LOVE WITHOUT LIMITS

CHAPTER 20

CHAPTER 20

WARNING: CONTAINS MATURED SCENES AND EFFECTS.

NAGHIWALAY LANG ang mga labi namin ni Maxwell nang matunog na tumikhim si Tito More. Naisubsob ko ang mukha sa dibdib ni Maxwell dahil sa hiya. Pakiramdam ko ay pulang-pula na ang mukha ko. Narinig ko ang mahinang pagtawa ni Maxwell sa hinawakan ang kamay ko upang iharap sa lahat ng naroon. Hindi ko magawang salubungin ang mata ng mga magulang niya, lalo na ng mga kapatid niya.

"Yaz and I..." panimula ni Maxwell, tila nahinto lang nang humigpit ang pagkakahawak ko sa kamay niya. Naramdaman ko nang lingunin niya ako pero hindi ko talaga magawang mag-angat ng tingin.

Nang sandaling 'yon ay hinahanap ko ang natural na kapal ng mukha ko. Iyong dating nagbibigay ng lakas sa 'kin ng loob na ipangalandakan sa pamilya ng lalaking ito na ako lang pwedeng magkagusto sa kaniya. Iyong apog na lantaran kong ipinapakita sa lahat kung gaano akong patay na patay sa lalaking ito. Iyong tigas ng mukha para hayagang ipakita ang desperasyon kong maangkin siya. Lahat nang 'yon ay hindi ko makapa sa katawan ko ngayon.

"We're in a relationship," dagdag ni Maxwell.

Kung tutuusin, iyon na dapat ang pinakamasarap na pakiramdam. Pero talagang nangibabaw ang hiya sa akin. Hindi ko maintindihan. Para bang noon ko lang nararamdaman ang kahihiyan sa lahat ng mga pinaggagagawa ko sa nakaraan.

"Oh my god," kapatid ko ang unang nag-react, hindi na dapat ako magulat. "Oh my god, ate," isang salita pa at siguradong papalahaw na siya. Awtomatikong volume ng bibig ni Zarnaih, at hindi kailanman naging mahina iyon, parating papalakas.

Naluluha, nag-iinarte akong nag-angat ng tingin sa kaniya. "Oh my god talaga," nagmamaganda kong sabi.

"Oh my god!" 'ayun nga at isinigaw niya na. Patakbo siyang yumakap sa 'kin. "Sa wakas ay umepekto ang gayuma mo!"

Binatukan ko siya. "Leche ka, wala nako siya gigayuma!"inis kong sabi. "Tarunga ang imong panultihon, maulawan ko nimo sa pamilya ni baby."

Natatawang ngumiti si Zarnaih, ang pangit niya. "Kuyaw ba! Lami ba na tawagong baby ang imong uyab?" mas malakas ang batok niya.

"Paghilom ka diha!" angil ko.

"Unsay bati-on kung mauyab nimo ang ultimate crushnimo?" ngisi pa rin niya, ang kamay ay nakasabit sa braso ko, tsismosang-tsismosa.

"Paghilom lagi, Zarnaih!" seryoso nang angil ko. "Basig isipon nila kung unsay ginaistorya nato diri," sinamaan ko siya ng tingin. Saka napapahiyang tumingin sa mga naroon. "Hihi." Pilit ang hagikhik ko. Parang lalo akong napahiya dahil sa kapatid ko.

Pumalakpak nang nakangiwi si Deib Lohr. "Grabe, ganyan pala ang salita ng mga parrot?" Natawa ang ilan sa mga naroon, maliban sa pamilyang Moon. Hindi ko naiwasang kabahan.

"Well?" tanong ni Maxwell.

"Well..." Tumikhim si Mokz. Saka naglakad papalapit sa 'min at niyakap si Maxwell. "Congratulations, son."

Nakahinga ako nang maluwang nang sinsero rin akong ngitian nina Tita Maze at Tito More, ramdam ko ang saya nila para sa 'kin. Nakakaloko naman ang titig ni Maxpein sa nakatatandang kapatid, para bang kung ano-anong pang-aasar na ang nabubuo sa isip nito. Si Maxrill ay hindi ko mapangalanan ang reaksyon. Ni wala sa amin ang kaniyang paningin.

"First girlfriend!" nang-aasar na ani Randall saka naglakad patungo sa kaniyang best friend at nag-akap ang dalawa.

Nasulyapan kong nakangiti si Dein Leigh, sinsero ang mga ngiti habang nagpapalitan ng tingin sa 'min ni Maxwell. Pero hindi nakaligtas sa paningin ko ang lungkot sa mga mata niya nang sulyapan si Keziah. Na noon nama'y tinungga ang lahat ng laman ng wine glass niya. Si Kimeniah ay agad ding lumapit at nakangiting hinagod sa likod ang kapatid, inaalo ito.