Huling Hiling

Chapter Two

'Cyu later.'

Binasa ko ulit iyong text ni Nigo kanina pang umaga. May pupuntahan daw kami mamayang hapon para sa sixth anniversary namin.

Nakapagtapos na siya ng pag-aaral at professor na siya ngayon sa isang sikat na university. Ako naman patapos na ngayong taon para makuha ang master's degree ko sa business management na gusto ng mga magulang kong kuning program.

Humarap ako sa salamin at inayos ang mahaba kong dark brown na buhok. Sinubukan ko iyong bagong make-up tutorial na natutunan ko kagabi noong nanonood ako sa YouTube. Sinimula ko ang brown smokey eye para bumagay sa buhok ko. Mas napaganda nito ang chinita kong mga mata. Mas nagkaroon ng kulay ang maputla kong kutis.

Nang matapos ako sa make-up, nagpalit na ako ng white top at jeans. Pagkatapos kong suotin ang itim kong block heels na may taas na two inches, tinignan ko ang sarili sa salamin. Ang tagal na pero naninibago pa rin ako sa itsura ko.

Ibang-iba.

Sinabihan ko si Nigo na magkita na lang kami sa mall na malapit tapos doon niya na lang ako sunduin. Gusto niya sanang sunduin ako rito sa condo pero ayoko.

Pagkarating sa mall pumunta muna ako sa supermarket para bumili ng Chuckie at mini Oreos kasi ito hilig ko mula pa noong bata. Bumili rin ako ng Sarsi softdrinks saka Cheetos na paborito naman ni Nigo. Kumuha na rin ako ng iba pang snacks. Ewan ko nga roon kung paano niya nagustuhan ang Sarsi na lasang gamot para sa akin.

Napatingin ako sa cellphone nang mag-vibrate ito noong nagbabayad na ako sa cashier.

'San kna? D2 na aq.'

Natawa ako dahil hanggang ngayon naaaliw ako kung paano mag-text si Nigo. Nagtipa ako ng reply pagkatapos nang ibigay na sa akin ang resibo at sukli.

'Dito ako sa supermarket. Wait kita.'

Umupo muna ako sa mga available na tables habang naghihintay. Nag-Facebook muna ako habang iniinom ang chuckie. Maya-maya lang may nagtakip ng mga mata ko at naamoy ko agad ang pamilyar na panlalaking pabango. "Nigo, ano ba!" Tumawa ako at tinanggal ang pagkakatakip ng mga kamay niya saka ko siya nilingon.

Tumungo siya para salabungin ako ng marahang halik bilang pagbati. "Tara na?" pag-aaya niya. Tumango ako at kinuha ang plastic bag saka tumayo. Habang naglalakad kami papunta sa parking lot napansin niya ang dala ko. "Ano 'yan?" tanong niya. Inabot ko naman ito habang ngumunguya ng Oreo.

Sinilip niya ang nasa loob at natawa. "Alam na alam mo talaga kung ano gusto ko, 'no?"

Oo pero iyong gusto ko hindi mo alam.

"Syempre naman," sagot ko. Inakbayan niya ako at lumapit sa tainga ko.

"Pero alam mo ba kung ano talaga ang gusto ko?" bulong niya na nakapagpanindig ng mga balahibo ko.

"Ako," simple kong sagot na para bang walang epekto sa akin ang mga kilos niya.
Tumawa siya at hinalikan ako sa sentido. Naramdaman ko ang mainit niyang hininga habang inaamoy niya ang buhok ko.

"Talino talaga ng girlfriend ko," sambit niya nang makarating kami sa kotse niya.

Nakahinga ako nang maluwag nang humiwalay siya para pagbuksan ako ng pinto. Pagkasakay ko ay sinarado niya ito at umikot para sumakay sa driver's seat saka niya pinaandar ang makina.

"So, saan tayo pupunta?" tanong ko pagkatapos niyang ipagsiklop ang mga daliri namin nang hawakan niya ang kaliwang kamay ko habang nagmamaneho.

"Basta," tipid niyang sagot at nakangiting sumulyap sa'kin. Nginitian ko siya pabalik.

Medyo mahaba-haba rin ang byahe na halos isang oras. Dumaan pa kasi kami sa bundok at halatang malayo ito sa syudad. Saan naman kaya ako dadalhin nito? Habang nasa byahe kinain namin iyong snacks na binili ko. Maya-maya naman ay pinarada na niya ang sasakyan sa isang restaurant na nasa bundok.