الــسـلامُ عـلـيـكم
راقيه بأناملي(العـباديه)
طاقة تـحمُل
الـعبـاديـ،،ــه
الـبارت //11//
زهراء
دخلت على برنامج التلجرام لگيت رسائل كومة من عنده كلهن يسألن عن صحتي وليش تخربطت !!! تفاجئت لان قبل شوية اتصل بيه يرزل !!
شخص ماثابت على رأي شخصيته متناقضه !!
من شفته داز هيج دزيتله
_ منو هذا الديراسل محمد لو غيره وايموجي ضاحك ؟
ثواني وانحذفت الرسائل كلهه !! گلت اكيد هذا جّـن رسمي باقل من دقيقه قرة رسالتي وحذفهن كلهن !!
عفته براحته بعد ماراسلت خليه المهم عرفته انو شنو شخصيته كلساع برأي
..
استمرت الايام نفس الروتين .. بيوم كاعدين نشرب جاي بعد العشة ودخلوا بيت عمتي ام سجى وياهه سجى اكرهـه وتكرهني سبحان الله الشخص الي يكرهك تحس بيه وتكرهـه لاارادي وهي هم تصرفاتهه تخلي الشخص يكرههه .
بقوا يمنه سوالف وضحك لمـا سجى سحكت وكالت عمتي ام محمد تريد تخطبني من ماما ومباشرةً عمتي كرصتهه وهيه اشرتلهه بعيونهه عود خليني اكمل گالتلهه ساره المن تخطبج؟ .. عمتي طفرت كالت لا ماتخطبهه جذب جذب وتخزر بيها تريدهه تسكت .. اني غثني تصرفهن كلت :-
_تره احنه مراح نحـسدهه
استهزأت بيهه وگمت قبل ماتحجي شويه وإجتي ورايه ساره جايبة الاخبار سمعت عمتي هيفاء وام سجى من سولفن بهمس وميعرفن ساره فضولهه يخليه تعرف اقل تفصيل كالت :
_لج زهراء الحگي
_ شنو ؟
_سجى مو تريد عمتي تخطبها ؟ احزري إلمن تخطبها
عطت بيهه لان نبرة كلامها خلتني اتحمس كلش
_ ايييييي احجي فضيني
_ تريد تخطبها لـمحمد !!
صفنت مصدومة وحواسي توقفت .. كمت مااحس بالاشياء التدور يمي .. دخلت بدوامه تفر بيه حاولت ماابين صدمتي ولاشنو احساسي بذيج اللحظه بس ساره ميخفى عليهه شيء مباشرةً صارت تطلق كلماتهه تواسي بيه ولـتضوجين وكلهه تتمناج اكره المواساة مباشرةً سويت نفسي بدون مبالاه گتـلهه
_ اني شعليه واذا تخطبها ؟
_ زهراء كافي قشمري نفسج بهالحجي
لساني احسه دخل ببلاعيمي مااگـدر احچـي بكملـه صغيره سكتت واجه الليل يواسي بيه اصابني أرق عيوني متعرف شنو النوم !!
اسأل بنفسي اني ليش ضجت ؟! واني شعليـه؟!! بقت افكار تجيبني وتاخذني عقلي يقتنع بس كلبي شيقنعة ؟ .. تفاجئت بدموع تتسلل لمخدتي وحسرة جبيرة بكلبي اريد اطلعها اريد اشيل الثقل الصار على كلبي .. اخيراً طلع الصبح عليه واني نوم ماكـو بعيني كعـّدت ساره للدوام صباحي وتوجهت للمدرسه هاربـه من نظرات ساره المشفقه،، هاربـه من مخدتي الشهدت على اذراف دموعي !!
_________________________________
سارة ..
بقى بلال يراسل يوميه ويدز غزل اشكال وانواع تعلقت برسائلـه حيل مينطيني كلبي احظره واسويلة تأمين ميمر يوم اذا مااروي نظري برسائلة الصارت عباره عن غزل ووصف لشكلي وتصرفاتي افرح من اشوف رسائلـه صارت البنيه الي اخذت رقمي تمشي ويايه اسمهه زينب حبابـه حيل بس هو متوسل بيهه علمود تخدعني وتاخذ رقمي ماجان بإيدهه شي غير تلبي طلبه .
صارت توصفلي مشاعره تجاهي شلون يسولف لاامه عليه وشلون فرحان وطاير ويگول لاامه اخطبيهه إلي،، اني اسمع وافرح مرات تلازمني ابتسامه طفيفه على شفافي الورديه تفرحني هيج كلمات غزل ووصف وومدح حسيت نفسي بحلم ولاكأنما عايـشه بواقع قاسي
بيوم دز رسالة معصب مبين
_ وداعة امي اذا مارديتي اليوم بعد فلا اراسل ولااذل نفسي إلچ ماكافي دتعذبين بيه صارلج شهر شنو هالكَلب القاسـي الي عندج ؟
اني انقهرت كلشي ولا ميراسل سكتت وبداخلي اريد ارد عليه ومتردده لما رسل رساله
_ تره اذا احلف بداعة امي معناهه كلشي انتهى وهسه حلفت بداعة امي اذا ماراسلتي بعد هاي هيه
اني نسيت الخجل والي همني هو وبس مااريده ميراسلني تعلقت بيه وبسوالفه
رديت
_ هاا
_ ههههه كلش هواي (ها !!!!!) هذا الكدرتي عليه بس الظاهر اني ساحل نفسي عليج هواي
_ يعني شتريد احجي مثلا؟
_ كولي شلونك اسئلي عني اسئلي عن اخباري تعرفي عليه
اني اجتني الشجاعه وفضولي فول سألته
_ شلونك
_ اخيرا كلتيهه ولو متأخرة بس ميخالف
زين بشوفتج ولو ماشايفج
_ ههههه اليوم تگضيهه ولو و ولو
_ ههههههه ضحكتيني والنبي
بقى يسولف ويخلق مواضيع واني متونسه
لاحظت نفسي اندمجت وياه واني اتمادى واسأل عن اهله !
_ هههههه شنو شكد عندك اخوات اخوان
_ ماعندي اخوان واني الوحيد واخوات اثنين متزوجات وبنت عمي اكثر شي علاقتي بيهه الي وياج زينب
_ كلشش حبابه الله يوفقها على طيبه كلبهه
_ ها انطتج وجهه البريء !
اشتغربت سألتة
_شنو يعني؟
_ ههههههه كلساع بوجه زينب خليهه بوجهه البريء مانفضحها احسن
اني تحولت إلى غبيه لدرجه وماسألته شي بعد
_ هههههه
_ زين امج وابوج ليش تطلكوا !
بقيت اعرفه عن عائلتنه وشرحتله كل تفصيل بحياتنه !
__________________________________
كرار
تعرفون معلوماتي ميحتاج شخص محبوب من الكل أحشش واخذ الإمور بمزاح .. شكلي جذاب ومقبول ملفت بشكل كبير ..
بس ميوصل لشكل محمد وهيبته ماانكر اني وياه نلبس سوية حتى القاط من نشتري نفس اللون بس محمد يحلي القاط يضيفلة جماليه وانجذاب
احب سارة من عمر صغير واحب اصفن على حركاتهه لطفولية وضحكتهه بأسنانهه الـتشبه اسنان الارنب يسموهه اسنان أرنبـيه
يخبلن اموت عليهن مره رادت تسوي تقويم رحت لبيبي حرضتها وخليتهه تبطل ومن يومهه اني وياهه عرك ومرات تحشيش
مرات عيوني تاخذني والگـه نفسي ادقق بتفاصيلهه وكلشي بيهه حلو حشمتهه ولفة شالهه وعيونهه النرجسيه وحواجبهه الثخينه وانفهه الصغير كل تفصيل حافظه بيهه
اما سجى ف تحـبني واعرف نظراتهه وافهمهن ودائما تشكي لمحمد الصاير مخزن اسرارهه
محمد ميحجيلي ابدد لان بطبعه يحفظ سر الشخص بس اني اتسمع إلهم وبيوم سمعت ام سجى تحجي ويه امي علمود سجى ومحمد تگلهه قريبين من بعض بلكي تصير القسمه وكانت عمتي تكثر الجيات والتسيورات بهاي الفتره وتقنع براس امي على سجى والاحظ سجى من تجينه تبقى تكرف وتغسل المواعين متخلي ضحى تلمس شي رغم هيه خطار !!
اضحك على سوالف النسوان
لما قررت امي تخطب سجى لمحمد !!!
وهاي كارثه واذا سمعت بيهه زهراء كلشي بنيته يتفلش... من سنين احاول ادخل محمد بعقل زهراء اعرفهه معذبته ومعذبه احواله مثل مااختهه معذبتني
اجيت احجي ويه امي گـالت بدون علم محمد مو الا يعرف صار رجال خل يتزوج اريد افرح بجهاله !!
قّنعت ردت ماصار كالت قرار نهائي سجى لمحمد
_زين سجى موافقه لو امهه موافقه ؟
_لا لا موافقه معليك انته
_ بكيفج بس محمد ميقبل وتتفشلين مقابيل خالتي (ام سجى )
_ روح روح هو انت شتعرف
عصبتني حيل من تضرب على متني وتدفع بيه لبره
عطت بصوت رج البيت رج عبالك طفل وتطرد بيه
_ عايز طول عايز عرض ليش شبيه مااعرف لان ممتحمل مسؤلية البيت ترة اكدر اتحمل مسؤليه مثل محمد بس بظهري اخوي لعد ليش احنه اخوان ؟
_ هسه اني شكتلك وعصبت هيج يمه اسم الله اكلني بگشوري
_سمعي يوم ام سجى خل تعوفج بحالج لان وحده مسمومه
ضربتني راشدي على خدي بكل قوتهه
_ مااسمحلك تتجاوز على اختي انته المسموم يامسموم
فتحت عيوني حيل متفاجئ تصرفها ! تعاملني مثل الطفل .. بقيت اغلي گتلهه
_ اذا رجلي بعد دخلت لهذا البيت مااطلع كرار واخو خيته
طلعت ورگعت الباب واسمع يصيحون بإسمي ووالدي ومحمد اجة محمد نزل شافني معصب واني ماطايق احد اول ماراد يحجي وياي دفعته من صدره فقد توازنه وكملت طريقي صاح وراي بعلو صوته
_ كرار اذا تعيد هالحركه والحُـسين اكسر ايدك
خليته يصيح بالشارع ومشيت اول مره اسويهه لان احترمه حيل كونه اخوي الجبير وهو راعي البيت والمسؤليـه بعد والدي ف الاحترام واجبه عليه بس انهضمت حيل كلهم محد يحترمني ويعاملوني مثل الطفل لان مو عصبي مثل محمد لان احشش وماخذ الامور كلهه بضحك !
يتبع .....
العـبـاديـه
