ခပ်မြင့်မြင့်နှာတံထက်တွင် နေကာမျက်မှန်တစ်လက်ကိုအကျအနတင်ထားပြီး မိကျောင်းသားရေအိတ်တစ်လုံးကိုလွယ်၍ လောလောပြာပြာရောက်လာသည့်သူမှာ လျန်ရွှမ်း။ ကားလမ်းပိတ်ခြင်းကြောင့်နောက်ကျရသည့်အကြောင်းကို ပြောပြရန်ပါးစပ်ပြင်လိုက်သည့်အခိုက်အတန့်၌ပင် ဟူချန်ရှီး၏မျက်နှာကို လှမ်းမြင်လိုက်သဖြင့် ပြောစရာစကားလုံးတို့ဟာ လည်ချောင်းဝ၌တစ်ဆို့သွားသည့်အလား တစ်ခွန်းမျှပြောမထွက်တော့ချေ။
အဘယ်ကြောင့်ဆိုသော် ခန္ဓာကိုယ်ပိန်ကျသွားသည့်လူမှာ တစ်ဖက်သား စိတ်ထဲနေ၍မကောင်းအောင်ထိ ပိန်လွန်းနေခြင်းကြောင့်။
ဟူချန်ရှီးသည်လည်း လျန်ရွှမ်း၏အမူအရာကိုအကဲခတ်မိလိုက်သဖြင့် မတ်တပ်ထရပ်ကာ လက်နှစ်ဖက်ကိုစွင့်ကားပေးရင်း ပြုံးပြလိုက်သည်။
"အရမ်းခံစားသွားရသလိုကြီး လုပ်မနေစမ်းနဲ့...နင်နဲ့မတူတော့ဘဲနေလိမ့်မယ် ရွှမ်းရွှမ်း"
ဝါကျတစ်ကြောင်းဖြင့် ကို့ရို့ကားယားနိုင်လှသည့်လေထုအခြေအနေကို ဖျက်ပယ်ပစ်သည့်အခါတွင်တော့ စိတ်မကောင်းချင့်ချင့်ဖြစ်နေသည့် လျန်ရွှမ်း၏အမူအရာတို့ပျောက်ကွယ်သွားခဲ့ကာ မိဖုရားခေါင်ကြီးသဖွယ်ဦးမော့ပြီး ဟူချန်ရှီးအား လှမ်းဖက်၍ စတင်အပြစ်တင်လာတော့၏။
"နင့်ကိုယ်နင် ဘယ်လိုတွေဖြစ်နေလဲဆိုတာ ပြန်ကြည့်စမ်းပါဦး..ခေါင်းအစခြေအဆုံး လက်သည်းတွေကိုပါအချိန်တိုင်းအရောင်တင်နေတဲ့ အကြီးဆုံးသခင်မလေး ရှီးရှီးမှ ဟုတ်သေးရဲ့လား"
ဟူချန်ရှီးက တဟီးဟီးရယ်ပြရင်း
"အမြဲတမ်း အပြင်မှာပြေးလွှားနေရတာမလို့ ဒီလိုဝတ်စားတာက ပိုပြီးသက်တောင့်သက်သာဖြစ်တာကြောင့်ပါ..ပြီးတော့ ကျင့်သားလည်းရနေပြီ"
ထမင်းစားပွဲဝိုင်းတွင် အားလုံး၏စကားလမ်းကြောင်းတို့မှာ ယနေ့၏အဓိကဇာတ်လိုက်ဖြစ်သည့် ဟူချန်ရှီးထံသို့သာ ဦးတည်လျက်ရှိသည်။ ဟူချန်ရှီးကိုယ်တိုင်သည်လည်း နိုင်ငံတကာသားရိုင်းတိရိစ္တာန်ကယ်ဆယ်ရေးအဖွဲ့အစည်း၌ အလုပ်လုပ်ခဲ့သည့်နှစ်များဆီမှအတွေ့အကြုံများအား အားတက်သရောဖောက်သည်ချနေသည်ပင်။
YOU ARE READING
ဖွင့်ဟဝန်ခံခြင်း
Romance--ကောင်းကင်ပြင်ကြီး ခြားနားထားမှန်း သိနေတာတောင် ချစ်ခြင်းမေတ္တာတွေကို နေ့တိုင်း စာအိတ်လေးထဲ ထည့်ထားတုန်းပါပဲ--
