة دي ياختي اللي مخليانا مش عارفين انتي بتفكري ازاي اول حاجة جت في دماغي قولتها وده مصدق وطار على المستشفي
حور : ويعني انت مش عارف أيمن أقل كلمة بتجننه
أيمن : متشكرين يا أصيلة
حور : أنا مبهزرش واتفضلوا روحوا شوفوا وراكوا ايه عن إذنكوا ورايا حاجات لازم تخلص قبل الفرح
وركبت سيارتها وتوجهت لمنزل وعد
____________________________________
في أحد الأماكن المهجورة
عادل : الشحنة هتبقي في نفس يوم فرحك انت والبت دي وفي نفس معاد الفرح لأنهم هيبقوا مركزين علي تأمين فرحها جامد ومش هيركزوا معانا
رامي : تمام
رازق : انتوا متأكدين البت دي مش بتضحك عليكوا
رامي : لا انا مهددها بأمها واختها اللي خاطفهم
عادل : بعد كتب الكتاب الكهربا هبعت واحد يقطعها وتقتلها وتهرب بسرعة قبل ما الكهربا ترجع
رامي : تمام مكان أمي واختي فين
عادل : قولتلك تخلص هجبهولك لحد عندك
رامي : ماشي
رازق : تموت بس وكل حاجة هتتحل وهتبقي فل الفل
بعد ذهاب رامي و رازق دخل عادل إحدي الغرف وقال : إيه رأيك بقي في الخطة دي حلوة صح لا وهتبقي أحلي لما تتنفذ وأشوف أختك مرمية غرقانة في دمها كده
يونس : لو لمست شعره منها يا عادل يا ويلك يا سواد ليلك من اللي هعمله فيك
عادل بزهق : انت بقالك سبع سنين عمال تقول نفس الجمل طب جدد طيب وبعدين مش لما تخرج تبقي تهدد
يونس : مسيري يوم هخرج من هنا وهوريك العذاب أشكال وألوان خلي فاكر اللي بيضحك في الآخر
______________________________________
في منزل وعد
وصلت حور ودخلت للداخل و وجدت وعد كالعادة ترتدي نظاراتها وتفرد شعرها القصير الذي يصل طوله حتي آخر رقبتها وتصنع كحكتين صغيرتين وتقول : لا بس عرفت معاد ومكان العملية
حور : امته ؟
وعد : يوم الفرح في نفس معاد الفرح اكيد مش هتسيبي الفرح وتروحي تقبضي عليهم
حور : سيبيها انا هرتبها ملقتيش بردو مكان يونس
وعد : للاسف لسه
جلست حور علي الأريكة تفكر قم هتفت فجأة : أنا ازاي نسيت حاجة زي دي .........
