مرحبا شباب و بنات، من هذا البارت راح
ابدي اتركلكم "رمزيات" احداث ترمز لاحداث ثانية اذا فهمتوها راح تستنتجون منها بعض الامور الي راح تصير بالمستقبل. فركزو زين،
و كتلميح راح اكوللكم. انتبهو على الامور
الي ممكن تكون مختلفة بشكل بسيط
جدا عن البارتات القديمه.
Have fun^^
...........................
البارت الثالث:
اني اسفه. مراح اكدر اكمل وياك، شوف
حياتك الله يوفقك ...
اودين: هذي جانت رسالتها من بعد انقطاع
شهر ونص. اعتقد هسه صار عدكم فكرة
ليش عاملتها بهالطريقة صح.
تمام. هسه نكدر نكمل قصتنا ...
لارا: من بعد ما تركت اودين كاعد وحده
رجعت للقاعة بعد ١٠ دقائق دخللنا استاذ
دياخذنا محاظرة. خلصت المحاظرة واودين
بعده مجاي.
سالي: خلي نطلع نتمشى شوية.
طلعنا نتمشى بالكلية، اني و فرح و سالي
نسولف و نضحك واني ادور بعيوني على
اودين. طلعنا من القسم و مشفته، وصلنا
لسنتر الكلية و ماكو. دخلنا الكافتيريا
و هم مجان موجود، لحضتها عرفت.
انو خلص صدك حينقل اودين.
فجأة حسيت بحزن بدأ يدخل گلبي.
فرح: شبيج حبيبي اكو شي؟
لارا: ها؟ لا عمري كلشي ماكو.
فرح: اوك لعد اكوم اني اجيب شي ناكله.
وبعد ما راحت فرح...
سالي: دتدورين على اودين؟
تفاجأت لارا و معرفت شنو تجاوب،
بس حاولت تضيع الموضوع.
لارا: ها؟ لا بنتي شكو دا ادور عليه.
سالي: ماشي، ع العموم تره طلع بعد ما
جنتو كاعدين سوه. و شكله جان ضايج.
لارا: يعني طلع خارج الكلية؟
سالي: اي. مراح تحجيلي شكو؟
لارا: موضوع طويل و فرح حتجي خليها
بعدين اسولفلج.
سالي: فرح هم تعرف.
لارا: ليش كلتيلها؟
سالي: مكلتلها اصلا جانت وياية لما شفناج
كاعدة يم اودين، و هيه اصلا اتفقت وياية
لما نجي هنا تروح هيه تجيب اكل، حتى
اني افتح وياج الموضوع لان هيه تستحي.
لارا: اوك، لعد من تجي اسولفلكم.
وبعد ما رجعت فرح.
لارا: انتو اكثر ٢ احسكم قريبات عليه
صح بعدني ما اعرفكم زين واول مرة
نلتقي اليوم، بس احس اكدر اثق بيكم.
فراح احجيلكم، بس فدوه اذا تقدرون
صداقتنا، الكلام يبقى بيناتنا.
فرح: ماشي.
سالي: اي اكيد حبيبتي لتخافين.
لارا: هاي مو اول مرة التقي باودين.
سالي: فرح: شلون يعني؟
لارا: يعني اني ملتقية باودين قبل الكلية.
اول مرة التقي بيه جانت بمكتبتنا، جان
يدور على رواية لكاتب امريكي مشهور.
سألني اذا موجوده عدنا، فكلتله اسفة ماكو
اذا تحب اكو روايات ثانية انكليزية،
مترجمة و غير مترجمة.
اودين: لا شكرا، اريد هذي الرواية و غير مترجمة ممكن تتوفر عدكم مستقبلا؟
لارا: اشوف راح احتفظ باسمها و اذا
كدرنا اكيد حنوفرها.
اودين: شكرا، اني هم راح اجي كل يومين
اشتري منكم و اشوف اذا توفرت.
لارا: اهلا وسهلا بيك.
بعدها سألني اذا جان عدنا روايات ثانية
لنفس الكاتب، فطلعتله كل الروايات الي
عدنا و من تأليفه.
صار عندي فضول اعرف سبب طلبه
لهالرواية تحديدا، توقعت انو محتاجها
لدراسة معينة كأن يكون ادب او لغات.
اكثر زبائننا الي يطلبون روايات انكليزية
يكونون محتاجيها للدراسة، قليل الي
يحبون يقرون روايات انكليزية، لان تكون
صعبة القراءة، فسألته ع السبب.
اودين: احب مؤلفات هذا الكاتب، خصوصا
هذي الرواية.
فسألته على السبب، و بدأ يشرحلي على
اسلوب الكاتب، طريقته بالكتابة، طريقة وصفه
للاشياء الي تخليك تحس انت موجود
بداخل الرواية، استشهدلي بأمثلة، حسستني
بجمال روايات الكاتب و منها.
استهلال الرواية.
The man in black fled across the desert, and the gunslinger followed.
"Stephen King
من اهم العوامل الي تساعد الرواية على
النجاح بشكل كبير.
هو الاستهلال الروائي "الشطر الاول".
حتى تجذب انتباه القاريء من البداية
ويبقى مشدود ويه احداث القصة لازم
تنتقي الكلمات الاولى بشكل حرفي ومتقن
وتوجه بيها رسالة مخفية لاحداث معينة
تقع ضمن اطار زمني معين، ممكن تكون
في بداية الرواية او منتصفها او حتى
نهايتها.
لما فسرلي الجملة...
فر الرجل المتشح بالسواد من خلال الصحراء.
فلحقه حامل السلاح.
حسيت نفسي مشدودة تجاه الرواية، منو
هذا "الرجل المتشح بالسواد"، و ليش
"فر من خلال الصحراء". زين منو هذا
"حامل السلاح" و ليش ديلاحقه؟
اثناء شرحه الي لبداية الرواية و جمالتيها
وابداع الكاتب بيها، حسيت نفسي حبيت
الرواية، بس الي حبيته اكثر طريقة شرحه
اسلوبه بالكلام، ثقله و هيبته.
ثقافته و شخصيته، و بوقتها عرفت
اني معجبه بيه.
حتى بابا جان دائما يحب يسولف
وياه و معجب بشخصيته،
و جان دائما يكول، هذا ابن حلال.
بعدها صار كل يومين يجي كالعادة،
ياخذ كتاب و يسأل اذا جبناها او لا.
كل مرة يجي اكتشف بيه صفة جديدة
تخليني انجذب اله اكثر، بعد اسبوع
حسيت نفسي بديت احبه، و بديت احس
تعامله اختلف ويايه، اسلوبه صار ارق من
المعتاد، حسيته يعاملني باختلاف عن
الباقين صرت افكر بيه بكل وقت.
جان كل ميجي يروح على رف معين
بالمكتبة، هذا الرف نعرض بيه الروايات
الانكليزية غير المترجمة. جان هوه الوحيد
من الزبائن يروح لهذا الرف، واني بديت
اهتم لترتيب هذا الرف اكثر من باقي
المكتبة. وبعد اسبوع لكيت قطعة ورق.
مطوية على شكل طائر الكركي(اوريغامي).
مكتوب على اجنحته جملة، لما قريتها
عرفت هاي الجملة تخصني، طرت من
الفرحة، حسيت نفسي بعالم ثا...
العفو بدون زحمة، ممكن تتفضلون، الوقت
تأخر ولازم نعزل المكان. :الويتر
فرح: عززززااا شوف الساعة بيش.
سالي: اهوووو هسه وكتها؟
لارا: خلص يلا نروح اكمللكم غير وقت.
بعدها طلعنا من الكفاتيريا و توجهنا لباب
الكلية، وكل وحده من عدنا رجعت لبيتهم.
ثاني يوم ساعة ٦ الا ربع.
🎵 when I see your face 🎵
🎵 there's not a think 🎵
فزيت ع صوت الموبايل.
"سالي" يتصل بك.
فتحت خط ... الو؟
تم تحويلك الى مكالمة جماعية ...
سالي: الو صباح الخير.
فرح: هلو لارا، صباح الخير.
لارا: صباح النور.
سالي: يلا كومي بدلي بسرعة،
دنجيج للبيت ناخذج.
لارا: شتردون وين ماخذيني من الصبح.
فرح: عازماتج ع ريوگ و حتى تكمليلنا
القصة هم.
سالي: يلا بسرعة ارسليلي موقعج على
اي برنامج. حتى اجيب فرح و اجيج.
و بعد ما رسلتلها الموقع كمت كلت
لماما وجهزت نفسي وبقيت انتظر.
صارت ساعة ٧ و بعدهم مواصلين،
بسبب الازدحامات اتصلت عليهم كالو
دقايق و نوصل.
لما وصلو جان الوقت متأخر، منلحك
نروح مطعم فتريكنا بالبيت. عرفتهم
على اهلي و طلعنا للكلية.
جنا رايحين بسيارة سالي، لما وصلنا
و دخلنا الشعبة جنت منتظرة اشوف
اودين موجود، بنفس الوقت خايفة
لا يكون صدك ديريد ينقل.
خلصت اول محاضرة و هو ماكو.
انقهرت بس جان عندي امل يكون متأخر،
سألوني البنات ليش ضايجة؟ واودين
ليش مجاي؟ فكلتلهم على الي صار بيناتنا
من حجي بالسنتر، و كلي حينقل.
سالي: امشو نروح نكعد بالسنتر اذا موجود
او اجه اكيد حنشوفه.
فرح: خوش فكرة.
طلعنا كعدنا بالسنتر، و بقينا كل متخلص محاظرة و يصير ريست نطلع للسنتر
وندور على اودين. بعد ما خلصت اخر
محاظرة و تاكدنا من اودين مجاي.
اتفقنا نروح للكافتيريا نكعد و اكمللهم
القصة، ولما و صلنا الكافتيريا لكينا احمد
واكف بالباب.
سالي: اكولك احمد، اشو اودين ماكو اليوم.
احمد: ما ادري والله.
سالي: اوك شكرا عبالي عندك علم.
