| سميتها روح |

بارت ٦

رجع الجوال ل روح :
لو صار معك اي شيي بس
اتصلي عليي زين !!
روح تضايقت وماهي راضيه :
ظافر انت وش تسوي انجنيت ؟!
ظافر :
انا مجنون من عرفتك
ظافر روح و ركب الشاحنه

روح جلست بمكانها وهي ماهي
فاهمه شيي ولا عارفه وش تسوي
حنين ركضت ووصلت ل روح طولت
صوتها :
وش هذا اللي شفت انا !!
روح ارتبكت من شافت حنين
ترددت :
انا !!
حنين :
ظافر هالمجنون وش قاعد يسوي
هو مرتبط !! لو تدري وهج بتموت
بارضها
روح تضايقت :
مالي ذنب شفتي هو شلون اسلوبه
معي
حنين :
المفروض توقفينه عند حده
روح :
والله ماقدرت حاصرني حتى اني
ضعفت قدامه
حنين :
يوه انتي طحتي بحبه بعد واضح هالشيي
روح بضيقه جلست وتتامل البحر :
مادري يا حنين انا من مات ابوي
ماني قادره القى روح انا ضيعت نفسي
بكثرت المشاكل والصدمات اللي صارت
معي
حنين جت ل روح :
بس حبكم مستحيل لو تدري امه
اقل شيي انها بتذبحك هي ماتطيق
حتى اسمك .

روح بضيقه :
وش اسوي !!
حنين جلست جنب روح
مسكت يدها :
انتي بمشاكل فوق راسك
ابتعدي عن ظافر ابتعدي
حبه محرم فيه بنات كثير
زيك انعجبوا فيه وبشخصيته
بس مافكروا ابد يحبونه ويغامرون
بهالمغامره الخطره جدًا لانه ملك
وهج وهج قلبها مريض وماينعش
هالقلب غير الحب حبها لظافر
عشان كذا فكري شوي وسترجعي
عقلك الضايع لا تحبينه اهربي تكفين .
روح مسكت يد حنين وببكيه :
بس هو يلحقني وش اسوي
حنين :
تجاهليه تجاهليه لين يذوب
هالشيي اللي بقلبه تجاهك
روح سكتت وكتمت حب ظافر
والضيقه بصدرها .

في احدى مقاهي الشاهي :
ابو فلاح جالس مع مجموعة
من الرجال بكبره يتقهون
ابو فلاح يفضف لهم عن
قصة مع هلال ودينه
و انه يبي يتزوج بنته بس هالبنت
عنيده و راسها يابس .
ضحك واحد بسخريه :
لو انا بمكانك كان مسكتها من يدها
وشعرها و ركبتها معي بالغصب وتزوجتها
ابو فلاح يفكر :
بس هي عنيده ما اتصور وش كثر عنادها
اعند من الصخر
الرجل الثاني :
لانها مدلله عند ابوها بس الرجل
غير بيكسر غرورها وعنادها
ابو فلاح :
معكم حق مالي الا اخذها
بالقوه و اتزوجها قبل ما يجي
خالها من الدوام وقتها ماقدر
اخذها لانه بيوقف بوجهي زي
ابوها هلال .
الرجل الأول :
وش تحرا تحر يوم يجي خالها !!
هنا صاروا يضحكون على ابو فلاح
ويشربون الشاهي
ابو فلاح صار بقلبه الإصرار
انه يشد روح من يدها وشعرها
وياخذها بالغصب ولا هذولي جالسين
يتقهون على سخريتهم به لانه ما قدر
على بنت صغيره.

روح جلست فوق سريرها
ومسكت ثوب وقامت تخيط به
تحاول تطلع الطاقة السلبيه اللي
هي بها
الا رن جوالها وعلى الشاشة رسالة :
ياروحي انتي شلون امورك وينك
الحين ؟
روح صار قلبها يدق بسرعه
من شافت الرساله اللي جايه
من ظافر .
روح بضيقه :
ودي اتواصل معك بس فيه
امور كثيره بينا
رن برساله ثانيه :
" لا تفكرين بشيي ياروح روحي
دامك معي بنتجاوز كل اللي قدامنا "
روح توترت ولا عرفت وش تسوي
كتبت كذا بدون شعور
" انا اخيط الثوب مشغوله "
ارسل ظافر فيس يضحك
روح عصبت :
يضحك هذا !!
ظافر برساله :
" ياروحي الحين تطمنت عليك
يا خياطتي الماهره "
روح عصبت بزياده :
ماني خياطته خياطه !!
كتبت وهي معصبه :
"ماني خياطه بس احب اخيط "
ظافر ارسل ضحكه طويله
روح :
يضحك بعد!!
روح كتبت :
تصبح على خير
وطشت الجوال فوق السرير بعصبيه
وارسل ظافر رساله ما شافتها :
"وانتي بخير يا روح ظافر و انفاسه " .