Aj chutti ka din tha.........baqi dino k baraks wo chutti k din dair se jagta tha.......safaid shalwar kameez mae malbus....is waqt bhi wo nashta karnay k liye dining room ki taraf barh raha tha jab uski nazar kitchen mae kam karti safeena par pari....wo muskurata hua kitchen ki janib aa gaya
"Mama ap yahan kiya kar rahi hain?" Unko kandhon se thamtay huay us ne un ki peshani par bosa diya tha.......safeena jo pratha bana rahi thin muskura di
"Nashta bana rahi hun......"
"Ap q bana rahi hain?......kahan hai apki wo ladli bahu? Wo q nahi bana rahi?" Hath bandhtay huay us ne masnui ghussay se kaha tha
"Wo mulazima se saaf safai karwa rahi hai......."
"Aj saman apnay ghar ja rahi hai" plate mae pratha nikaltay huay safeena ne itla di thi
"Oh shukar hai.......azab se jan chut rahi hai" us ne shukar kartay huay mu pe hath phaira to safeena ne usay ghoora tha
"Aliyan.......esay nahi kehtay"
"Koi baat nahi anti.......mae ne bilkul bhi bura nahi mana........" Red suit mae malbus,khulay baal,muskurati hui wo kitchen k darwazay mae khari thi,aliyan or safeena ne uski janib rukh mora
"Suchi baat ka kiya bura manana" aliyan ne benayazi se kandhay achka diye
"Toooo.......tumhari nazar mae......mae ek......azab hun" shelf pe pari tokri se saib uthatay huay us ne khana shuru kiya tha.....sath hi sath aliyan ki janib qadam bhi barha diye
"Han.....ek bohat bara azab" itmenan se itla di gae thi,safeena nashta liye dining hall chali gae thin
"Hmmm.......thanks" wo phir se muskurai thi,aliyan ne mashkook nazron se usay daikha tha
"Mtlb k mae jiski bhi zindagi mae shamil hun gi......wo azab ban jaye gi?" Wo kuch sochti hui sawal kar rahi thi,aliyan ki pursoch nazrain us pe jami thin.........wo zaroor kuch ulta sidha plan kar rahi thi......akhir ko ali ki behan thi......sidhay kam ki us se tawako rakhna bekar tha
"Tum kiya soch rahi ho?" Aliyan ka lehja bhi nazron ki tarhan mashkook hua tha
"Mae? Mae kuch nahi soch rahi" us ne saib ki bite letay huay shanay achkaye thay
"A friend in need is a friend indeed........ Ye jumal to tum ne suna hi hoga" wo uski ankhon mae daikhtay huay keh raha tha......jesay parhnay ki koshish kar raha ho
"Suna kai bar hai.....par esa dost kabhi mila nahi mujhay........" Uska lehja badla tha
"You can trust me" aliyan ki baat sun k wo muskura di
"I trust you......don't worry" us ne aliyan ka kandha thapka tha
"Saman........kuch garbar hai tumharay sath........ I am dam sure about that........tum bata do to behtar hoga.......agar mujhay kahin or se pata chala to shyd mae tumhari koi madad na kar sakun" aliyan ka lehja sakht tha......saman ka dil chaha us se apnay dil ki baat keh de........lekin dil mae ajeeb se waswason ne dera dala hua tha......wo chah kar bhi usay kuch bata nahi pai thi......ye mamla wo khud hal karna chahti thi
"Mae apni problems hal karna janti hun aliyan........lekin agar kabhi na hal kar saki to tum se zaroor kahun gi......or mae janti hun tum meri help zaroor karo gay......" Uski muskurahat bilkul pheeki or be rang thi,aliyan ko yaqeen ho gaya tha k wo kisi maslay mae hai lekin wo usay force bhi nahi kar sakta tha is liye khamosh ho gaya
"Ok.......jesay tumhay thk lagay......par meri baat yad rakhna........koi bhi baat ziyada dair tak chupi nahi rehti.......har raz k afshan honay ka ek waqt hota hai.......lekin zaroori nahi tab halat bhi hamaray haq mae hon......"
"Janti ho.........Insan ki aqal ek bohat bara hatyar hoti hai us k pas.......insan koshish yehi karta hai k is hatyar ko apnay faiday k liye istemal karay lekin baz okat wo apnay hi hatyar se apna nuksan kar baithta hai......." Wo khamoshi or sanjeedgi se uski baat sun bhi rahi thi or samajh bhi
"Insan kabhi bhi khudko insan bana rehnay nahi deta........wo koshish karta hai k ashraful makhlooqat se bhi buland darja paa jaye.......or is koshish mae wo khudko janwaron k darjay se bhi gira leta hai........waja sirf ye hai" us ne apni peshani pe ungli se ishara kiya tha
"Insan ki aqal........wo khudko aql e kul samajhta hai......or isi zoam mae wo bohat se esay failsya karta hai jo agay ja k us k liye nuksan or zilat ka bais bantay hain......."
"Mae janta hun tum ek aqalmand larki ho.......jo karo gi soch samajh k karo gi........lekin agar tum confuse ho.......jo k tum ho.......to mashwara le sakti ho.......yahan or bhi bohat se aqalmand mojud hain"
"Tum indirectly apni taraf ishara kar rahay ho" ab k wo dono muskuraye thay
"Yahan mujh se bhi kai ziada aqalmand mojud hain.......bas zara ghor karna hoga" us ne kandhay achkatay huay kaha or bahir chala gaya......uska rukh dining hall ki janib tha.......saman k sath sar khapanay k baad bhuk ne zor pakar liya tha jab k wo us k alfaz pe ghor karti wahin khari reh gae
*****************
"Yar sheeza congratulations......I'm so happy for you..........." Wo shahmir ko tayar kar rahi thi jab sheeza ne usay khabar sunai thi......uski rukhsati ki tareekh aglay jummah teh pai thi....aleezay khushi se nihal ho gae.....us k hath se brush choot k farsh pe gira tha....shahmir ne sir tham liya.......
"Mama" wo ghussay se bola to aleezay ne kan pakr k mazrat ki
"Thanks yar.......ab ye batao kab aa rahi ho meray ghar? Meri mama to kab se tumhara,abeeha or areesha ka intezar kar rahi hain.......ab pehli fursat mae meray ghar pohancho tum teeno" sheeza k dapatnay pe wo muskura di.......
wo khud bhi us se milna chahti thi,lekin aliyan k order ki waja se wo kahin nahi ja sakti thi......or na hi wo khud usay kahin le jata tha......jis pe unki achi khasi jharap bhi hoti.....or hamesha ki tarhan aleezay ko hi uski baat manni parti thi......
"Esa karo sheeza tum aj yahin ajao........abeeha bhi aa rahi hai......sab mil k khoob baatein karain gay"
baray arsay baad wo purani batooni aleezay k roop mae I thi,apni zindagi k masail mae uljh kar wo sab kuch bhula bethi thi,ab itnay arsay baad moka mila tha apni doston k sath dhair sari baatein karnay ka jisay wo gawana nahi chahti thi......
Muqabil bhi Sheeza thi jo in mamlat mae us se bhi do qadam agay chalti thi......wo foran razi hui thi......
"Ok ok.......wait I'm coming I'm coming" purjosh andaz mae kehtay huay us ne phone band kiya to aleezay shahmir ki taraf mutawajoh hui jo usay ghussay se ghoor raha tha
Royal blue three piece suit pehnay,balon ko set kiye wo behad haseen dikh raha tha......is dressing mae wo bilkul aliyan ki copy lag raha tha......aleezay muskurati ankhon se usay daikhnay lagi
"Wow.......prince charming......you're looking very handsome" hath bandhtay huay us ne shahmir ki tareef ki thi
"Baba se bhi ziyada?" Us ne ankhain bari kartay huay pucha
"Ofcourse my love" aleezay ne shahmir ka gal chumtay huay jawab diya to wo ankhain band kiye hans diya......ye hansnay ka uska apna style tha or aleezay ko us k baap ki tarhan uski muskurahat bhi behad pasand thi
"Hmm.....hmmm...." Wo dono apni baton mae magan thay jab aliyan ne kankhar k unhay apni taraf mutawajoh karwaya tha......undono ne ek sath uski janib rukh kiya tha
