■■■■■■■■■■■■■■■■■■■■■ 🌿 لا أعرف ما هو الحب ، لكن إذا كان الحب هو الرغبة برؤيتك بإستمرار ، وعندما أراك لا أرى أحداً في هذه الدنيا وأريدك لي فقط ، إذن أعتقد اني أحبك🌿 •••••••••••••••••••••••••••••••••••••••••••••••••••••••••••• في باحة الكلية.. واقفه وهي شادة حزام شنطتها بإيديها الزوز وتسمع فيه.. هو اللي واقفه عليها وحاط ايديه ورا ظهره كان يكلم فيها ويمرر في نظره ع المكان يساره.. 🍀"لانعرف نلف وندور ولانعرف ندير مقدمات..اني يابنت الناس ليا مدة نتابع فيك وعرفت عنك وعن عيلتك وعن كل حد تعرفيه ويعرفك كل شي..عجبتيني وخشيتي خاطري ونبيك بالحلال" ضحكت مها غصب عنها.. شافلها بطرف عينه بعدين قال.. /لاباس! مها قالت بضحكه.. /ايه باهي يعني انت شن تبي توا؟ رفع حاجبه وقال.. /اللي نبيه صرحت بيه.. عقدت حواجبها وهي تشوفله بإبتسامه.. غير نظرها عنها وقال.. /الحمد لله ربي عاطيني من فضله،ماديا واخلاقيا مش ناقصني شي غير مش مكمل تعليمي وفرق العمر بيني وبينك مش شوي..لكن عادي مش مشكله..هز راسه وهو مكمل يقول..نتفاهموا نتفاهموا.. ضحكت مها تاني وهي حاطه يدها ع فمها.. رجع شافلها بطرف عينه وهو رافع حاجبه.. هدت مها ضحك وقالت.. /ممكن نعرف اسمك؟ غير نظره عنها..عقد حواجبه وهو يقول.. "الحاونكي..حسن الحاونكي" بدت ع وجه مها ملامح الصدمه وقعدت ساكته.. هو بدون مايشوفلها قال.. /بعد عرفتي اسمي..شن قولك؟ حمحمت بعدين قالت بشي من الربكه.. /اسفه مافيش نصيب ربي يعطيك اللي خير مني ان شاء الله.. شافلها بطرف عينه وقال.. /السبب!؟ مها تنهدت وهي تحاول تخفي خوفها بعدين قالت.. /مانبيش نتزوج توا.. هو قال.. /نراجيك لين تتخرجي ماعنديش مشكله.. حطت حزام شنطتها ع كتفها وقالت.. /معليشي قتلك مافيش نصيب.. مرر نظره ع المكان بعدين شافلها بنظره التام وهو يقول.. /مدام خشيتي قانون مفروض تكوني شجاعه وواضحة قولي علاش ماتبيش!؟ نزلت عيونها شويه بعدين رفعتهم فيه وقالت.. /مافيش بينا قواسم مشتركه اني من عالم وانت من عالم تاني مش حنتفاهموا بكل بكل..ابتسمت وقالت..فهمت عليا!؟ حرك راسه بالنفي.. غمضت عيونها وابتسمت بربكه وتوتر بعدين فتحتهم وقالت.. /مافيش نصيب وخلاص واضحه.. ابتسم وهو عاقد حواجبه يقول.. /لامش واضحه.. شافتله وقعدت ساكته.. هو قال.. /شوفي انتي عششتي في دماغي مش قادر نحولك منه بكل..من هداكا اليوم واني مش قادر نركز في شي من كثر مانفكر فيك.. هي بإستغراب قالت.. /اما يوم!؟ بنفس الابتسامه قال.. /يوم اللي سكرت علي سيارتك بسيارتي..الحاجه هادي ماصارتش بلاش راهو.. هي توا اسعفتها ذاكرتها وفكرتها بالموقف يدوب ابتسمت بعدين قالت.. /والله هادي مش مشكلتي مافرضتش عليك تفكر فيا بكل ولادورني.. مرر نظره ع المكان بعدين شافلها وقال.. /من قالك مش حنتفاهموا ونتلايموا ع بعض الحاجه هادي تنعرف بالعشرة.. خدت نفس وقالت.. /انتي تبيني نكون معاك صريحه..ok..لااني ولاعيلتي حنتقبلوا الموضوع..انتم عيلة الحاونكي وياريت ماتواخذنيش يعني معروف تاريخكم في التهريب الناس لتوا لتحكي بيه انت نفسك قعدت سنين في الحبس..ضحكت وقالت..قصدي يعني..مستحيل..لايمكن..سامحني.. قعد يشوفلها بنظره امتزجت فيها المعاني زي المشاعر.. غضب..حزن..ضيق..كبر.. هذا كله شافاته مها في نظره وحده.. قالتله ان مافيش بينهم قواسم مشتركه..لايمكن يتفاهموا..لكن هي حاليا مش عارفه شن صار فيها لما عيونها داموا النظر لعيونه..شعور مش عارفه تفسره قاعده تحس بيه..شعور اجتاحها اجتياح وخلاها مش قادره تغير عيونها عنه.. غاب عيونه عن عيونها لما خفاهم بالنظارات بعدين هو بدي يغيب شوية شويه لعند ماغاب عن عيونها تماما.. "مها" التفتت شافت لصاحبتها كريمه اللي جت وقفت وراها وهي تشوفلها بتساؤل وفضول.. طلعت منها تنهيده عميقه تلقائيا وقعدت تشوف لكريمه وهي مش قادرة تتكلم ولاقادره تسكت دوشة المشاعر اللي صايرة داخلها.. ♧الفروق بين الناس تقدر تتحكم في هلبه حاجات فينا وفي حياتنا لكن ماتقدرش تحكم في قلوبنا بكل،القلب كان حب لايشوف لفرق اجتماعي لامادي لاعلمي ولافارق عمري لكن كل اللي ذكرتهم غالبا يكونوا اقوى من الحب وهما يحددوا مصيره ويكتبوا نهايته..مرات يكتبوه من قبل مايبدا.. يعني في من يتمنى نجمة معلقه في السمي لايمكن يطولها ويقعد عمره كله يتفرج عليه من بعيد بعين الحسرة.. 🌿🌿🌿🌿 الساعه الرابعه مساءا.. قدام مدرسة الفضيلة للبنات.. كاالعاده كان جبر واقف يستنى في اخته مروج.. ومروج طلعت من المدرسه لكن ماكانتش بروحها.. كانت معاها بنية جبر وين يشوفها يقعد يتفرج عليها بس من جمالها وبرائتها ولطفاتها اللي مالهاش حد.. 🌸"خودي هدا قلمك هدى" هدى قالت بإبتسامه.. /خوديه بكل معاش نبيه.. ابتسمت مروج وقالت.. /صحيتي.. هدى قالت:مش تنسي تكتبي الواجب؟ ضحكت مروج وقالت.. /اول مانروح بنكتبه طول واني بالقرمبيول.. ضحكت هدى.. 🍃ويوصل فيهم جبر قال لأخته وهو محرج.. /هيا مروج.. شافتله هدى وقالت.. /شن جو جبر؟ هو ابتسم بإحراج وقال.. /باهي..وانتي.. قالت بإبتسامه.. /حلو.. "هدى" التفتت شافت لمحبوبه اللي كانت واقفه بعيد مع فداء لما شافت نظرة فداء ليها خافت ردت نظرها لمروج وجبر وقالت..باي.. ولفت ومشت بسرعه لأختها وبنت عمها.. مروج شافت لفداء لقتها تشوفلها بكره غيرت نظرها عنها وهي تقول.. /حيوانه..شافت لخوها وقالت..هيا نروحوا.. جبر شاف لهدى للحظات بعدين مشي واخته مشت معاه.. 🍃"بنحرش فيك امي فريحه راهو" هدى قالت بضيق.. /علاش باهي هي شن دارت مادارت شي.. محبوبه:مش نظيفه ياهدى تو تخليك مقمله.. هدى قالت.. /كل يوم امي تشوف في شعري وتقول نظيف مافيه شي وحتى هي نظيفه وحوايجها نظيفات.. فداء تأففت بضجر.. ومحبوبه تشوف لهدى بضيق.. ع جية السيارة.. مشولها كلهم وهدى تقول.. /ماديروش مشاكل باهي.. محبوبه هزت راسها بالموافقه لكن فداء ماابدتش أي ردة فعل وقعدت مستاءة من تصرفات اختها.. 🌾🌾🌾🌾🌾 "والله قالولي الصغار ماصدقتش لين ريتك بعيوني" ضحك فرحات وقال.. /شن حالك وشن داير في هالدنيا؟ مسعود قال بإبتسامه.. /في خير ونعمه من الله عايشين حامدين شاكرين. فرحات قال بإبتسامه.. /كويس كويس.. مسعود:انت اللي شن صار فيك وشن درت فرحنا وقول تزوجت.. ضحك وهو يحرك في راسه بالنفي.. مسعود قال بضحكه.. /تو نزوجوك وحده من هني بش معاش تسيبنا بكل.. فرحات ضحك بعدين قال.. /مش ناوي نسيبكم بزواج ولامن غيره.. 🍃في هاللحظه ارتفع صوت آذان صلاة العصر.. مسعود قال.. /صدق الحق وزهق الباطل..هي ترافقني للصلاه.. ابتسم فرحات وقال.. /والله ياغالينا بنمشي نصلي في جامع البنداري عندي موضوع مع الساعدي اول ماشافني واني خاش للبنداريه شدني وماطلقني الابالسيف.. مسعود قال بإبتسامه.. /اكيد بيحكي معاك في موضوع الصغار..نشدني عنك هلبه طول فترة سفرك نقوله راهو مرات معاش بيولي وهو شي مازال متأمل فيك تولي سبحان الله تقول كان عارف.. فرحات قال بإبتسامه.. /الباين ربك قاسمله اللي في خاطره.. مسعود قال بمفاجأه.. /كيف!قصدك وليت لخدمتك الاولى؟ ضحك وقال.. /تقدر تقول هكي.. مسعود ضحك بعدين قال.. /تبيلنا تقعميزة طويله.. فرحات قال.. /وهو كذلك لكن عندي مش عندك.. مسعود قال.. /لاشن عندك هادي انت ضيفنا دكتور عشاك عندنا الليله.. فرحات قال.. /كان ماشدنيش الساعدي ع العشي جيب عشاك وتعالالي في الحوش اللي اجرته مؤقتا لعند مانكمل بني.. مسعود وهو مندهش قال.. /قصدك بتبني حوش هني!؟ هز فرحات راسه وهو يضحك.. مسعود قال بإبتسامه.. /معناها حق بتستقر في البندرايه.. فرحات قال بإبتسامه.. /معاش نقدر نفارقها المكان الوحيد اللي يلايمني.. فجاة سمعوا صوت اقامة الصلاه.. مسعود قال بفجعه واستعجال.. /خدتنا الدوة ونسيت الصلاة..نشوفك بعدين ان شاء الله.. ومشي فات بسرعه من جنبه وعيون فرحات تلحق فيه لعند ماتباعد عنه تبدلت ملامح وجهه للإمتعاض بعدين رد نظره القدام ورسم ع وجهه ملامح عاديه ومشي بطريقه لجامع البنداريه.. 🌿🌿🌿🌿🌿 بعد العصر.. قصر ذهيبه.. 🍃قدام جناح ربيعه.. كانت نزيهه واقفه وهي رافعه في حضنها بنتها وتقول لربيعه.. /شبعانه؟ ربيعه هزت راسها وهي مبتسمه ورافعه حاجبها.. نزيهه:غيرتيلها ورديتي بالك من لبسها زي ماوصيتك؟ ربيعه وهي مبتسمه نفس الابتسامه قالت.. /الحاجه هادي ندير فيها من غير ماتوصي.. نزيهه رفعت حاجبها وقالت.. /الحرص واجب.. ربيعه قالت بنفس الابتسامه.. /ماتوصيش حريص..وتوا ولي لجناحك وخلي البنت ترقد مرتاحه في سريرها.. وخشت وسكرت الباب في وجهها.. نزيهه غمضت عيونها محاوله منها لتهدئة نفسها بعدين فتحتهم ولفت ومشت لجناحها بغضب.. 🌿🌿🌿🌿🌿🌿 "صار انقلبت الآية!" قالت الجمله هادي وداد صديقه عزة بعد ماضحكت من قلبها لما سمعت كلامها عن سلامه.. عزة قالت بضحكه انزعاج.. /بلابرادة وداد.. وداد هدت ضحك بعدين قالت.. /بتتحملي زي ماهو تحملك مسكين.. عزة قالت بضيق. /لكن اني مستاحشة البلاد هلبه مستاحشة اهلي مستاحشة جونا..باهي اقل شي يخليني نحضر رمضان هني.. وداد سكتت وهي تفكر بعدين قالت.. /شن رايك تقولي لأمك تقنعه لكن من غير ماتقوله عزة قالتلي يعني وكأنها رغبتها هي بس.. عزة وهي تفكر في كلامها قالت.. /تو نقوللها..ان شاء الله يوافق يارب.. وداد قالت.. /ان شاء الله..ايه شن تخبرينا عن الاجواء في قصر ذهيبه.. عزة قالت بإبتسامه.. /استقبلونا احلى استقبال لما روحنا واليوم من الصبح كنت عندهم..مانحكيلكش ع جوهم يهبل ياودو حتى هما خاطري نحضر رمضان معاهم ع قد ماحكالي عنه سلامه.. وداد قالت بإبتسامه.. /تحضريه ان شاء الله تحضريه.. ضربتها عزة ع يدها وقالت.. /خلينا فيك انتي مافيش جديد؟ وداد تنهدت وقالت.. /مواضيع وماتمش اللي نتعرف عليه يطلع فيه عيب ماينقبل..اللي شخصيته ضعيفه..واللي بخيل..واللي مش واخدها جديات..واللي متخلف..عاهات يازوزو عاهات.. عزة قالت.. /تبي نصيحتي..فوتي المواويل هادي وركزي في القرايه وكان عندك نصيب في حد يجيك لعندك.. وداد هزت راسها وقالت.. /هو هذا..باهي قوليلي شن بديري في القرايه!؟ عزة قالت.. /تفاهمت اني وسلامه نراجو لعند ماشفاء تسكر عام بعدين نبدا نقرا ولما نطلع نخليها في حوش عمه عندهم مربية الاطفال ممتازة تهتم بيها ع عيون مرت عمه.. وداد:هادي الاردنيه؟ عزة قالت بإبتسامه.. /ماعرفتش حد بطيبتها وروحها الحلوة غير عمتي ربيعه بعد تعرفت عليها عرفت علاش هي وياها صاحبات.. وداد قالت.. /باهي كويس لقيتي من يهون عليك الغربه ويساعدك.. عزة قالت بإبتسامه.. /الحمد لله.. "عزة جيبي ودو وتعالوا اشربوا معانا القهوة" عزة قالت بصوت عالي.. /جايين..ناضت وقالت لوداد..هي نوضي.. ناضت وداد وقالت.. /زعمه خربوشتك قاعده فايقه.. عزة قالت بضحكه.. /اشبح.. ومشوا مع بعض طلعوا من دار عزة.. 🌿🌿🌿🌿🌿 "الحاونكي!!" غزلان بدهشة قالت اسم الحاونكي بعد اللي سمعاته من كريمه وكريمه قالت.. /تعرفي من اللي سمعته عنه ماتخيلتاش هكي بكل..كنت نتخيل في راسه اصلع من فوق وعنده شعر من الجناب وسمين عنده كرشه قدامه وتحت عينه اليمين خبشة واصله لوذنه ويلبس في سواري عربيه قهويه وبطاطيه. غزلان وهي تضحك قالت.. /هدا كله تخيلتيه من اسمه!؟ كريمه:ومن كلام الناس عليه..تي حتى سيارته تخايلتها مازدا ولادتسن"عكاريه" طلعت BMW مرة وحده..لا وفوق هكي من زباين مقهى "روما"..! غزلان قالت بإبتسامه.. /شخصية مميزة.. كريمه؛هلبه..هو صح شكله مش وسيم لكن جذاب وشخصية وعنده حضور قوي حتى مها مع انها رفضاته حسيتها تأثرت بيه هلبه،مشي باقي اليوم وهي مش مركزه في شي بكل..تقولي خايفه منه يديرلي حاجه لكن اني حسيتها خافت من نفسها.. غزلان قالت.. /وعندها الحق تخاف..مااعتقدش اهلها يوافقوا عليه مع انه تعدل وتغير هلبه ع حسب مانسمع من بابا وكريم لكن تغييره هدا مع الاسف مايقدرش يمسح ماضيه.. كريمه وهي تشوف للفراغ قالت بأسف.. /فعلا في قانون البشر الماضي الاسود لايمحى .. 🌿🌿🌿🌿🌿 "بعد العصر طلعوا" قالت وردة الكلام هدا وهي دخل في بوها لوسط شقتها.. عطوان وهو يمرر في نظره ع الشقه قال.. /لتوا ماكلمكش.. ورده وقفت وهي تقول.. /لما يحصل فرصه يكلمني..خش ياغالي خش قعمز. خش عطوان للصاله وقعمز وهي مشت وراه بعدين قعمزت جنبه.. عطوان قالت... /زعمه يطول اكثر من يوم؟ وردة:لامايقدرش خدمته وقراية ابراهيم..صعب.. هز راسه بعدين قال.. /ماتبيش تشربينا قهيوة!؟ ناضت وهي تقول بإبتسامه.. /من عيوني.. ومشت طول طلعت من حداه وخلاته يمرر في نظره ع المكان وهو متوتر ويفكر في اكثر سبب خلاه يجي يقعد معاها.. 🍃🍃🍃 "احترامي سيدي" رئيس مكتب التحريات في المكافحه قال.. /قعمز رائد محمود قعمز.. قعمز الضابط وهو يقول.. /خير سيدي جد جديد في حكاية الميناء؟ قاله بإستياء.. /جد جديد لكنه صادم ومربك.. بإستغراب قاله الضابط.. /شن عرفتوا سيدي!؟ تنهد وقاله.. /المعلومات الاخيره اللي وصلتني أكدت تورط عطوان الاشهب في صفقات مخدرات واسلحه تمت داخل البلاد تحديدا هني في الالف وخمسين.. الضابط قال بأسف.. /عطوان الاشهب نسيب عبد المولى بعيو.. قاله الرئيس.. /هكي بتتعقد الحكايه.. الضابط قال.. /انت متوقع ان عبد المولى ممكن يبدي حد عزيز عليه ع مصلحة البلاد! عبد المولى ونعرفه مافيش عنده غالي فوق البلاد وقوانينها..لو كان بوه مكان عطوان الاشهب يسلمه فورا بدون تردد.. الرئيس قاله.. /كل بنادم عنده نقطة ضعف وعبد المولى عيلته نقطة ضعفه يامحمود.. قاله:نعاود ونقولك سيدي عبد المولى لايمكن يبدي شي ع مصلحة البلاد اني اللي نعرفه كويس ليا معاه سنين طويلة سيدي.. سكت الرئيس وهو يفكر في كلام الضابط بعدين قال.. /بعد يروح من طرابلس يصير خير.. 🌾🌾🌾🌾🌾🌾 البندرايه.. ..في مربوعة حوش الساعدي.. كان الساعدي مقعمز مع ضيفه ع انفراد يحكي معاه في الموضوع اللي مأرق تفكيره ليه سنين.. 🍃رفع فرحات سبابته لأعلى عظمة انفه ساوا نظارته بعدين قال.. /الموضوع مش مستحيل لكن يبي وقت.. الساعدي:مش مشكله المهم النتيجه.. ابتسم فرحات وقال.. /بإذن الله حتكون نتيجة مرضيه تفرحك وتفرح زوجتك والعيله كلها.. الساعدي قال بإبتسامه.. /ان شاء الله.. دق باب المربوعه شافله الساعدي وقال.. /خش خش.. انفتح الباب وبعد ثواني خش محرز بسفرة العشي.. فرحات ضحك وقال.. /قتلك مانبي شي..اني راهو عندي مرض في المعده مانعين عليا الماكله هادي.. حط محرز السفره وهو يقوله.. /كان قلت راهو درنالك اللي تقدر تاكله.. هو قال.. /مانبي شي غير مية وتمر فقط هدا ماناكل في الليل.. الساعدي قال.. /اللي تبيه يجيك.. محرز قال.. /شويه بس..ومش بسرعه طلع من حداهم.. الساعدي قال بضحكه.. /غير اقرب ذوق ذواقه بس.. رفع سبابته وحركها بالرفض وهو يقول بإبتسامه.. /ابدا..نزل يده وقال وهو رافع حواجبه..مش حتعاني معاي انت بعدين.. ضحك الساعدي وقال.. /لاباس عليك لاباس عليك.. 🍃وقعد فرحات عندهم نص ساعة تانيه بعدين طلع من عندهم للمكان اللي بيقعد فيه بالإيجار.. وهو ماشي فات من قدام محل مواد غدائيه كانوا فيه الشيخ ابراهيم ومسعود يهدرزوا وهو يسمع لحديثهم.. "الحفله عليا اني يامسعود والله مانك حاط فيها حاجه آدم دايره ولدي راهو مش طالب عندي" "والله ماعارف شن نقولك ياشيخ..مادام انت تبي هكي باهي" "المهم يامسعود نعاود نوصيك اهتم بآدم من جميع النواحي ماتخليشي يهتم بحاجات تانيه ع حساب القرآن القرآن قبل كل شي يامسعود" "كلامك ماعندي مانقول فيه وحناخد بيه إن شاء الله" "إن شاء الله ربي يبارك فيك وفي ذريتك" "آمين آمين..بارك الله فيك" 🕸وهو اللي قاعد يسمع في حديثهم لما وصل في الحوش اللي بيقعد فيه وقف علي بابه وهو يقول بغضب.. "معليشي..معليش" 🌿🌿🌿🌿🌿🌿 متمدده ع سريرها في دارها وهي حاطه راسها ع الوساده وبتفكيرها سارحه في اللي صار معاها اليوم... كلامه قاعد يتردد ع مسامعها..نظراته بين عيونها..مش قادره تحوله من بالها نهائي.. غمضت عيونها وقالت.. /ياربي..تو اني مفروض نخاف منه يديرلي حاجه بعد رفضته مش نحس روحي مضايقه لإني رفضته..قصدك بالعقل بالعقل يامها راهو هدا كان راس كبير في التهريب وخريج حبوس ومش متعلم..ابتسمت وهي تقول..لكن شخصيته حلوة وطريقة كلامه تهبل هكي حسيته راجل مالي مكانه..تلاشت ابتسامتها وقالت..تي شن تقولي انتي مافكرتيش في فرق العمر بينك وبينك قريب خمستاشر عام كان مش اكثر.. رقدت ع جنبها الأيمن وحطت ايديها تحت خدها وهي تتفكر في كلامه.. 《 شوفي انتي عششتي في دماغي مش قادر نحولك منه بكل..من هداكا اليوم واني مش قادر نركز في شي من كثر مانفكر فيك》 ضحكت بخجل بعدين تنهدت..تبدلت ضحكتها لملامح الصدمه وهي تقول..تنهدت !..حي عليا!! وتسمع صوت دق ع باب دارها.. ناضت قعمزت وهي تقول.. /خش! انفتح الباب وخشت امها وهي تقول.. /باهي اللي قاعده نايضه.. رفعت حاجبها وقالت... /علاش!؟ امها برفعة حاجب قالت.. /فكرتي في الموضوع.. غمضت عيونها بنفاد صبر.. امها قدمت قعمزت قدامها وقالت.. /والله فرصه بنتي فرصة ماتتعوضش..مال وعلم وعيلة متسميه.. فتحت عيونها وقالت بإنزعاج.. /لكن شلافطيه ياماما ويدرهوا الكبد وكان خدوني ببخلوني نعيش غادي واني مستحيل نعيش معاي لو نموت.. امها ضيقت عيونها وهي تقول بشك.. /بنت اعترفي عندك حد ولا!؟ هي جي بين عيونها الحاونكي احمر وجهها وقالت.. /لاحد لاسبت..من الاخير ماما اني نبي نقرا قرايتي توا مانبيش نتزوج ولاننخطب.. امها وهي مركزه ع ملامحها ونبرة الارتباك في كلامها هزت راسها ومازال تشوفلها بشك بعدين مشت طلعت من الدار وسكرت الباب.. زفرت مها بخوف بعدين قالت.. /بكل ماما هادي..ورجعت حطت راسها ع الوساده ورجع عقلها يفكر في الحاونكي.. 🍃وهو لهالوقت قاعد في الميناء.. مقعمز ع كرسي مقابل البحر عيونه عليه وعقله سرحانه فيها.. يتفكر في كلامها..في اسلوبها..في ابتسامه وضحكتها.. زادت سيطرت عليه اكثر من قبل بس قلبه محروق من رفضها ليه ومن سبب رفضها ليه هو كان متوقع ولما صار اللي توقعه ماتحملاش ماتحمل فكرة انها مش ليه وممكن تكون لغيره.. مسح بإيديه ع وجهه بعدين خدي نفس وزفر وقعد يمرر في نظره ع المكان.. 🍃وفي مكان تاني بعيد عنه.. تحديدا الحوش اللي ساكن فيه بسام التركي.. كان مقعمز ورا مكتبه في داره..يقرا في قصص كريمه ويعاود.. مع كل كلمه يقراها يتخيل فيها قدامه هي اللي تسرد في القصة.. ابتسم وهو يتخيل في ردة فعلها لما تقرا جرايد الصباح اللي منهم جريده السبق..الجريده اللي تنشر فيها قصصها وهو حاليا اصبح كاتب مقالات فيها.. 🍀وطلع فجر تاني يوم.. فاقت كريمه ع صوت الآذان وفيقت خواتها صلوا الفجر بعدين اروى وثريا شدوا كتاباتهم وبدوا يراجعوا في دروسهم..وهدى ولت رقدت لأنها الوحيده اللي تقرا في الفترة المسائيه.. اما كريمه نزلت للكوجينه.. 🌸وين خشتلها ونزلت من الدروج ابتسمت وهي تسمع في الابتهالات الدينيه اللي طالع صوتها من راديو برنيه.. وصلت تحت وخشت عليهم وهي تقول بإبتسامه.. /صباح الفل.. هنادي وتعويضه وبرنيه ردوا.. "صباح الوردات..صباح الخيرات والليرات" مشت طول لهنادي وقالت.. /طابت خلاص؟ هنادي:توا كيف طابت.. مشت كريمه تجيب الفناجين وبرنيه حداهم دير في فطور زكيه.. 🍀مع ان زكيه قاعده في عز صحتها لكن كانت مدايرة لنفسها نظام صحي وماشيه عليه..🍀 خدت برنيه سفرة الفطور بعد ماجهزتها ومشت طلعت من حداهم.. "صبح عليك الورد ياحلو ياصابح" بدت الاغنيه هادي في الراديو وهنادي وكريمه يغنوا معاها.. 🌸كريمه:خل نطلع نشربها برا..بالله هنادي او مايوصلوا الجرايد جيبلي السبق.. هنادي قالت.. /حاضر ياللا.. خدت كريمه سفرة القهوة ومشت بإتجاه باب الكوجينه الخارجي ومشت بيها لمكانها المفضل بين الشجر وقعمزت وبدت تشرب بهدوء.. بعد عشرة دقايق جتها هنادي بالجريده عطتهالها ورجعت للكوجينه.. وهي طول فتحتها وبدت تقرا فيها..قرت الاخبار بعدين مشت للصفحة الخاصه بالأدب والثقافه.. لما وصلت فيها شافت عنوان مقال شد انتباهها.. "بين السماء والأرض" وبدت تقرا فيه..
(منذ قديم الأزل..كانت مقاييس الفروق بين البشر ماديه بحتة ولازالت إلى الآن.. يقيم البشر بعضهم بعضا بما يملكون من المال وبما وصلوا اليه من مراتب دنيويه ماديه وقليل هم الذين يأبهون لميزان الاخلاق والايمان.. الاانه في فترة العصر الذهبي "عصر الاسلام " جعل ميزان الاخلاق والايمان الميزان الوحيد المقيم للبشر.. مع اختلاف اصول الصحابه والمكانه الاجتماعيه والماديه لكل واحد منهم الا انهم اصبحوا سواء لايميزهم الاإيمانهم.. فلافرق بين عبد الرحمن بن عوف اغنى اغنياء قريش وبين بلال الحبشي الا بالإيمان والتقوى والعمل الصالح.. وماجعل عبد الرحمن بن عوف من المبشرين بالجنة هو ايمانه وجهاده بنفسه وماله "اعماله الصالحه" ليس بالأمر الهين انقلاب حال الانسان من الغنى للفقر بل هو امر مرهق جدا قاسي جدا ع النفس.. إلا ان عبد الرحمن عندما خسر كل مايملك في سبيل الغايه العظمى استطاع ان يتغلب ع اثار هذه الخسارة بثروته القلبيه قوة ايمانه التي جعلته يعود ليقف على قدميه ويعيد كل شي كما كان بل افضل مما كان عليه و استمر في الجهاد والبذل والعطاء مدى حياته.. هذا هو الفرق..هدا مايحدد مكانة كل منا في السماء والارض مقدار مانملك من ثروة ايمانيه واخلاقيه.. فبين من لايملك هذه الثروات وبين من يملكها فرق عظيم كالفرق بين السماء والأرض...) بسام التركي.. ▪▪▪▪▪▪▪▪▪▪▪ "شن فهمتي مها!؟" مها نزلت الجريده وهي تقول بإبتسامه فرح.. /واضحة يابنتي واضحة زي الشمس.. كريمه وهي تشوفلها بلهفه والدموع في عيونها قالت.. /باهي قولي شن الواضح زي الشمس! مها قالت بإبتسامه.. /يبيك تعرفي انه فهم انك خايفه منه وعارف سبب هالخوف..يبي يقول ان نظرته وافكاره تغيروا معاش زي قبل.. ضمت كريمه ايديها الزوز وحطتهم ع فمها وهي تفكر في كلام صاحبتها.. مها قالت.. /شن مازال تبي اكثر من هكي بعد ولى يكتب في الجريده اللي تنزلي فيها قصصك..شوفي حتى للطريقه اللي دارها بش يوصل فيك..يهبل ياكريمه.. نزلت كريمه ايديها وشافلها وهي تقول بقلق.. /مازال خايفه يامها..مرات هدا جو داره بش يوصل للي يبيه.. مها خدت نفس وقالت.. /كريمه حبيبتي..بسام لادورك ولاجاك اللي جمع بينكم صدفه صدفه مابنتيش فيها قدامه بنت هبله وعبيطه ساهل ينضحك عليها بكلمتين..هادي حاجه..الحاجه التانيه..ارجوك ياكريمه ارجوك الفكرة اللي واخدتيها ع نفسك الغيها من عقلك..انتي تهبلي وتجنني ياكريمه تنحبي هلبه مش شويه والله مانقولك في هالكلام مجامله وربي عالم.. تنهدت كريمه بضيق وقعدت ساكته وهي تشوف في الفراغ.. مها تنهدت بيأس بعدين طوت الجريده وهي تمرر في نظرها قدامها لعند ماثبتهم ع شخص لما شافاته قالت بضحكه.. /بالدور يوم اني ويوم انتي.. شافتلها كريمه بإستغراب.. مها قالت بإبتسامه.. /حصل عليك خلاص ماعندك وين تهربي.. وجهت كريمه نظرها وين ماتشوف مها وتجمد في مكانها.. ضحكت مها وناضت وهي تقول.. /باي.. ومشت وخلتها قاعده متسمرة وهي تشوف لبسام اللي كان مقعمز بعيد شويه يشوفلها بإبتسامه.. لحظات وناض قدملها..مع كل خطوة يقدمها كانت دقات قلبها تزيد تتسارع من التوتر والخوف.. وصل فيها ومشي قعمز في الطرف التاني من المقعد.. اتكى بمرافقه ع ركابه وشبك اصابعه في بعض وقال.. /قاعده خايفه؟ كريمه زادت ضمت ايديها ببعض وقالت.. /معقوله بسرعه هكي!انت امتى عرفتني اصلا؟ قاللها وهو مبتسم.. /من اول يوم قابلتك فيه عرفتك..شدتيني ليك هلبه شفت فيك اللي ماشفتاش في غيرك.. قالتله:وشن هو اللي شفته؟ بنفس الابتسامه قال.. /طبيعيه...انسانه طبيعيه بعيد عن التكلف والتصنع والتظاهر.. سكتت وهي تفكر في كلامه وهو لما شافها التزمت الصمت قال.. /تعرفي..امي ليها فترة تجري في جرتي تبيني نخطب تقولي خليني ندورلك والله لما نجيبهالك زي ماتبي وين تجيني جايبلتي موضوع المواصفات للبنت اللي تختارها بعيده هلبه عن اللي اني نبيها.. كريمه قالت بضحكه.. /اكيد امك تبيها حمرا بيضا وطويله وعيونها ملونات وشعرها اصفر.. ضحك وقال.. /لاوالله ابدا..امي كل همها تجيها كنه تهنيها ع ولدها الوحيد.. كريمه عقدت حواجبها وقالت.. /يقولوا وحيد امه خلوه يقعد عند امه.. قال بضحكه.. /من اللي قال! ضحكت وقالت.. /اني.. بسام قال.. /ماتصديقهاش اني متاعك هادي كل اللي تقولك فيه دوة مافيش منها.. ابتسمت بضيق وقعدت ساكته.. وجه نظره ليها وقال.. /نبي نخطبك.. شافتله بفجعه.. هو قال بتوتر.. /ارجوك كريمه ماتهربيش واسمعيني للآخر..انتي تبي تعرفيني ولا تبي تطمنيلي خلاص خليني نخطبك وفي فترة الخطوبه تتعرفي عليا كويس.. كريمه غيرت نظرها عنه وهي خايفه ومضايقه.. سكت شويه بعدين قال.. /قاعده خايفه مني!؟ تنهدت وقالت.. /منك ومن غيرك..منك لأني نعرف ان مافيش حد يتغير بسرعه هكي،الشخص المتمسك بوجهة نظره ومبادئه صعب يغيرهم بسرعه..ورد بالك تقولي الاعجاب ولاالحب ولاغيرهم يغيروا..الواقع يقول غير هكي يابسام.. هو كان يسمع في كلامها بإنتباه لكن لما نطقت اسمه حس بشعور حلو حلاوته غمرت قلبه وقلبه خلاه يقول.. "وكأني اول مرة نسمع اسمي" شافتله بضحكه وقالت.. /هدا اللي سمعته من كلامي! قاللها بإبتسامه حب.. /وكأني ماسمعتش غيره.. ابتسمت وقالت.. /اني نحكي جد بسام.. قاللها:معاش تقولي اسمي بش ماننساش الكلام اللي ينقال قبله وبعده.. ضحكت بخجل وهي حاسه بقلبها قاعد يرفرف وسط ضلوعها.. هو ابتسم وقال.. /اني توا وليت مصر اكثر من قبل لو مشيتي عني وخليتيني حنمشي لبوك طول ياكريمه.. تلاشت ابتسامتها وخلت محلها ملامح الضيق والخوف.. عقد حواجبه وقال.. /مانتوقعش راجل بشخصية بوك يرفضني.. خدت نفس بعدين قال.. /ايه بابا مايرفضكش..لكن..وسكتت.. وهو عاقد حواجبه قال.. /من ممكن يرفض الموضوع من عيلتك؟ قعدت كريمه ساكته وهي مضايقه لأبعد حد وعيونها تعبوا دموع.. هو فكر للحظات بعدين قال.. "امك؟" تنهدت كريمه بضيق وقالت.. /للأسف عقلية امي تشبه عقلية هلبه شخصيات كتبت عنهم في رواياتك.. وجه نظره القدام وقعد ساكت.. هي دامت النظر ليه للحظات بعدين قالت.. /شفت ان الموضوع مش ساهل وان في حاجات ماتتغيرش بسرعه ومرات ماتتغيرش بكل.. ناضت ومشت وخلاته وهي شاده دموعها بقوة وهو يلحق فيها بنظراته المستاءة شافها وصلت لصاحبتها بعدين خدتها ومشت.. 🍃مها بقلق قالت.. /شن صار كريمه؟ كريمه ابتسمت بألم وقالت.. /ماصار شي..هي سقدي روحك قريب تبدا المحاضرة..وزادت سرعت خطواتها ومها تمشي معاها وهي تشوف لحالتها... 🌾🌾🌾🌾🌾 الساعة الثانية عشرا والنصف قبل الظهر.. خش ريان بحواء وآدم لحوش كمال البندار وهو يقول.. 🌱"حواء بري خشي" حواء قالت.. /حاضر..ومشت بسرعه خشت داخل الحوش.. ريان خدي آدم من يده وقال.. /بكري سلطان قال بعد تروحوا راجوني في المربوعه.. آدم قال.. /علاش!؟ ريان:ماقالش.. ومشي بيه لباب المربوعه الخارجي خشوله وسكر ريان الباب.. 🌾وقعدوا في المربوعه مقعمزين يراجوا في سلطان وريان يسمع ع آدم في جزء من سورة النبأ.. ويخش عليهم سلطان اللي لما شافهم قال.. /شيوخ.. آدم قال.. /اني زعيم مش شيخ.. ضحك سلطان ومشي قعمز جنبه حط يده ع راسه ومسح ع شعره وهو يقول.. /الله يبارك عليك ياآدم الله يبارك..آدم انت ختمت جزء عم ولا؟ آدم:ايه.. سلطان قال.. /واليوم بيديرولك حفله ولا؟ آدم قال.. /بتجي ولا؟ سلطان قال.. /نحاول..كان ماجيتش نبيك تاخد هديتك مني من توا آدم:شن هي؟ سلطان:انت في شن خاطرك ترا؟ شاف ادم لسلطان لحظات بعدين قال.. /نبي حصان.. ضحك ريان وسلطان قال بإبتسامه.. /واني بنهديك حصان.. ناض آدم وقف وقال وهو مندهش.. /حقه!؟ ضحكوا ريان وسلطان اللي قال بعدين.. /ايه..تمشي معاي للحوازة تشوفه؟!.. آدم قال بحماس ولهفه.. /ايه..هيا هيا نوض توا.. ناضوا سلطان وريان وهما يضحكوا.. بعدين مد سلطان يده لآدم وقال.. /هيا.. شد آدم يده وهو قال لريان.. /خش اعطيهم علم وتعالى بسرعه.. ريان هز راسه ومشي بسرعه طلع من المربوعه من بابها الدخلاني وسلطان وآدم طلعوا من الباب الخارجي.. °°°°°°°°°°°°°°°° مرزعة كمال البندار.. في اسطبل الخيول.. كان سلطان واقف مع ريان وآدم يوري فيه الهديه متاعه.. آدم وهو يتأمل في المخلوق اللي قدامه بشغف قال.. /صغير.. سلطان؛هذا مهر يازعيم لما يكبر يولي حصان..زيك انت توا راجل صغير لما تكبر تولي زعيم كبير.. ابتسم ريان وهو يشوف لسلطان.. آدم؛نركب عليه عادي؟ سلطان قال.. /ايه عادي.. وخدي سلطان المهر طلعه ومشي بيه بإتجاه الساحه وريان وآدم مرافقينه.. لما وصلوا للساحه.. رفع سلطان آدم وركبه ع المهر وهو يقوله.. /شد كويس.. نفد آدم كلام سلطان بعدين وجه نظره القدام شويه وقال.. /مش طويل..نبيه طويل نبي نشوف من فوق.. سلطان قال بضحكه.. /تو يكبر وتكبر معاه وتولوا طوال الزوز وتشوف من فوق هلبه.. سكت آدم وهو يشوف للمهر وريان اللي يمشي معاهم كان يشوفله بإبتسامه.. سلطان مرر نظره ع المهر بعدين شاف لآدم وقال.. /سميته اسم ان شاء الله يعجبك يازعيم.. آدم قال.. /شني!؟ سلطان قال.. /الهزيم.. آدم قال:شن معناه؟ ريان قال.. /عادي نجاوب اني؟ سلطان قال بإبتسامه.. /جاوب ياشيخ.. ريان شاف لإدم وقال.. /الهزيم صوت الرعد.. سلطان قال.. /صح..وصوت جري الحصان يسموه هزيم..وصوت ريح القوية يسموه هزيم..وكلمة هزيم اصلها الفعل هزم واللي معناه كسر شوكة العدو.. ريان؛كسر الله شوكه عدونا الآزلي المبين.. ضحك سلطان وقال.. /ماشاء الله ماشاء الله.. وآدم يسمعلهم بصمت وهو يراقب في ملامحهم ويفكر في كلامهم اللي ماقدرش يفهمه كله.. 🌿🌿🌿🌿🌿🌿 خدت شنطتها من ع الزيانه بعدين مشت طلعت من الدار وسكرت الباب بالمفتاح وخدت المفتاح حطاته في الشنطه بعدين مشت بإتجاه الصاله.. خشتلها لقت بوها فيها يتفرج ع الأخبار قالتله.. /ماتبي نديرلك شي قبل لنطلع ياغالي.. ابتسم بوها وقال.. /بري بنتي بري ربي يحفظك.. قالتله بإبتسامه.. /ويطول في عمرك..بالسلامه..ومشت بإتجاه باب الشقه وهي تسمع فيه يقول.. "في أمان الله" 🍃هو قعد في مكانه يسمع في صوت الباب لما انفتح وتسكر.. لحظات وناض ومشي طلع من الصاله وتوجه لدار النوم.. لما وصل في بابها حط يده ع المقبض وجي بيفتح الباب لقاه مسكر بالمفتاح.. انتابه شعور بالغضب الشديد خلاه يخبط الباب بقوة بعدين لف ومشي بيولي للصاله وهو يشتم ويلعن.. اول ماوصل في الباب سمع الهاتف يرن قال بعصبيه.. /اكيد الكلب هداكا..خله يرن من هني للعام الجاي.. وخش للصاله.. 🌾🌾🌾🌾🌾 عصرا.. في مسجد الرجل الصالح.. اقيم الاحتفال بختم آدم ولد الخمس سنوات لجزء "عم".. كانوا الشيخ ابراهيم مع مسعود وبعض من الطلاب اللي في سن الفتوة يعولوا ع مائدة الاحتفال.. والاصناف ع المائدة كان يتفرج عليهم ريان وهو يبلع في ريقه،مش قادر يقاوم الحلو يبي ياخد منه اي حاجه.. حاول يمنع نفسه لكنها كانت اقوى منه قدم وهو يمرر في نظره في حواليه خايف حد يشوفه.. ولما وصل في الحلويات نزل ومد يده للنوع اللي جي في خاطره.. فجأه جاته خبطه ع يده شافه يمينه بفجعه.. آدم وهو يشوفله ببرود قاله.. /تحساب ماحد يشوف فيك! ريان وقف ع حيله وقال.. /نذوقها بس مش واكلها كلها.. آدم اشر ع الكعك المالح وقال.. /خود هدا.. شاف ريان للكعك المالح بعدين رد نظره لآدم وهو يشوفله بإمتعاض.. آدم مشي للكعك المالح خدي منه طرفين بعدين رجعله وقف قدامه مدله وحده وقال.. /كول.. خدي ريان كعكه وقال وهو مبتسم بإمتعاض.. /هاه..وبدي ياكل بغيظ.. وآدم يشوفله بنفس البرود وهو ياكل.. وعيون ابراهيم تشوفلهم وهو مبتسم بعديت بدي يتلى في آيه من سورة الزخرف.. {الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ} 🌿🌿🌿🌿🌿 قصر ذهيبه.. في فيرندا جناحها واقفه مربعه ايديها نظرها ممتد للأفق وعقلها رافعها في عالم غير العالم.. اليوم بالذات من لما ناضت الصبح وهي حاسه بشعور مش مفهوم..مرة تحسه شعور فرح..مرة وحشه..مرة حنين.. وحاليا هي حاسة بحنين رهيب لحد مافيش يوم غاب ع بالها.. 🍃ربيعه والدموع في عيونها تنهدت وقالت.. /اللي بنقولهولك توا ياربي مانقدرش نقوله لغيرك بش مايقولش عليا مهبوله..ياربي..حطت يدها ع صدرها وقالت..مش عارفه علاش قلبي مش مصدق ان ولدي مات..حاسه قاعد عايش..حاسه هلبه..نزلوا دموعها وهي تقول..ماهو يقولوا قلب الأم يحس بضناه يقولوا وانت الاعلم ياربي..مسحت دموعها اللي رجعوا نزلوا وهي تقول..ياربي وانت اللي تعرف كل شي وتشوف في كل شي..كان حق..بلعت ريقها وكملت تقول..كان حق ولدي قاعد حي..ياربي ياربي خليه يعيش مرتاح عمره كله حتى لو قعد بعيد عني المهم يكون مرتاح ومتهني..ياربي يارب.. سمعت صوت بكاء أصيل مسحت دموعها بسرعه بعدين خشت وسكرت باب الفيرندا.. 🌾🌾🌾🌾 "ماشاء الله ع وليدي ماشاء الله" زاهيه قالت بضحكه.. /هاتيه خل نلود عليه.. مسعود قال.. /لايام معاش ديريها العادات هادي الشيخ ابراهيم قال كلها حرام وشركيات. زاهيه قالت.. /الستر ياربي! حويته ضحكت وقالت.. /اقري عليه قرآن ياعمتي.. مسعود:اقري آية الكرسي والمعوذات يام.. عقدت حواجبها هي تقول بإبتسامه.. /تعالى دومه تعالى.. مشي بسرعه لحناه خداته في حضنها وبدت تقرا عليه.. حويته غيرت عيونها عنهم وقالت.. /بعتوا للدكتور حصته من العشي؟ مسعود قال.. /مالا شنو..هو الأول.. 🕸🕸🕸 في مكان خالي في البندرايه.. كان واقف يتفرج ع الكلاب الضاله وهي تاكل في حصته من العشي الختمه.. غير عيونه وهو يسمع في حديث قاعد يدور بين البنت وبوها.. 🍃" مرات نوض في الليل نحس بدوخه ولانتعب خليك بايته حداي هني سلم بنتي" وردة قالت بإبتسامه.. /حاضر وبيي حاضر غير راجي نجيب شرشاف ومخده.. ومشت طلعت من حداه غابت للحظات بعدين رجعت بالغطاء والوساده ومشت قعمزت بيهم ع وحده من الفراشات.. 🍃وبدي بوها يهدرز عليها ويجيب في ذكريات الماضي.. وكل مايطلع من سيرة يخش في سيرة لعند مالاحظ ان النوم غلبها ومعاش قدرت تقاومه.. وهو قعد في فراشه لعند ماعدا وقت لاباس بيه يخليه يتأكد انها غطت في نوم عميق.. حول الغطا وناض بهدوء ومشي طلع من الصاله متوجه لدار النوم.. وين وصل فيها لقي بابها مردود فتحه وخشه ورده وراه بعدين فتح الضي ومشي طول بإتجاه الدولاب وقعد يدور ع ركن عبد المولى لعند مالقاه.. واول ما بدي يفتش فيه لقي اللي كان متوقعه ملفات تخص شغل عبد المولى موجوده فيه.. لكن لما مد يده بياخدهم جمد في مكانه لما سمع صوت بنته وهي تسأل فيه.. "شن دير!!؟"
...يتبع...
☆ليالي الشتاء الباردة دفئوها بركعه واذكروني بدعوة☆
Oops! This image does not follow our content guidelines. To continue publishing, please remove it or upload a different image.
