سبحان الله وبحمده سبحان الله العظيم ♡
من هي صاحبه الفستان الوردي التي ضيعت علوم ولدنا ؟
(يـوم عـزيـمـه الـجـد سـلـطـان )
بتال ونواف وفهد وفيصل ومازن مكروفين كرف يجهزون مجلس الرجال
فيصل قافله معه من اوامر جده الي ماتخلص ومازن ذبات وضحك بوقت غلط
الجد جالس ويتأمر عليهم : فيصل انت ومازن قومو اذبحو الذبايح والباقي يجهز القهوه والدلال والتمر وعلوم الرجاجيل
فيصل : تكفى ياجد ان راح معي مازن بضحك وبنسى الذبيحه تكفى قول غيره
مازن : خيرر يعني انا مطرود من عند الوجد ومطرود من عند فيصل؟ وش هالحياه القاسيه ذي !
الجد : قم قم تقلع انت وياه واذبحو الذبابح وعطوهن الحريم يطبخنهن
فيصل : ابشر ي جد
وراحو مازن وفيصل يذبحون الذبايح
فهد بتفلسف : ياجد لماذا لم نذهب ونأتي بهن الي الملحمه ؟
الجد منفقعه كبده من لهجه فهد : اقول ورا ماتلبخ
فهد : ماذا تعني كلمه "تلبخ" انا لم افهم قصدك ؟ ماذا تقصد ؟
بتال : انا اقول يا فهد قم بس عاونا لاتلقم مخمس
فهد : حسناً يابن عمي
ابو الوجد : يبه عسى كل شي جاهز ؟
الجد : اي الحمدلله كل شي جاهز بس انت علمت الوجد تتأدب؟
ابو الوجد : يايبه البنت كفايه الي فيها
الجد بجديه: اجل اذا سوت مشكله والله والذي رفع السماء وانزل كتابه بزوجها
ابو الوجد : خلاص بروح اتكلم معها
نواف : عزتي لها المسكينه متولجينهنا من امس
بتال : والله الله يعينها
فهد : لا يا اصدقاء انها حمقاء ولاتحترمني فـ امس اذ هي تهاوشني
نواف : مالومها والله لو هاوشتك على ذي اللغه المكسره
فهد : سأسامحك هاذه المره ف المره القادمه لن اسامحك احذر ياخي
بتال : ياحر كبدي حرهااا ابك بالله لاتتكلم مع الريجيل اليوم تفقع كبودهم
فهد : حسناً سأسكت
،
الوجد لابسه فستان وردي فوق الركبه بشوي وموضح ملامح وجمال جمسها الفتنان وشعرها القصير مسويه له ويفي وواقفه قدام المرايه تلبس الحلق
طق الباب ونطقت الوجد : ادخل يانودي
دخل ابو الوجد وعقدت حواجبها الوجد ونطقت بربكه : هلا يبه
ابو الوجد : اجلسي يابنتي بقول لك شي
الوجد توقعت انه بيهاوشها على فستانها لان عمامها كلهم يهاوشون بناتهم على الفساتين القصيره الا ابو الوجد
جلست الوجد وجلس قبالها ابوها ونطقت الوجد : يبه فيك شي؟
ابو الوجد تنهد ونطق : يابوك جاي احذرك وانا خايف ياخذونك مني ويعطونك رجالاً مانعرفه
الوجد عقدت حواجبها : يبه مافهمت ليش مين ياخذني
ابو الوجد : ابوي وعمامك متوعدين فيك ويدورون زلتك يبون يزوجونك على ادنى غلط
الوجد : بس يبه اذا انت معي اكيد محد بيقول شي !
ابو الوجد : انا معك بس ابوي ماقدر اعارضه صعبه يابنتي وعشان كذا جاي اقولك اهجدي بس هالفتره ولاتعاندينهم عشان مايلزمون يزوجونك
الوجد والدمعه بطرف عينها : يبه ! كيف وشلون وليش
ابو الوجد : يابوك مابيدي شي انا قلت لهم وعارضت فكره زواجك بس عمتك شيخه تعبي راس ابوي وتحرضه عليك
الوجد بتهديد : طيب ي ست شوشو والله ماتسلمين من يدي اليوم
ابو الوجد : لاتعرضينها يزوجونك واذا لزمو يزوجونك ترى بزوجك فيصل !
الوجد : لا يعع الا فيصلل مالقيتو الا هوو!
ابو الوجد : يابنتي نزوجك فيصل اشوا من يزوجونك رجال مانعرفه هو شين ولا زين
الوجد : يبه مابي احدد تكفى لاتزوجوني
ابو الوجد ابتسم : يابوك شيً ماتبينه ماهو بحاصل
الوجد ابتسمت ونطقت : مشكور بابا
ابو الوجد : ابوك معك حتى لو على غلط ، المهم ميلا وين ؟
الوجد نزلت راسها بضيق ونطق ابو الوجد : وش فيك؟
الوجد بضيق : يبه اسفه ماقدر اربي ميلا يبه اعطيتها الايباد وهي بعمر صغير والحين ضاعت بين الاجهزه وماترفع راسها عن الايباد واذا جيتها واخذت الايباد تعصب وتبكي وتضرب وتصارخ اسف بابا
ابو الوجد تنهد ونطق : معليك يابنتي الشره مو عليك الشره على امك الي هجرت بيتها وبناتها
ابو الوجد : على طاري امي اتصلت عليها امس
ابو الوجد : قايل لك لاتتصلين لاني اعرفها امك عنيده وراسها يابس بتحط اللوم والخطاء عليك
ابو الوجد : يبه صدقني مالها ذنب هي اكيد مضغوطه وانفجرت علي امس
ابو الوجد : هو انتي صادقه يابنتي محد معصوم عن الخطاء وقومي ولايتعكر مزاجك وروحي لشيهانه والعنود وحاولي تاخذين ميلا معك تلعب مع غند والشله الي معها
الوجد ابتسمت : ابشر
ابو الوجد ابتسم وطلع وتنهدت الوجد وحطت عطر ولبست عبايتها وطرحتها على رقبتها واتجهه لغرفه ميلا ونطقت : ميمي ؟
ميلا ماترد وتلعب بالايباد
تضايقت الوجد وتقدمت وسحبت الايباد من ميلا : قومي يلا
ميلا بدت تبكي وتصارخ وتضرب
الوجد قست قلبها عشان ماتدمر اختها بالاجهزه ونطقت : مافي ايياد اليوم من اليوم ورايح الايباد تستخدمينه ساعه بس والباقي تلعبين مع غند وغنى وعبود والشله !
ميلا تبكي وتضرب الوجد : مابغىى ابغى الايباد
الوجد رفعت الايباد على الرف وشالت ميلا بحضنها وعلى الرغم ان ميلا تصارخ وتبكي الا ان الوجد متجاهله تماماً عشان ماتتضرر اختها من الاجهزه طلعت الوجد من البيت وحطت الطرحه على شعرها ومشت متجهه لبيت الجد
ودخلت فيه والكل يسمع بكاء ميلا
الجده سحبت ميلا من الوجد : ابك علامها تبتسي؟ ليكون دابجتها؟
الوجد : لا بس خذيت الايباد منها
الجده : اييه زين ماسويتي ذبحنها الاجهزه الوكاد معليه لاتشيلين همها تبتسي شوي وتعود تلعب مع الورعان انتي روحي العنود تحراتس
الوجد : تمام اذا بغيتي شي ناديني تمام؟
الجده : زين ياعين ابوتس روحي استانسي
الوجد ابتسمت واتجهه لغرفه العنود
العنود وهي تحط الايلاينر : افف مو راضي يضبط!
الوجد : هايي بنات
شيهانه من زود حبها للوجد قامت دقت تحيه : ارحبي يادوله المستقله
الوجد ضحكت ونطقت : البقىىى يالمحزم المليان
العنود وهي ترسم الايلاينر : محزم فاضي قصدك
شيهانه : اقول سوي ايلاينرك ذا الي تقل ابو قاسم
ضحكو البنات ونطقت مها وهي ماسكه ظهرها : احس بولد بدري
الوجد : وناسههه مهاوي بتجيب مهاوي صغيرهه
دلال : احس انا عكسكم احس بخاطري وحده منكم تتزوج من زمان عن الزواجات !
العنود والوجد وشيهانه بصوت واحد : لا ان شاء الله مانبي نتزوج !
مها ضحكت ونطقت : اول من يعرس انتم
جوري دخلت عليهم تركض : بنات بنات في سالفه قويههه اسطوريه طازه
الوجد : جوييي العلوم اسلمي
جوري : بنات تخيلوووو
العنود نزلت الايلاينر : تحمستت بسرعه!!
جوري : علوممممم صازه
شيهانه : تهرجي زي الاواد ولا بصفقك
جوري : بنات تخيلو شفت بنات عمتي شيخه وحده لابسه فسفوري والثانيه تفاحي
الوجد مسكت راسها : ياراسيي وش اللوان الي تفقع العين
شيهانه : عرفت من يشتري الفساتين المعلقه بالخياط
العنود تنفض قميصها : تف تف ماودي اتشمتت
مها : بنات خلاص حرامم
دلال : منجد بنات ترى تبتلون
جوري : ماعلينا اسمعو العلم الثاني
شيهانه : كومه علوم هالبنت
جوري : بنات حرمه جابر بتجي يعني الوجد بتتهاوش معها مره ثانيه !
الوجد : وتسبديييي سماهر ماغيرها؟؟
جوري : ايي هي
الوجد اخذت ربطه شعر حطتها بيدها ونطقت مها: وش بتسوين يالمهبوله
الوجد : عشان اذا استفزتني ربطت شعري واستفردت فيها
شيهانه والعنود : معاك
دلال : وايي بنات مو صاحيات !
جوري : انا عن نفسي جويي الهوشات لاني بنقل العلوم
الوجد : بنات عاد من الحين بقول الي تحط عيونها علي وتخز بفقعهم لها
شيهانه : تممم انا معكك
العنود : عاد جوجي اليوم لابسه وردي ماش مو حق هوشات
الوجد : اوهمها اني لطيفه بس اذا تمادت كسرت يدها
شيهانه : جويي اجل اليوم مابي اسوي كيرلي عشان مااتحسف عليه
العنود دقت تحيه : العمه نودي مع بنات اخوانها
الوجد وشيهانه : حييي
دلال : الوجد حرام ترك كتكوتهه لاتصفقينها
الوجد بمزح : ترى اصفقك الي يمنعني
مها : اوهه تهديد من تحت التريلات خلاص بنلتزم الصمت
شيهانه : ايي اهجدو
جوري : شيهانه شوي وتشبك الوجد واحد من اخوانها
شيهانه غمزت : هي اساساً زوجه فيسل على قوله عهود
العنود بضحكه : الوجد حرم فيسل بن نواف
انتفضت الوجد بكره للرجال : وعع وعع وعع يابنات وعع مابلع الرجال في عيشيه ربي
جوري : تم ننقل العلم
العنود : اخباريه الديره جوري
شيهانه : لزمتت خلاص مهما كرهتي فيصلوهه بزوجكم
الوجد تضيع الموضوع : خلاص بنات فستاني حلو؟
ضحكو البنات على تصريفها للموضوع وكلملو يتكشخون
،
فيصل ومازن يذبحون الذبايح وثيابهم البيضاء الملطخه بالدم
مازن يصفق ويعزز لنفسه : حيي عينك يازوزو
فيصل : جود جود زين لااحطك بدالها وانحرك
مازن كشر : وع انت واعصابك التالفه
فيصل بتهديد بالسكين : قد اعذر من انذر ترى بنحرك !
مازن : خلاص زين اهجد تراني عمك
فيصل : معليش انا ماعندي عمام
مازن : يلعن ام الجحده
فيصل : خلاص خلاص انت عمي المهم عمي زوزو بدخل الذبايح وانت دزها للمغسله وطلع ثيابنا انا والعيال
مازن : وجع وهاذا وانا عمك
فيصل: اهجد اكبر منك بسنه !
مازن : ترى بسنه مو بعشر ستين
فيصل : اي زين انت صح واكبر من ١٥ سنه خلاص كذا رضيت؟
مازن : اي خلاص رضيت لاتنفخ عزتي للي تبي تتزوجك بدعي ليل نهار ماتكون الوجد زوجتك المسكينه بتاكل خرا دامها بتتزوجك
فيصل: معليك مو هي
مازن غمز : اجل بنت الست شوشو على قوله الوجد ؟
فيصل : لا ماهي عهود وبعدين تعال علامك متولجني بهالوجد ذي؟
مازن : مادري ياخوي الوكاد بروح وانت رح بعد لاتقعد تعاين !
راح مازن وضحك فيصل لان مازن فيه كميه حب للحياه وسعيد
مازن شهق والتفت : شفت ضحكتك اخيرااا
فيصل ضحك : رح رح توكل
ضحك مازن وراح وشال فيصل راس الخروف بيد وبيده الثاني الكيس الي فيه الذبيحه
ودخل
،
الوجد نازله من الدرج بعد ماسمعت بكاء ميلا : افف ياربي افف
فيصل جاي وملابسه دم ومعه راس الخروف
الوجد طلعت بوجهه فيصل وصرخت من شافته
فيصل طاحت عينه على ذاك الجمال وذاك الفستان الوردي والجسم الي سلب عقله بوقتها فيصل ماتوقع انه خفيف لدرجه ذي تجيب راسه بنت حتى اسمها مايعرفها وفهى بوجهها
الوجد من شافته فهى سطرته كف على خده ونطقت : وجعع احترمني !
فيصل استوعب الكف وصد عنها ونطق بعصبيه: ماني ميت عليك لاوجهه ولااخلاق !
الوجد : الظاهر تبغى كف ثاني !
فيصل : توكلي بس
الوجد : جاي وبوسط بيت جدي وتقول توكلي؟؟
فيصل تجاهلها واتجهه للمطبخ
الوجد استوعبت فستانها الوردي القصير وحطت يدها على وجهها بفشيله ونست تماماً صياح ميلا وطلعت للبنات وهي مو على بعضها
فيصل دخل عند حريم عمامه وينزل الذبيحه
فيصل : سمي وجدي يقول لاتتأخرون
ام بتال : ابشر ابشر ولايهمك
الجده : فيصل بالله شف ليش ميلا تبكي هالوجد ماحصل تجي تشوف اختها
فيصل : ابشري ياجده
وطلع فيصل وشاف ميلا واخذها معه يسكتها وهي خافت من الدم وهو مبتلش فيها واخذها معه للمجلس الرجال ونزلها عند العيال وينتظر مازن الي تأخر لكن فيصل كان يهوجس بالعيون الكحيله الي مايعرف حتى اسمها ومايدري منهي وقال بينه وبين نفسه : اتمنى ماتكون متزوجه اتمنى ماتكون لا مها ولا دلال يارب ، جوري اعرفها مشفوحه مو هي صاحبه العيون الكحيله والوجد مدري ماقد شفتها بس ماظن هي وعهود اعرفها اجل شكلها عهد ! المهم ماعلينا منهي بالطقاق
مازن جاء ومعه الثياب : استعجل البس ابوي فاصل على العيال
فيصل اخذ الثوب : ابشر ابشر رح هد جدي بسرعهه
مازن : والله مالي دخل اخاف يطرحني يصفقتي {وَلا تُلْقُوا بِأَيْدِيكُمْ إِلَى التَّهْلُكَةِ}وانا ماني رايح للهلاك
فيصل التفت وهو ينطق : الله يس....
قاطعه مازن وهو يشهق : فيسل!! وش فيه صابرك مضروب ؟؟
فيصل حط يده على خده : وش تقول؟؟
مازن : وربي مصفوق بكف عان الاصابع
فيصل فتح كاميره جواله وشاف خده الا في مطابع اصابع ام فستان وردي مجهوله الاسم !
مازن : مين الي مصفقك؟ هاذي اصابع صغيره واضح بنت اعترف
فيصل: اييي ميلا ميلا شلتها وهي تبكي وسطرتني
مازن ضيق عيونه : علينا؟
فيصل : اجل مين غيرهاا؟؟ ميلا ولا شيهانه
مازن : نشيل احتمال شيهانه لان يدها يد افغاني قويه تشيل ضروسك ونشيل احتمال يد ميلا لانها طفله ماتعور كذا مينن اعترف ؟؟
فيصل : ياليل عادد فكني شرك ياورع تقلع
مازن : بخمن اجل اول خيار الوجد لان تتعامل بالتصفيق ثاني خيار عهد ثالث خيار الي تقول فيسل
فيصل دخلت باله انها عهد وسج بنص خيارات مازن
مازن : الوو ولدد
فيصل : مازن يرحم والديك اسكت تكفى طالبك طلبه
مازن : زين زين ي فيسل زين
فيصل يكره هالاسم"فيسل " ونطق : اللهم صبرني صبراً جميلاً
ضحك مازن وتعداه فيصل ودخل لمجلس الرجال
،
الجد فاصل على العيال وفهد عالم موازي وقاعد يبربر له باللغه الفصحى المكسره
فهد : انظر ياجدي ان فيصل قادم فل تهاوشه
بتال : اظن محد يفقع كبد جدي الا ذا الفهد
نواف : فهد عالم ثاني تحس مترجم عربي بـ لوس انجلوس
مازن سمع الذبه وضحك بوسط هواش الجد : ياعيالل نواف يذب اخيراا
الجد : اعقببب ! يالخسيس انا اهد عليكم وتضحك؟؟
مازن يدور عذر: يايبه شسمه اييي ايي مدري وش قاعد اقول بس ترى بالغلط ضحكت يعني مو بيدي يايبه
الجد كش بوجهه مازن ونطق : مالت هاذا وانا ابيك عم لهم وتصير رسمي بس ماش مالت عليك انت والخمه الي معك
فهد : انا لست بلي دخل
فيصل: بالله فهد ماتعرف والله ماتعرف تتكلم فصحى
نواف : فهد شي ماتعرفه اتركه
مازن : طالبك طلبه اترك هاللغه تكلم معنا لهجه عاميه، ابك، عانه، يعدي،عان زي كذا تكلم
فهد : يااصدقاء دعوني وشأني فأنا احببت هاذا اللغه من الصغر
فيصل : خذلك عزتي لنا ولرجال على اللغه الي بيسمعونها
الجد : الوكاد علمو ذا المتوخ فهد كيف يضيف ويتكلم مع الرجاجيل لايقول ماذا تريد هل قهوه ام شاهي
مازن كاتم ضحكته وماوده يضحك يلقم تهزيئ وفيصل يدري اذا ضحك مازن بيلقم تهزيئ معه
وراح الجد وانسدح مازن يضحك والعيال يضحكون على وضعيه مازن
،
تعالو للبنات
دخلت عهود ومعها عهد على البنات وعم الصمت عند البنات وتحولت سوالفهم من حش الي براندات وكشخه
عهد كانت من اكبر احلامها تصير نسخه من الوجد وزعلت من شافت الوجد لابسه فستان وردي !
شيهانه بهمس للوجد : دشو علينا العرب الملحدين "رياكشن"
الوجد بهمس : وايي شوفي عهد كيف تناظرني شوي وتخترقني !
جوري جت بتنقل علم بوقت غلط : بناتت مادريتو؟؟
الوجد قرصت جوري وهمست : اسكتي شوي بس ممكن ماتقولين شي عند عهد وعهود؟
جوري : طيب طيب
فزت الوجد : بناتتت ميمي وينهاا؟؟
العنود : يمه بسم الله وين راحتت ؟
شيهانه : بنات ميمي مو زي الورعان الباقين ميمي تروح!
الوجد : بروح ادورها دورو معيي
جوري : تم تم يلا انتشرو
اما عهد الي رجعت للبيت تغير لبسها وتلبس فستان وردي
الوجد راحت بخوف تدور ميمي وتدور المزرعه كلها بدون عبايه ولا طرحه من الخوف على اختها لطالما ميلا مو زي الاطفال الباقين ميلا من الاحتمالات انها تطلع من برى المزرعه
الوجد ترفع شعرها الي يلعب فيه الهوء وقلبها يطق بخوف
فيصل طلع يدخن بعد ماانكرف من الجد وطاحت عينه على ام فستان وردي قاعده تمشى وتدور بخوف وواضح مرتبشه
كان يحس بشعور غيره بقلبه يخاف احد يشوفها بالفستان هاذا ونطق بحده
: هيه انتي ام فستان وردي
الوجد التفت لصوته ونطقت : ترى ماني رايقه لك !
فيصل بحده : الضيوف الحين يجون ادخلي!
الوجد ماقدرت تتحمل اختفاء ميلا ودمعت عيونها : اوفف خلاصص تكفى اسكتت
فيصل : طيب وش فيك وليش تبكين؟؟
الوجد : لو سمحت اتركني بحالي مالك دخل من اكون ومن انا ومن ادور خلاص
فيصل : عهد؟؟
الوجد وهي تمشى تدور ميلا ونطقت بدون لاتحس على نفسها من الخوف الي فيها : اييي خلاص فكني
فيصل بهمس : كنت حاس انها عهد
فيصل ابتسم من عرفها وراح
الوجد دخلت واتصلت على ابوها : يبه
ابو الوجد : سمي علامك تبكين؟
الوجد : يبه ميمي وينها؟
ابو الوجد : لاتخافين فيصل جابها لنا
تنهدت الوجد براحه : الحمدلله تبيها ولا اجي اخذها؟
ابو الوجد : لا خليها تلعب مع عبود
الوجد : تمام
وقفل ابو الوجد الخط ورجعت الوجد للبنات تطمنهم وجلسو يسولفون وشوي ودخلت عليهم عهد لابسه فستان وردي !
الوجد غمضت عيونها تهدي نفسها لان طقت كبدها من تقليد عهد لها
شيهانه : الوجد التقليديه
جوري ماتت ضحك : حلووو بنقلها بنقلها
العنود : حبيبتي عهد انتي بنت اختي وحبيبتي ليش تغيرين فستانك هذاك احلى
عهد : عجبني هاذا طيب
الوجد : خليها خليها بشوف وش تاليتها
دلال: الله يستر بس هدوء الوجد مو مطمنيني!
مها: بنتفجر نهايه العزيمه قولي مهاوي ماقالت
،
بعد صلاه المغرب صلو وبدت الناس والمعاريم تجي
ام بتال وام نواف وشيخه والجده ماسكين العزيمه ويهلون ويرحبون
والبنات يلعبون حجره ورقه مقص والي تخسر تدخل تسلم على الحريم اول
وخسرت الوجد والمفروض تدخل تسلم اول وحده
الوجد : بنات تكفون لاا !
العنود : روحي جوجي يلاا
شيهانه وهي تطل على الحريم من عند الباب : وجدوه
الوجد : هلا
شيهانه : بنت هاذي مو بنت خالك شروق؟
الوجد بشوق : كذابهه!!
شيهانه : عاني !
الوجد صارت ورا شيهانه وشافت بنت خالها شروق وام شروق: يارب ماما جت
العنود تنهدت بضيق من الشوق اللهفه بعيون الوجد
الوجد : بنات بدخل
ودخلت الوجد وهي تتمايل بخصرها وتلعب بشعرها يحق لها تغتر وهي بهاذا الجمال كله
وبدت تسلم على الحريم والبنات دخلو وراها
الوجد وصلت لـ شروق : شروقيي
شروق حضنت الوجد : ياحيوانه وحشتني ليش ماتتصلينن فقدتك
الوجد : اعذريني والله ماختفيت الا عندي ضروف
شروق : عادي ياعيوني انتي
الوجد : شروقي وشلون امي؟
شروق : كويسه بس ترى مشتاقه لك بس تكابر
الوجد زمت شفايفها بضيق ونطقت : طيب ومشاري هجد؟
شروق هزت راسها : لا مع الاسف تطور الوضح صار يوعد عمامك
الوجد تنهدت : يارب يسرهاا
شروق : ياعيوني هاذي الحياه يوم لك ويوم عليك لكن تفائلي بالخير
الوجد : افف يلوموني بحب بنت الخال ياناسس
ابتسمت شروق وجلسو جنب بعض
والعنود وشيهانه يتوعدون بـ الوجد لانها جلست عند شروق
جت حرمه وقفت جنب ام نواف : السلام
ام نواف : وعليك السلام
ام طلال : وشلونتس وشخبارتس
ام نواف : بخير الحمدلله وانتي شلونتس وشخبارتس؟
ام طلال : بخير دامتس بخير المهم يام نواف ابي هالبنت من بنته ؟
ام نواف : مين ؟
ام طلال تأشر على الوجد : هاذي ام وردي
ام نواف : ايي هاذي الوجد بنت تركي السلطان
ام طلال : اييي هاذي الوجد الي يمدحونها؟
ام نواف : الله الله هي وتستاهل المدح
ام طلال : بيني وبينك ابي امها بخطبها
ام نواف خافت ان الوجد تروح لـ طلال وهي تبي الوجد لواحد من عيالها ونطقت : البنت مخطوبهه
ام طلال : هو؟ مخطوبه؟ جل مايقولون صغيره وماتحب الرجال وش صار؟ ومن خطيبها؟؟
ام نواف : مخطوبه لولدي فيصل
ام طلال : ايي الله يوفقهم ويتمم لهم على خير
ام نواف : امين امين
وراحت ام طلال وامتلى المجلس بالحريم وشيهانه من عوايده تخلي كل البنات يقومون يرقصون اما هي لا ماترقص وحجتها " قصه شعري بوي "
وجابت السماعه وبدت تشغل شيلات وهي ناويه الوجد
شيهانه شغلت الشيله وسحبت الوجد بوسط المجلس والوجد بالبدايه ترددت بس ماتبي كلام الناس عنها ورقصت
والعمه شيخه تسوي نفسها تصفق للوجد وهي بالحقيقه تكش عليها والوجد تلاحظ وتكش على عمتها ومحد لاحظ الكره والعداوه الي بينهم .
جلست الوجد بعد مارقصت وتعدل شعرها والطامه الكبرى ان سماهر كانت جنب الوجد والكل متوتر ويدرون انهم الحين يتهاشون
سماهر : وعع ترى رقصك مو حلو !
الوجد التفت للي جنبها وشافت سماهر : سماهوه يالحصنيه؟؟
سماهر : يالعوبا يالملسونه ايي انت سماهر
الوجد قامت شدت شعر سماهر : ايا بنت الكلب اجل تسبين رقصي ؟؟
وسماهر تشد شعر الوجد وتهاوشو والحريم يفارعون بينهم
الوجد تتفلت من الحريم الي ماسكينها : يافقع كبدي يالحصنيه
سماهر تتخبى بين الحريم خايفه من هالوجد الملسونه : يالملسونهه
وهدوهم الحريم وطلعو وجد من المجلس عشان تهدى الاوضاع
وسماهر تعدل شعرها وكأن شي ماصار
وشيهانه والعنود كانو يعاونون الوجد بس من تحت لـ تحت شغلهم بالدس
،
فيصل جالس بالدكه بعيداً عن الرجال وباله مشغول بأم فستان وردي وكان مصر انها "عهد"
رمى الدخان الي بفمه وتنهد ويحس ان قلبه معها وكان ينكر المشاعر الي جته
رفع راسه على حس عهود وصد : خير؟
عهود : فيسلل طفشانه ابي اسولف معك
فيصل وهو منزل راسه : ياختي تقلعي عيب وشق جيب
عهود : وايي فسول ليش ماتسولف معي؟
جت عهد وهي لابسه عبايتها ونطقت : عهود؟؟ وش جابك عنده؟
فيصل شاف فستان عهد الوردي الي طلع طرفه من الركبه واقتنع ان ام فستان هي نفسها عهد ونطق وهو منزل راسه : عهد انتي الي قابلتيني اليوم؟ العصر؟ً
عهد ماصدقت انه يتكلم معها ونطقت بكذب : ايه انا عهد
فيصل قام وراح وهو مبتسم انها هي عرفهاا اخيرا
بس الي شاغل باله ان ام فستان وردي ماكانت مندفعه لدرجه هاذي شك بالموضوع بس تجاهله
عهود : وجع عهدد !
عهد عرفت انه يقصد الوجد وعضت على شفايفها ونطقت : اسمعي اعرف كيف اجيب راسه
عهود : كيفف ؟
عهد : عندي
عهود : تمام يلا نرجع لايشكون
ورجعو
،
الرجال يقلطون على العشاء والحريم كذالك يقلطون
الوجد والعنود وشروق وجوري وشيهانه جالسين على شكل دائره وبينهم الحلا والقهوه ويسولفون
الوجد وهي تتلذذ بالحلا : بناتت مره يجنن جربوه
شروق : منجد والله طعمه لذيذ
العنود : هاذا اعرف مكانهه بنات قريبب من عندنا لازم كل جمعه ندج له ونشتري
شروق : افف اعزموني مو تدجون لحالكم خير ترى اغارر ماعندي بنات خال ولا عم غير جوجي
شيهانه : هاذي حقتي
جوري : يوههه ياشيهانه تغار تغار احد يحب الوجد اكثر منها تموتت
العنود : عزي لرجلها بيلقى شيهانه مرسبنه عنده تسولف مع الوجد
الوجد : مابغى اتزوج ليش مصرين اني بتزوج !
البنات غيرو الموضوع لان الوجد ماتحب
شروق : الوجد فستانك مرهه يجنن من وين ؟؟
الوجد : من ** مره اسعارهم معقوله تجنن والله
العنود : ايي والله قد رحت مع الوجد وكان كل المحل يجنن يابناتت يجنن
شيهانه : اهخخ ياحلوي بس شاريه راحه بالي جنز وبلوفر يالبيه
جوري : اقول بنات خلاص قومو نتغشى جعت
الوجد : تمام يلا قومو
وقامو البنات يتعشون وتعشو
،
١:٢٣ ص
خلصت العزيمه وراحو الناس وهنا تبدا فقره البنات "التنظيف"
الوجد بفستانها ومعها المكنسه وتتحلطم
العنود لبست قميص الروز وتكرف
وشيهانه تسوي نفسها تساعدهمم
والعيال جالسين بالدكه يلعبون بلوت وفيصل ساج عنهم ويتمشى ومازن خرب البلوت وقام مع فيصل
واخيراً البنات خلصو تنظيف
الوجد لبست عبايتها ونطقت : يلا بنات برجع البيت واغسل الميكب واجيكم الصبح ان شاء الله
العنود : خيررر والله تخلوني هنا لحالي ؟
شيهانه : والله انا مشتاقه لسريري لي يومين راقده عندك برجع للبيت مع الوجد
جوري كذا ولاكذا هي مو معهم هي نايمه بالمجلس
شروق : بطقها كعابي الله يعين
الوجد : تعالي نامي عندي وبكرا تروحين
شروق : تمم يابنت الخاله
وطلعو من بيت الجده شيهانه والوجد وشروق
شيهانه راحت بأتجاه بيتهم والوجد وشروق
وبطريقهم لبيت ابو الوجد حصلو مازن وفيصل
تنهد الوجد : كملت
شروق : ليش مين هذولا؟
الوجد : خالي وولد عمي
مازن شاف الوجد وجاء بينطق اسمها بس : اوهه بنت اخ...
قطع كلامه من شاف شروق وصفر بذوبان : صارخخ
فيصل كشر من انه ماكمل كلمته يبغى يتأكد اذا ام فستان عهد ولا؟
الوجد : خير بعد؟
فيصل : اكسري الشر !
اما مازن وشروق يتهاوشون
شروق بعصبيه : ليش تصفر وتقول صاروخ؟؟
مازن : لا اسمعي يابنت الحلال شرقت بدخان فيصل وقلت صاروخ بالغلط وماكنت اقصدك
شروق : الا قلتت
مازن : لالا اكلت فلفل واحرقت لساني وقلت صاروخ بالغلط
شروق : وسحبان الله كل شوي يتغير العذر!
مازن : لا ماقصدد
الوجد : وربي ان ماتقلعت عن طريقي مايكون لك طيبب!
فيصل انلخم كيف انها قبل شوي قالت بأندفاع "ايي انا عهد " والحين تهاوشه عجز يتسوعب تقلب شخصياتها جاهل انهم غير الشخص !!
فيصل والوجد يتهاوشون ومازن يبرر لشروق موقفه
واخذو ١٠ دقايق وهم يتهاوشون واخر شي تركو بعض وكل واحد راح لبيته
،
الوجد وشروق دخلو البيت بهدوء لان ميلا نايمه ومسحو ميكبهم ولبسو البجايم ونامو
،
فيصل دخل وحصل شيهانه تاكل بالمطبخ ونطق : ارحبي
شيهانه : جابك الله اجلس اجلس
فيصل : مشروع نقل علوم جديد غير علوم جوري هاذي
شيهانه : اييي اسمع تخيل صارت هوشه كبيرهه
فيصل تربع على طاوله المطبخ : اسلمي
شيهانه : تخيل ان الوجد كانت ترقص وخلصت رقص وجلست والي ماتعرفه انها جلست جنب اكبر عدوه لها سماهر!!
فيصل : سماهر الي تهاوشتو معها اخر مره ؟
شيهانه : اييي هيي المهم سبت الوجد وتقوم الوجد عاد كانت منضغطه اليوم مره وهي تجرجرها يمين ويسار وتسمح بوجهها البلاط عز الله بردت كبدي هالوجد
فيصل: اعوذ بالله جنيه هالبنت عاد اسمع انها ملسونه بس ماقد شفت منها شي
شيهانه : اهخخ لو تشوفك عاد انت رجال وهي ماتحب الرجال واول ماتشوف رجال تصفقه كف حتى لو ماسوى لها شي
فيصل عقد حواجبه وتذكر البنت الي صفقته كف "ام فستان وردي " !
شيهانه : اقولككك تخيل جتنا عهد ولابسه فستان وردي وععع وعع مايصلح عليها !!
فيصل لفت انتباهه : فستان وردي؟ وعهد؟
شيهانه : اييي تخيل جلطتني وبكل ثقه تحسب نفسها غنوجه زي الوجد !
فيصل : اي زين تمام
وقام وهنا تأكد ان ام فستان وردي هي عهد
وعقدت حواجبها شيهانه وكملت اكلها .
______________________
انـتـهـى الـبـارت .
اللهم اغفر للمؤمنين والمؤمنات والمسلمين والمسلمات الأحياء منهم والأموات
النجمه تدعم الروايه
وعطونا رايكم
YOU ARE READING
لاتقارنين حبي لك بأي مخلوق انا حتى بغيابك احبك
Randomفيصل بحده وعصبيه نطق: ان ماخذيتك وربيتك ماكون ولد محمد الوجد ببرود وعناد : ان مارفضتك ماكون بنت تركي !
