#وردة الياسمين # .... بقلم : أميرة عادل
الحلقة السابعه.....
خلصت الخطوبه وروحوا كلهم وهما مبسوطين قووووي فيما عدا اتنين .....
...........................................................................................................................
دخلت يارا عند ياسمين اوضتها ...(ما هي من ساعة ما يسرا بقت بتبات عند مامتها ويارا احتلت اوضة يسرا وبقت ياسمين في اوضه ويارا في اوضه ) ... المهم
يارا: ياسو ..مالك كنتي راجعه متضايقه كده ليه في الخطوبه ...حتى ويامن بيوصلنا كنتي ساكته ومش بتتكلموا زي عادتكم
ياسمين: عادي يعني يا يارا ... كنت تعبانه
يارا : مش عليه انا.... فيه ايه
ياسمين : اصل يامن قالي .....وحكت لاختها كل اللي حصل من ساعة ما بداؤا يتمشوا لغاية ما سابته وهي متضايقه
يارا: مممممممم.....من واقع خبرتي في الحياه ..احب اقولك ان يامن بيحبك
ياسمين: خبرتك في الحياه !!! .. ويامن بيحبني انا !!!... ده انتي بتخرفي أحلى تخريف ههههههه
يارا : يا بنتي واضح جدا انه بيحبك بس هو نفسه مش عارف
ياسمين : لا والله ...يعني هو بيحبني وهو مش عارف وانتي اللي عارفه ههههههه...روحي نامي يا يارا عشان شكلك تعبانه
يارا : فكري فيها كده ..بقاله فتره بيتضايق من كلمة اخوات ..واتضايق قوي لما عرف ان جالك عريس ..واتضايق لما كنتي بترقصي ...يبقى ليه كل ده
ياسمين : معرفش ومش عايزه اعرف...انا يامن بالنسبه لي صديق ومش عايزه اخسره
يارا : وتخسريه ليه بس...
ياسمين : عشان انا مبحبوش
يارا : والله بدأت اشك في الموضوع ده كمان
ياسمين مسكت مخده ورمتها على يارا
ياسمين : انتي النهارده بتقولي اي كلام
يارا بتضحك : بكره كل حاجه هتبان وهتعرفي اني عندي حق
ياسمين : طب ياختي ..يالا من غير مطرود عايزه انام
يارا : تصبحي على خير ...ومتفكريش كتير ..سيبي الايام هي اللي تفكرلك
ياسمين: هههه .... ده ايه الكلام الكبير ده
يارا (بتمثل كانها بترفع ياقه قميص لابساه ) : مش اي حد يابنتي
ياسمين : هههههه .....طب يالا بيتك بيتك
يارا : تصدقي انا اللي غلطانه اني جيتلك اوضتك ...بعد كده هتيجي انتي تتحايلي عليه عشان اقعد معاكي واديكي خبراتي
ياسمين بتدور على حاجه ترميها عليها ...يارا ضحكت وجريت دخلت اوضتها تنام.....اما ياسمين ..قامت شالت المخده وحطتها على السرير ونامت على السرير وفضلت تفكر كتيير في كلام يامن وكلام يارا ...لحد ما تعبت من كتر التفكير واخدت مخدتها وحطتها على راسها كانها بتسكت الافكار....لحد ما نامت
...........................................................................................................................
اما عن عمرو .... اول ما وصل البيت غير هدومه واتصل على يسرا
يسرا كانت قاعده مع مامتها ..لقت موبايلها بيرن ...شافت لقيته عمرو ..بصت لمامتها واتكسفت
مديحه عرفت ان اللي بيتصل عمرو راحت قالتلها
مديحه : روحي يا حبيبتي كلمي خطيبك من بره
يسرا قامت باست مامتها وخرجت عشان ترد على عمرو
يسرا : الو
عمرو: احلى الو سمعتها في حياتي
يسرا : ياسلام ..مش قوي كده
عمرو : لا كده واكتر من كده كمان ..كنتي نايمه ولا ايه
يسرا : لا ابدا ...بس كنت قاعده مع ماما ..وعلى ما سيبتها وطلعت رديت عليك من بره
عمرو :مممممممم....يعني انتي قاعده لوحدك دلوقتي
يسرا : اه ليه !!!!
عمرو : بسال بس عشان اعرف اتكلم معاكي براحتي
يسرا (بخضه ) : براحتك ازاي يعني
عمرو ( بضحك ) : انتي قلقتي كده ليه ...هههه....وحشتيني على فكره
يسرا : بكاش قوي على فكره
عمرو : انا بكاش ... طب الله يسامحك انا زعلان منك
يسرا : لا متزعلش خلاص
عمرو : لا لازم تصالحيني
يسرا : واصالحك ازاي بقا
عمرو : تصالحيني ازاي !...تصالحيني ازاي! ....لقيتها
يسرا (برقه ) : ها ازاي !!!
عمرو (بخبث ) : ابعتيلي بوسه يالا ...
يسرا ( برقت ) : نعممممممممم
عمرو (بضحك ) : ايه مالك
يسرا (بارتباك ) : انا برضه اللي مالي ..انت قليل الادب على فكره ويالا اتفضل اقفل بقا
عمرو (بضحك ) : طب استني بس ...هههههه... انا بس بحب اشوفك وانتي مرتبكه ومكسوفه كده ...ياه كان نفسي اشوفك قوي دلوقتي ههههه
يسرا (بدلع ) : بقا كده ...طب انا اللي زعلانه منك
عمرو ( بحب ) : وانا مقدرش علي زعل قلبي مني ابدااا
يسرا (بضحك ) : يبقي تصالحني
عمرو (بخبث ) : وهترضي بالطريقه اللي هصالحك بيها
يسرا بسرعه : لا انا مش زعلانه اصلا
عمرو : انا بقول كفايه كده ونكتب الكتاب
يسرا ( بضحك ): كفايه ايه ده احنا خطوبتنا كانت النهارده يابني ههههه
عمرو : ابنك ؟!!!! هعديها بمزاجي ..بكره انا هاجي لطنط عشان نكتب الكتاب
يسرا : والله مجنون ههه
عمرو (بحب ) : مجنون بيكي
نسيبهم يكملوا كلام بقا هييييييح.......
........................................................................................................................
روح يامن وسميره مع آسر ونورا على بيتهم عشان يباتوا معاهم ويسافروا الصبح
بعد ما غيروا هدومهم وهما قاعدين سوا ...
سميرة : انت سبت الخطوبه ورحت فين يا يامن
يامن : كنت بعمل تليفون ..واتمشيت شويه
سميرة : اصلك اتأخرت قووي
يامن : عادي بقا يا ست الكل
سميرة : انت في حاجه مضيقاك يا يامن
يامن : لا ابدا يا ماما ..مفيش حاجه
نورا : آسر .. ما تشغل لنا الفيديو بتاع الخطوبه اللي صورته خلينا نتفرج
سميره : اه يالا يا آسر خلينا نتفرج
آسر : هو انتوا مش لسه كنتوا هناك
نورا : شغله يالا خلينا نتفرج ونركز براحتنا ههههه
آسر : حاضر يا ستي..
شغل آسر الفيديو بتاع حفله الخطوبه على التلفزيون وقعدوا يتفرجوا كلهم
يامن وهو بيتفرج بقا مركز مع ياسمين في الفيديو وسرح فيها فاق على صوت نورا
نورا : بجد يا ماما ...اما دي حكايه عجيبه
سميرة : اه يا بنتي والله زي ما بقولك كده ....انا حتى استغربت لما لقيتها جايه تكلمني انا ومكلمتش مديحه ...بس قلتلها اني بكره ان شاء الله هقول لمديحه وابقا ارد عليها
نورا : ربنا يعملها اللي في الخير ..ياسمين تستاهل كل خير ...انا لو عندي اخ ولد مكنتش سبتها تضيع من ايدي ابدا
يامن : هو ايه الموضوع بالضبط ..ما تفهمونا بدل ما احنا عاملين زي الاطرش في الزفه كده ولا ايه يا آسر هههه
آسر : اه صحيح ..ايه الالغاز دي
نورا ( بتضحك ): اصل واحنا في الخطوبه جت طنط عفاف ..عارفينها قريبتكم دي ..هو انا الصراحه معرفش تقربلكم ايه صحيح ...
يامن (باهتمام ) : يا ستي مش مهم تقربلنا ايه ...المهم كملي
نورا: ممم شكلك مهتم بالموضوع
يامن :لا ابدا ولا مهتم ولا حاجه ..عادي يعني ...مش عايزه تكملي بلاش
سميره بتحكي ..... فلاش بااااك
عفاف : ازيك يا سميرة عامله ايه يا حبيبتي ...والله ليكي وحشه
سميرة : اهلا يا عفاف ...عاش من شافك يا حبيبتي
عفاف : بقولك ايه ياسميره عايزاكي في موضوع
سميرة : خير يا عفاف أأمريني
عفاف : الامر لله وحده...هي ياسمين بنت مديحه مخطوبه ولا حاجه
سميره : لا يا عفاف ..مش مخطوبه ولا حاجه ..ايه جايبالها عريس هههههه
عفاف : ايوه انتي بتقولي فيها ...ابني محمد اللي بيشتغل في السعوديه ..ايه رايك
سميرة : وهو شافها ولا يعرفها منين
عفاف : ياستي هو نازل اجازه الاسبوع الجاي ..اجيبه ونروح يتقابلوا ويشوفوا بعض
سميرة : ربنا يعمل اللي فيه الخير ..طب انتي عايزه مني ايه
عفاف : بصي انا مكسوفه اروح انا افاتح مديحه ...فانتي كده قوليلها وشوفي رايها..في قبول ولا لأ ..عشان ما اكسفش نفسي يعني ...وابقي بلغيني ...ممكن
سميرة : طبعا ممكن يا حبيبتي ..ياسمين دي زي بنتي بالضبط ...انا هقول لمديحه وابقا اكلمك
بااااااك
سميره : بس يا سيدي ادي كل اللي حصل
نورا : وانتي هتعملي ايه يا ماما
سميرة : يومين كده وهكلم مديحه اسالها وأرد على عفاف ...
نورا : ربنا يعمل لها اللي فيه الخير يارب
يامن سمع وفضل ساكت وفضل قاعد معاهم شويه بس عقله مش معاهم وشويه استأذن عشان يدخل ينام
دخل يامن الاوضه وعمال يفكر وبيكلم نفسه وهو مبتسم: وبعدين معاكي يا ست ياسمين النهارده ..مش عايزه تطلعي من دماغي ليه...والله انا خايف اكون فعلا ح...وسكت مكملش ...بس اترسمت على وشه ابتسامه وراح في النوم
.............................................................................................................................
سافر يامن وسميره تاني يوم الصبح على اسكندريه ولما وصلوا.. طلع يامن مع مامته وطلع الشنط ..وبعدين
يامن : ماما انا هنزل شويه ..
سميره : رايح فين يابني ..ده احنا لسه واصلين
يامن : معلش بقى يا ست الكل ... أصل البحر وحشني وعايز اتمشى عليه شويه ...مش هتاخر يا ماما ...
باس راسها ونزل
سميرة في سرها : قلبي حاسس ان فيك حاجه يابني ..ربنا يهديلك الحال يارب ويراضيك زي ما انت مراضيني
.............................................................................................................................
نزل يامن اتمشى علي البحر وبعدين قعد ...ومسك موبايله واتصل بياسمين
ياسمين( كانت نايمه فردت بنوم وهي مش عارفه مين ) : الو
يامن : سكت شويه
ياسمين (فاقت شويه ) : الو مين
يامن : الو يا ياسو ..انتي لسه نايمه ولا ايه ...انا يامن
ياسمين (بزعل) : اه اهلا يا يامن
يامن : ايه اهلا يا يامن دي
ياسمين: امال عايزني اقولك ايه
يامن : انتي لسه زعلانه مني
ياسمين : انت شايف ايه
يامن : شايف ان قلبك اسود قوي
ياسمين : يالا ...... بجملت الحاجات اللي قلتها
يامن (برقه ) : خلاص يا ياسو ...انا اسف ...والله انا مش عارف كان مالي امبارح ... وجت معاكي انتي العصبيه كلها
ياسمين: ..............
يامن : مش هتردي عليه طيب ..يا ستي انا عارف اني غلطت امبارح .. بس انا عارف ياسمين صاحبتي وحبيبتي هتسامحني
ياسمين اول ما سمعت حبيبتي ...قلبها بقا بيدق جااامد قوي .....اما يامن فاستغرب اللي قاله ده ....بس كمل عادي عشان يداري الموضوع
يامن : ها يا ياسو سماح المره دي .. ميبقاش قلبك اسود كده .... لو ما سامحتينيش هقوم ارمي نفسي في البحر دلوقتي وانا بعرف اعوم وهتبقي انتي السبب ههههههه
ضحكت ياسمين : ههههه ..خلاص مسامحك .. ولو اني كنت زعلانه منك قوووي ... انا يا يامن تقولي بعمل ك...
قاطعها يامن : خلاص بقا متفكريش في اللي فات خلينا في اللي جاي
ياسمين: ماشي .... عشان تعرف بس ان قلبي ابيض وزي الفل هههه ... مش اسود زي ما ناس بتقول
يامن :هههه... ياساتر...
ياسمين : انبسطوا في الخطوبه امبارح ؟؟
يامن : اه كانت جميله قوي ...عقبالك
ياسمين : ميرسي ..عقبالك انت كمان
يامن : صحيح .. امبارح قعدنا شفنا الفيديو اللي آسر كان مصورة حلو قووي
ياسمين: بجد خليني ابقا اكلمه عشان ناخده منه
يامن (بحنان) : كان شكلك حلو قوووي امبارح
ياسمين (بكسوف ) : انت بتوزع مجاملات كتير اليومين دول ولا ايه ...عموما .. متشكرين يا سيدي ... دي اقل حاجه عندي ههه
يامن : انا بتكلم جد على فكره مش بجامل
ياسمين (عايزه تغير الموضوع عشان حست انها مكسوفه قوى ): انتوا سافرتوا ولا لسه
يامن ( بابتسامه لأنه فاهمها ) : اه سافرنا من بدرى وانا بكلمك من على البحر اهه
يامن : إلا صحيح لسه مستنيه عريسك اللي هيجي يخطفك على الحصان الابيض .. ولا ممكن توافقي على جواز تقليدي
ياسمين : هههه انت كل شويه تسألني اسؤال ده ..... لا طبعا هفضل مستنيه لما يجي ويخطفني
يامن (بصوت واطي قوي ) الحمد لله (وكمل ) .. ها ولسه بتحلمي بالفرح الاسطورى بتاعك
ياسمين (بتخيل ): اي نعم ...نفسي اعمل حاجه غريبه في الفرح .. حاجه مجنونه .. يعني مثلا السقف يتفتح وننزل انا والعريس من فوق على القاعه .. كده حاجه مجنونه
يامن (بضحك ): من السقف حته واحده ..ايه الاحلام دي ..هتهدي السقف على دماغ الناس هههههههه وهتنزلوا ازاي بقا بالبارشوت ولا ماسورة المطافي هههههه
ياسمين: رخم على فكره ...مش هقولك حاجه تاني ...عامل زي يسرا ويارا بتحبطوني على طول كده
يامن ( بضحك ): يا ستي ربنا يوفقك وتعملي كل اللي نفسك فيه ... يالا عايزه حاجه
ياسمين : شكرا يا يامن ...سلم على طنط ..سلام
يامن : سلام
يامن بعد ما قفل مع ياسمين ...قعد يفتكر المكالمه ويبتسم ..
قال : لا واضح اني اتهبلت .. اما اشوف الواد بوب فين يجيلي عايز اتكلم معاه يمكن افهم مالي
مسك موبايله .. كلم ايهاب
يامن : بوب حبيبي واحشني
ايهاب: ده ايه الرضا ده ..اكييد وراك حاجه عشان تكلمني الصبح كده..
يامن : فينك يا بني
ايهاب : انت اللي فين
يامن : انا رجعت اسكندريه ..فينك انت
ايهاب :هكون فين يعني .. في البيت طبعا ... ما هو حضرتك سافرت عشان الخطوبه وسيبتني انا هنا للشغل ومعرفتش انزل اشوف خطيبتي يا ناااس
يامن : هههههههه ...ده انت متبهدل قوي يا عيني ...طب انا مسافه السكه واكون عندك
ايهاب : تنور
يامن : يالا سلام
ايهاب : سلام
..............................................................................................................................
صحيت يسرا من النوم على صوت مديحه
مديحه : يسرا ...حبيبتي ..اصحي يالا الظهر هيأذن خلاص
يسرا وبتفتح عنيها : صباح الخير يا ست الكل
مديحه : صباح النور يا حبيبتي ...يالا قومي خدي شور وصلي ...وحصليني على المطبخ عشان نجهز الغدا عشان عمرو وعيلته جايين النهارده على الغدا ولا نسيتي
يسرا (بابتسامه لمجرد انها سمعت اسمه ): لا منستش يا ماماتي .... حالا هخلص واحصلك ...ممووووووه
قامت يسرا دخلت الحمام وصلت وخرجت لقيت يارا وياسمين قاعدين .. واول ما شافوها
يارا : مش واخده بالك يا ياسو ان في ناس احلوت من ساعه الدبله ما نورت ايديها
يسرا ابتسمت وبصت لايدها قوي
ياسمين : واخده بالك انتي من التسبيل اللي حصل للدبله ده ...امال هتعمل ايه لما تشوف صاحبها ههههههههههه
يارا : يا لهووووي على الحب يا ناس
يسرا : انتوا فايقين عليه على الصبح ههههههه
يارا / ياسمين قاموا وهما بيلفوا حواليها وبيغنوا : يا دبله الخطوبه عقبالنا كلنا ونبني طوبه طوبه في عش حبنا ...ههههههههههه
مديحه خرجت من المطبخ على صوتهم وضحكهم
قعدت تبصلهم وبعدين قالت : ارحمني يا رب رازقني باتنين معاتيه مش واحده ...هههههه ...
ياسمين : يا ماما متقوليش الحاجات دى ... بتتحسد ههههه
مديحه : ربنا يسعدكم يا بنات ويخليكم لبعض
كلهم : ياااااااارب
مديحه : طب يالا ...يسرا معايا على المطبخ ...ياسمين ويارا تنضفوا الشقه كلها.. واحده عليها الاوض ..والتانيه الصاله والحمام
..............................................................................................................................
يامن قعد مع ايهاب يتكلموا في الشغل وشويه
يامن : إلا قوللي تعرف ازاي انك بتحب....
ايهاب : ايه ده وقعت ولا ايه ههههههههههههه
يامن (بضيق ) : وقعت ايه بس وهبل ايه ....انا مفيش حاجه من دي خالص .
ايهاب : على بوب برضه .... مين ها ...مين اللي قدرت توقع يامن بجلاله قدره اللي ماكانش بيعبر حد ده ...لدرجه اني قلت انك مصفح ضد الحب ههههههههه
يامن : تصدق انا غلطان اني بتكلم مع واحد زيك اصلا ..انا ماشي
ايهاب : استني بس ياعم ..ايه القفش ده ..انا بهزر معاك ...وعموما هتقول هتقول مكنش النهارده يبقي بكره ..هتخبي عليه يعني ....(وغمزله )
يامن : ربنا يهديك ...
ايهاب : يارب
يامن : ها ماجوبتش على سؤالي
ايهاب : اصله سؤال صعب ....بس بص يا سيدي .....مممممممم....انها تكون وحشاك على طول ...تحس انك عايز تسمع صوتها باستمرار ...لما تكون مضايق هي اول حد يجي على بالك عشان تحكيله ...لو يوم عدى من غير ما تكلمها تحس ان في حاجه ناقصاك ..وان اليوم ضلمه قوي ..بس مجرد ما تشوفها او تسمع صوتها بس ..تحس ان الشمس طلعت والجو بقى حلو ...( كان عمال يتكلم وهو باصص ليامن ..لقى يامن سرح ...راح ايهاب مكمل بضحك ) وتلاقيه سرحان كده ومش معاك ههههههه
يامن فاق من سرحانه على الجمله الاخيره : تصدق انا غلطان اني قاعد اتكلم معاك ...ربنا يصبرك يا نادين على ما بلاكي
ايهاب : نادين ...وحشتني قوي ...يالا اتكل على الله خليني اكلمها بدل ما انا قاعد معاك كده
يامن : ماشي يا عم الرومانسي ..انا ماشي ..سلام
ايهاب : سلام
.............................................................................................................................رن جرس الباب في شقه مديحه
مديحه : روحي يا يسرا افتحي
يسرا ( بسعاده ) : حالا يا ماما
راحت جري بصت لنفسها في المرايه ...ومشيت ناحيه الباب
فتحت لقيت والد عمرو ( حسين ) : ازيك يا عروستنا
يسرا : ازي حضرتك يا عمو ..اتفضل
علي : ازيك يا يسرا ..عامله ايه
يسرا : بخير الحمد لله ....اتفضل .
لقت عمرو واقف قدامها وماسك بوكيه ورد احمر كبييير شكله يجنن وبيبصلها بحب
عمرو : صباح الخير يا مراتي العزيزه
يسرا ( بضحك ) : مراتك ده ايه بقا ...انت بتنط خطوات ليه
عمرو : ان شاء الله مش همشي النهارده غير وانا محدد معاد كتب الكتاب ..عشان تعرفي بس اني مش اي حد
يسرا لسه هتتكلم ....لقت كوثر واقفه ورا عمرو
كوثر: انتوا واقفين كده ليه ..ها ( وغمزتلهم )
يسرا (بارتباك وكسوف ): ازيك يا طنط ..عامله ايه
كوثر : انا الحمد لله كويسه ....وسعولي كده لما ادخل انا وانتوا كملوا كلام هههههههه
دخلت كوثر ...يسرا ( بصت لعمرو ) : كده تكسفني قدام طنط ..انا مخدتش بالي خالص انها واقفه
عمرو ( بغمز ): طبعا شوفتيني ..نسيتي الناس
يسرا : عمروووو....
عمرو : خلاص خلاص ههه
دخلوا وقعدوا وبعد الغدا
حسين : بصراحه كده يا حاجه مديحه ... احنا عايزين نكتب كتاب الاولاد
مديحه بضحك : انهي ولاد
كوثر : ايه يا مديحه ...يسرا وعمرو
مديحه ( بجديه ): ده ازاي يعني ...دي خطوبتهم كانت لسه امبارح...وبعدين احنا اتفقنا كتب الكتاب مع الفرح اخر السنه مش كده
عمرو : صح يا طنط...احنا اتفقنا فعلا ....بس حضرتك يرضيكي يعني ..اني اعمل حاجه حرام وربنا مش راضي عنها
مديحه ( بصتله باستفهام انه يكمل كلامه ) وده شجع عمرو وكمل : يعني لو قلتلها كلمه حلوه تبقى حرام لو مسكت ايدها ..حرام ..حتى لو بصتلها بس ...وانا مش عايز اعمل حاجه تغضب ربنا ...عايز ارضي ربنا في حياتي مع يسرا من اولها عشان ربنا يكملنا ببعض ويبقي راضي عننا
سكتت مديحه بتفكر .........
حسين : ها يا حاجه ... اعتقد كده احسن وبعدين ..متأخذينيش يعني ...كلام الناس مبيرحمش ...لما يلاقوا عمرو كل شويه داخل طالع وانتوا لوحدكم وهو بس خطيب يسرا احسن !! ولا لما يكون كاتب كتابه !!
كوثر : ها يا مديحه وافقي يالا
مديحه اقتنعت بكلامهم و...بصت ليسرا : انتي ايه رايك يا بنتي
يسرا ( بكسوف ) : مش عارفه يا ماما ..اللي تشوفيه
مديحه : مممم ...طب على بركه الله ...بس على شرط
عمرو( بسعاده ) : انتي تأمري يا ماما
مديحه (بضحك ) : توعدني انك تحافظ عليها ومتزعلهاش ابدا ...يسرا مش بس بنتي ..دي اختي وصاحبتي ...يسرا طيبه وقلبها ابيض ..اوعى في يوم تخليها تعيط ولا تنيمها زعلانه
عمرو ( بحب ): وانا اقدر برضه ازعل القمر بتاعي يا ناس .. ده حتى ما أبقاش راجل لو خليتها تعيط ولا نيمتها زعلانه
مديحه : عمرو ...اتلم بدل ما ارجع في كلامي ها ههه
عمرو : قلبك ابيض يا ماما ...ذلة لسان واوعدك هتتكرر بعد كتب الكتاب ههههههه
حسين : ها نقول مبروك
مديحه : مبروك يا يسرا يابنتي ...الف مبروك يا عمرو
في الوقت ده علي كان واقف في البلكونه ودخل لما سمع مبروك
علي : الف مبروك يا عمور ...مبروك يا يسرا ...ربنا يصبرك على جنانه هههه
يسرا : الله يبارك فيك يا علي ...هنعمل ايه بقا ...قدري ههههههه
عمرو : نعم نعم ....ايه قدري ده ..طب بزمتك في قدر احلى من كده ( وغمزلها )
مديحه : عمرووووو
عمرو : ههههه طب نعمل كتب الكتاب ..الجمعه الجايه ان شاء الله
مديحه : بالسرعه دي
علي : خير البر عاجله يا طنط
مديحه : استنى بس هكلم عمها برضه ..وارد عليك ....مايصحش اقرر لوحدي كده ولا ايه
حسين : عداكي العيب يا حاجه
و كانت ياسمين ويارا بيحطوا العصير و الحلو ...دخلوا يقدموا الحلو والعصير ...سمعوا مبروك
يارا : خير ها فروحونا معاكم
عمرو ( بفرحه ) : هكتب كتابي يا ناس
ياسمين : لا والله ...ايه سلق البيض ده هههه
عمرو : انتي مالك انتي ..يا ساتر ..حاسس انك انتي حماتي
ياسمين ( بغيظ ) : ايوه عندك اعتراض ...مامتي طيبه ..ومش هتعرف تعمل حما ...فسيبلي انا الدور ده هههههههههههه
يارا : مبروووووووووك يا عمرو ..مبروك يا يسرا
عمرو / يسرا : الله يبارك فيكم عقبالكم
عمرو: ياااه ...هكتب كتابي يوم الخميس ..تيرارا
كملت يارا : هكتب كتابي وابقى عريس
عمرو وياسمين ويارا : والدعوه عامه وهتبقى لمه ..وهيبقي ليه في البيت ونيس اه يا ولاد بلدنا هههههههههههه
مديحه : معلش يا جماعه بناتي مجانين هههههه
حسين : ده على اساس ابني الكبير ايه ههههههه
كوثر : ربنا يسعدهم يارب
كلهم : يااارب
فضلوا قاعدين شويه ويتكلموا ويضحكوا ..علي استاذن ودخل يقف في البلكونه شويه
ياسمين كانت عملت الشاي وجابته
مديحه : ياسمين ...معلش اندهي علي من البكونه عشان يشرب الشاي
كوثر (ولقيتها فرصه يتكلموا ) : لا دخليهوله يا ياسمين معلش
ياسمين : حاضر ...( اخدت الشاي ودخلت البلكونه )
علي كان واقف مديها ظهره وساند علي صور البلكونه
ياسمين : احم...احم...اتفضل الشاي يا علي
علي لفلها مد ايده اخد الشاي : شكرا
ياسمين لفت عشان تخرج
علي : ياسمين...
# مستنيه رايكم وتعليقاتكم علي الحلقه لانها تهمني جدااا ...ويارب تعجبكم #
