Unicode
ရင်နင့်.......
အပိုင်း(၆)
ကျောင်းဆင်းချိန်..
ထမင်းဘူးလေးပိုက်ပြီး အေးရိပ်ခပ်သွက်သွက်လမ်းလျှောက်လာခဲ့သည်။ နေ့ခင်းက မိုးကျထားသဖြင့် ရာသီဥတုက ဟိုငေးသည်ငေးနှင့် လမ်းလျှောက်ကောင်းသော်လည်း သူမကတော့ ဘာကိုမှမငေးနိုင်ပါ။
အိမ်ကိုအချိန်မီပြန်ရောက်ပြီး နောက်မကျခင် ထမင်းအိုးတည်ထားချင်စိတ်သာ ကြီးစိုးနေ၏။ ထိုမှသာ သူမအရိုက်အနှက်ခံရခြင်းမှ သက်သာမည်ကို။ ထို့ကြောင့် မပြေးရုံတမယ်လေး လျှောက်လာစဉ်..
"ဘုတ်"
"အမေ့..."
တစ်ယောက်ယောက်က သူမခန္ဓာကိုယ်လေးကို အရှိန်ပြင်းပြင်းနှင့် ဝင်တိုက်သွားသဖြင့် အေးရိပ်လက်ထဲ ထမင်းဘူးလွတ်ကျသွားသလို လူကလည်း မြေပြင်ပေါ် ဟက်ထိုးမှောက်သွားတော့သည်။
"ဟား... ဟား"
"သူလဲသွားတာ ဖားကျနေတာပဲ ရယ်စရာကြီး ဟီးဟီး"
"ဖားမကြီး ဖားမကြီး လာကြည့်ကြပါဦး ဟားဟား"
လှောင်ပြောင်ရယ်မောသံကြောင့် မော့ကြည့်လိုက်တော့ အောင်အောင်တို့အဖွဲ့။ သူမကိုတမင်တိုက်ချလိုက်ပုံရသည်။
"အား.. ကျွတ်.. ကျွတ်.."
ဒူးနေရာ၌ပွန်းပဲ့ကာ နာပြီးစပ်နေတော့ အေးရိပ်ဘာမှမတုန့်ပြန်နိုင်သေး။ မျက်နှာလေးမဲ့ကာ ညည်းညူရင်း ထမင်းဘူးကိုအရင်ကောက်လိုက်သည်။ ပြီးတော့မှ ထော့နဲ့ထော့နဲ့နှင့် ထလိုက်ပြီး
"နင်ငါ့ကို တမင်တိုက်တာ မဟုတ်လားအောင်အောင်"
"ဟုတ်တယ်လေ.. ဘာဖြစ်လဲ"
အောင်အောင်က မခန့်လေးစားအမူအရာနှင့်ပင် လှောင်ပြသေးသည်။ အေးရိပ်မခံရပ်နိုင်စွာပင်
"ငါနင့်ကို ဆရာမနဲ့တိုင်မှာနော်"
"တိုင်လေ.. နင့်ကိုဘယ်သူဂရုစိုက်မှာလဲ"
"နင့်လိုအရက်သမားသမီးကိုများ ငါ့အဒေါ်ကအရေးလုပ်မယ်ထင်လား"
ရီရီမွန်မွန်က နှုတ်ခမ်းတထော်ထော်နှင့်ဝင်ပြောသည်။ အေးရိပ် မျက်ရည်တွေရစ်ဝဲချင်လာ၏။ အတန်းပိုင်ဆရာမက ရီရီမွန်၏အဒေါ်ပဲဖြစ်သည်။
YOU ARE READING
ရင်နင့်... (Normal Version)
General Fiction"အစ်ကိုလို့ ခေါ်လိုက်တာနဲ့ နင့်ကိုငါ့ညီမလေးအနေနဲ့ ငါတစ်သက်လုံးကာကွယ်စောင့်ရှောက်ပေးမယ်" သုတဉာဏ် "ငါနင့်ညီမလေး မဖြစ်ချင်ဘူး နင့်မိန်းကလေးဖြစ်ချင်တာပါ နင့်ချစ်သူဖြစ်ချင်တယ် အမြဲဖြစ်ချင်ခဲ့တယ်...
