Russian Roulette (Book 1 of RR Trilogy)

Roulette #68

Chapter 68 

(Game Over)

Hindi natigil sa paghingal si Malekeith dahil sa patuloy na paghahanap niya kay Michaela sa loob ng malaki at lumang gusaling kinaroroonan nila. Hindi nakatulong ang dami ng mga tauhan ni Stefan na tumutugis sa kanya.

Mabilis siyang sumandal sa isa sa malalapad na poste ng ikalawang palapag nang may tatlong kasamahan nina Stefan ang nagpaulan ng bala sa gawi niya. Ilang hakbang mula sa kanyang pinagtataguan ay nakita niyang nagtatago rin ang kanyang mga kasamahan sa ibang poste.

Nagsenyasan silang magkakasama at nang makakuha ng tiyempo ay lumabas sila sa kanilang pinagtataguan at sabay sabay na pinaputukan ang mga kalaban sa kanilang harapan. Dahil sa pagkagulat ay hindi na nagawang gumanti ng putok ang mga ito.

Ilang segundo tumagal ang pagpapaputok nila sa iilang kalabang naroon. Ngunit rinig na rinig pa rin sa buong lugar ang putok ng baril sa bawat sulok ng gusali. Patuloy lamang ang sagupaan sa kapaligiran.

Labis silang nagulat nang makitang dumoble ang bilang nina Stefan matapos makaalis ng helicopter na sinasakyan nina Clade at Ariadne kanina lamang. Napagtanto na lamang nila kung saan galing ang mga ito nang makita nila ang isang matandang lalaki na nakaitim na suit at may itim na trilby hat sa harap ng gusali. Nanonood lamang ito sa kaguluhan habang humihithit ng tabako. Marami ang gwardya nito na nakahilera sa kanyang likuran.

Mas lalong kinabahan si Malekeith nang makita ang lahat ng iyon. Mas binilisan niya ang paghahanap kay Michaela at sa tauhan ni Clade na nadakip. Ang mahirap pa ay hindi nila alam kung kailan sasabog ang mga bombang inilagay sa katawan ng dalaga, kung mayroon nga.

Hindi niya mahanap ito sa rooftop at sa mga palapag sa pinakataas na bahagi ng gusali kung kaya't bumaba siya sa iba pang palapag hanggang sa makarating sa ikalawa. Ni kahit anong sigaw o senyales ni Michaela ay wala siyang marinig sa paligid.

Nang maubos ang mga kalaban sa palapag na iyon ay nagpatuloy silang lahat sa pagkilos patungo sa mga parteng kinakailangan sila. Batid nilang lahat na nalalamangan sila ng kabilang panig... batid nilang unti unti silang natatalo.

Patuloy lamang sa lakad-takbo na pagkilos si Malekeith habang paminsan-minsa'y nagtatago sa mga poste. Walang direskyon ang kanyang pinatutunguhan. Basta na lamang siyang kumikilos sa pag-asang mahahanap din niya si Michaela kalaunan.

Natigilan siya nang mapunta sa loob ng isang abandonadong function hall ng gusali kung nasaan ang karamihan sa kanilang panig. Bumuo ng maliit na grupo ang mga ito at tila inokupa ang lugar upang maging kwarter.

Tinanguan siya ng iilang bumaling sa kanya nang makitang pumasok siya. Mula rito ay rinig pa rin nila ang hindi matigil na putukan sa labas.

Natuon ang mga mata niya sa gitna ng kumpol kung saan nakatayo ang dismayado, galit, at bigong si Aleksandar. Kumunot ang noo niya at pinakinggan ang mga sinasabi nito sa teleponong hawak.

"What do you mean sacrifice?! Why will he sacrifice himself? Did he lose his mind?!" Sunod sunod na sigaw ni Alek na nakapagpatahimik sa kanilang magkakasama.