Can We Still be Friends?

Isa

Jo, may gagawin ka ba bukas? Samahan mo nga ako, simba tayo.

Awtomatikong napangiti ako ng makita ang nickname niya sa chat. Agad akong nagtipa sa keyboard ng ire-reply sa kanya.

Sure! Wala din naman akong gagawin bukas. What time?

Wala pang isang minuto ay nagreply din agad siya.

Eight? Agahan mo ng gising ah, mag-alarm ka. Susunduin kita diyan.

Hindi na mawala ang kasiyahan sa mukha ko habang nagiisip ng isasagot sa kanya. Napakagat labi ako para pigilan ang impit na kilig sa kaibuturan ko.

Nang dumaan si kuya sa pwesto ko ay sinaway ko ang sarili ko. Mahirap na, baka mapansin na naman ako ni Kuya Ross.

Jo, tama na. Kaibigan lang tingin niya sa iyo. Nagpapasama lang siya sa'yo, hindi yon date. Huwag kang mag-assume masasaktan ka lang...

Okay.

Sagot ko na lang, tuluyan na akong nainis sa ideyang naisip ko.

Jo, maaga kang gigising a. Baka naman pagdating ko diyan hindi ka pa naliligo.

Napangiwi ako. Naitatak na talaga niya sa isip na lagi akong mabagal kumilos o kaya ay laging late. Kilala na talaga niya ako.

Oo nga. Sige na good night na, matutulog na ako nakakahiya naman sa'yo.

Bago pa siya makareply ay naglog out na ako, mahirap na baka hindi na ako tumigil sa kakachat kung hindi ko sasawayin ang sarili ko.

Pumasok na ako sa kuwarto ko at humiga na. Patulog na nga dapat ako kanina ng maisipan kong manuod muna sa Youtube pamapaantok tapos nag-online na din ako.

Nakailang ikot, baliktad at galaw na ako sa kama pero hindi pa din ako makatulog. Hanggang ngayon kasi, kahit ayaw kong isipin ay naiisip ko siya, si Celo. Naiisip ko yung kami.

Naks, may kami ba?

Alam niyo yung feeling na hindi ka sigurado sa isang bagay? Yung wala kang mapanghawakan?
Hindi ka sigurado kung kakapit ka dahil hindi naman siya nagbibigay ng tali para kapitan mo? Did you ever feel like you wanted to fall but you are not sure if he's willing to catch you?

Ramdam niyo yun? Ganoon kasi ang nararamdaman ko ngayon.

Si Celo kasi kaibigan ko siya pero hindi ko maintindihan kung bakit ganoon na lang ang mga akto na pinapakita niya sa akin. Hindi ko tuloy alam kung naga-assume lang ako o dumidiskarte talaga siya.

Alam kong meron pero hindi ko mapangalanan kung ano ba talaga kami kasi wala naman siyang sinasabi sa estado naming dalawa.

Ang alam ko magkaibigan kami, dati.

Alas dose na ng nagvibrate ang cellphone ko. Nang tiningnan ko ito ay may mensahe galing kay Celo. Tatang Celo ang pangalan niya sa cellphone tsaka sa facebook ko, at Ka Jo naman ang pangalan niya sa akin. Close naman kami kaya kahit ganoon kadugyot pakinggan ang tawagan namin ay okay lang.

Binuksan ko ang message niya at napangiwi ng mabasa ang laman nito.

Binibining Jolina Madrigal matulog ka na. Magkikita pa tayo bukas, magpapaganda ka pa para sa akin.