عاشروهن بالمعروف
ج ٩ النهايه
عاشروهن بالمعروف
النهايه 🌹🌹
رجعت نوال وياي للبيت وسمعت احلى خبر بحياتي
سعاد مچانت متاكده من نفسها حامل راحت الدكتوره حللت طلعت سالب يعني مو حامل والدكتوره كاتبتلها ادويه ومااعرف شنو
اقروا مذكرات نوال من سمعت الخبر (ماقصرت مولاتي زينب اربع اشهر ادعي بحضرتها أن سعاد متحبل من رجلي غدرتني دخلت لبيتي اكلت وشربت. وغوته وحرگت گلبي ممنونه منچ مولاتي ماخاب من تمسك بكم)
اني ردت فعلي بالنسبه السعاد جربت الحياة وياها وجبرت نفسي علمود طفل لكن الله ماراد وسعاد همين متحبني وزواجي منها خانگني الله انطاني فرصه ثانيه اصحح الخطأ وحتى غرفتها مدخلتها من يوم الي رجعت نونه من سوريا
اتفقت وياها على الطلاگ وهو بس عقد شيخ وطلگنا شيخ وانطيتها المؤخر مالتها وچانت محتاجه سياره لان سيارتها تعبانه اشتريتها وحده وسديت هذا الجرح النازف الي سببته لنونه وشلت فكرة الاطفال من راسي مدام الله مرايد احمده على باقي نعمه زوجه وصحه والبيت وكلشي واهم شي نونه مااگدر بدونها جربت وندمت
انتقلنا لولايه ثانيه وخلينا البيت بالايجار والمحل بعناه اشترينا بيت بالولاية الجديده وامورنا الماديه ممتازه نونه ماخليتها تشتغل وحتى اني اشتغل قليل نطلع نفتر نسهر للصبح اني وياها
صارت سنه ٢٠٠٥ اشتاقينا للعراق ولاهلنا واعرف اهلي راح يفتحون موضوع الاطفال من البدايه اي واحد يسالني اجاوبه اثنينه ميصير عدنا ودنعالج لان تعرفون موقف امي من زوجتي
كانت ايام المشايه رحنا النجف ومشينا ويه المشايه للضريح المقدس بكربلاء نونه الطريق كله تبجي واني ادعي وصلنا للحسين كان زدحام وملايين الزوار زوجتي مگدرت تدخل للشباك بس اني دخلت ادري الي طلبته مستحيل حلفت الحسين برقيه وتوسلت بجاهه عند الله وهاي الملايين الجايه كلها جايه بامل وحب الله ونبيه وذريته .
وجاني رد الحسين من رجعنا لامريكا دكتور اني مراسله من زمان وحچالي عن تقنيه جديده لاطفال الانابيب بوكتها وزارة الصحه الامريكيه مموافقه عليها وهسه وافقت وردنا نكون متطوعين لهاي التجربه العياده بواشنطن ومن البدايه گالنا النسبه ضعيفه حتى ميصير عدكم احباط وبدت التجربه وعلى أساس يزرعون اكثر من جنين لكن الزرع نجح بجنين واحد ونولدت رقيه سنة ٢٠٠٦ طفلة انابيب من نوال ومني
عمرها هسه ١١سنه
قبل ايام احتفلنا بعيد ميلادها وشفت نونه تكتب بدفتر قديم ومشگك ولازگته الف مره سألتها انطتنياه مذكراتها قريته ولو كله غلط ومسبه ومن البدايه اول مشافتني گايله عليه مخبل
عادي مسموح الها هاي حبيبتي وزوجتي وبت عمي وام رقيه الغاليه ومن شفت مذكراتها حبيت اكتب قصتي
يمكن تكون السبب وتنطي امل لشخص يائس او صابر اوموجوع ترى الامل بالله موجود ورحمته واسعه
وايضا قصتي ردتها اعتراف من رجل بفضل المرأة وتضحياتها شكرا ورعاكم الله
