قلب بين الوهم والحقيقه

جزء الاول

#قلب_بين_وهم_وحقيقه
ام مريم اماسي الليل
الجزء الاول
عندما نعيش حياة نختصر فيها واقع نظن انه ملخص حياتنا بالكامل يشاء القدر ويغير مسار حياتنا وافكارنا
اسمي هاله قصتي تبدي من عائله متكونه من ٧ ابناء٢تؤام بنات سرى ورسل والي بعدهم نجوان وسمر مو توأم والي بعدهم ٣تؤام اني هاله وفراس وهند وامي وابويه اولاد عم من عائله عدها تفرقه بين الولد والبنت والبنيه مجرد كائن يربوا حتى تكون نهايته زوجه عد رجال لكن الابن هذا شي مقدس من السماء بكل عيوبه واغلاطه هو يبقى الافضل وهالشي سبب تدمير تربية الولد وتحطيم مستقبله وكيانه
قصتي بدت من اول ما بديت افتهم واوعى جانت امي متبين حنيتها علينا عدها نوع من القساوه مو مثل اغلب الامهات الي يكونون قريبات من بناتهم جانت عصبيه ويا خواتي الكبار دائما تعتبر خلفتها للبنات ابتلاء لان هي وابويه يريدون ولد يمكن لان عائلتهم بيها عدد البنات يفوق عدد الولد بضعفين ولان ابويه جان يأذيها بالحجي لان خلفتها بنات جانت تعكس هالشي علينا ......خواتي الكبار من وعيت شفتهم يخافون وشخصيتهم ضعيفه لان امي وابويه مسيطرين على تربيتنا لدرجه حتى ملابسهن امي تختارها وابويه متابعهن ودائما يروح يسأل عليهن بالمدرسه.... ولو مو مجتهدات و مطيعات وخلوقات جان اهلي تحججوا بأي شي حتى يزوجوهم وهن بعمر المتوسطه لان حلوات ودائما يتقدمولهن خطاب يمكن هالشي هم سبب يخلي الاهل يخافون على بناتهم ...يمكن تتوقعون امي وابويه جهله ورجعيين لكن بالحقيقه امي وابويه اثنينهم خريجين جامعه ومن عائله متمكنه ماديا لكن جهلهم وتخلفهم بتفكيرهم ومعتقداتهم الي ورثوها من اهلهم .....وهي البنيه هَم ومسؤوليه وشكد ميتعبون عليها مابيها فايده الهم فايدتها للرجال لكن الولد هو السند ....والي راح يتعبوا وياه يرجع الهم بكبرتهم ......دائما اسمع من انولدنا اني واختي واخويه جان اسعد يوم بحياة اهلي لان فراس انولد واني وهند تحصيل حاصل يعني مجرد اضافه على عدد البنات لكن افضل من البقيه على الاقل ترحب بينا كأفراد جدد بالعائله بصاية فراس لان انولدنا تؤام كبرنا وجانت الاكله الطيبه لفراس واللبسه الزينه لفراس وهو يختار ويأمر واحنه كله بكيف امي وابويه ما النا حجايه مضطهدين لدرجه اختي الچبيره اول ما اتخرجت من الجامعه جانت طبيبة اسنان اتقدملها ضابط خريج كليه عسكريه بدون مياخذون موافقتها مجرد سألوا عليه وعلى اهله اقتنعوا ...انطوها خبر افلان خطبج واحنه وافقنا وتم زواجها والولد شوفها الويل لان يحس بالنقص بسبب اختلاف الثقافه والتأهيل الدراسي بينهم وجانت من تشتكي لاهلي من معاملة رجلها ويريدها تكعد بالبيت اهلي ميقبلون عليها خلص اتزوجت معناها شيصير بيها تتحمل واطيع الرجال حتى مترجعلهم ولا تطلگ وطبعا يدزون بهالهدايه والمسواگ وابد ممقصرين ويا اختي ورجلها كله حتى يكسرون عين رجلها ويخفف معاملته السيئه الها لكن ......هم دمروها خلوا رجلها يشيخ عليها وحس اهلي ميوگفون ويا بتهم لذلك خيرها بين تكعد بالبيت لو ينفصلون ومن حجت كدام امي على مستقبلها والسنين الي تعبتها بالدراسه .......امي جاوبتها ومقبلت عليها گلتلها مستقبلج بيتج ورجلج واطفالج .... وبالفعل هذا الي صار اختي ورا سنتين ربة بيت عدها طفلين تؤام حالها حال اي وحده ما تعبت ودرست..