رجعني لدار وكمل يرقيلي وانا على حالتي نضرب نكسر قلبت الدار عليه بشوي حتى تكالميت ورقدت بصح بايتة ليلة كاملة وانا مع الكوابيس نفس الأشكال نشوف فيها تجري من ورايا بايتة نعيط و أحمد يهدي فيا بسيف وباه سيطر عليا ،صباح نضت على نفس حالتي وزاد عليا لحال وليت منحملوش لايقرب ليا ولا حتى يشوف فيا وغير يجي يقرب لعندي نولي ناكل فروحي نضرب وجهي ونقطع شعري وهذا شي لي يصرا كامل وانا نشوف بصح مربوطة غير عيني تشوف بصح تصرفاتي منيش مسؤولة عليها ولا عيط لصاحبو راقي من الصحرا قالو منقدرش نجي حتى بعد سمانة ومنعرف اذا نقدر ، فوتها معايا سمانة جحييم وكي مقدرش يسيطر عليا عيط لخاوتي ولاو هوما يحكمو فيا وهو يرقيلي وساعات يجيب صاحبو تاع الخطرة اللولا بصح مقدروليش وحالتي كل يوم تسوء اكثر ، فاتت سمانة وصاحبو تاع الصحرا مجاش زادت فاتت سمانة اخرى وأحمد ديما معايا فدار وحالتي من سيئ لاسوء قريب نلحق للهبال وخاوتي بقاو يتناوبو عليا مايخطيوني لا ليل لا نهار وحتى يما فلول محكاولهاش مباعد حست واصلا مش موالفة نطول عليها بلاما نعيطلها حتى شكت ولاو حكاولها ولات تجي مسكينة توقف تتفرج فيا وتبكي وتروح ميخليوهاش تقعد ؛ حتى جا نهار لي جا فيه صاحبو تاع الصحرا راقي معروف ومعاه واحد اخر ثاني راقي ، كي شفتو جسمي ولا يرجف وليت ندير حركات لا ارادية ساعات نبكي وساعات نضحك بصوت وساعات نعيط ونقلو روح روح وسعات نطلع السيتار على وجهي ولاو أحمد وعزيز يحكموني وهو بدا يرقي جابوها معايا نهار وليلة وهوما يرقيو نتغاشى ونعاود نفطن حتى لصباح خلاص حسيت جسمي تعب ومقدرتش بدا يتحرك فمي وحاجة تهدر فبلاصتي قال الذهب الذهب الذهب ، راح يجري احمد جاب الصندوق كي فتحو مالقا والو فرغ الذهب مكاش والو حتى شاف فجيهة فيها فراغ ومغطيا هي المالات مخدومة هكذاك جاب موس وفتحها وكانت الصدمة ، لقا فيها اربع كادنات وحدة كبيرة وثلاثة صغار مع اوراق منعرف وش مكتوب فيهم ، كي شافهم احمد ناض يعيط ويطير هز الموس وقالهم نروح ليها ليوم نذ.بحها ، ناضو يهدنو فيه ويحكمو فيه ونساوني انا ولا الضباب فعينيا ووليت نحس روحي نغرق فبحر تعبت وتعب جسمي حتى تغاشيت كي فطنت نسمع فراقي يقلهم لازم نجيبو لمفاتح ونفتحو الكادنات لاخاطر لولاد وضك يتأذاو كثرمن امهم ، هز التلفون وعيط لراجلها قالو جيب خالتي وولادك (سماهم بالواحد هوما ربعة ولادها )قالهم جيبوها وارواحو نسمع فأحمد يقلو لالا مكان والو راني عارضكم نتوما وخالتي للعشا برك ، كوبا عليه وبقا يستغفر من الكذب فوت ساعتين وانا نستنا فيهم وحاسة روحي قاعدة على الجمر يديا من كثر ما زيرت عليهم (بلا ارادتي)حسيتهم تكسرو، طبطب الباب راح احمد فتح دخلو راجل خالتو وولادها تشوف فيهم مستغربين لحقتهم خالتو كي شافت فيا وفي ذهب والصندوق و الكادنات وجها تلون بقات واقفة فالباب وعينيها خارجين ، قال راجلها _أحمد غير الخير وليدي وشكاين _سقسي مرتك ضك تقلك وشكاين ، شافو فيها ولادها وراجلها جات تهدر نطق أحمد قالها بلا كذب الصندوق وذهب كانو عندك وحنا ماحليناهش الا في حضور الرجال ، وكيما العادة نطقو على فمي وليت نقول هي هي هي لي دارتها هي لي دارت السحر ،ولادها وراجلها بقاو يتفرجو فيها ومشوكيين متوقعوهاش طوول ، قالها الراقي قوليلنا وينهم المفاتح قاتلو ماعندي حتى مفاتح _متهدريش مالا اتحملي مسؤوليتك ( لضك مفهمتش لاه قالها تحملي مسؤوليتك لي عندها معلومة تقول )، قالو أحمد روح جيب لولاد _ايه ضك نجيبهم ، هبط جابهم هو هاز نجيم وسعاد لابسة جلباب وسيتار وهازة نجيب ، حطهم قدامو وبدا يرقيلهم كي كثر بالرقية قاتلو خلاص خلاص ضك نقول_ ايه اهدري وقولي وين المفتاح _ في داري _وين فدارك؟_ فتوالات وقالت لبنها على لبلاصة وين هبط راسو وخرج ، انا حالتي زادت وليت نغلي وحدي نحوس نهرب نحوس نجري بصح حاكميني احمد وعزيز مخلاونيش نتحرك وليت نخبط فرجليا ونقلهم خليوني نروح ؛ بعد وقت رجع بنها هاز ساشية كحلة مربوطة شحاال من عقدة فتحهم الراقي لقا كتب واشكال وانواع من السحر شافهم لقاها دايرة سحر لراجلها يطيعها وولادها ونسا ولادها يطيعوها ويقعدو خدامين عندها (وصح نسا ولادها في اربعة عايشين معاها وكيما تقول يقولو حاضر) ، فكلهم السحر ورجع ليا جبد لمفاتح وفكلي السحر حسيت روحي خرجت وصوتي راح وبحيت من كثر ماعيطت ، مافقتش حتى لقيت احمد يفرغلي فالما ويفطن فيا نضت وانا واعية عكس قبيل نشوف بصورة مش واضحة ومضببة ، نطقو اولادها قالولها تبرينا منك ماراكي امنا مانستعرفو بيك وخرجو ، راجلها شاف فيها وقالها اذا ولادك مرحمتيهمش انا وش ديريلي روحي راكي طالق طالق طالق وجا خارج ومخليها بقات لاصقة فيه وتقلو والله كلش درتو علاجالكم دزها وخرج ، ناض ليها احمد
