#مذكرات_مريم:
#الجزء24:
مور ما حبط خالد قعدت نايضة حتى السبعة تع الصباح باش داتني عيني غفيت فطنت على صوت الباب تع البيت تفتح بالزور.. دخلت حلا قالتلي صباحية مباركة يا لعروسة عقداش معولة تنوضي يا مزود الرقاد يا الأميرة ديانا؟ فتحت عينيا بالتعب باش نستوعب قلتلها وشبيك وش كاين؟! قالتلي يا لي ما تستحيش نور ولادها ما حبوش يسكتوا و تجري وحدها فالدار تقسمت على ربعة و أنت راقدة هنا ما عندك لا ضمير لا احساس.. خزرت فيها مدة باش استوعبت قلتلها اخرجي برا با قليلة التربية كيفاش تدخلي عليا هكدا؟! قالتلي لي يسمعك يقول راكي مريحة بابا نوضي احبطي و بركاي من الرقاد يلا.. قلتلها اغلقي الباب و طبڨي برا.. و عاودت غمضت عينيا قالتلي تنوضي و راسك فوق رجليك.. قلتلها وش كاااااين؟ دوك انت تزيدي شويا و ترنكي لدار راجلك ما ديريش قيمة لروحك فوق حقها.. جات نحاتلي المخدة و ضربتني على راسي جيت نحبط رجليا من البونك باش نوض ليها حكمتني من الشعر حسيتو قلعاتو في يدها حكمتلها يدها و قلتلها اطلقنيييي رخييييسة.. كركرتني من البيت و أنا نحاول نسڨم راسي فرفشتني ناضت تضرب فيا و قالتلي تحبطي لتحت تخدمي ما عندناش لي يخدمك كلبة و أنا ما نرووووحش هادي هي داري يا لي ما عندكش دار.. قلتلها و الله غير نبيع لباباك ماشي مربية.. قالتلي بابااااا عيطيلو تشوفيييي.. خليه يجي و في دقيقة نقنعو يطلقك يا وحد الهاملة بابا ماشي مجبور باش يصرف على ماليك دار و دوا و فيزا ماليك الطلابين لي رماو بنتهم و ما صدقوا تهناو منها لوكان عندهم الشرف ما يرميوكش رمية الكلاب و جايا هنا عندنا تحوسي على الخدم و الحشم.. تلحت فيها ضربتها و حكمتها من شعرها طبعتني و طلعت فوقي شبعتني ضرب على وجهي و أنا في عوض نضرب وليت نغطي في وجهي.. كانت تضرب و تقول هدا ذنب عمي خرج في يماك حتى ولات دير لاشيميو و ما لحقتش لوكان يزيد باباك يحكمو كونسار كيما هي و نتهناو.. كنت نقاوم فيها و نباري على وجهي بصح كي سمعت قالت هكدا جمدت و قعدت نشوف فيها و هي تشوكات ما فهمتش علاش نحيت يديا و ما وليتش نقاوم قلتلها شكون لي راهو يدير لاشيميو؟ ناضت طمت شعرها قالتلي حتى واحد.. و حبطت تجري و تشوف موراها و أنا قاعدة مشوكية.. فقت مع روحي بلي كنت بشوميز دونوي قصيرة خفت يجي نائل على غفلة و يشوفني نضت للبيت بدلت حوايجي و دخلت للصالدوبا وجهي مديفورمي من الضرب غسلت و يدي ترجف قلت يا ربي و تكون تكدب و ما يكونش الكلام لي قالتلو تع الصح.. وجعني راسي و أنا نحاول نربط ما بين كلام خالد تع الصباح و كلام حلا.. حبطت شفت أم عباس قاعدة تهدر فالتلفون و عينها عليا و الحاجة في بيتها فاتحة خزانتها و قاعدة فالقاعة ما نعرف على واش كانت تحوس و لاتاي مازالو سخون كانوا مازال ما فطروا.. رحت للكوزينة صبت نور تسيق فالساحة و حلا لابسة حوايجها تع الخرجة و قاعدة فالجنان رحت دخلت للاستقبال صبت خالد متكسل فالفوتاي راقد و رامي يدو على جبهتو كي سمع صوت الباب دار شافني و عاود رجع كيما كان قلتلو خالد.. قالي انعم.. قلتلو برك نهدر معاك.. قال يا فتاح يا عليم يا رزاق يا كريم.. نحا يدو حطها تحت راسو و قالي وش كاين تان صباح لله؟ انتبه لآثار الضرب في وجهي قالي وش كاين؟ قلتلو نسقسيك على حاجة وحدة برك و بغلاوة يماك و بنتك واجبني بصراحة.. ماما وشبيها؟ قالي علاش وشبيها؟ قلتلو لالا أنت لي تقولي وشبيها من واش راهي تسوفري؟ قالي خير شفتيها فالمنام؟ و وجهك وشبيه؟ قلتلو ماما كاش ما بيها؟ ناض قعد و يسڨم في شعرو قلتلو أهدر.. قالي أنا ما علاباليش على واش راكي تحكي أصلا.. قلتلو ماما راهي تسوفري من كاش مرض؟ قالي كيما واش زعما حددي.. قلتلو كونسار.. و قعدت نحوس على الجواب في عينيه بصح ما حبش يخزر فيا قاعد غير يهرب بعينيه منبعد قالي ما علاباليش اكزاكت.. قلتلو يمال بواش علابالك؟ إدا كاش ما كاين أهدر.. قالي شفتي يماك فالمنام؟ و وشبيه وجهك؟ قلتلو لالا ما شفتهاش أصلا ما لحقتش باش نرقد برك حايبا نعرف وشبيها ماما.. قالي ما بيها والو أصلا يامات و نديك نرجعك عندها.. قلتلو مليح بصح عيطلها فالتلفون نسقسي عليها برك.. قالي راني نستنى في مكالمة مهمة ماشي دوك.. قلتلو بصح أنا ما نطولش نطمن عليها برك و نكوبي.. قالي خلاااااااص قلتلك منبعد و نعيطلها تهدري معاها.. قعدت نستنى لابال ديالو وقتاش و هو عينو على التلفون و يكتب.. قلتلو نائل راهو هنا دوك نجيب تلفونو.. تعنكر فيا بوحد الخزرة سكتني بقيت قاعدة شاف فيا منبعد مدلي التلفون نضت نجري حكمتو عليه حطيتو في ودني كان يصوني حتى جاني صوت بابا سلمت عليه و هدرت معاه سقسى عليا قلتلو أنا راني مليحة ماما كيفاش راهي مع الدوا؟ قالي يمال عرفتي؟ قلتلو إيه و هاد ليامات إن شاء الله نجي عندكم.. قالي يماك راهي ما بين يدين ربي سبحانو لوبيراسيو أثرت على نفسيتها بزاف الشي لي صرا ماشي ساهل مريم و حنا حالتنا راهي كلما تزيد تروح للأسوء لوكان ماشي راجلك لي وقف معانا ما نعرف وش راهو صرالنا.. قلتلو علاش ما هدرتوش علاش؟ أنا بنتكم ولا لقيطة حايبا نفهم علااااش أنا آخر من يعلم.. قالي يا بنتي لي صرا فيك بزاف عليك أنت تحملتي جزء كبير من الشي لي صرا ما خصكش باش نزيدو عليك.. أنا لي قلت لراجلك ما يحكيلكش بصح هاد الراجل و الله غير فحل و وليد حلال غير سمع بمرض يماك مدلنا يدو و أفضالو علينا بزاف.. هو يهدر و أنا دموعي يطيحو.. قلتلو بابا و دوك ماما وين راهي و العملية ديالها كيفاش؟ قالي راهي مليحة راهي راقدة الدوا ينعسها دوك رانا نستناو يخرجوا ليزاناليز و نشوفو إدا حبس الورم لخطر كي نحاولها الثدي الأيسر كان مشالها في كامل صدرها و الطبيب راهو يقول لازم نزيدو نحيولها الثدي الأيمن و نستناو رحمة ربي سبحانو.. كي سمعت كامل هاد التفاصيل ما قدرتش نشد روحي حكمت صدري و نبكي بالشهقة و خالد يديه في جنابو و يدور قدامي ما عرفش وش يدير قالي بابا ادعيلها.. قلتلو بابا تعيش ما تخبيو عليا والو أنا هاد اليومين نطلع عند خالي.. قالي يا بنتي أنا ما نقدرش نرجع و يماك في هاد الحالة اصبري حتى تتحسن شويا.. قلتلو بابا جي ولا ما جيش أنا رايحة نقعد نستناكم في دار خالي و ماما غير تفطن عيطلي.. قالي تهلاي في روحك.. كوبيت معاه و غطيت وجهي نبكي بضعف و قلة حيلة.. كامل هاد الانقطاع عليا من جيهة ماليا و أنا عمبالي أنانية و تهناو مني و هوما حالتهم حالة.. و خالد لي راهو يعاونهم و مفضل عليا و أنا عمبالي راني دايرا فيه مزية كي راني قاعدة معاه عايشة و نتصرف كي الطير لعمى.. قاعدة نبكي و نشهق قالي خالد خلااااص مريم قولي الحمد لله أذكري ربي سبحانو.. شفت فيه و عينيا معمرين دموع قلتلو و الله ما علابالي كيفاش نرد خيرك فترة و جوز اتحملنا.. قالي وش راكي تهدري يا الجايحة.. جبدني لصدرو يسكت فيا و قالي منين عرفتي؟ و وشبيه وجهك؟ واجبيني عمري.. قلتلو مع حتى واحد برك قولي وقتاش تديني؟ خلاص رايحة تقتلك هاد الشهقة.. زيرني لحضنو و قعد فالقاعة معايا قالي خلاص تهدني الوقت لي حبيتي نديك برك تفاهمي معاهم و راني واجد وين ما كانوا.. نوضني قعدني فالفوتاي سمع صوت نائل فالجنان يداوس و نور تحكي خلاني و راح فتح الباب لي يطل على الجنان باش يشوف وش كاين قابلاتو نور قالها وش كاين وشبيه نائل؟ قالتلو ما كاين والو أبو شهم.. شاف حلا قاعدة فالجنان و نائل يبهدل فيها زڨالهم دخلوا عندنا و أنا قاعدة بضعف غير نبكي قالي نائل ما تبكيش ختي ما تعترضيش على قضاء الله و قدره الله يشافيها و تنوضلكم بالسلامة.. خالد شاف فيه مستغرب قالو و أنت وين علابالك؟ قالو سقسي بنتك وش دارت.. أنا ما حبيتش ندخل روحي لخطر إدا دخلت فيها نباصي عليها.. قالتلو حلا ما درت والو بابا.. قالها ما درتي والو يا قليلة الحيا تربية سعدية.. و دار لخالد قالو أبو شهم بنتك زدمت على مرتك ضربتها و عايرتها بمرض يماها و أنا ما قدرتش ندخل ما بيناتهم.. قالها خالد صار هكدا يا لي ما تستحيش.. قالتلو بابا و الله ما قصدي عمبالي كان علابالها.. قالها و وجهها هدا وشنووو؟! قالو نائل هي لي شريتها بصح كيما قلتلك أنا ما قدرتش نخرج.. هي تشوف في نائل و خالد حكمها يضربها طبعو نائل و نور دخلت تسلك قالها خالد يا بنت الكلب ملوقتاش تمدي يدك عليها؟ جيت ما بيناتهم قلتلو خالد خلاااااااص راهي حامل لوكان كاش ما يصرالها نولي أنا السبة.. قالي الله لا يردهاااااا.. على هاد الكلمة دخلوا والديه الحاجة عيطت عليه و قالتلو وش خداكم هاد الشي مازالني حية و لحقتو تضاربوا يمال لوكان نموت كيفاش؟ قالها خالد وشبيك يما؟! هي الحاجة عمبالها خالد و نائل ضاربوا.. قالها نائل ما تهدريش مع خالد اهدري مع هاد الحية تربية إخلاص و سعدية.. و قال لحلا و الله لوكان ماشي باباك غير أنا لي نتصرف معاك بصح ما نقدرش نجوز على باباك كي شغل ماكاشو.. قالتلو الحاجة وش كاين خالد وش كاين وليدي؟ قالها يما بجاه ربي خرجيها من قدامي خير ما ندمها على النهار لي جبتها فيه.. نائل نحى بليغتو و هي صوطات تجري للصالة.. قعدت الحاجة قدامي و قالتلي و أنت وشبيك بنتي؟ وش صرا ما بيناتكم؟ قالها نائل يما ماااااشي الغلطة دياااااالها.. و دار لخالد قالو أبو شهم ما تزعفش بصح بنتك و الله ما تنبلع فمها فايح تهدر برك ما تحشمش و قدر مرتك من قدرك.. خالد كان قاعد وجهو أحمر و يفرغ زعافو فالدخان قالو خليني نوض نرحي عضامها.. و ناض يجري حكمو نائل و الحاجة غلقت الباب و قعدوه و هو يسب فيها حتى للظهر عيطت لراجلها جا داها من الباب ما دخلش أصلا..
رداسة كانت في دار سليمان و أنا قعدت في بيت الحاجة حكمني السطر في راسي و قلبي قاعد يدور حبيت نتقيا حاشاكم.. جاتني الضبابة على عينيا و حسيت بالتعب و الفشلة و قبل الغدا جات هيام باين خالد لي عيطلها فالتلفون دخلت سلمت عليا و قالتلي وشبيك وش صرالك؟ قعدت قدامي تهدر بصح ما ركزتش كامل مع كلامها كنت قاعدة فوق البونك طامة رجليا و حاجة راسي عليهم شافت فيا و قالتلي راني نهدر معاك وشبيك؟ حطيت راسي على البونك و غمضت عينيا ضاقت فيا النفس قالتلي نوضي نغسلك مررريم.. هي تهدر معايا و أنا لساني انبلع عيطت لخالد جا مفرفش قالي وشبيك؟ قعد قدامي و جبدني قعدني قالتلو هيام خايفة غير يكون حبطلها السكر.. قالها السكر؟! منين جاها السكر؟ قالتلو لالا ديك النهار كان حابط.. راحت جابت لابراي و بوندولات و هو جبدني لصدرو و قالي ما تزعفيش عمري كل حاجة رايحة تتسڨم إن شاء الله.. قاستلي هيام السكر صابتو 300 قالها خالد نووووضي هيام لبسيلها حوايجها غاولي.. و خرج عند الباب يعيط ناااائل.. و أنا راسي نحس فيه كي الجعلولة.. لبستلي هيام و خرجت أنا و ياها و خالد و نائل جا معانا و الحاج و الحاجة يحوسوا يعرفوا وش كاين.. طلعنا فالطونوبيل و طريق كاملة و أنا على كتف هيام كي دخلنا للسبيطار عاودوا قاسولي السكر و دارولي ليزاناليز صابوه طالع بزاف دارولي لانسولين و قال الطبيب يلزمها تقيسو كل يوم و عطاني الدوا و خرجت غير طلعت فالطونوبيل كلاطيت بالبكا و أنا نتخيل في ماما و حالتها و هيام تكالمي فيا حتى نائل و دمعو عينيه تأثر.. قالي خالد ما تبكيش اليوم فالليل إدا تحسنتي نروحوا للشمال.. قالتلو هيام نجي معاكم ولا ما تديونيش؟ قالها خالد يا أم علي كلما نجي نرقعها من جيهة تطرطق من جيهة أخرى..
رجعنا للدار و حالتي مستقرة تقريبا بصح نفسيا كنت مدمرة كي وصلنا جيت نحبط قالي ريحي نهدر معاك.. نائل و هيام حبطوا و أنا قعدت معاه قالي انا اليوم الصباح كنت بزاف مقنوط و ربي يشهد عليا بلي كي ما وجهتك ما عاتبتك خفت كاش ما نزلق بكلمة تجرحك و حنا بلاش علاقاتنا راكي تشوفي كيفاش راهي.. الكلام لي هدرتو ما كنتش قاصدو و ماشي كيما فهمتيه أنت.. قلتلو بصح أنا ما نقشتكش حتى تعرف وش فهمت منو.. قالي مام بصح ديري مليح في بالك بلي منهار لي ديتك حتى آخر نهار في عمري و انت مسؤولة مني.. قلتلو أنت ما قصرتش و أنا أصلا راني حاسة روحي ثقلت عليك بزاف أنا و ماليا.. قالي اششت اسكتي وشنو هاد الكلام؟! قلتلو لالا لازم نهدر.. أنا ما كنتش عارفة وش راهو صاري مع ماليا و بلي أنت لي عاونتهم و وقفت معاهم و المفروض نشكرك لخطر ماشي محتمين عليك باش تحمل كلشي.. قالي هدو كيما راهم ماليك أنا تان ماليا.. قلتلو الله يسلمك.. قالي وشنو هاد الرسميات؟ و علاش عينيك راهم يصبو كي الشتا؟ قلتلو لخطر راني نحس روحي عالة عليك.. ملي نشفى لعمري و أنا عايشة بقناعة و راضية بالقليل عايشة بعزة نفس و راضية بصح دوك تبدل الحال ما علاباليش كيفاش حطني المكتوب في هاد الوضع.. قالي بصح أنت مرتي و هاد الشي واجب و فرض عليا بلا مزيتي.. قلتلو أنا و ماليا استنزفناك ماديا و معنويا.. قالي دوك ما تحكميش عليا من كلمة هدرتها و ماشي قاصدها.. قلتلو لالا ماشي هكدا بصح انا ما قدرتش نتأقلم معاكم و هاد الشي أثر على النفسية ديالي و انعكس على علاقتنا سلبا ماراناش مرتاحين في زوج على هديك كمل خيرك و امشي بكلامك على الأقل خرجني من هاد الحالة لي عيا تخمامي و اديني عند خالي و أرفع أنت الدعوى و أنا نتنازلك على كلشي.. قالي وشنو هادي تع تتنازلي يا المهبولة لوكان تدي من عمري ما نقولش لالا وشبيك؟ تهدني و ما تاخديش قرار و أنت في هاد الحالة.. قلتلو خالد هاد الحالة مستمرة الله يخليك هنا تحبس أنت ترتاح و أنا نرتاح.. قالي بصح علاش راكي تبكي وشنو هاد الدموع كامل علاش تحبي الدراما؟ قلتلو نفسيتي راهي منهارة.. قالي كلشي ينحل خمي مليح و القرار يرجع ليك عندك منا حتى للصباح إن شاء الله و لي قررتيها رايح نكون معاك فيها ماشي ضدك.. قلتلو إن شاء الله.. حبطت و هو معايا ساندني قالي و دوك كيفاش راكي تحسي روحك ماشي خير؟ قلتلو إيه الحمد لله.. كي دخلنا صبنا الحاج و الحاجة قاعدين فالجنان تحمدولي على السلامة منبعد طلعت للبيت بدلت حوايجي و قعدت قدام باب البالكو ساندة راسي على الباب نشوف فالسما و دموعي تسيل تقنطت كنت حايبا نشوف ماما شويا و دخل خالد شافني في هديك الحالة حضني من ظهري و قالي أنا ماليك يماك و باباك و خوك.. درت ليه قلتلو خالد حايبا نشوف ماما.. قالي اشششت نتعشاو و نرتاحو و نروحو ما نخليكش حتى تشوفيهم.. قلتلو خالد راني نموت.. جبدني لصدرو كلاطيت بالبكا فرغت كامل القنطة ما بين يديه قالي مريم خلاص يا روحي خلاص عمري.. قلتلو أنت تحبني؟ رفعلي وجهي باسني من نيفي و قالي أنت روحي و دنيتي و كامل دنيتي أنت عشقي لي ما نقدرش نعيش بلا بيه.. قلتلو راني خايفة من كلشي.. قالي راكي خايفة من الفقدان ماشي من كلشي و هدا شعور طبيعي كامل نجوزو بأزمة صغريها تصغار كبريها تكبار مريومتي ادعي و ربي سبحانو ما يردش عبدو خايب.. قلتلو خالد ما تسمحش فيا غير معاك لي نحس بلامان.. زيرني لصدرو و قالي وين راكي شايفتني سامح فيك؟ و إدا على الكلام تع الصباح صدقيني كنت نغلي كي شفتك خارجة و سليمان يطبع فيك رقدت عند يما غير باش ما نقلقكش بتصرفاتي و المحاسبة ديالي.. قلتلو رايح يجي نهار وين تخليني؟ قالي إيه يجي النهار وين نخليك.. رفعت عينيا و قلتلو علاش؟ قالي غير الموت لي تخليني نخليك ما تبكيش خلاص قلبي يوجعني كي نشوف دموعك.. قلتلو أنت علاش متعلق بيا و كي نقولك حايبا ماليا ما تقبلش؟ قعد غايس في عينيا كي شغل حايب يدي الجواب منهم منبعد قالي أنت لي رايحة تواجبي روحك.. قلتلو كيفاش؟ قالي الكناري لي فالكاجة وش عاجبك فيهم؟ قلتلو نحب صوتهم و شكلهم.. قالي ياك ربي سبحانو خالقلهم جناحتين علاش ما تخليهمش يطيرو؟ قلتلو لالااااا نخاف عليهم هدو دياولي انا لي متهلية فيهم.. قالي و أنا هكدا حابسك في قلبي و ما بين ضلوعي.. العشق ماشي كلمة هادي تع نسمح فيك و نخليك ما تخميش فيهم أصلا أنت عشقي و بنتي و صاحبتي و كامل أهلي.. و بالنسبة للسوجي تع أهلك و الكلاملي قالتلو حلا تكون سور سمعتني كي كنت نهدر مع يما سينو و الله مام نائل لي ما نخبي عليه والو و ما علابالوش و حساب حلا مازال ما خلاص.. قلتلو ما ديرش مشاكل معاها منبعد يقولو مريم لي حرشاتو على بنتو.. قالي و دوك الزعاف كيفاش؟ قلتلو أنا مارانيش زعفانة منك بصح زعفانة على حالتي.. قالي بجاه ربي بركاينا من الدموع راكي تقول شي دايرا موتور و تجبدي هههههه ضحكت قالي دوك علابالك وش حايبك ديري؟ قلتلو وشنو؟ قالي ترتاحي و نتعشاو و نروحوا وش رايك؟ قلتلو قول والله.. ضحك و قالي ههههه و الله تقول طفلة صغيرة..
رحت دوشت و بدلت حوايجي و الدوزان لي نحتاجهم و حبطت حسيت مورالي طلع.. صبت خالد متكسل في حجر يماه و نائل قاعد يحرش بيه قالو صغير وش فيها مسديلو يما مسديلو.. قالتلو الحاجة أنا نحبكم كامل عندي كيفكيف.. قالها يما وشمن كيفكيف و أنت تبربري فيه تقول صغير خصو غير يرضع.. ناض خالد يضحك و قالها ههههه الغيرة راهي كالياتو راح يطرطق.. قالتلو هيام نائل ما يرتاح حتى نزوجوه.. قالها نائل أم علي راهو قدامك تزوج و مازالو يحوس على الحنانة عند يما.. قالو خالد كي نزوجوك و نشوفوك إدا تحوس على يماك.. حقا بابا وين راهو؟ قالو من مقبيل و هو ما بين الجنان و المنور ما نعرف على واش كان يحوس كي كره راح مع أم عبسكة عند عباس.. قالتلو هيام تبحرولو الدراهم قال بالاك غسلوهم و طاحوا.. قالها خالد شكون لي غسلهم؟ قالتلو نور لي غسلتلو حوايجو.. دار خالد ليا و قالها آااا انا قلت بالاك لخطر غسيل الأموال اختصاص هدوك الناس.. صونا تلفونو تقعد و رفد يهدر مع سليمان قالو أهلاااا أبو داوود.. و الله مور العشا إن شاء الله رايح لأربيل.. يامات و نرجع.. ياريت و الله و نديو نائل معانا.. قالو نائل راكم رايحين؟ قالو خالد إيه.. قالتلي الحاجة ما طولوش تعيشو.. قلتلها لالا عمتي ما نطولوش.. كوبا معاه و قالي وين راهو العشا عندنا سفر.. قالو نائل أبو شهم إدا صح سليمان يروح مام أنا نجي معاكم.. قلتلو و أنا كيفاش؟ قالي خالد أنا و ياك وحدنا و نائل و سليمان وحدهم حنا نريزارفيو فلوتال و انت تريحي عند خالد. قالي نائل يا راس البطاطا وقيل تحوسي على فواياج دونونس و الله ما نخليوه ليك يا لوكان تموتي انا نوقفلك كي العضمة فالطاس نوريلو كيفاش يغيرني.. نضت نضحك قالي و تضحك البهلولة رفد المخدة رماها عليا قالو خالد نائل اخطيهااا ما تقلقهاش.. و قالي نوضي مريم وجدولنا نتعشاو باش نسهلو بكري..
نضت أنا و هيام جبدنا الكبة و درنا شوربة و مقبلات و نور لاتية مع ولادها ما حبوش كامل يسكتو من البكا.. كي كملنا طلعت لفوق لبست حوايجي و وجدت حوايج خالد و عاودت حبطت.. لبست سروال زرق عريض تع شتا و تريكو وردي قصير و باسكات بيضا.. قعد خالد يشوف فيا ماشي عاجبو الحال قالي وشنو هادا مريم صافا عمري؟! قلتلو ياك مستور.. قالي لالا يا روحي اطلعي بدليهم و ما تشنفيش عليا بنتي.. طلعت لبست فوقهم شال تع شتا طويل لفيتو و حبطت صبتو واقف يستنى فيا كي شافني خزر فيا بمكر و تبسم قلتلو وشنووو؟ قالي و الله لوكان ما خفتش ندي ذنوبك غير نخبيك في قلبي و ما نخليكش جوزي العتبة تع الباب.. قلتلو لالا يمال غير ما تديش ذنوبي.. رفد تلفونو و المفتاح خرج قبلي و أنا دخلت لبيت الحاجة بقيت الحاجة و هيام و نور على خير و خرجت فتحت باب الكوزينة كان خالد الله يبارك عليه لابس قمجة و سروال كحولة و فيستا ڨري طويلة جاوه بزاف شبان كان واقف مع سليمان هو و ياه يتشابهو بزاف و عندهم نفس الستيل تع اللبسة بصح نائل ما يتشبهلهمش و زيد رقيق عليهم هو في عز البرد يلبس شورت و تريكو دومي مونش.. طلع نائل مع سليمان و أنا مع خالد و ديمارينا.. أنا غير طلعت فالطونوبيل ديجا بديت نتثاوب قالي خالد حايبا ترقدي عمري؟ قلتلو لالا مانيش حايبا.. قالي مريم منا و جاي نقصي الحلو و ديري ريجيم فالماكلة ديالك على الأقل فهاد الفترة لخطر كي يبدا السكر يطلع و يحبط هكدا قادر يحكمك بعيد الشر.. قلتلو كي يقولها نائل علاش جديدة على أحمد راضي؟ بابا و ماما و خالي كامل عندهم السكر.. قالي معليه بصح الحذر واجب.. قلتلو تعيش شعل كاش غنية وش يجوزلنا الطريق.. قالي حاكمين الطريق نديرو الغنا؟! قلتلو خاااالد.. قالي يا وحد الستوتة معولة عليا؟ علاش راكي تتفشي عليا هكدا؟ ضحكت و قلتلو ههههه ديرلي على ذوقك.. قالي اصبري نوريلك ذوقي.. شعل غنية حسين نعمة تع [يا قمر عندي حبيبة أحلى من كل البنات.. من طبع دجلة و فاها عيونها بلون الفرات.. موعد و شاطي جفنها غارت منها............ بيها اشكال الدلال] كان يغني معاه و يشوف فيا بوحد الخزرة حشمني.. كنا مشينا مسافة ماشي قليلة قالي مريم خالك عندو الدراري؟ قلتلو عندو اسل و عسل و أنهار و عندو يعقوب و أنسون يعطلو أنس.. قالي الله يبارك أنا لي نعرفو عندو بنات و طفل صغير يمال نريزارفيو فلوتال نائل نحاوزو عند سليمان و أنت تقعدي معايا.. قلتلو بصح حنا ما تفاهمناش هكدا.. قالي تعيشي ما تعارضينيش نديك عندهم و فالليل نديك.. قلتلو كيما تحب.. قالي شوفي فيا.. نموت و نعرف باباك كيفاش كان مورالو فالليلة لي جابك فيها.. ضحكت و قلتلو ههههه حقا حبيت نسقسيك على نائل.. قالي وشبيه؟ قلتلو ماشي على أساس كنت رايحين تخطبولو من عند خوالك؟ دوك ظهرت الطفلة قرات معاه فالجامعة.. قالي إيه صح يما حبت هديك الطفلة وسمها ترفة.. قلتلو وش تكونلكم بالضبط؟ قالي خالتي خاديا خال الطفلة.. وحد البنيتة شويبة تشبهلك بصح عندها مشكل في وحدة من رجليها و هي في كل الأحوال نائل عينو على هديك الطفلة و يما تحاول تقنعو بترفة.. قلتلو علابالك أنا نحب نائل بزاف نحسو يتشبه لزكريا سورتو كي يجي يحوس على الماكلة.. كان زكريا يجي عيان نستناه و عندهم نفس العقلية.. قالي و دوك على تعمرو عينيك بالدموع وشبيك ياك نائل راهو هنا كي الشادي.. ضحكت.. قعدنا نحكيو حتى نعست و داتني عيني رقدت الطريق طويلة و صامطة كنا في الموصل نروحو للدهوك و لا للزاخو ما نطولوش يا ربي ساعة برك..
فتحت عينيا خزر فيا خالد و قالي وشنو هاد العينين الله ينعل باباك هو جاب و أنا تبليت.. قلتلو خالد وقتاش نلحقو؟ قالي علاش عمري واقيل أنت لي راكي تسوقي و عييتي.. قلتلو خالد حبيت نتقيا حاشاك.. جبد التلفون كان رابط الصوت فالطونوبيل عيط لسليمان رفد عليه قالو انعم أبو شهم.. قالو خليونا نحبسوا شويا.. قالو سليمان غير لخير كاش ما كاين؟ قالو لالا ما كاين والو.. حبس الطونوبيل فتحت الباب و بديت غير نتڨاوع أصلا ما تعشيتش.. حبط خالد فتح قرعة ما فرغ في يدو و غسلي وجهي شهقت حبط نائل قالي واش مريومة لحقتي لهنا و كريفاتلك الرودة؟ قلتلو توبة ما نزيدش.. قال لخالد شوف أبو شهم ولي ليا إدا عاودت قالتلك اديني لماليا.. جا سليمان قال السلام عليكم غير لخير كاش ما بيهم؟ رفعت عيني و شحال كنت حاقدة عليه كي بيع لخالد قلتلو لالا ما بيني والو.. قالو خالد عيات من الطريق.. قالو سليمان يمال حنا نديماريو.. قالو خالد اتكلوا على ربي.. هو طلعوا و خالد طلع قلتلو خالد أنا هدا سليمان ما نحبوش.. قالي علاش؟! قلتلو ما نحبوش نحسو ما ينحملش و مكروه و فتان.. قالي لالا هدا أبو داوود دراعي الأيمن.. قلتلو إن شاء الله يكون حتى رجلك و أنا وش راحلي.. قالي وقيل راكي دايرا في بالك بلي هو لي بيعلي كي خرجتي بلا خمار؟ قلتلو إيه هو.. قالي لالا و الله غير أنا لي لمحتك كي خرجتي بصحانية الوجه و شفتو كي كان يطبع فيك.. قلتلو خفت عليك.. قالي شحال من مرة قلتلك ما تهدريش معايا باللهجة ديالك.. قلتلو و أنا وش نديرلك إدا أنت تتأثر بلخف.. قالي على الأقل غير من شي عيباد أبرد من الثلج ههههههه..
وصلنا للإقامة و دخلنا لأربيل ريزارفينا زوج شنابر فلوتال غير فتح خالد الشومبرة رميت روحي على البونك رقدت بحوايجي كي فطنت الصباح ما صبتش خالد سمعت صوت الما فالصالدوبا دقدقت فالباب غلق العين و قالي وش كاين؟ قلتلو أفتح الباب حبيت نغسل.. فتح الباب و قالي ادخلي يا لي ما تستحيش.. شفتو فاتح الدوش قالي علاش راكي تشوفي فيا هكدا علابالي بروحي شباب.. قلتلو علاش راك دوش مع الصباح وين كنت؟ قاعد يغسل في شعرو و الرغوة على عينيه قالي رحنا لملهى ليلي هنا قريب.. خزرت من و من ما صبتش باش نضربو طلعت ليمونش دياولي و بديت نسرفڨ فيه قالي و الله غير نڨصر معاك كنت مع سليمان و نائل خلااااص يا بنت الكلب.. قلتلو رخيس تخونس و الله غير نقتلك.. ناض يضحك و قالي هههههه بديتيني بهبالك صباح لله تحبي نثبتلك بلي ما درت والو؟ قلتلو إيه.. مدلي يدو و أنا كي النية مديتلو يدي جبدني بيا بحوايجي لتحت الما.. رفدت سربيتة لفيت روحي بيها و فتحت الباب خرجت انتبهت لتلفونو كان يصوني مكتوب بندر رفدت و سكتت جاني صوت إخلاص ضحكت و قلتلها ههههه واش السحارة صباح الخير.. جينا نجوزو فواياج دونونس.. قالتلي الله لا تربحك يا ×××× و الله ما تربحي.. قلتلها غسلتي وجهك؟ بروسيتي سنانك؟ و الله لدوك مازالكي ممسوخة كي الشيطان؟ قالتلي و الله غير داياتو داياتو و دوك تشوفي و قولي إخلاص ما قالتش يا وحد المصفارة المجعيطة.. قلتلو ما تتقنطيش كي يكمل يدوش نقولو راهو عيطلك (الدوق فليد) بايباي.. كوبيت عليها و أنا نغلي و دوك كيفاش ندير؟ ماجاياش ندير معاه مشكل و هو ما عندو حتى ذنب لخطر هي لي عيطتلو.. خرج من الدوش ينشف في شعرو و يشوف فيا و يشوف فيا بخزرة تع واحد نال و دا حقو من واحد.. قلتلو بصحتك حبيبي.. قالي الله يسلمك و يحفظ والديك.. وش مازال ما لبستي؟ و تلفوني علاش راهو في يدك؟ قلتلو شوف ما تبهدلني ما دير منها حكاية عيطلك بندر و رفدت عليه.. قالي و شكوووون لي سمحلك؟ قلتلو أنا صح رفدت بصح ما قلتش ألو و زيد إخلاص لي عيطت تهدد فيا و تهدر فالكلام الزايد.. قالي بواش هدداتك؟ قلتلو قالتلي داياتو داياتو.. قالي مريم حبيبتي بركاي من هاد التصرفات و الله ما تنالي منها والو من غير الزعاف بعدي على هاد الحكايات و التصرفات و تلفوني ما تزيديش تدناي ليه نحيه كامل من قاموسك.. قلتلو و نخليك تسرح و تمرح على هواك ياااك؟ قالي علاش ما تخليش ربي سبحانو ما بين عينيك؟ غير مقبيل معامن كنت نسرح و نمرح؟ ما تحطيييش راسك ما تحشميش أنت علابالك وش كاين و ديري العكس شوفي فيا.. خزرت فيه و قلتلو علاش زعفت دوك؟ قالي زعفت لخطر ديري وحد ليبيتيز ينطقو الواحد من جنابو علابالي دوك شويا و يطلعلك السكر.. قلتلو لالا ما يطلعش.. قالي مريم تصرفك غالط ايماجيني لوكان كان صح بندر لي عيطلي.. قلتلو عادي وين راهو المشكل وعلاش هداك سليمان ماشي وليد عمكم و لاصق فينا وين ما نروحو؟ قالي جيبي هداك لسليمان؟ هدا مأمنو على داري و ماليا لوكان كاش ما يصرالي.. كان يهدر و عينيه على السربيتة لي كنت لافة روحي بيها و بدات تتفتح قالي نوضي البسي حوايجك
يجا راهو بدا الشيطان يتربع في مخي.. جبدت السربيتة لفوق و نضت جبدت حوايجي و هو يمسح في مساطشو قدام المرايا.. جبدت مونتو طويل في فرو كحل قصير مع الجين و هو لاتي يخنتش في تلفونو كي كملت انتبهلي قالي حبسيييي.. وين راهو الشال؟ قلتلو خالد نتخنق القلمونة تان تستر.. رمى التلفون و ناض لبس كحل في كحل و قالي أيا نروحو.. حبطنا لاريسبسيو صبنا نائل و سليمان واقفين قالنا نائل صباح الخير ليوم راكم لابسين كيف كيف.. سليمان كي يشوفني مع خالد يشعل ڨارو و يشوف لجيهة وحدوخرا و كي نكون ماكاشني يولي يتصرف على طبيعتو و يڨصر و يضحك..
طلعنا في طونوبيل وحدة سليمان يسوق و نائل قدامو و أنا و خالد ملور.. نطق نائل قالي مريم ختي اسمحيلنا أنا و سليمان فسدنا خرجتكم بصح يكون في علمك أنا مانيش حاس أصلا بالذنب و لوكان تزيد تصحلي الفرصة نجي و نروح معاكم.. قالو سليمان و أنا شكون لي قالك اطلب السماح في بلاصتي؟ قالو نائل ماشي عيب عليا و أنت خويا و لازم نحس و نعبر في بلاصتك ما راكش تشوف فينا أنا و ياك كي زعيط و معيط في وسطهم و هوما عرسان؟ و دار لينا يغزل فينا بيديه ضحكت و حطيت راسي.. قالو خالد أنت تنقص من عمرك غير باش تقلقها خليهاااا ما تقلقهااااش.. قلتلو خليه ياك رايح يتزوج و تشوف وش رايحة ندير في مرتو راني نستنى في هداك النهار كل يوم.. هاد الكلام هدرتو بلهجتي المصلاوية سليمان خزر في خالد فالمرايا تع لقدام باستغراب عاقد حواجبو و خالد و سليمان يتفاهمو غير بالخزرة قالو أبو داوود مازال ما سمعت والو.. قالو سليمان يا خويا الله يكون في عونك تسمع سبان و أنت تضحك تحسبها مجاملة.. قعدت غايسة مع روحي ما فهمتش قصدو.. نطق نائل قال انا راني حايب ناكل قلية مصلاوية.. قالو خالد هادي تاكلها فالموصل ماشي هنا.. قالو سليمان كيف كيف أبو شهم أصلا ماكلتهم و تقاليدهم متقاربين لخطر نص الأكراد كانوا ساكنين فالموصل..
حبطنا في ريسطورو بزاف شباب قالي خالد حبيبتي مريم نقعدو وحدنا؟ قلتلو إيه كيما تحب.. جبدلي كرسي قعدت و هو قابلني و قعد جابولنا المونو درنا لكومند و جابولنا الفطور.. قالي علاش ما كليتيش؟ قلتلو لالا مانيش قادرة أصلا أنا ما نفطرش.. كان يشرب فلاتاي و عينو على التلفون منبعد رفع عينو و قالي لبارح جبت النيميرو تع خالك من عند باباك و عيطتلو فالتلفون خبرتو بلي جيتي.. قلتلو إيه مليح.. حط التلفون بجيه حط رجل فوق رجل و السبحة في يدو بدا يهدر سيريو قالي شوفي مريم رايح نديك عندهم أنا ما نعرفش طبيعة العلاقة ما بيناتكم بصح الشي لي نوصيك عليه ما تتصرفيش بعفوية و تاخدي راحتك على لخر.. ما دوشيش عندهم.. ضحك و صوت عالي و لي سالفي و التصاور ممنوع.. شعرك ما يبانش قدامهم خليهم وسيلة باش تشوفي ماليك هدا ما كان ما تتعمقيش معاهم.. قلتلو بصح علاش كامل هاد الحذر؟ قالي مريم أنت ماشي غير مرتي أنت قطعة من روحي قولي عليا متخلف راهو مكبرها باطل أنا ماشي لي جا ندير فيه كونفيونس و سرك ما تمديه لحتى واحد و علاقتنا ما تهدريش عليها أصلا مدي انطباع إيجابي و اسمعي كثر ملي تهدري.. قلتلو ما يكون إلا خاطرك.. قالي الله يرضى عليك.. اليوم مع المغرب نجي نديك و نشريلك تلفون في طريقي.. قلتلو و ماليا؟ قالي دوك شوفي خالد و ماليك أنا نجيبهم ما تتقلقيش.. كملنا خزرت في نائل و سليمان تقول شي محرومين من لاتاي و الدخان.. نضنا و كي شافونا هوما تان ناضوا.. ما بيني و بين روحي جيتهم معانا ما عندها حتى معنى و كنت نشوفها قلة ظرافة و مام كي فاتو جاو كانوا قادرين كي وصلنا يروحوا لبلاصة وحدوخرا و يخليونا على راحتنا بصح كي نهدر مع خالد يتحسس و يتقلق من كلامي و هدا سليمان بلاش ما ينحملش و حاسب روحو بزاف تقول شي ضرتي بصح الحاجة لي كوداتلي مخي و استغربتها هي تخمام خالد حرت كيفاش فالدار هدا سليمان كي يجي ما يقعدش معانا كيفاش دوك خالد جاتو عادي و مأمن جاوني بزاف أسئلة في راسي..
رحنا لوين يسكنوا دار خالي كي ڨارا الطونوبيل عيطلو خالد فالتلفون يبلغو بلي وصلنا.. شويا و خرج شفتو واقف عند الباب استقبلنا منبعد أنهار بنتو و فوزية مرتو تان خرجوا عند الباب.. سليمان حبط معانا باش يسلم على خالي انتبهتلو يشوف في أنهار منبعد حبط راسو و قعد يستغفر كانت لابسة سورفاتمو مزبوطة مع بوستيي و معاها فيستا خفيفة تع بيجامة أما نائل كان يرمي في عينو ملتحت لتحت.. سلمت على خالي و مرتو و عرضهم باش يدخلو بصح سليمان ما حبش ولاو طلعوا فالطونوبيل و راحوا و أنا دخلت رحبو بيا..
