Nehaj Nesut Nas Běle Oblaky [ISV]

Razděl 5. V tamtu stranu

Kako to jest potrěbno izrěkti? Nahoslav je govoril togda s krčmarem! Krčmar jemu je skazal... ah! Potrěbno prvo slovo...! Poslě togo uže bude prosto, jedno rěčenje, potom drugo!

Nahoslav stoji v srědině komory i vozdvigaje svoju ruku. Izgledaje dost zabavno. Beževy plašč oblěkaje jego proniklivo. Našek izgledaje kako žrec, ktory dělaje čudne magične obredy. On koncentruje svoje čuvanje na krčmovom ključu, ktory leži po drugoj straně tjurmy, za štangami.

V momentu, kogda on je byl maksimalno uvěrjeny, čto Noga jest daleko, načel on dělati svoj ambiciozny plan. Oni sut razpletli vezala. Tutčas Nahoslav stoji v čudnoj pozě i pokušaje magično privlěkti ključ do sebe. Toj blěskajuči ključ prividno je izgledal interesno za razbojnikov, i oni htěli by jego někde prodati. Najpravdopodobno oni ne znajut togo, že prědmet imaje magično svojstvo: on vračaje se k svojemu vlastniku.

Jediny nedostatok v tutom genialnom planu može byti maly detalj, o ktorom Nahoslav ne hče tutčas govoriti. To jest kakoby dost glupo i sramotno za njego...

- Ty ne pametaješ magičnoj kletvy, pravda li? - Fialomira bystro poznaje toj detalj - pfff, kaka sramooooota! - komentuje ona jego slabost do pametanja slov i rěčenij.

- Bud ty tiha! Ja probuju koncentrovati se!

- Ah, pomilujte, dragy gospodine, čto ja vas razstrajaju - odgovarjaje ona i subtilno izsmějaje se iz njego. Podhodi ona bliže k njemu. Tuto izgledaje tako, kako by jej poranjeno tělo regenerovalo se, kogda ona jego uražaje / obidžaje.

Glava Nahoslava vri od mysljenja. On išče magičnu formulu v cělom mozgu. Jasny grom! Noga može vratiti se vo vsakom momentu. To uže ne jest směšno!

- "Vot jest čarovnik bez nauky...

Prijdi ključu do mojej ruky!"

Svezok ključev svistaje i lětaje iz jednogo kraja temnice do drugogo. Fiala zatiskaje dlanj. Ona imaje vse ključe. Stoji ona pri Nahoslavu, ktory ješče ne može srazuměti, čto tutčas je slučilo se. Radostny metaličny ključ iz krčmy "Pod Orljim Perom" blěskaje tako, kakoby on smějal se iz Naška.

Začto tuto durno rymovanje rabotaje? Je li to byla magična kletva? Ona uvěrjeno tako ne zvuči! To potrěbuje byti něčto drugo!

Fialomira tiho pokušaje raztvoriti viseči pri želěznyh štangah zamok.

- To jest magija. To ne jest kako rabota v polju, lovjenje zvěrev ili budovanje domov. Čarovne formuly ne potrěbujut byti točne - informuje ona.

- Zaisto? No začto...? Toj ključ imaje vračati se do vlastnika. A ja jesm vlastnik!

- Nu da, ale to jest prosta magija. Tako prosta, čto bez problema jest možno ju obmamiti.

- Čto... - Nahoslav ne dověrjaje v to, čto je uviděl - ale... ty prividno jesi utratila svoju magičnu silu!

- Da, no odkryljenje ne izbiraje tobě cěloj sily. Ja mogu koristati magiju.

- Ale... - Nahoslav dalje togo ne razuměje. Kako mogutno jestestvo je byla děvčina prěd tym, kako ona je utratila svoju moč? Ona govori, že jest slaba, ale smogla privlěkti do sebe toj ključ. To jest absurdno! Čto jest magija, ktoroj ljudi tako ne razumějut? Ljudsko družstvo uživaje jedino někakove proste magične prědmety, ktore sut iztvorjene vyše magičnymi rasami iz dalekyh krajin. Jest li možlivo někde naučiti se magiju?

Zamok pri štangah trěskaje tiho. Jedin iz ključev ščestlivo je dogodil. Fialomira podavaje ključe Našku.

- Ne jest važno, čto ty govoriš, ale to, čto ty čuješ v srědině, v sobě. I važno jest, kaky jest tvoj cělj. Rymovanje dodavaje silu do magije. Vyše prosto jest čarovati s poezijeju na ustah. Ne zabudi togo, možno někogda tuto bude za tebe pomočno.