" اسفه ع التأخير لكن تعرفون عاد كان عيد ومقدرت اكتب التكمله "
صحى اهل البيت وكان صباحهم غير بدون اصوات اهل الديره
ريما : اهخخ تعبانهه ابي اكمل نوم ياخي وش ذا
رهام : اقول قومي
ريما : ليش يمه
رهام : ولا اقول خلاص انتي ارتاحي كيف بطنك الحين ؟
ريما : الحمدالله خف شوي
رهام : زين
طلعت امها من الغرفه وسكرت الباب فزت ريما بسرعه وهي تشوف كم الساعه وانصدمت من كميه الرسايل من الهنوف ونجود
دخلت تشوف رسايل الهنوف الي كان محتواها كله عباره عن ( كيف وصلتو؟ طمنيني ؟ وصلتوووو؟؟ ردييي يبنت ليكون صار لك شيي )
ردت ريما على رسايل الهنوف وهي تطمنها انهم وصلو وطلعت رسايل نجود نفس الشي وردت بعد
قعدت ريما نص ساعه لحد ماتقوم من سريرها وهي تتقلب يمين ويسار وبعدها بدون سابق انذار تذكرت لحظاتها مع عزام وتذكرت يوم اعترف لها وشغلت اغاني رومانسيه وقعدت ترقص وهي مبتسمه
دق عبد الرحمن باب غرفتها يوم سمع صوت الاغاني وفتحت ريما الباب وهي مبتسمه وتناظره : وش تبي
تكتف عبد الرحمن واتكأ بجسمه على الباب وقال : وش المناسبه السعيده ؟
ريما : مافهمت
عبد الرحمن بضحكه : ليش الاغاني والرقص وابتسامتك شاقه وجهك كل ذا عشان رجعتي غرفتك ولا وش
ريما : اي اتوقع عشان كذا
ركز عبد الرحمن بالاغنيه الي شاف ان كلماتها رومانسيه وقال : مالقيتي غير ذي الاغاني
ريما : احب ذا النوع من الاغاني وربي يرقص
هز عبد الرحمن كتفه وهو يدخل غرفتها ويرقص معها
استانست ريما وقعدو يرقصون هي وياه ويضحكون ويصورون وكل شي
خالد : يااااولد وش ذا الازعاجج قصرو الصوتت لا اجي امحطكم بالعقال
ريما : معليشش يبه
خالد : قصري الصوت لا اجلدك
ريما : ابشرر
قصرت ريما الصوت وهي منخرشه وطلع عبد الرحمن وهو يضحك : يا انه خرشنا صدق
ضحكت ريما وسكرت باب غرفتها وقعدت تسولف مع نجد ف الجوال
اما فارس طلع يقابل اخوياه
رعد : والله يولد طول ذاك الاسبوع ومازن يسألنا اذا بنفزع او لا
فارس : لاحول
تيّم : اي وقسم انا قلت له اني بروح ديرتنا ولا تزعجني لاني بنشغل وتركني لكن رعد اهله هنا ف مازن كان دايم يشوفه
نايف : يلا وش خطتك يافارس
فارس : اسمعوني زين اول شي بنسوي اننا ساحبين عليه ولما بيروح عشان يواجه حازم وشلته احنا بنكون وراه واول ماينضرب نتدخل
رعد وهو يصفق : والله انها فكره حلوه يعيال
تيّم : اي والله
نايف : خلاص تم بنشوف متى بيروح وبنسويها
جا مازن لما شافهم قاعدين مع بعض
مازن : السلام عليكم
العيال : وعليكم السلام
مازن : الا يعيال ترا موعد الضرابه بكره
فارس : طيب ؟
مازن : لا بس اخبركم
رعد بضحكه : بالله وين ابي اجي واشوفك تنجلد
تيّم وهو يضرب كتف رعد ويقول : تخيلت حازم وهو يمسح فيه الارض
مازن : اوريكم كيف بمسح فيه الارض والمكان بيكون عند ذيك الحاره الي محد ساكن فيها
نايف : قصدك الي ورا حاره ناصر ولد صفنا ؟
مازن : اييي هي
فارس : وشوله يبي يوديك يضاربك هناك
مازن : عشان محد يشوف
رعد بلعانه : قصدك عشان محد يشوفك وانت تنجلد
مازن : شدخل
ضحكو العيال وقعدو يسولفون وقعد مازن معهم وهو خايف اذا صدق ماراح يفزعون له
بعد اذان المغرب راحو العيال للمسجد يصلون وبعد ما خلصو افترقو وكل واحد راح بيته
دخل فارس البيت وهو يسلم على اهله
ريما : وينك انت اليوم من الصبح ماشفتك
فارس : مع اخوياي
ريما : اها
عبد الرحمن : الا شفيه مازن؟
فارس : شفيه ؟
عبد الرحمن : مدري وانتو طالعين من المسجد كنت وراكم وشفته بعيد عنكم ويناظركم
ريما : متهاوشين معه ولا؟
فارس : لا مو بزران حنا عشان نتهاوش
عبد الرحمن : اجل وشفيه
فارس : مدري عنه
ريما : تراه خويك وش الي مدري عنه
فارس : خلاص مالكم دخل انقلعو
قام فارس وتركهم وهو يحاول يسكت ومايخبرهم عن شي لانه يعرف لو عبد الرحمن درا بيمنعه ومابيخليه يتضارب وبيقول عشان مصلحته وبيقعد ينصحه انه يبتعد عن المشاكل والضرابات الي مامنها فايده
قعد فارس ربع ساعه وراح يدق لغرفه ريما بعد ماشافها دخلت
فتحت ريما الباب وهي تقول لفارس : نعم ؟
فارس : ابي اكلمك ما ابي عبد الرحمن يسمع او اي احد
ريما : تفضل
دخلته ريما وسكرت الباب وقعدت على سريرها وهو قعد ف الكنب الي جنب سريرها
فارس : اسمعي اوخيتي
ريما : من اخويتي ذي واضح تبي تطلب شي يلا قول شعندك؟
فارس : اسمعي تذكرين سالفه حازم؟
ريما : ايوا
فارس : بكره موعد الضرابه
ريما : ما قال يوم الخميس ؟
فارس : اي بس واضح ان مازن استفزه او قال له شي عشان كذا خلا الضرابه بكره وواضح يبي يجلده جلد
ريما : يراسي تو الناس بكره اول دوام لك بعد الاجازه
وبتبداه بضرابه !!
فارس : لازم ترا تورطنا معه اكيد بنحل الموضوع بذي الضرابه
ريما : الاوادم يحلون المواضيع بكلام ونقاش وانتم بضرابه
فارس : قلتيها الاوادم لكن حازم واخوياه مايتفاهمون الا بالضرب وانا واخوياي بعد مانتفاهم الا بالضرب
ريما : ياليل طيب وليش جاي تخبرني الحين ؟
فارس : عشان امي وابوي وعبد الرحمن
ريما : مافهمت شدخلهم ؟
فارس : ياغيبه اقصد ما ابيهم يعرفون وانتي بتغطين علي
ريما : ماشاءالله!
فارس : وش لازم تغطين علي
ريما : كيف اغطي عليك يعني
فارس : مثلا تخليهم مايشوفوني بعد الضرابه لان اكيد برجع وانا فيني جروح وكدمات من الضرب الي بيصير اكيد مابرجع ووجهي وجسمي سليم دام بتضارب مع حازم !!
ريما : دامك تدري ان جروح وكدمات وش حادك تروح تضارب ؟؟
فارس : عشان الكرامه
ريما : اتوقع انك نسيت ان ماضيك الي كله ضرابات خلاك ف يوم تروح المستشفى وقعدت هناك ثلاث ايام ماسلم وجهك من الندوب الي للحين موجوده ولا سلمت عظامك الي تكسرت !!!
فارس : عادي ماضي وانتهى
ريما : وانت تبي تجدد ذا الماضي ؟؟
فارس : بسم الله علي لاتخافي مابيصير شي وانا اخوك
ريما : ياليل بقول لعبد الرحمن عشان يأدبك دام مو راضي تسمع مني
فارس : لاا تكفين لاتقوليله استري علي ذي المره بس
ريما : بشوف
فارس : بالله ريما انتي قد علمتي الهنوف عن ضراباتي ولا ؟
ريما : لا بس هي قد سألت عن الندبه الي تحت شفايفك والي فوق حواجبك بعد
فارس : وش قلتي
ريما : قلت بسبب ضرابه شوارع
فارس : وش ضرابه شوارع بعد انتي الثانيه
شهقت ريما وهي تتذكر الهنوف الي كانت داقه عليها وماقفلت الخط منها وواضح انها سمعت كل شي : على طاري الهنوف اتوقع انها سمعت الي قلته
فارس : تستهبلين كيف بتسمعنا وهي بالديره ؟
اشرت ريما على جوالها وناظر فارس على الي كانت بالخط واول ما قرا الاسم مسك الجوال وقال : هنوف ؟
الهنوف : فارس وش الي سمعته انا ؟
فارس : ولا شي كنت امزح
الهنوف : لاتكذب فارس يعني طلعت الندوب الي ف وجهك سببها الضرابات صدق !!!
فارس : عادي حتى عزام يوم كان بالثانوي يتضارب مافيها شي
الهنوف : لا بس ما كان يتضارب كثرك واضح انك تضارب كثير
فارس : لا يعيوني عادي مابيصير لي شي
الهنوف : وش الي مايصير فيك شي وريما قالت قبل شوي انك دخلت المستشفى بسبب وحده من الضرابات وتكسرت ضلوعك!!
فارس : خلاص ماضي وشفتيني مافيني الا العافيه
الهنوف بصراخ : بس انا اخاف عليك ياحيواننن
فارس : يلبيه الي تخاف عليي
الهنوف : فارس مو وقتك اتكلم صدق انا لاتتضارب !!
فارس : مايصير يقلبي والله الموعد بكره بيحسبوني رخمه اذا مارحت وبتنمسح كرامتي بالأرض والكل بيتكلم كيف اني خواف وانسحبت وماضاربت مثل الرجال
الهنوف : لاا مابتنمسح كرامتك
فارس : شوفي انا حاط مبدأ بحياتي والي هو ( ابتعد عن المشاكل لكن اياك ان تتراجع شبر ان بدأ القتال )
الهنوف : انقلع انت ومبدأك ماهميتني تبي تضارب روح وخلهم يجلدونك
جا فارس بيرد لكنها قفلت الخط بوجهه
ريما : تستاهل
فارس : حاولي تراضينها بعدين وقولي لها ان الموضوع عادي وانها ماتخاف علي
ريما : ابشر
طلع فارس من غرفتها وحاولت هي تدق على الهنوف الي ما ردت على اتصالها ابدا واغلقت جوالها
استسلمت ريما ونزلت تسوي العشاء مع امها
رهام : اخيرا جيتي تساعدين
ريما : يمه تراني تعبانه بس الحين خفيت وقلت اشوف اذا تبين مساعده
رهام : خلاص يحياتي تعالي قطعي الخضار اما عبد الرحمن قدامك قاعد يقطع البصل حاولي تخلصين بسرعه عشان نخليهم ف النار
ريما : دحوم كيف البصل معك؟
عبد الرحمن وهو يمسح دموعه بسبب البصل : لا زين زين بس عيوني تحرقني
ريما : يعيوني تعال انا بسويه بدالك وانت قطع الخضار انا متعوده
قام عبد الرحمن وخلاها تقطع البصل بداله وهو قطع الخضار
رهام : الا وين اخوكم الداشر ذا ؟
ريما : مدري قبل شوي طلع من غرفتي مدري وين راح
رهام : وش كان يبي
ريما : يبي يقول لي سالفه بيض كالعاده
رهام : اي والله
لف عبد الرحمن على ريما وهو حاس يا ان فارس فضفض لها عن شي او ان في مصيبه بيسويها ويبيها تغطي عليه
لاحظت ريما نظرته وتجاهلت الموضوع وكملت تقطيع واخذت صحن الخضار الي قطعه وحطته ف النار مع البصل
خلصت مساعده امها ورتبت الصحون على الطاوله وراحت تنادي ابوها
دخلت ريما المجلس وشافت ابوها قاعد منسدح يتابع تلفزيون وعهود بحضنه
ريما : بابا
خالد : عيون بابا
ريما : فديت عيونك تعال بنتعشى
خالد : الله الله شميت ريحه اكل لذيذه حسبتها من بيت الجيران طلعت من بيتنا
ريما : شدعوه يعني ماقد شميت ريحه اكل حلوه من بيتنا
خالد : لا لا امزح معك بس
ريما : اي زين يلا تعال ناكل
خالد : كل اخوانك موجودين ؟؟
ريما وهي تاخذ عهود وتقول : لا فارس مو بالبيت لكن دحوم بالمطبخ ساعدنا
خالد : وينه ذا الكلب طلع وماقال لي
ريما : مدري عنه انا بتصل عليه وبجيكم
راح خالد وعهود للمطبخ قاعدين ينتظرون ريما الي واقفه جنبهم وتتصل على فارس
رد فارس عليها بعد مادقت الف مره ولا رد عليها وقالت (الوو فارس)
فارس (وش )
ريما ( وينك؟)
فارس (مالك دخل )
ريما ( ابوي يسأل عنك تعال نتعشى )
فارس ( انا عند العيال )
اخذ خالد جوال ريما وقال لفارس ( والله اذا مارجعت البيت الحين وتعشيت معنا بتنجلد بالعقال فاهم؟)
فارس ( بس يبه ما ابي )
خالد ( ما اعيد كلامي )
وقفل الخط
ريما : اييي كفوو يبه الحين بيجي ركض
قعد الكل على سفره وبدو ياكلون الا ويدخل فارس عليهم ويتنفس بسرعه واضح انه فعلا جا ركض
خالد : اي ماتمشون الا بالعين الحمرا بعدين تعال وين كنت؟
فارس : مع اخوياي يبه
خالد : محد مخربك غير اخوياك
فارس : ليش يعني مخربيني
خالد : صاير تطلع اخر الليل وترجع الفجر وتفحط لاتحسب اني ما اعرف والجيران يشتكون منكم ومن ازعاجكم
قعد فارس يلعب بشعره وذي حركته اذا توتر او استحى والي صار له الحين انه توتر وخاف عن يوصل خبر الضرابه لأبوه لكنه سكت وما قال شي وبدا
ياكل
قعد يناظر ريما بين فتره وفتره وهي بعد يعطون بعض نظرات ويكملون اكل لكن عبد الرحمن مايفوته شي وانتبه لهم
عبد الرحمن : شعندك انتي وياه
ريما : ماعندنا شي
عبد الرحمن : طيب
قعدت عهود تسوي ازعاج بالسفره ومو راضيه تاكل شي
فارس : والله اذا ماسكتي بتنجلدين يلا كلي
عهود : ما ابي
قام فارس وهو ياخذها وخلاها تجلس بحضنه وقام يعطيها اكل وكلت بعد ماهمس ف اذنها انه بكره بيوديها البقاله والحديقه
رهام : وش قلت لها عشان تاكل ؟
فارس : اسرار بيني انا وياها صح عهود؟
عهود :ايوه
خلصو اكلهم وقام الكل يساعد ويرتب ويغسلون الصحون مع امهم
وبعدها قعدو ف الصاله يسولفون ويضحكون ويتابعون تلفزيون
بعدها بكم دقيقه قال خالد : الا بالله بكره دوام صح ؟
رهام : ايوا دوام
خالد : بتداومون انتم ؟
ريما : اي
عبد الرحمن : اكيد نداوم يبه
فارس : ايوا
خالد : اها اجل خلاص
فارس : وش خلاص
خالد : مالك دخل بس اسأل
فارس : طيب
خالد : قلت روحو نامو
عبد الرحمن وهو يناظر اخوانه ويقول : متى قال روحو نامو؟
ريما : يبه ماقلت لنا
خالد : تكذبيني يعني؟
ريما : لا لا يبه ما اكذبك بس انت سألتنا اذا بنداوم او لا ماقلت نامو
خالد : يحماره انا سألتكم بتداومون وقلتو ايوا وانتم عارفين الساعه متأخره الحين يعني لازم تفهمون اني اقصد روحو نامو !
عبد الرحمن : لا بالله
فارس : يبه ماله داعي الالغاز كان قلت
خالد : والله كل واحد اغبى من الثاني ماتفهمون
ريما : دامك عارف اننا اغبياء كان قلت
خالد : يعني الحين بتقعدون تناقشوني للصبح ؟؟
فز ابوهم وهو يمسك العقال عشان يخوفهم ويروحون وكلهم قامو يتراكضون ودخلو غرفهم ونامو من الخرشه
خالد : شفتي كيف خوافين
رهام : حرام عليك خرشتهم بس يستاهلون افضل ينامون من وقت عشان الصبح مايتعبون
خالد : ايوا
رهام : واحنا بعد يلا ننام
خالد : عهود تعالي يلا بنروح ننام
عهود : طيب
راحو غرفتهم ونامو هم بعد
_
الصبح
قامت رهام تجهز فطورهم وتصحيهم عشان المدرسه
قامو فارس وريما من وقت عشان يروحون المدرسه اما عبد الرحمن ينهض بعدهم بساعه عشان الجامعه
ف امه ماقومته
فارس : وربي تعبان ماودي اداوم
ريما : غصب تداوم يحبيبي عشان الكرامه
فارس : ايي صح نسيت تصدقين
رهام : اي كرامه وش السالفه
ريما بضحكه : لا ولا شي يمه
كل واحد اكل فطوره وطلعو
فارس وهو يمشي جنب ريما وسكر باب البيت وراه وطلعو للشارع : يا غبيه كنتي بتفضحيني
ريما : وش افضحك انت الثاني ذكرتك
فارس : اي بس امي كانت بتدري
ريما : لا معليك ماتدري
بعد ما مشو مسافه بسيطه جو شله فارس يسلمون عليه عشان يروحون معه المدرسه
ريما بتشميقه : جت شله النحس
رعد : وش قصدك انتي الثانيه
ريما : ولا شي كل تبن
تيّم : طالع لك لسان
ناظرته ريما من فوق لتحت وقالت : كل تبن انت بعد
نايف : بسم الله علينا مين مزعلك؟
ريما : لاتخلوني ادعي ان حازم يجلدكم واحد واحد
رعد : شكله فارس مايقدر يخبي شي عنك
فارس : يعيال والله ابيها تغطي علي يوم ارجع
نايف : لا معليك كلنا خبرنا خواتنا عشان يغطون علينا
ريما : قسم بالله انتم بدوننا ولا شي
تيّم بضحكه : اي والله الله يحفظكم يلا نوصلك مدرستك ولا تروحين لحالك ؟
ريما : وش الي تجون معي كأنكم بوديقارد بمشي لحالي
فارس : يلا انتبهي لنفسك
ريما : انا المفروض اقولك كذا انتبه لنفسك وانتو بعد موفاضين يجي واحد متكسر اجلدوه وصورولي
رعد : ازهليني بصور لك كل شي
ريما : كفوو
راحت ريما وتركتهم وهم يضحكون على حركاتها
وصلت المدرسه ولقت نجد وقامت تستقبلها وتحضنها وهي فرحانه
ريما : نجدددد اشتقتت لكك
نجد : يحياتي وربي اكثر
ريما : تعالي اقعدي عندي لك سوالفف
نجد : نص سوالفنا قلناها لبعض بالاتصال وش باقي بعد
ريما : سالفه صارت امس نسيت اخبرك
__
عند مدرسه العيال
وصلو الصف وهم يشوفون مازن قاعد لحاله
فارس : هلاا بمازنن شخبارك يخويي
مازن : ارحببب
رعد : شفيك قاعد لحالك
مازن : وصلت قبلكم وقلت انتظركم
تيّم : زين
ف الفسحه شافو حازم وهم يناظرهم بنظرات تحدي وبادلوه هم بنظرات معناها (بتنجلد بس اصبر )
قعد فارس يبتسم له بطريقه مستفزه لدرجه كان حازم بيقوم يصفقه لكن انقذهم جرس الحصه الخامسه وراح حازم هو وشلته صفهم بعد ما الاستاذ هاوشهم وناداهم عشان يدخلون وفارس واخوياه رجعو صفهم وهم يضحكون عليهم
_
ف الصرفه
رعد : يعيال الوقت المنتظر جاهزين ولا؟
نايف : صح اني دايخ من الحصص لكن يالله معليه بحاول اصحصح
فارس : يبوي قلنا لك نام كلنا نمنا عشان نقوم مركزين
نايف : نمت بس متقطع كل ثانيه انخرش من صوت الاستاذ ويدق الطاوله بقوه بعد
تيّم : والله ولا دريت عنه نومي ثقيل ماسمعت شي
فارس : اي والله
وقفو العيال ينتظرون متى حازم وشلته يروحون للموقع واول ماشافوهم تحركو مشو وراهم وتخبو ورا السيارات
رعد وهو مثبت الجوال بمكان مرتفع عشان يبين كل المضاربه : لازم اصور لريما انا وعدتها
فارس : شدعوه ترا بتخاف يوم بتشوف الضرب الي بيصير
رعد : لا لا وش تخاف اختك عن الف رجال ماشاءالله عليها تبي ضرابه تخوفها هي لو الود ودها كانت بتجي تضارب معنا
نايف : اي والله اتفق معك بذي النقطه
فارس : خلاص اسكتو وخليكم من اختي جا مازن
ركزو العيال مع مازن وهو يدخل وماسك عصا ورافع ثوبه ومشمر اكتافه وداخل بكل ثقه ورافع راسه
نايف : والله انه رجال شوفو المشيه بس
رعد : حييي هالعينن يولد واضح يبي يجلدهم
دخل مازن وتقدم لحازم وهو يضربه واول ماضربه تجمعو عليه شله حازم وطيحوه بالارض وبدو يضربونه
اول ماشاف فارس واخوياه ذا المنظر صرخ فارس وهو يرفع ثوبه ويقول : مشينااا يعياللل
ركضو العيال وكل واحد رافع ثوبه ومشمر اكتافه ومتلثمين واللي ماخذ عصا واللي بيعتمد على يده ف الضرابه
فارس ورعد ونايف من النوع الي يعتمدون على يدهم بالضرابه اما تيّم يفضل بالعصا واحيانا بيده
دخل فارس ركض وهو يرفس حازم ويطيحه بالارض عشان يبعد عن مازن اول ماطاح حازم ناظر على فارس بعصبيه وهو يقول : مين الكلبب الي تجرأ يضربني
فارس بثقه : انا الي تجرأت اضربك يلا قوم يارخمه
حازم : انا الرخمه يحيوانننن اوريك الحين
قام حازم وهو معصبب ويدخل ضرب على فارس بوحشيه وفارس يرد بالمثل واقوى بعد
اما رعد دخل ضرب ف واحد من شله حازم
وتيّم ونايف نفس الشي قعدو يضربون اي حد قدامهم ناظرهم مازن بنظره انتصار لانه كان حاس انهم مابيسحبون عليه واستانس وقام يضارب معهم
طيح فارس حازم وهو يركب فوقه ويمسكه من ثوبه ويضربه بقوه ويقول :اجل مسوي ساطي ومحد قدك ياشيخ دز بس اوريك مين الساطي الحين
حازم : اوريك تحسب ساطي الحين
دفه حازم وهو يخنقه ف الارض ويكفخه
مسك حازم عصا كانت جنبه وجا بيضربها ف راس فارس الي كان طايح بالارض
الا ويركض رعد وهو يشوت حازم ويطيحه ف الارض وياخذ العصا منه ويدخل فيه ضرب
قام فارس يضارب اي حد يجي قدامه
طولت الضرابه لكنها توقفت اول ماجو شيبان وشافوهم وقعدو يصرخون :ياوللددد وقففف انت وياااه
ركض حازم وشلته عشان محد يشوف وجيههم
اما فارس قعد يرتب شماغه الي متلثم فيه وغطى وجهه وطلع هو واخوياه يركضون واخذ رعد جواله وراحو بعيد يتخبون
_
رهام : غريبه دايم فارس يجي معك لكنه تأخر
ريما : لا هو قال لي بيطلع يتغدا مع اخوياه
رهام :اها زين
راحت ريما لغرفتها وهي خايفه من مصير فارس هل بيطلع من الضرابه جالد او مجلود
_
نايف يفك الشماغ : وربي جلدناهم يعيال لو نشرنا المقطع بتروح هيبته
فارس وهو يمسح الدم الي فوجهه :اي والله
تيّم : يعيال بعد ذي المضاربه احس ودي ب كبسه
فارس :مشينا نتغدا
رعد : برسل لريما من بدايه الضرابه وانا ابي اعرف رده فعلها اصبرو
رسل رعد الفيديو لفارس عشان يرسله لريما
_
فتحت ريما الفيديو وهي كل ثانيه تشهق من المنظر وهي تشوف اخوها ينضرب وكيف انه كان بتجيه ضربه ف الراس وممكن تكون خطيره وتخليه يودع حياته لكنها فرحت يوم شافت رعد لما فزع لفارس وطيح حازم عنه وجلده سجلت ريما فويس وهي تقول :ياحيوان وربي دمعت حسبتك بتتأذى لكن الحمدالله رعد لاحظ وبعدين وش المضاربه الفله ذي وربي انكم جلدتوووه جلدد تستاهلون اسوي لكم حلى وقهوه صراحه وصح فارس لاتجي البيت الحين انا قلت لأمي انك بتتغدا مع اخوياك
_
فتح فارس فويسها عندهم
رعد :اي والله زين اني لاحظتك يخوي
فارس :اي وقسم ذيك اللحظه كنت بودع
نايف : تراني ماخذ هم الشيبان لا يعرفوننا ويعلمون اهلنا
فارس :تدري مافكرت فيها وربي ابوي متوعد فيني يقول انتم مخربيني وان مسوين ازعاج للجيران ويشتكون مننا !!
تيّم : يعيال احس راسي مصدع واسمع طنين قوي ف اذني
فارس :شفيك
تيّم :مدري يوجعني
تقدم رعد وهو يمسك راس تيّم وشهق
نايف :وششش
تيّم :شفيكك ليش تشهق وش فيه راسي
رعد :د..دمم
فز فارس ومسك راس تيّم وفعلا كان ينزف
فارس :مشيناا المستشفى يولدد
ركبو العيال سياره نايف وتحركو للمستشفى عشان راس تيّم
دخلو تيّم عند الدكتور وانتظروه وهم متوترين وخايفين لا يصير فيه شي لان ضربه الراس مو سهله
طلع الدكتور وفزو كلهم
فارس :طمنا يادكتور
الدكتور : الحمدالله انكم جبتوه من وقت
فارس : ليش وش فيه ؟؟
الدكتور : هدي يخوي مافيه شي الحمدالله لكن جاه نزيف ولو تأخرتو بيكون عنده نزيف حاد وممكن يأثر عليه هو حاليا فيه جرح ف راسه وسوينا له خياطه ووقفنا الدم
نايف : الحمدالله
رعد : الحمدالله ريحتنا يادكتور خفنا يكون شي خطير
الدكتور : هو كان بيصير خطير لو ماجبتوه
فارس : اها
الدكتور : كيف صار له الجرح هذا ف راسه ؟
سكتو العيال وهم عارفين ان مستحيل يقولون له بسبب ضرابه لانه ممكن يبلغ عليهم الشرطه ويتورطون
تدخل فارس ونطق : كنا نلعب كوره وطاح بقوه على الارض وبعد مده لاحظنا الدم ف راسه وركضنا به لهنا
الدكتور : الله يهديكم انتبهو لنفسكم
رعد : ان شاء الله
مازن : يقدر يطلع اليوم ؟
الدكتور : اي مافيه شي بس خلوه نص ساعه يرتاح بسبب الم الخياطه واثر البنج للحين فيه انتظرو وبعدها تقدرون تتطلعونه
فارس : طيب مشكور ماقصرت
الدكتور : ولو ذا واجبي
راح الدكتور ودخلو العيال على تيّم يتطمنون عليه
بعد فتره قدرو يطلعونه
رجعو العيال بعد ماتغدو واخذو تيّم لبيته وبعدها كل واحد راح بيته
_
دخل فارس البيت بشويش عشان محد يسمعه
ولا احد يشوفه وفعلا دخل غرفه ريما ركض
ريما : يمه خرشتني
فارس :محد شافني الحمدالله
ناظرت ريما لجروحه وقالت :انتظرني هنا لاتتحرك
راحت ورجعت وهي جايبه عده فيها ادوات طبيه
طلعت معقم جروح وملصقات
ريما : قرب راسك
فارس : ماله داعي الجروح معناتها انك رجال
ريما وهي تسحب راسه وتحطه ف فخذها وتنومه :اقول انطم ماله دخل خليني اعقم جروحك عشان امي وابوي ودحوم مايشوفونك
فارس :اييي صحح
حط فارس راسه ف فخذها وقعدت هي تعقم جروحه وهو يخبرها وش الي صار
ريما :ترا رعد مصور شفت كل شي
فارس :ادري بس ف الفيد تحسين غير ويوم الشخص الي كان موجود بالضرابه يخبرك غير
ريما :ايوا ايوا كمل
سولف معها ومسكت جوالها تتابع مسلسلها وهي تلعب بشعره وماحس فارس على نفسه الا وهو نايم
بعد فتره حست ريما رجولها وجعتها بسبب الشي الثقيل الي عليها وتذكرت فارس ولقته نايم ابتسمت وهي تصوره للهنوف
وبعدها ابعدت راسه عنها بشويش وغطته ببطانيه وقعدت بالكنب تراسل الهنوف
الهنوف :نايم ؟
ريما :ايوا جا يسولف لي عن الضرابه وانا اعقم جروحه وبعدها لعبت بشعره ونام
الهنوف :جروحه ؟
ريما :اي تجرح اصبري براويك الفيد انا قلت لخوي فارس يصور لي
رسلت ريما الفيد للهنوف الي ماقدرت تتحمل ولا كملت الفيد بعد ماشافت حازم وهو كان بيكسر راس فارس
الهنوف :مقدرر بيكسر راسه ما ابي اشوف
ريما :كملي وشوفي
اقنعتها ريما تشوف وشافت ان خوي فارس فزع له وماصار له شي وارتاحت
الهنوف :يمه الحمدالله خفتت
ريما :اي وربي حتى انا خفت
الهنوف :يوم بيقوم خليه يكلمني
ريما :ابشري الا بسألك
الهنوف :هلا
ريما :كيف حال عزام ؟
الهنوف :لاتخافي حبيبتس بخير بخير
ابتسمت ريما لكلمه حبيبك وقالت بخجل : الحمدالله جعله دوم
سولفو شوي وبعدها قفلو الاتصال ولفت ريما على فارس وقومته يروح لغرفته وطلع يكمل نومته بغرفته
_
ف الصباح
مر عليهم نفس الروتين وراحو مدرستهم ورجعو مر شهر كامل وما كان فيه فعاليات تستحق انها تنقال كانو يتمشون ويتسوقون وبس
_
يوم الاثنين
ف ذا اليوم ناداهم ابوهم يقعدون بالصاله عشان يخبرهم عن شي
خالد :كلكم موجودين
فارس :اي
ريما :وش تبي تقول يبه ؟
خالد :اسمعوني زين عزام ولد عمكم ياسر نقل يشتغل هنا
فارس : وناسسهه بيصير يطلع معي ومع اخوياي
خالد :لا لو شاف اخوياك بيوديكم كلكم المركز بسبب دشرتكم
عبد الرحمن :ليش نقل هنا اذكره عاجبه شغله ف المدينه الثانيه
خالد :مدري يوم سألته قال يبي يكون قريب مننا
ابتسمت ريما وهي حاسه انه يبي يكون قريب منها ويشوفها
ريما : طيب وين بينام ؟
خالد : بيجي بيتنا كم يوم لين مايلقى له شقه
فارس :ليش شقه بعد خله ينام عندنا
خالد : مدري هو قال بس ثلاث ايام بيقعد وبعدها بيروح لشقه عشان ياخذ راحته ويكون اقرب من المركز ف هو بكره بيوصل عندنا
فارس :متى بالظبط ؟
رهام : انتم بتكونون ف المدرسه لما بترجعون بتلقونه واصل
ريما : اها زين
رهام : وش الي زين
ريما بتوتر : انه بيوصل من وقت عشان يقدر يرتاح من الطريق
رهام : اي صادقه
مر اليوم وجا الليل وراحت ريما تنام وهي مستانسه انها بكره بتلاقي عزام ف بيتهم
_
الصباح راحت ريما لمدرستها وهي ماخذه شوي ميكب بشنطتها عشان قبل الصرفه تحطه وتقابل عزام وهي كاشخه وطالعه حلوه لان دايم ف الصرفه يكون وجهها تعبان وشاحب وبس تبي توصل عشان تنام
نجد : الله يعني بيكون ف بيتكمم
ريما :ايوااا متخيييلهه واضح انه نقل عشانيي
نجد : كيوووت
ريماا : تكفين مره كيوت صدقق
نجد : واضح اشتاق لك
ريما بخجل : يمكن
نجد : استحتت استحتت
الاستاذه : نجد وريما اخر انذار والله لو ماسكتو بنزلكم عند المديره
ريما ونجد قمطو العافيه وسكتو وانتبهو لحصصهم ومر اليوم طبيعي لكن قبل الحصه الاخيره بدت ريما تحط روج خفيف وترتب وجهها عشان مايكون شاحب وتعبان
نجد : مزززه بنتي مزه
ريما : فديتك
نجد : افداكِ
طلعت ريما من المدرسه وهي تمشي للبيت وشافت فارس واخوياه يتمشون ولقت تيّم ف راسه شاش للحين وراحت له
ريما : تيّم تعال تعال
تيّم : ياهلا بريما
ريما : اهلين
تيّم : وشو
ريما : وش فيه راسك ؟؟
رعد : انكسر راسه من الضرابه امس
نايف : وش الي انكسر لاتكبر المواضيع بس انفقش وانجرح وجاه نزيف وودينا المستشفى
ريما : كل ذا وتقول مكبر المواضيع ياربي بس
تيّم : تشوفين
ريما : طيب كيف راسك الحين خف مافيه نزيف مايوجعك ؟
تيّم : لا لا مايوجعني خف شوي بس احيان صداع واسمع طنين قوي ب اذني والدكتور قال لو تأخرنا ذاك اليوم كنت بودع وبتكون حالتي خطيره بسبب النزيف الحاد الداخلي الي بيجيني
ريما : يمه الحمدالله انكم رحتو بسرعه
فارس : اي قسم بالله
طلع عزام وهو يشوف فارس وعنده عيال وبنت تقدم لهم وسمع صوتها وهي تهاوشهم
ريما : تراكم كلاب وماتستحون والله لو خبرت دحوم بيجلدكم جلد كلكم ف المجلس بيسدحكم
رعد : هدي هدي وش الي تقولين لدحوم
نايف : اي لاتعلمينه
رعد : لا اهبدك
ريما : تعال اهبد
تقدم رعد وهو يمسكها من رقبتها بكتفه ويقول : اجل تعال ها
مد عزام يده وهو يبعد يد رعد عن ريما لف رعد بصدمه وقال : من انت؟؟؟
عزام : ابعد عنها ولا تلمسها
لفت ريما يوم سمعت صوته وقالت : عزاامم جيتت
فارس : ياهلاا
عزام : اهلين
نايف : من ذا
فارس : ولد عمي
تيّم : اها تشرفنا
سلمو العيال عليه وهو يناظرهم واحد واحد وسحب ريما وفارس ودخلهم داخل
فارس : شفيك
عزام : كيف راضي اخوياك يكلمون اختك ؟
فارس : تراها تربت معهم وانا بعد اكلم خواتهم عادي وامهاتنا وابائنا اصدقاء من يومهم بزران
عزام : حتى لو !!
فارس : مالك دخل اعتقد انها اختي ادخل بس
لف عزام يناظر ريما الي بادلته النظره وقالت : شفيك عزام وربي عادي مثل ما فارس يكلم خواتك وانت تكلمني عادي
عزام : بس ذول غريبين انا ولد عمك
ريما : ذول مثل اخواني عادي والله وكل واحد يعرف حدوده ما بنسوي شي ترا
عزام : طيب
دخل عزام قبلهم وقعد ف المجلس
وركضت ريما لغرفتها تبدل ملابس المدرسه وترتب نفسها ونزلت تحت تشوفه
دخلت المجلس وهي تقعد جنب ابوها وتناظر بعزام
خالد : البيت بيتك ياولدي وخذ راحتك
عزام : مشكور ياعم ماتقصر والله
خالد : كيف الشغل معك
عزام : ترقيت ياعم وصرت رقيب
خالد : ما شاءالله تستاهل مبروك
عزام : الله يبارك فيك
خالد : ريما روحي جيبي القهوه
ريما : شي قهوه ولا اسوي ؟
خالد : مدري
رهام : لا انا جهزت الفواكه وقلت اخاف اسوي القهوه وتبرد قومي سويها
ابتسم عزام لها وهي قايمه وبسرعه غير ملامح وجهه لما شاف ابوها يناظره
جابت ريما القهوه وقعدت تاكل معهم وجا فارس
خالد : الا يا عزام متى ناوي تتزوج ؟
انصدم عزام من سؤاله وناظر ريما وبعدها رجع يناظر خالد وقال : اذا ربي كتب بس للحين ماكونت نفسي عشان اتزوج
خالد : الله يرزقك بنت الحلال
رهام : اي بنات المدينه حلوات وانت تتمشى بتشوفهن واذا تبي بدور لك بعد
عزام بضحكه : لا ياخاله مشكوره لاتدورين لي توني صغير
رهام : شكلك تبي بنات الديره
فارس : اكيد وش يبي ببنات المدينه وبنات الديره حلوات
لف الكل على فارس وقال خالد : ايي وانا اقول ف الديره ماتجلس بالبيت اثاريك تدور بنات وتقعد تتغزل فيهن ؟؟؟
فارس : لا يبه اخسي ما اسوي كذا انا محترم
رهام : بعدين عزام وش الي بعدك صغير الحين عمرك ٢٤ خلاص كبرت
ريما بضيقه : خلاص يمه الولد قال مايبي يتزوج ليش تغصبينه لو بغا بيقول لأمه ليش انتي تدورين له بعد
ناظرها عزام وهو عارف انها غارت وقال : لا عادي امك مثل امي اذا لقت لي بنت الحلال راضي
ريما : قلنا لا ماتفهم انت
خالد : وانتي شعليك ؟
ريما : ولاشي
خالد بضحكه : اقول اذلفي روحي غرفتك قاعده ترادين ف مواضيع مالك دخل فيها
قامت ريما بزعل وسكرت الباب وراحت غرفتها وهي باقي شوي وتصيح من كلام اهلها وعزام
خالد : كنت امزح ماتوقعتها بتقوم تروح غرفتها صدق
رهام : الله يهديها مدري شفيها منفسه
عزام : عادي راجعه من المدرسه وتعبانه اكيد منفسه
فارس : اي والله
دخل عبد الرحمن وقعد معهم وهو دايخ ويقول : خلصت كل كلاساتي وبالكلاس الاخير حضرته نصه وشردت
رهام : ليش تشرد بعد
عبد الرحمن : تعبان يمه
خالد : اي تعبان تراك سهران انت وريما طول الليل تتابعون فلم وتشغلون اغاني ترقصون لاتحسبوني ماسمعت مو يعني رايح غرفتها يعني مابسمع صوت رجولك
عبد الرحمن : كيف سمعت يبه قلت لها تقصر الصوت
فارس : يحيوان انت وياها ليش ماناديتوني سهرانين بدوني اوريكم
عبد الرحمن : تراك نمت قبلنا يعني وش نسويلك ماقدرنا نقومك
فارس : لا مو عكيفك
عبد الرحمن : شوف كنت مار من غرفتها وشفتها مو نايمه دقيت الباب ودخلت وقالت لي تعال نتابع فلم بعدها قمنا نصور كم ترند وبس
فارس : هين بس الحين بمعط شوشتها ذي الخاينه
عزام : وشلون خاينه وهي مخبيه عليك وماقالت لعبد الرحمن مدري عن وش بس انها كانت تقول لخويك انها بتخبر عبد الرحمن وهو يقول لها لاتقولي
عبد الرحمن : فارس وش السالفه ؟
خالد : مخبيه عن وش ؟؟؟
فارس تورط وقال : شفيكم محسسيني شي مهم
خالد : وش السالفه طيب
فارس : لا ولا شي بس كنت ابي اطلع مع العيال نتغدا وقلت لها تغطي علي
عبد الرحمن فهم ان في موضوع اكبر من ذا لكنه سكت وقرر يكلم ريما بعدين
طلع عزام وركض فارس وراه وهو يدقه : يازفت ورطتني
عزام :وشو
فارس : ليش قلت كذا
عزام : ليه وش فيها
فارس : انت لو تعرف وش الي مخبيته ريما ومغطيه علي ماكنت بتقول كذا قدامهم
عزام : طيب قول لي ليش غطت عليك وليش اخوياك يقولون لها لاتخبر بعد
فارس : سر بيننا بس ما اوثق فيك
عزام : انقلع ياورع
راح خالد ورهام عشان يتسوقون اغراض البيت وبقو العيال بالبيت وراح عبد الرحمن لغرفه ريما
دخل الغرفه وسكر الباب وقال : اعترفي تراني اخوك مابسوي لك شي
توترت ريما وهي تحسبه يقصد الي بينها وبين عزام ونطقت : اقول وش
عبد الرحمن : عن فارس وش الي مخبينه عني ؟
ريما : ماخبينا شي
عبد الرحمن : يماما تقدرين تلعبين ع الكل الا انا قولي لي
ريما : مقدر هو قالي ما اخبرك
عبد الرحمن : هل ف يوم انا ضربتك واذيتك ؟
ريما : لا
عبد الرحمن : طيب ليش خايفه مني وماتبين تقولين
ريما : اخاف تعصب على فارس وتضربه
عبد الرحمن : يعيوني يماما والله ماراح اضربه انتي تعرفين مستحيل اضربه الا عشان مصلحته
ريما : طيب ذا الشي عشان مصلحته وبتضربه انا داريه
عبد الرحمن : اوعدك اني ما اضربه خلاص قولي لي
ريما بتردد : تورط خوي فارس مع واحد قوي ف المدرسه ومعروف حق مشاكل وتضاربو وانا غطيت عليه
سكت عبد الرحمن وبعدها قال : كنت حاس
تحمست ريما وقالت : اصبر بوريك الفيد حق الضرابه
عبد الرحمن : مصورييين الضرابهه ؟؟؟!!
ريما : اي قلت لرعد يصور لي
راوته ريما الفيد وحاول يمسك اعصابه وهو يشوف الضرب الهمجي الي كان ف الفيد
عبد الرحمن : ب ذا الضرب كان ممكن واحد فيهم يودع ترا !
ريما : طيب وش بتسوي ب فارس ؟
عبد الرحمن : لا بس بكلمه
ريما : لاتكلمه اسكت سوي انك قفطته بالغلط وشفت الفيد ف جوالي وكذا فهمت ؟؟
عبد الرحمن : ابشري يعيوني
حضنها عبد الرحمن وقال : تدرين اني احبك ودايم احمد ربي على وجودك بحياتي ؟
ريما وهي تبادله الحضن : يحبيبي انت
عبد الرحمن : اقولك من الحين لاتخبين شي عني وانتي داريه اني مو من النوع الي اضرب وعصبي وتذكري اني سندك ب ذي الحياه واخوك الكبير يعني اسرارك بحفظها ما راح اقعد انشرها بين الناس ولاتخبين شي عني انتي وفارس !
ريما : ابشر
_
طلعت ريما من غرفتها بعد ماطلع عبد الرحمن وراح للبقاله وهي تتمشى بالبيت
لمحها عزام وركض يسحبها عليه وهو يتلفت يمين يسار عشان محد يشوفهم
ريما :بسم الله خرشتني
عزام :وحشتيني
ريما : انقلع خلي امي تدور لك زوجه ولا شرايك انا ادور لك
عزام بلعانه : دوري لي يمكن ذوقتس احلا
ريما : عزامم كل تبن
عزام :غرتي ولا ؟
ريما : لا
عزام : واضح اجل ليش وجهتس احمر كنتس باكيه
ريما : ليش ابكي وع بس
شدها عزام وقال : يلبيه الغيوره والله ما بتزوج غيرتس اصبري بس ادخلي ثالث ثنوي وبخطبتس
نطقت ريما وهي تحاول تكتم فرحتها : صدق ؟
عزام : اي
ابتسمت ريما وقالت : وربي اني احبك ياشيخ
عزام : يا لبيييه احلا من يحبنيي
قرب عزام وضمها بقوه وبعدها تركها وهو يقول : معليش بس وحشتيني
ريما : ادري ادري
راح عزام ورجعت ريما غرفتها وهي مستانسه
يتبع ......
" حبايبي مدري اذا بينزل البارت الثاني اليوم لكن بكره مدرسه وبيكون عندنا اختبارات ف يمكن بتأخر بتنزيله لكن بحاول اخلصه اليوم لأني امس بالليل بديت اكتب نص البارت "😭🤍🤍