Dalgona Coffee (Whipped Coffee)
သို့/ ဖေဖေ
သတိရခြင်းများစွာနဲ့ စာရေးလိုက်ပါတယ်။
သမီး အစစအရာရာ အဆင်ပြေချော့မွေ့စွာရှိလို့ ဖေဖေ စိတ်မပူတော့ဖို့ အရင်ဆုံး ပြောပြပေးချင်ပါတယ်။ အရင်လို သမီးက တခုခုဆုံးဖြတ်ဖို့ စိုးရွံ့မှုတွေ မရှိတော့ဘူး ဖေဖေ လုပ်သင့် လုပ်ထိုက်တာကို လုပ်ပြီး အမှန်ကန်ဆုံး ဖြစ်အောင် လျောက်လှမ်းနေပါပြီ၊ အမှားတွေ အပေါ်မှာလဲ သင်ခန်းစာ ယူပြီး ရှေ့ဆက်ဖို့ ခွန်အားတွေ ဖြည့်ဆည်းနေတတ်ပါပြီ။ ဒါတွေဟာ ဖေဖေ့ လမ်းညွှန်မှုတွေ မပါဘဲ သမီး လျောက်လှမ်းနိုင်မှာ မဟုတ်တာ ဖေဖေ သိစေချင်လိုက်တာ...
ဒါနဲ့ ဖေဖေရော ကျန်းမာအဆင်ပြေရဲ့လား ပျော်ရွှင်ချမ်းမြေ့ပါစေလို့ သမီး ဆုတောင်းလျက်ပါ ဖေဖေ။
ဘဝအတွက် ရုန်းကန် လှုပ်ရှားရင်း အရင်လို ကော်ဖီတခွက်ကို အိမ်မှာ မသောက်ဖြစ်တဲ့အခါ မနက်ခင်းတိုင်း ဖေဖေ ဖျော်ပေးနေကြ Dalgona Coffee လေးကို သတိရလိုက်တာ ဖေဖေရယ်...
အထက်တန်းကျောင်းသူ ဘဝရော၊ တက္ကသိုလ် ကျောင်းသူဘဝမှာပါ စာကျက်တိုင်း ခေါင်းကြည်အောင် မအိပ်ချင်အောင် Americano coffee ပဲစွဲစွဲလန်းလန်း သောက်တက်လို့ လုပ်ငန်းခွင်ရောက်တော့လဲ Americano coffee ပဲသောက်တက်တဲ့ သမီးကို ဖေဖေ ပြောဖူးတာလေး အမှတ်ရသေးတယ်။ ငါ့သမီး ကော်ဖီးခါးခါးပဲ သောက်နေရင် အချစ်ခါးခါးနဲ့ပဲ တွေ့ရမှာ ဖေဖေ စိတ်ပူတယ်တဲ့လေ .... အဲ့တုန်းက သမီး တဟားဟား ထရယ်လို့ ဖေဖေက မျက်မှောင်ကြီး ကျုံ့ပြီး ဖေဖေ တကယ်ပြောတာတဲ့ ကော်ဖီချိုချိုလေး သောက်ပြီး အချစ်ချိုချိုလေးနဲ့ ငါ့သမီးကို ကြည်နူးပျော်ရွှင် စေချင်တယ်တဲ့ ...
အဲ့ဒီနေ့ကစပြီး ဖေဖေဟာ အချို မကြိုက်တဲ့ သမီးအတွက် ဘယ်လိုကော်ဖီကများ အကြိုက်တွေ့စေမလဲ ဆိုပြီး တမျိုးပြီး တမျိုး ရှာဖွေစမ်းသပ်တော့တာပဲ။ သမီးလဲ ဖေဖေ ဖျော်တဲ့ အမျိုးစုံသော ချိုအီနေတဲ့ ကော်ဖီတွေကို မကြိုက်ပဲ ကြိတ်မှိတ်သောက်ခဲ့ရသေးတယ်လေ...
အဲ့တုန်းက ဖေဖေဟာ အလုပ်မရှုပ်ရှုပ်အောင် လုပ်နေတာပဲ ဆိုပြီး နောက်ကွယ်မှာ မေမေနဲ့ အတင်းပြောကြသေးတော့ မေမေက နင့် အဖေက ပိုလွန်းတယ်တဲ့ အချစ်ချိုအောင်ပဲ ကော်ဖီချိုချို သောက်ရမယ်လို့ တသက်လုံး မကြားဖူးပါဘူး ငါနဲ့သမီးရည်းစားဘဝတုန်းကဖြင့် အဲ့လို ကော်ဖီချိုချိုဖြင့် မတိုက်ဖူးပဲ ငါ့အချစ်ကြခါးခါးကြီးပေါ့လေ တဲ့... ဖေဖေက သမီးတို့ အတင်းပြောတာကြားပြီး ပြန်ဖြေတာလေးလဲ မှတ်မိသေးတယ် မိန်းမရ မင်းနဲ့ငါကြ ကော်ဖီဖူးစာမှ မဟုတ်ပဲ ချိုအေးမွှေးတဲ့ ကရဝိတ်က ရေခဲမုန့်ဟာ ဘယ်နှယ့် အချစ်ခါးမတုန်း သေချာစဉ်းစားစမ်းပါ။ အေးမြချိုမွှေးတဲ့ ရေခဲမုန့်ကြောင့် တို့တွေ ခုထိ အိမ်ထောင်သက် တလျောက် အချစ်တွေက ချိုမြိန် အေးမြ လန်းဆန်း မွှေးပျံ့နေတာ မဟုတ်လားတဲ့....
ESTÁS LEYENDO
Journey to the Coffee
No Ficción[Unicode] Coffee ချစ်သူတွေအတွက်Coffeeကြိုက်တဲ့ ကောင်မလေးတစ်ယောက် Coffeeအကြောင်းသိသလောက် ရေးသား သောက်ခဲ့ဖူးတဲ့ Coffeeတွေအကြောင်း Coffeeနဲ့ပတ်သတ်တဲ့ quoteလေးတွေ နှစ်သက်မိတဲ့ Coffee Artလေးတွေအကြောင်း တစေ့တစောင်း ကော်ဖီပုံပြင်လေးတွေလည်းကြားဖူးသလောက်...
