حكاوي❤🚶🏻‍♀

الحكايه الرابعه♥

- وبعدين يا رحمة مش هنركب شكلنا كدا
- هنركب إصبري بس
- يا بنتي شايفة الزحمة، دا رابع اتوبيس ييجي ومنعرفش نطلعه برضو وبقالنا تلت ساعات واقفين.

بصيت حواليا بضيق فعلا تعبت من الوقفة والشم..أية دا !!

- رحمة..رحماااه مالك بتبصي علي أية؟
بصتلها وابتسمت إبتسامة هي عارفه معناها كويس
هزت راسها بقلق - مش علي الصبح، لا أفكار مجنونة تاني!
مسكت ايديها وبصوت واطي - تعرفي تسكتي وتجاريني.
- يا رحمة هتهببي أية؟
ضحكت وبصيت في نفس الإتجاه - كل خير يا حب.

مشيت وهي ورايا، وقفت جنب شاب حاطط نضارة شمس علي شعره وايديه في جيوبه بزهق من الوقفه
- لوسمحت
بصلي بإستفهام - نعم يا مدام؟
قال مدام صح! يا ليلة مامي الكحلي
- ممكن تلبس النضارة بتاعتك لحظة بس.
- ألبس نظارتي؟ لية؟
- هقولك إلبسها بس.

كان ممكن يكبر دماغه ويمشي من جنبي ودا المتوقع..
بس الغريبة أنه سمع كلامي ولبسها، امم فضولي يعني!
- ها

مردتش عليه وعليت صوتي شوية فجأة.
- يا ناس عدوا الراجل مش شايفين أنه ضرير وتعبان إزاي؟
- أية !!!!

لسه هيقلع النضارة كام شاب مسكواه وطبطبوا علي ضهره
وطلعوا وانا بسرعة مسكت أيد سلمي وطلعنا وراه
سلمي فضلت تبصلي بذهول وانا باصه لسقف الاتوبيس
وكاتمه الضحك بالعافيه، نزلنا المحطة أخيرا

وقفت مكاني لما سمعت صوته العالي
- إستني عندك راحة فين؟
لفيتله ببرود - خير يا إستاذ..خير
- انتي مستوعبه الي عملتيه من شوية؟
- الي هو ؟
- وكمان بتسألي! يا بجاحتك يا شيخة.
بصتله بعصبية - كلمة كمان واقول متحرش وبدل ما كانوا بيطبطبوا عليك، مش هتلاحق علي فين يوجعك.
اتعصب أكتر - يعني بتهدديني كمان!
_لا التهديد دا للعيال التوتو انا بنفذ علطول.
بصيت حواليا وعليت صوتي وانا بقرب منه وبمسك في قميصه بتمثيل.
- يا ناس إلحقوني يا لهوي إبعدوا عني
لقيت الناس بتتلم بسرعة
- خير يا بنتي..مين دا؟ وعملك أية؟

لسه هرد راح إبتسم ومسك إيدي وبصلي بتحدي
- انا خطيبها يا راجل يا طيب
- خطيبها!!
- نعم!!

إتجاهل صدمتي وكمل - هي زعلانه مني شوية بس وانا بحاول اصالح فيها
- يا بنتي الأمور متتحلش كدا.
- يا بنتي شكله بيحبك عديها انتوا كبار وبلاش تفرجوا الناس عليكم.

بصيتله بغضب ومشيت بنرفزة وسلمي ورايا بتنادي عليا
- يا رحمة استني بس
- يا خطيبتي استني هصالحك طيب، مقدرش اعيش من غير نكدك.

أنا لما بختار صحابي، بختار الي يقدروا وقت زعلي وخنقتي بيعرفوا يهونوا عليا جامد.
- يووووه بطلي ضحك بقي
- أحسن علشان تبطلي جنان
- يعني أنا الغلطانة!! دا أنا ركبته ورحمته من الشمس
- تقومي تقولي عليه ضرير!
- الجيش بيقولك اتصرف.
ضحكت - بس كان شكله لذيذ اوي وهو عامل فيها خطيبتك
- لذيذ صح!
- اه وكلبوب أوي
- طب غوري بقي، غوري بقي صاحبة عرة.

كنت في المدرسة وخلصت الحصص بتاعتي ومروحة
شوفت بنوتة قاعدة علي جنب وبتعيط
- مالك يا حبيبتي؟ بتعيطي لية؟
- مامي زعلانة مني؟
إبتسمت - ومامي زعلت منك لية؟
- علشان عليت صوتي، والله يا ميس رحمة كنت مضايقة
- واية ضايقك يا عيون الميس؟
- الشوز بتاعت العروسة كانت ضايعه وكنت بدور عليها ومامي كانت بتنادي روحت قولتها "نعم..نعمممم يا مامي"
ومن ساعتها وهي زعلانه مني.

لفيت وشي وانا كاتمه الضحك
- طيب بيتك فين؟
- ورا المدرسة
- طب أية رايك نجيب هدية لمامي واروح معاكي ونصالحها.
- بجد؟
- طبعا

اشترينا ورد وروحت معاها وانا مبسوطة
كل واحدة فينا كانت ماسكة وردة ومامتها اول ماتفتح  هنحط الوردة قدام وشنا ونقولها" بليز يا مامي كفاية زعل" 

خبطتنا علي الباب، ها واحد اتنين تلاته
الباب إتفتح - بليز....يا لهوي! هو تاني !!
- خالو زين فين مامي؟
- جوا يا جوري

جوري دخلت وانا واقفة متخشبة مكاني قدامه والوردة  لسه قدام وشي، شكلي عرة اوي بجد.
- هااااي
مد ايده واخد الوردة - ميرسي والله مكنش ليه لزوم التعب دا انا مسامحك.
اتوترت من الموقف الهباب دا - أنت..أنت
ضحك وربع درعاته قصادي - خطيبك يا مدام

- يا مامي دي ميس رحمة وهي الي قالتلي اصالحك كدا
انا بحبها أوي.
جات ست لطيفة باين انها اكبر من الافندي الي واقف قصادي دا - يا خبر ادخلي يا ميس إتفضلي
- لا لا شكرا بعد اذنكم، وربنا يخليهالك

نزلت جري وانا هعيط، فين الجراءه ها بقيت بطة بلدي
لية كدا ؟اضايقت من نفسي هفضل متهورة لحد أمتي!
- يا ميس إستني
وقفت مكاني ومسحت دموعي بسرعة
- خير حضرتك
- كن..
غضب عني إتعصبت جامد
- ممكن تبعد عني كفاية لحد كدا، غلطت من الاول واتهورت خلاص بقي مش هنعملها حكاية لو سمحت
رد ببرود- تاكلي زلابيه ؟
- اية !!

مسكت علبة الزلابيه وفضلت اضحك علي الموقف
ساعتها جاب العلبه وحطها قدامي ومشي
يا ربي انا دايما موعودة بالمجانين دول
- يا ماما لازم يعني؟
- يا بنتي حاجات رمضان كتيرة يلا بس علشان نلحق
- يلا

دخلنا كارفور، انا فعلا بحب السوبر ماركت اكتر من امي ذات نفسها اخدت العربية
- انا هجيب من قدام وانتي هاتي من هنا
- طيب روحي

بصيت للكرتونة - اممم طب اخد ١٠ ولا كرتونة؟
قطع أفكاري صوت مألوف ليا - كرتونه
- صح انا برضو بق..
اتخضيت لفيت بسرعه -  أنت تاني!! انت طالعلي في البخت ولا عملي الاسود؟
- الابيض إن شاء الله
- نعم؟ بتعمل أية هنا؟
ضحك-  يا ميس دا هايبر طبيعي يعني بشتري
- اه فعلا أحم، طب وسع
- إتفضلي..ااه ميس رحمة ممكن طلب؟

إتلفت باستغراب من أمتي الاحترام ي ولا!
- أتفضل
حسيت أنه محرج من حاجة - أحم بصي
طلع ورقة من جيبه وادهالي
- اية دي؟
- دي طلبات سمية طلبتها وانا صراحة مش فاهم نصها
ممكن تساعديني؟

رفع رأسه للسقف بيصفر وانا بصيت للورقة شوية وضحكت
- وهي سمية هتطلب عروسة حلوة ليك؟
بص للورقة متصنع الاهتمام_اية!! فين دا ؟
- اهو اه وتكون ياريت ميس رحمة مش كدا؟
- عليكي نور.. احم قصدي عليها حركات.
- وحشة؟
- لا اقصد
- قديمة مش كدا؟
- دقيقة من فضلك
- بتعلي صوتك عليا كمان؟
- لا
- أنا بحب الراجل الحمش
- اه
- بس لو زعق فيا هفقله نصيين
- بصي علي حسب يعني أو بـ..
- هاتلي زلابية
- اية!!
- حبيتها أخلص علشان نلحق نحجز القاعة..قـ.. قصدي نلحق نجيب الزلابية.

" ورغم البعد..أؤمن أن ألقاك "

#رحمة_طارق
#حكاوي_زين