مشات السهرة رقص وضحك وتجمعات حتى لاخرها وبدا كل واحد طالع ومعاه اللي تونسو ..ناضت فطوم وشيماء بجوج شدو فيه وحدة من هنا وحدة من هنا ومصطفى كيشوف فيهم ..عيط لشيماء قاليها هوا بغاكم طلعو بجوج
قالت ليه اه سولو
قاليها صافي غير سيرو
طلعات تبعاتهم وفيدها كاسها دالمشروب غادية مع الدروج وكتشوف لتحت فالبنات كيتفركو
طلعو لواحد البيت دخلو معاه كان كبير وعندو فرشة وقالت ليه شيماء انادي عالشغالة تجيب لنا شيشة
قاليها بتعب بلاها خليها لبكرة
قالت ليه لالا خليها تجيبها انوريك واحد الستون غتحبو كثير
طلات من الباب قالت لخدامة طلع ليهم شيشة ورجعات لقاتو مقنت فطوم عاطيها هوا وياها للبوسان
خلاتو وخرجات مشات جابت واحد القرعة دالبيرا قدها قداش
وجات هي والشغالة دخلو حطو داكشي ومشات عند فطوم جراتها قالتها ليها معاك داكشي اللي قلتي لي
قالت ليها فطوم غي طريف ماجبتش بزاف
قالت ليها شيماء اريه
جبدات من صدرها واحد الطريق دلحشيش ومشات عرات على داك المعسل فتتات فيه طريفات دلحشيش وخوات الماء عمراتها بالبيرا حتى لفم وضارت عندو قالت ليه اجي جرب هاد الشيشة انما ايه ..مزة
عضات فطوم شنايفها مشات وقفات حداها قالت ليها اوييلي بغا تسيفطيه بزاف عليه
قالت ليها شيماء وشنو بغيتي يسيفطنا حنا !! خليه ينعس والى فيك اختي ما يهز منك ليه
قالت ليها فطوم لا اختي مافياش شيماء. وصافي خلي يطيح ينعس
جلسو حداه كيشروب ويعطيوم وهوا كيجر ويعاود حتى تقلبو عينيه طاح نيشان على ضهرو وحل فمو
ناضت فطوم قالت ليها اوييلي المسخوطة قتلتيه
خرجات شيماء عينيها ناضت طلات عليه كتسنط على قلبو حتى هزها بواحد الشخرة وناضت قالت ليها الله ..تهنييينا
جروه لبلاصتو عراوه وشافو فيه بقرف وغطاوه وناضو جلسو فالبالكو كيتجمعو حتى بدا النهار يطلع عاد دخلو لداخل
مشات شيماء حداه نعسات وفطوم بقات كدور وحلات واحد المجر لقات فيه الفلوس وبدات تهز وتخشي فصدرها
طلات عليها شيماء قالت ليها شنو كديري
قالت ليها غير شوية اصاحبتي مالكي
جرات شيماء المجر وشافت فيه لقاتو ناعس وهزات علاش قدات حتى هي ومشاو نعسو حتى صبح الحال وسمعو الدقان فالباب
ناضو فتحو الباب لقاو الخدامة كتجمع البنات وخرجو كيجمعو شعرهم هبطو عند البنات لتحت لقاو مصطفى واقف وقفة مستقيمة وطويل فيدو جوايات فالابيض كيهضر معاهم وكل وحدة كيعيطيها جوا
قالت ليه وحدة واش انرجعو لمارتينيز
قاليها شكوم جابكم
قالت ليه الشلحة
قاليها هاهي جايا تردكم
قالت ليه فطوم حنا غنبقاو ياك
قاليها نتوما رسميات
عطاهم الجوايات ورجعو لبيتهم كيحسبو الدولار فوق الناموسية
فطوم : الله كملت فلوس الطموبيل ..غنخرج نيشان نشريها
شيماء: غير سيمانة هنا منخرجش العام كامل
فطوم : اصلا حنا جالسين هنا حتى يمشي سهرنا ولا مسهرناش ثلتالاف ديالنا ديال النهار طالعة
شيماء:اكراميات شحال عطاوهم؟
فطوم:الدوبل تمنالاف درهم. كي ديما .. وباس. وباس تيليبل راكي عارفة ..
شيماء:موحال غدا يطلعنا معاه عاوتاني والى طلعنا ضاروري اي تكينا
فطوم :مانبانوش ليه اصلا فين غيلقانا فداك الزحام غير الى سول علينا مصطفى
شيماء:باقي عندك شي طريف؟
فطوم:باااقي عندي موجود جابو ليا واحد الدري من كتامة
شيماء:وا ديري بحسابو غدا الى طلعنا نعسوه
فطوم:مايبغيش ينعس الى شافنا غندوخوه فالسهرة نطلعوه دايخ اما الى طلع ساحي والاه لا خضع ليك ..
شيماء مهم ختى ليل ونشوفو
نعسو ونفس الريتم تعاود ونفس السهرة وبنات جداد وروتين كيتعاود..كما خططو نفدو وجا قاصدهم نيشان مرة اخرى وشدوه شبعوه وسط السهرة وطلعوه برموه كيف بغاو وصبحو نازلين وبقاو على داك الريتم ليلة يتخباو عليه بين البنات ويطلع وخدة اخرى وليلة يبانو ليه ويشدوه يقلبوه ويطلعوه حتى سالات السيمانة فالنوامة وخرجو منها فالباص مع البنات من بعد ما رجعو ليهم اغراضهم وهواتفهم .
شداتو شيماء وهي جالسة حدا فطوم قالت ليها طفاا..ماعرفت شنو دارت يسرى..اما واحد البكوص يالاه تعرفت عليه قالي عيطي ليا نتي مشيت لا انا لا العيوط لا لالعيوط لا لغيوان عنداك غير يقلب عليا سيفتو
حاولات تشعلو مابغاش يشعل وخلاتو حتى وصلات لمارتينيز لقاتها خاوية غير شي بنات قلال اللي كيجمعو حوايجهم يمشيو
دخلات حطاتو يتشارجا وحطات الباليزة حداها كتسنا محجوب يجي عندها وفطوم كتسنى الشلحة تجي عندها
قالت ليهم الخدامة مشاو يوصلو البنات ويرجعو وجلسو كيتناقشو قبل مايتفرقو
شيماء: معامن جالسة دابا؟
فطوم مع البنات اصلا طلعو ليا فراسي اختي السكنة مع ل*ف*ح*ب*ات خايبة ونتي
شيماء:انا مع يسرى يالاه كرينا واحد الدار مفرشة وغالية مالقيناش الكرا
فطوم: يالاه نرهنو انا وياك ..صدري يسرى ونسكنو غير بجوج ونرهنو احسن. بشي طناش ولا غير تسعود دار زوينة ونساو للكرا
شيماء: مانقدرش نصدر يسرى اصاحبتي كتبقا فيا وعندها بنت كتقرا ومها مريضة
فطوم:انا مكنرتاحش ليها اختي والله ..مهم الى بغيتي نرهنو قوليها ليا
شيماء: انا مكرهتش بغيت العوين ولاكن يسرى لاسقاني وهازة عليا شحال من حاجة
فطوم: ايوا صافي نقسمو الرهين بثلاتة
شيماء: ماعندهاش اصاحبتي باش ترهن واش انا كنقول ليك مها مريضة راه عايشة غير بالدوا وبنتها صغيرة كتقرا ..حتى ريزوها خوا مابقاوش كيعيطو ليها ..وجبتها معايا لهنا وماطلعاتش فالعزلة راكي شفتي ماشفناهاش فالنوامة ..ونتي بعدا تبغي تسكني فسلا جديدة
فطوم:انا ماعندي مشكل نسكن تا فالمريخ اصلا غنبدل ديك الخرشاشة اللي عندي على قبلها جمعت الفلوس هاد الصيف ..طلقت فيها يدي مزيان دابا غنبيعها ..مهم انا باغا الرهن شوفي شي دار تما زوينة نرهنوها والفراش نشريوه بشوية بشوية ..انا عندي بيت النعاس ديالي صغير مع البنات وعندي تلفازتي وشحال من حاجة غنجيبها معايا والشي لاخر نتعاونو فيه
شيماء:صافي واخا انمشي نشوف الرهين احسن كاع من لكرا وغالي
وصل المحجوب هوا الاول وقالت ليها
احسن اللي وصل هوا الاول مابغيتش كاع نتلاقا مع الشلحة..كنشوفها كنبغي نموت
سلمات عليها ومشات ودعاتها ركبات مع محجوب وهوا فرحان قاليها
كي دازت السيمانة احبي
شيماء: بحال ديما
محجوب:وراه الشهر جاي جاي ولدو عنداك تمشي تسافري
شيماء: جايا القرايا امحجوب على الله يجي قبل منضرب داك الشهر الاول فالقرايا وندخلو فالمعقول
محجوب: عطيهم شهادة طبية وهني راسك ابيبي
شيماء:الى ظطريت غادي نديرها .. مهم شحال جات فالباي ديال السيمانة
قاليها واحسبيها عندك ربعة طلعات تسعالاف درهم للوحدة واكراميات ثلاتة تمنالاف درهم درهم للوحدة عندك تما ستة دالميلون اكراميات اري جوج ورقات فالوحدة. ميات دولار ميات دولار والطلعات ثلاتة دالورقات ..المجموع مليون ومية وستين
جبداتها حسابتها فالسما قبل مايقول ليها شحال وعطاتو الطريفة المعتادة كما معروفة واكد ليها باش ماتنساش موعد الشهر الجاس وبقا كيحاول معاها تخرج اكراميات من غير النوامة وخلاتو فالشك وطلعات بحالها للدار عيات مادق حتى شبعات والشاروت عطاتو ليسرى ..بقات جالسة مرهونة كتسنى حتى تمات جايا بواحد العباية جارة صندالة
طيني ورور طيني احشي لك ماعندي هي لاااهي هي يالاااه هي لااااهي وان تو تري فور وباد ولاد ولااا د..فين دوزتي السيمانة ايسرى غير فالدار
طللت عليها يسرى من لكوزينة وهي كتقلي لحوت قالت ليها خرجت واحد جوج خرجات طريفة ورجعت ..مالقيت ماندير عاودت تخميلة للدار
دورات شيماء الماكينة اللي حطات فيها حوايجها وقالت ليها قلبي على شي دار للرهن ايسرى
قالت ليها يسرى علاش بغيتي ترهني؟
شيماء:الرهن احسن اختي جايا الشتا الخدمة كتقلال..غنرهن انا وفاطمة الزهراء
يسرى: شكون فاطمة الزهرا؟
شيماء:فطوم الكزاوية
حركات يسرى راسها قالت ليها وبشحال بغيتو ترهنو
شيماء: ماعرفتش مهم قد ما طلع الرهن كيقل الكرا ..تقدري ترهني معانا؟
يسرى:ومنين اختي واش انا كنشكي عليك بالعكر كتقولي شخبار الدراري.
شيماء:وصافي غنرهن غير انا وياها
تبسمات يسرى قالت ليها غتجري عليا
هزات شيماء حجبها وهي كتستف حوايجها قالت ليها من نيتك!! نتي عارفاني نديرها ؟ واباز
بدات يسرى كضحك ومشات عنقاتها قالت ليها نتي راه ختي ماشي صاحبتي..ولاكن عنداك تقلبك فطوم عليا
شيماء: انا مكيقلبني حد..غتبدا لقرايا ماتبقاوش كاع تشوفو وجهي
شافت تيليفون شعل راسو من بعد ما شد فيه شارج شوية ومشات كتجري وقلبها كيجري كتر منها طاحت على تيليفون والمساجات والبواط فوكال كينزلو بحال الشتاء..شدات حنكها كتولول وتشوف فيه وتردد
ويلي ويلي ويلي شحال من ابيل!!! ويييلي ويلي ..مكاينش النهار اللي معيطش فيه ..حيد عليا نتا وجه الويل شغندير بيك
حيدات مسج ديال واحد وتاصلات بيازيد من التعيطية اللولة جاوبها وباين من صوتو ماعاجبوش الحال ورد بشوية قاليها وي؟
عضات صبعها قالت ليه يازيد صافا
قاليها صافا اختي ميغسي
قالت ليه سمح ليا راه تيليفوني كان خاسر والنوامر كاملين مشاو لي
قاليها بيرودة دابا صاوبتيه؟
قالت ليه اه داكشي علاش عيطت ليك
قاليها ايوا مزيان بصحة
بقات ساكتة كتسناه يقول شي حاجة وصدمها قاليها يالاه بسلامة بون جوغني
قطع عليها خلاها بلاكة مصدومة ..رجع وجهها اصفر وعينيها دخلو وكتافها طاحو وناضت شادة تيليفون فيدها تكات على واحد الحيط حتى غرغرو عينيها ..دازت حداها يسرى كتحط العشا قالت ليها مالكي علاش كتبكي
تنخصصات وقالت ليها والو اصلا مكاين والو ..انا ماعرفتش مالي غير هاكاك حسيت بالبكية
يسرى: ااه حقا فكرتيني..عرفتي شكون جا عندك
خرجات شيماء عينيها قالت ليها شكون؟!!
يسرى:جا عندك يازيد ..
طاح النص من شيماء قالت ليها جا عندي حتى لهنا!! شنو قلتي ليه
يسرى: جا اختي واحد العشية حتى دق فالباب ..قالي كلمي ليا شيماء مالقيت منقول ليه ..قلت ليه مسافرة ..صافي هادشي اللي قلت ليه
بقات شيماء غير كتشوف فيها قالت ليها وعلاش ماقلتيهاش ليا؟
يسرى: وعاد كي دخلتي مع الباب هانا قلتها ليك
عضات شيما على شنايفها وجلسات شدات راسها قالت ليها. انا قلت ليه كان خاسر ليا تيليفون
يسرى: وصافي قولي ليه كنت مسافرة وخسر ليا
شدات راسها وبقات ساكتة حتى الشهية تسدات ليها وجلسات كتشوف فتيليفون ويدها على خدها ..كانت باغا تعيط ليه وترددات شحال من مرة لاكن ماعرفات اشنو تقوليه وكل مرة كتخيلو قطع عليها عاوتاني كتراجع باش ماتحطش فموقف هي ماباغاهاش
حطات تيليفون وناضت تشغل راسها بشي حاجة ولقات عندها الروينة خصها تجمعها ومشات كتنتسا جبدات الماريو كامل طواتو وبقات كدور من قنت لقنت حتى سالات وشدات كارو شعلاتو كتكيف وطلع وتهبط فتيليفون ..صونا ليها حمزة فتحات ليه الخط قاليها نخرجو نسهرو لاكن رفضات واخا عيا يحاول معاها وقطعات معاه طاحت نعسات شبعات نعاس بعدا مافاقت حتى لجوج ديال لغد ليه ..عيطات لواحد كان قرا معاها يعطيها التفاصيل باش تعرف شنو تشري شنو ماتشريش وخصصات داك النهار لاغراض الجامعة والحوايج اللي تلبس .
عيطات لفطوم تونسها لقاتها واجدة وتلاقاتها فالرباط ركبات معاه فبيكانطو ديالها ومشاو لاكدال كيدورو من محل لمحل لقات الصولد مشتت وشافت في فطوم قالت ليها فين تبان ليا بلاكة حمرة كنفرح.. ولاكن مزال ماجابوش حوايج جداد ديال البرد هاد الكوليكسيون قديمة اصاحبتي
فطوم: شوفي هادوك واعرين ..غير 99dh والله لاقتيه فالبرد بداك الثمن
مشات شيماء كتقلب فدوك القبيات لقصار خدات منهم ثلاتة وفطوم جوج ودازو جيهة الصيكان كيقلبو قالت ليها بغيت صاك يهز ليها لكتوبا والدفاتر يكون كبير
حيدات ليها فطوم دوك الصيكان قالت ليها مالنا اختي على سبع مية درهم بايعين ليا. زارا ..نديك عند واحد كيبيع الصيكان فمدينة دوزيام كاليطي فلامارك ماتعرفيش كاع واش اوريجينال ولالا ..عندو صيكان ارميس واعرين
شيماء: الصراحة بااغا شي صاك من ارميس
فطوم:انا عندي واحد اوريجينال بثلاتة دالمليون خديتو من دبي كان خداه ليا واحد
شيماء: حتى أنا عندي واحد جاني كادو ديال ديور ..صراحة عندي الاوريجينال جاوني كادو ..عندي ساعة د بولكاري اوريجينال.وشي تواشا اخرين
خرجو من تما كيتجمعو مشاو كملو الشوبينغ الخاص بالدراسة خداو عرام دالحوايج لقاوهم صولد ومشاو جلسو كيتغداو.. جا واحد عند شيماء باينة عليه ولد اكدال سبق ليها الفرونسي وحتى هي ماعطلاتوش ردات عليه بيها ومابغاتش تقلب للعربية وجلسات عليه هاك بالاك فاللخر صدراتو مشا بحالو وشافت في فطوم قالت ليها باز ..عجبتيني بغيت نتصاحب معاك!! تا تعجبني انا بعدا ..نتصاحبو باش ي**ح*و*ي فابور اللي ماعندو فلوس يقول ليك نتصاحبو
فطوم :الخروج والمصاحبة مكتيلاقوش..يا اما الخروج يا اما المصاحبة اما بجوج عمرهم يتلاقاو.. تنهدات شيماء قالت ليها انا اختي يالاه نويت نبدا وتصفعت ..
فطوم كتبغي شي واحد
شيماء: ماشي حب ولاكن اعجاب..يعني عندي رغبة فيه مابغيتش نخسرو ..تعشيت معاه مرة وحدة صافي قلب وجهه عليا دغيا ..والمشكلة هاد القلبة اللي دار ليا ومعاودش عيط غتقتلني..غير مكمداها وعاد مازدت بغيتو
فطوم :نتي من النوع اللي كيحب بالتهديد..كن كان تابعك بحال الحمار كن جرتلتيه
شيماء: ااه ياختي ماعرفتش علاش انا هاكا ..تزعطت فيه دابا واكثر فاش قلب عليا.. والمشكلة انا عزيز عليا كري والله منعيط ليه ..مالقا شكون تعيط ليه اخا نكون كناكل عليه التقاشر
ضحكات فطوم قالت ليها واعيطي شرحي ليه
شيماء: والله منعيط !! هييييه!!! قطع عليا بحال هاكاك ونعيط ليه ..والله مايحلم بيها ..نعيط ليه ليارح نيت اللي ضارت بيا الدنيا اما دابا واعية براسي..
فطوم : خلي مو هاكاك كيعجبوني هاد الفعايل ديال النفخة ..
شيماء: اما انا ..هاي هاااي مكتر منك نحك ليه زنافرو مع الارض والله منعيط ليه ولا نتبعو واخا يكون شكون ما بغا يكون ..قطع ليا عند بلو صافي طبيب ولد البورجوا وتيتيز غادي نعيط كنرغب ونزاوك فيه حيت كاين غير هوا زعما ..نزيد نحلها ليه والله لا حليتها ليه تما بقا
فطوم : ناري عادي تصرعيييه.. عندااك تعيطي ليه
هزات شيماء حاجبها قالت ليها والله لا عيطت معامن هوا نتشوا بكرامتي ومانتشواش بلا كرامة ايه
دورات راسها وغطوم كضحك قالت ليها ااصلا الى عيطتي ليه وبقيتي ديريليه فالخاطر غيجر بيك الحبل وتبقاو هاكا ديما غضبان ونتي تحزري ..اصلا ماتبقايش معمرة ليه العين ..شحال نتخاطرو حتى مزال يعيط ليك
حركات شيماء راسها قالت ليها والله لا عيط
فطوم.والله تايعيط..مالكي مريضة قاطع عليك تيليفون ومايعيطش..كيتسناك تعيطي ليه وتعطيه مبررات..ولاكن نتي غتصرعيها كاااع كاع كاع الى قلبتي عليه وخليتيه مايشفع ليه زينو لا الطب ديالو لا تا لعبة..ناااااري شحال كنموت على هاد البلانات وكنموووووت عليهم هههه
أنت تقرأ
شرف للبيع
Teen Fictionسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
