#قصة_طلاقي
لاية الراوي
الجزء السادس
طب عالبيت وطبگ الباب بعنف ....جفلت يا ستار شنو صاير ....جنت بالغرفة طلعت ها ها شكو شبيك ....
انتي ليش ما تحترمين .....ومتقصدة تصرفين بلا مبالاة
شسويت يا ربي دخيلك ...
كم مرة كلتلج كويلي قميصي محتاجه ضروري ....
اني رفعت حاجبي مستغربة كل هالهوسة علمود كوي قميص ....
ههههه يعني كالهوسة علمود قميص اتغدة واكوي ....ومشيت خطوتين .....وجرني من شعري ...
اخ اخ شبيك شعدنا شنو عبدة عندك ....وخرت ايده ....بعد لا تعيدها ترة والله ما يصير خير واذا مقهور على قميصك ذيج زوجتك خليها تهز طولها وتخدمك ....فهمنا مزوجها دتخلفلك بس عادي كل النسوان يشتغلن وعادي يجيبن اطفال .....وكافي استغلال ترة ساكتة مو علمودك ببالي شي اريد اوصله وساكتة ....
هااا يعني غيرتج منها خلتج ....تتقصدين ما تقومين بواجباتي الا بالعركات ...
ههههههههههههههههههه ....فعلا ضحكتني .....لو اريد اخليها براسي حتى صوتها ما طيقه .....واكبر دليل وضعك هسة تصرخ وتمد ايدك ...بس خليتك براسي اسبوعين فلا تحاول تلعب على شي ما اله نتيجة وياي .....
على الاقل هي تحترم ....مو مثل جنابج لا تقدير ولا احترام .....
اني فعلا استفزني حجيه ....وكمت احجي بعصبية .....
شوف احترم ما احترم شغلة تخصني .....واني محترمتك وانت تعرف هالشي .....بس على تصرفاتك هاي والله ما ابقى ثانية بعد ....وطز بكلشي ......ورحت للغرفة لبست حجابي .....ولملمت غراضي بسرعة وهو منتچي على الباب ويباوع ومن دون حجي ....شلت الجنطة ....وصلت ليمه وما تحرك .....باوعت عليه ... ممكن شوي طريق ....
ابقي نتفاهم .....
والله والله والله اذا ما بعدت عن طريقي. ....لا اسوي شي نندم علي ثنينا .. .....
مع الاسف ....صارت علاقتنا بهالمستوى .....
وراح توصل مستوى ادنى ....اوعدك .....
انتظري اوصلج الدنيا ظهر .....
والله ما اروح وياك ....هذا حد علاقتنا ....طلگني وفضها بعد ما الي نفس هالبيت. .....
وطلعت واني فعلا كارهته ....اني هسة صرت ما احترم واتصرف بغيرة ....
وصلت لاهلي واني روحي براس خشمي ....وماما وبابا استلموني وصياح وهوسة ......
واني اصلا منتهية .....حجيت بصوت عالي شوي ....
اني بعد ما اتحمل ارجع اله ....وكلامي واضح جدا .....واذا ما مرحب بيهة هنا اني من هسة اروح لبيت جدو ....
بابا نفعل وحسيت على لحظة راح انبسط ....ماما تلاحگت الموقف ودخلتني للغرفة .....
وجرتني من ايدي .....خبال ليخبلچ ....شنو ناوي تجلطي لابوج ....ودخلتني اكعدي خلي اهدي ......
كعدت واني راسي راح ينفجر .....ميتة حر ....واعصابي متشنجة ....
بقوا هوسة بالصالة .....واني فتحت حجابي وتهويت شوي وتبردت ....شوي وماما طبيت ....
اريد افهم شصاير بينكم بالجديد وجتي بهالظهرية .....
ماما انتي تريدين الصافي وما تدوخين نفسج بالتفاصيل ....لو تردين راسج يوجعج .....
اني ارررريد اطلگ ....ملييييت زهگت ....الايده بالمي مو مثل الايده بالنار ....انتم عايشين بمثالية انتي وبابا واني اكلة وحل .....اني اريد اروح يم عمة مروة ارتاح بابا مراح يوافق على جيتي ويظل الى ان يرجعتي .....
انچبي نوب موديل جديد بيت جدج ....وابوج وغصبن ما عليج تتحملي هذا ابوج ....كومي اكلي وبعدين نشوف حل ....
ما اريد شي ...نسدت نفسي ....وما اتنازل عن رأيي هالمرة لو معرف شنو يصير ...
تخبلي بعد ....انتي مو صاحية لا والله ...وطلعت
اني قررت اروح اذا مو اليوم باجر على بيت جدو ....بابا راح يبقى عصبي وما راح اهدئ هيج ...
صارت الدنيا مغرب واني بالغرفة ....اتصلت بعمة مروة وكلتلها راح اجيج ....تتحمليني والله حموت من مغثة لمغثة ....
شوي وماما طبت ....كالت مكافي تبس راس طلعي اوكلي لج ادري بيج ما متغدية ونحرك دمج ....كومي
ماما ...باجر من ارجع من الدوام ....ارجع لبيت جدو ....ولا عبالج عناد لا والله بس ماما والله تعبت من رحت الى اليوم عايشة بمغثة وهم
كمت ابچي ....ماما اني مو بنتج شبيكم وياي لهدرجة صرت عالة عليكم اذا رجعت مطلقة ...
لا يا ماما ليش هيج دتحجين ....ندو حبيبتي والله اني وابوج علمودج صافين وياه لان نعرفج تحبي بس لان مقهورة منه تتصرفين هيج ....
ماما اني هسة ارتاح من ابتعد عنه ...ارحموني .....
جابتلي اكل .....واكلت لكمة وغسلت ونمت ....ومن الصبح طلعت للدوام ووصيت ماما تخلي ايمن يذبلي جنطتي ببيت جدو .....ومن المدرسة طلعت لبيت جدو ....ووصيت عمة تفهم بيبي انو صهيب مسافر وجيت اكعد عدهم هالفترة لان اذا عرفت ما تتركني بحالي الا تجلطني ....
تغدينا وسوالف وابين انو اني عادي وماكو اي شي .....وكملنا وطبينا لغرفة عمة وحجيتلهة وكالت اذا دتتأذيني نفصلو ومثل ما يكولون وجع ساعة ولا كل ساعة .....طبعا عمة عمرها بنهاية الاربعين موظفة ببنك .....وما تزوجة ....وهي وبيبي عايشين واني جنت هواي ابقى يمهم من جنت ما مزوجة....
مشت الايام واني امتحانات وتعب وتوصلني بطريقها وارجع كيات .....واتفقنا بس نكمل تاخذ اجازة ونروح لبيت عمي بالسليمانية اريد اغير جو واطلع ارتاااح تعبت ....بابا بهالفترة ابد ما حاجاني وماما تتصل وتطمئن على وضعي هي وهدى وصهيب باشا ما كلف نفسه بالسؤال حتى .....
وكملت امتحانات وصار على سالفتي تقريبا اسبوعين ....
وحجزنا ورحنا للشمال .....وبابا عرفت واتصل بمروة وخطية ما خلة عليها من الحجي على دطمعيها وحدة طالبة الطلاق رايحة تتونس ونص ساعة وهو يرزل بيهة ....سدت من عنده وجهها ينطي الوان .....كلتلها ورطتج وياي اسفة ......
وبعد اريع ايام من روحتنا .....العصر جنا طالعين للسوگ ....واتصل صهيب وما جاوبت ....كم مرة وما جاوبت الا ان دز مسج ...تجاوبين لو والله اتصرف تصرف تندمين عليه ....
وشوي واتصل ....
نعم ....
على كيفچ ست ندى ....تستاحين وتتونسين ولا عبالك تاركة بيتج ولا اكو رجال تاخذين الاذن منه قبل متسافرين ....وتزعلين من اكول ما تحترمين .....
اني اسمع بس شوي وكال ما تجاوبين ليش ساكتة ....
والله معرف شنو احجي بالضبط ....اولا البيت الي تحجي عنه بطل بيتي والرجال الي استأذنه اني اصلا طالبة منه الطلاق .....ومال اتونس فوالله مو حرام الواحد يتونس .....انت يعني مسوي كل الهوسة واتصالات علمود سافرت اتونس .....
سهلة ....والله لا ارجعج بظرف ساعات وكولي صهيب كال ....وسده
اووووي والله صحيح صارت سالفتك بلا ملح ....سوي الى تكدر علي ....
يومين مرن وماكو اي شي جديد .....كاعدين الظهر وبابا اتصل !!!!!!!
يبووووو شراح يسوي بية هسة .....الله يستر جاوبت
الوووو
صحيح ما تستحن انتي وعمتج .....تدرين زوجج شنو سوة من قلة احترامج للي اكبر منج .....دزلنا تبليغ يطلبج لبيت الطاعة !!!!!!!رتاحيتي تريدين تفضحينا .....باجر من الصبح ترجعن وحسابج بعدين وسده
اني فرت بية الدنيا من الصدمة ....عززززة من كل عقله ....شافوني هيج ونخبصو ويسألون وبصعوبة فهمتهم ....ومروة اكلت هم شون تواجه بابا .....واني افكر هذا شجاه هيج يصرف .....
يتبع
