عشق الطوائف( عشقي)

البارت التاسع عشر

'♧'🌹'♧'عشق الطوائف'♧'🌹'♧'
'🌸'{عشقني سُنَيَ}'🌸'

♧🌹♤الحلقه-19-♤🌹♧

الكاتبة:- فاطمة علي
🌸لايك+تعليق🌸

.
.
تكله ..كلبي ما فرح عكبك ولا سار
وجدمي ما خطا الغيرك ولا سار
اخبرك ما بقت كلمه ولاسر
فضحني الشوك والحب مو بديه

يرد عليها فارس ..
لوه ايدي حبيبي اشلون لويا
وجنت افرشله روحي ابساط لو..يا (لو اجه)
"زاي"القصرت وياك لو"يا"
ولونها"الدال"احذفها بدي

تكله ..
..وحك من نزل الايه ....وسنها
حلوة الرصعه بخدودك...وسنها
الدنيا فرحت من ضحك....وسنه
بشاير طشت بصبح و مسيه

...💔...

فارس : نرمييين ، نرووومه حبيبتي شبيج ..ليش تبجين هيج ..ليش تأذين هل عيون الحلوات

نرمين : رفعت راسي وباوعت عليه شفته خايف عليه ويرجف ..ردت اكوله ليش مخطفتني وخلصت هل موضوع ليش عايفني بنار لا اني الك ولا اني مو الك و حبك مانعني من حب اي شخص وما اكدر اوافق على احد غيرك اني هم احبك مثل متحبني بس شسوي ما بيدي شي اسوي

..نزلت راسي.. مااكدر اجاوبة و اكوله انت سبب عذابي ودموعي .. كومني وكعدني على القنفة .. كمبص بالكاع وكعد كدامي وهو لازم ايدي واني دموع تجري اريد احجي واحس فد شي عاكد اللساني ميخليني انطق ..

فارس : شبيج حياتي ليش هيج تبجين .. لج تجوين قلبي
بدموعج هذن ..

نرمين : فارس اني تعبانه كلللللش .. حسيت ضغطي صفر هلكدد وجعني راسي و وجهي نااار وحيلي يرجف

فارس : هذا مو طبعي ابجيج ..نرمين ليش تكابرين انه احبج
وانتي تحبيني ليش تمانعين نتزوج و نعيش بحب
وسعادة و سلام انتي بس خلي ايدج بيدي .. حتى نخلف درزن بنات واريدهن كلهن مثلج يشبهنج قالب واحد ولد يشبهوني و نسويهم فريق منتخب ها شنو رأيج ..

نرمين : اباوع عليه يسولف ويضحك وغمزلي ،و يحاول يغير حالتي و يضحكني ..بس اني محطمه و كلبي متحمل هموم واوجاع
حسيت نفسي عجزت عمر وحده ب 50 سنه مو 19 سنه ..

فارس : زين انخلف هذولة الزعاطيط واجيبلج خدامه اتزوجها على ورق علمود تتحرك براحتها كدامي وهم تخدمج وتساعدج بالجهال وانتي بس الي مااخليج اطلعين من الغرفة بس الفارس على كولتج فارس باشا .. هااا جمارة شكلتي ..

نرمين : باوعت عليه بعصبية و خلاني احجي .. غير اموووت
اذا مرة تشاركني بيك امووت مااتحمل اشوفك متزوج وكدامك تفتر .. وبعدين حرام عليه تحرم بت الناس من حقها ..وبأي حق ارضه شي على غيري و ماارضا على نفسي

.. فارس اني مو حقيرة وانانية افكر بس بنفسي ..شفته لازم الضحكه بالكوة بس غمازته فاضحته ..كبل طكها بضحكه وكعد بالكاع ..

فارس : ههههههههههههههه ..اروح فدوووة للتغار عليه اغديلج سبع فدوات .. كومي غسلي هل وجه الحلو ورتبي نفسج و افتري بيتج براحتج يالله كومي ..

نرمين : بيتي ..

فارس : ان شاء الله بيتج اذا مو اليوم باجر اوليس الصبح بقريب ..

نرمين : الله كريم .. عفته ورحت غسلت ورجعت شفت الملاية باخر قصيدة بس اني بعد حيل ما ضل عندي .. خلص العاشر و رجعنه للبيت .. رجعت حالتي أنتكست و صرت اسوء

..بدت درجات تصير موزينه كله بالسبعين واني محتاجه درجات عالية علمود المعدل .. كاعده بالاستقبال وجان يطب علينه ليث سلم و كعد بس شكله مو مريح ورى سالفه ..

ليث : يابه.. يمه اريد احجي وياكم بفد سالفة بس اتسمعوها للاخير يالله تنطون رأيكم يعني لا كبل تحكمون عليه..

هيثم : احجي ابني ..

ليث : اني اريد اتزوج

هيثم : اي بيها الخير ..خوش قرار ..

سمية : اكيد اكو وحده ابالك وشاغلة فكرك لهذا قررت تتزوج ..

ليث : الصراحه ..اي اكو بنية صارلي فترة وياهه وهي وياي بنفس الجامعه وتحبني واحبها ومتفاهمين على كولشي
بس ..

هيثم : اذا متفاهمين على كولشي اذن ابني دلينه بيتها ودز امك وخالاتك خل يشوفنها ..ونتفق على الباقي ..

نرمين : اوكف بابا مو هو بنهاية الحجي كال بس ..بس شنو ليش مكملت .. كبل خزرني ليث ورجع دنك ..

هيثم : احجي بابا اكو شي بيها البنية اهلها مو خوش ناس ..

ليث : لالااا يابه لاهي بيها شي ولا اهلها اصلا اهلها اني سألت عليهم احسن ناس وكلها مدحت بأخلاقهم ..بس اكو سالفة صغيرونه بيهم بلكي متأثر ..

نرمين : وهي ..؟

ليث : نرمين كافي خل شوية شوية احجي ..

هيثم : احجي ياابني شنو اتقطر الحجي علينه تقطير ..

ليث : البنية مو مسلمة مسيحية واني صارلي اربع سنين احبها اعشكها واذا مااتزوجها اموت وهي هم تحبني بس هذا الفرق بينه اني وياهه الطائفه و الديانه ..

نرمين : ليث حجه على السريع و ابوية وامي بقو مصدومين من حجي ليث ..

هيثم : ابني هذني المسلمات الي تارسات العراق يوم التحب اتحب مسيحية ..