رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 4 🔥
مشينا للعياده طول .. و خشينا حطوها في الملاحظه ..
جهاز تخطيط القلب على صدرها .. نحولها حوايجها .. ركبولها التغذيه .. يسحبوا منها في تحاليل دم ..
وقتها بس 👌🏻 نقول يا مزنه ليش ما مكملتيش قرايتك ؟
ليش ما تخدميش ؟
القلّه اخي 💔 .. الحاجة أخي 💔 .. الفقر أخي 💔 ..
من آلاف السنين عمر ابن الخطاب قال { لو كان الفقر رجلاً لقتلته } ... و الفقر قتل فينا كل شي حلو يا عمر .. قتل كرامتنا .. قتل مشاعرنا .. قتل حسنا و أحساسنا ..
تحسي روحك عايشه باش تنذلي بس ..
اااااه جعانه 😔💔 .. بطني تعصر فيا من الجوع .......
قداش حاجة الواحد بيتحملها ..
الي في عمري ينزلوا في مواد للسيمستر الجاي .. الي في عمري تستنى في بوها يخش عليها بكيس شيبس ..
الي في عمري تترجى في أمها تخليها تقص شويه من شعرها ..
وقتنا تغير .. تغير هلبا ..
بتقوليلي أمهاتنا كانوا يتزوجوا صغار و جابوا و ربوا و كبروا ؟؟
بنقولك ليش أباءنا زي اولاد توا ؟
توا هو الي يقولك بري حوش بوك كان مش عاجبك 🤦🏻♀️
يبرمجلك دماغك أن الحوش هذا مش حوشك و المكان مش مكانك ..
و أنه مداير فيك جميل لأنه خداك من حوش بوك ..
بالله فكيني منهم كبدي طايبه أنا 🤦🏻♀️
جى الدكتور و قالي تحاليلها كويسه .. خودوا الدواء هذا و الصبح تقدروا تروحوا بيها ..
رد عليه حسن قاله كان هذا نخلوها حتى يوم تاني نتطمنوا أكثر .. و الفلوس موجوده الحمدلله ..
أنا 😳🤦🏻♀️🔫🥴
زيد تفاخر ع الدكتور برزق عديلك ..
باهي كيف تبيني نحترمك ؟
كيف تبيني نشوفلك بعين كبيره ؟
ما كانتش مشكلتي مع الفقر لا لا .. و لا كانت مشكلتي اني ساكنه في دار مع العيله .. و لا معاملة اهله معاي ..
لكن في المرض 🤚🏻 ما نبيك توقف تتفرج بكل برود ..
خشيت لي رُقيه لقيتها راقده .. قعدت جنبها لين جى الدكتور شافها و دارلها خروج ..
خديتها في حضني و طلعت .. روحت الحوش طول خشيت داري ..
وكلتها و رقدت .. حسن مقعمز جنبي و جنب رُقيه .. أمه لا طلعت و لا سألت و لا تحيرتلها شعره ..
قالي نجيبلك تاكلي حاجة ؟
قتله لا ما خاطريش ..
خشيت فراشي .. دماغي يرفع و يجيب .. أم حسن ما عمرها سحبت مرتب .. ليش ما تساعدناش ؟ ... كيف الناس هادوا ؟؟
ياريتها تغلط في حبة القلب و تموت ..
خداني النوم رقدت .. و نضت الصبح على أتصال أمي و موده بيجوا عندي ..
نضت ضميت الحوش و حسن بيطلع يخدم على سيارته .. قتله كم قعدوا عندك فلوس ؟ قالي مزال 500 .. قتله معناها خليها هنا و لما تجي موده بعدين نردلها 500 و الباقي كل مره مبلغ .. خير من ينصرفوا في الدوه الفاضيه و معاش نقدروا نرجعوهم .. طلعت أمه من الدار قتله حبوب القلب كملوا أعطيني 150 دينار تو نقول لي وحده من اخواتك تاخدهملي ..
و أنا نغلي من داخل بنتفجر .. أعطاها 150 من فلوس موده .. و قتله بناخد شخاشير و شاربات .. أعطاها 100 دينار ..
و خشت دارها و هي فرحانه بتطير .. و أنا ركب الضغط لي راسي خلاص ..
قعمزت نستغفر و ما بيتش نتكلم و لا كلمه .. جت أمي و أخواتي .. قعمزت نهدرز و طلعت رُقيه جنبهم ..
الحمدلله اليوم أحسن بهلبا ..
نضت فتحت الفريز نبي نطيب الغذاء .. لقيت حافظه فيها رز .. حافظه فيها كيكات .. حافظه فيها نواشف مشكله .. حافظه فيها عبمبر ..
سكرت الفريز و حطيت غذاي ع النار .. أم حسن في دارها لا طلعت لا سألت لا شي ..
حطينا غذانا و تغذينا .. و جت مفيده و طول خشت المطبخ فتحت الفريز بتسخن غذاء أمها .. و على علو صوتها تسب فيا .. كنة العازه .. مش متربيه .. و و و و ..
نضت قتلها احترميني ع الاقل قدام اماليه .. على شنو مش متربيه انا ؟
ناضت امي قتلها عيب عليك الي اتديري فيه .. قتلها مفيده العيب اندير فيه بنتك بس ..
امي لا فطور لا غذاء لين اتصلت بيا و قتلي تعالي حطيلي غذاء ...
قتلها امك طقيت عليها الباب و ناديتها ع الغذاء و حطيتلها سفرتها قدام الباب و ما تبيش تفتحلي الباب ..
جبدتني امي من ايدي و قتلي اسكتي خلاص و اخواتي قالولي بنروحوا احنا 😰
قعدت شاده فيهم و نقوللهم اقعدوا بالله عليكم ما تعدلوش عليها ..
أمي قتلي ما نقدرش نتحمل الوضع هذا .. و مفيده تضحك بعلو صوتها .. و أنا لين حاطه أيدي على راسي من الموقف .. و طلعوا روحوا ..
طلعت معاهم للباب و خشيت لقيت أم حسن و مفيده مقعمزين في الصاله ..
قتلي ضمي الحوش كويس جايين بنات عمتي .. خديت بنتي و خشيت الدار ..
أستغفري يا مزنه .. أستغفري باش تهدي ..
أستغفر الله .. أستغفر الله .. 🤦🏻♀️
اتصلت بي حسن .. قتله تعالى ارفعني حوش بوي .. قالي شن في ؟
قتله بنستريح يومين ..
سكرت الخط و طلعت المطبخ بندير حليب لي رُقيه ..
لقيتهم مقعمزين يتغذوا .. و حميده و بناتها معاهم .. و ملوحين غذاء حسن في الكناسه ..
قتلها علاش هكي ؟ 😳
ما بتش ترد عليا و لا حرف ..
فتحت الدولاب بناخد حليب رُقيه .. لقيت حكة النيدو فاضيه .. قتلهم وين الحليب ؟ ..
ردت عليا حميده قتلي البنات داروا بيه كيكه ..
بردوا خشيت داري و سكتت و قلبي يغلي ما يعلم بيه الا الله ..
جى حسن و قعد معاهم برا .. نسمع فيهم يقولوله طيب غذاء اماليها و الباقي شوفه في الكناسه لوحاته ..
كنت نخاف منهم .. نخاف من صوتهم و نظراتهم .. نخاف من الجو المشحون الي يسببوه بمجرد ما يخشوا الحوش ..
ما نقدرهمش و ما قدرتهمش ..
خش حسن للدار .. قالي هيا كان بتمشي حوش بوك ..
قتله بس !! ...
هذا هو !! .........
قالي انتي مرتي و هما اخواتي و بنطلع نخدم على راسي ..
به و أنا ؟؟
ع الأقل قولي معليشي تحمليهم ..
ع الأقل خش عليا بوجه بشوش و قولي عارفهم ضايقوك و الله غالب بنصبروا و نتحملوا لين نديروا حوش ..
كانت سلبيته تقتل فيا .. تخلي فيه يصغر في عيني ..
لأن الأم و الخوات ما يتجرأوش على كنتهم الا لو يعرفوا ان ولدهم ضعيف ..
——————————-
تعالي نطلعوا برا جنب الناس .. شفتيها هادي الي خاشه تعزي و الي تحضنه تبكي معاه ؟؟
هادي تكرهني في الدم و فرحانه هي توا ..
كانت زمان لما نتلاقوا في مناسبه و معاها راجلها .. كان تلقى تدسه في شلامتها من الغيره مني .. و هو عيونه ما يقيمهمش مني بكل
ايه عاد ماهو احنا الي تشوف راجلها يبصبص ما تقدرش تحاسبه بكل .. لا لا .. تحاسب الي يشبحلها .. و تحسسك أنك انتي الي خفيفه و راجلها راجل ما يعيبه شي .. و فسريها انتي هادي 🤷🏻♀️
شوفيهم كيف قارنين روسهم في بعض و يغتابوا فيك .. امممممم تلقيهم يقولوا هادي وحده من المنحرفات صاحباتها ..
يشبحولك مستغربين فيك كيف تبكي ..
النوعيه هادي .. كان تحكيلها قصتك تقولك لااااااااا 🤚🏻🤚🏻 أنا حاشاني ما نديرش هكي .. و سامحيني إنتي الي غالطه و و و ..
الناس كلها تشوف لي سلوكك بس .. و يحكموا عليك و ينتقدوك و يمحوا تماما الظروف الي جبراتك تغيري سلوكك ..
——————————-
خديت شنطتي و طلعنا مشيت حوش بوي ..
خشيت لقيت امي و موده ينظفوا في الحوت بيديروا عشاء ..
قداش جى في خاطري وقتها ..
أصلاً خشتك لي حوش بوك تحسسك بالراحه .. بالحريه .. تحسي روحك خفيفه .. مرحه ..
حملك كله خليتيه في حوشك غادي ..
خشيت سلمت على عماد و خشيت معاهم للمطبخ .. يسألوا فيا شن صار مع عزوزتك و حماواتك !! ..
و جت مسره بتلحق ع العشاء ..
المستوى 👌🏻 الي كانوا أخواتي يهذرزوا بيه ما كنتش نعرفه 🤷🏻♀️ لين مرات نقول بجد هما هكي عايشين !
بجد هكي يحسوا !
كنت زي التايهة مقعمزه و نسمع ..
ما تلقي الا الي تقولك ما بعدك كيف متحمله الصراحه ..
و الي انتي عندك عادي .. عندي أنا حلم 🤷🏻♀️
يتبع
