بقلمي: ميامي آلـ حيدر
بسم الله الرحمن الرحيم
لا تنسون تصوتون للبارتات حتى يصعدن ❤.
قُل لي صباحُ الخيرِ سيّدتي
واملأ بفيض هواكَ أوردتي
قُل لي صباحُ الخيرِ يا أملي
أشعِل فتيلَ العشق في لُغتي
_________________
تذكير:
هُيام: موافقة اتزوج جساس...
باوعتلي بسرعة وهلهلت وعيونها دمعت وحضنتني
هُيام: ها يمة ماادري بيج تردين تخلصين مني لهل درجة
سارة: فرحانتلج والله جساس خوش ولد
غمزتلها وحچيت بتلاعب
هُيام: ها يمة ترديني اتزوج بسرعة حتى تصاحبين وتعرسين
ضربتني على زندي وضحكت
سارة: لا ولج ويني وين الزواج بعد
حچيت بضحكة
هُيام: باعي حلگچ انشرگ من الطول للطول گولي اريد رجل وفضينة
هزت راسها وهي تضحك
سارة: مايفيد وياچ الحچي خل اگوم ابشر ام جاسم
گامت راحت ركض للتليفون رحت وراها حطيت أذني على التليفون واسمع امي گالتلها على موافقتي وام جاسم وسما هلهلن ويضحكن
سارة: عيني بكيفكم بعد انتم تحددون شوكت يعقدون بس انطونة خبر قبلها بكم يوم حتى نجهز امورنة
ام جاسم: هايهية يمة بعد اسبوع ان شاء الله نمشي عليكم ونحدد الحاضر والغايب
اتفقن وامي سدت التليفون فرحانة كلساع تحضن بية وتبوسني، العصر امي اتصلت على خالي الچبير وبلغتة بخطوبتي صح هو علاقتنه سطحية حيل وياه بس مهما يكن راح يجيبون مشية وشيوخ وناس كبارية عشيرتهم ف لازم يتلگوهم زلم من عدنة، گالتله بعد اسبوع الخطوبة وسدته
بهل اسبوع رحنا 3 مرات للسوگ
اشتريت فستان عقد وثنين فساتين هم البسهن لون ماروني وواحد كريمي ثنينهن خلاعي بس الابيض مال العقد ساتر شوية واشتريت مكياج وغراض كاملة من اكسسوارات واحذية كعب وغيرهن وهم اشترينة اغراض للبيت علمود الترتيب
رادني سما ويقين اروح احجز صالون للخطوبة بس ماقبلت گلتلهن بالحنة والعرس اروح للصالون هسه امكيج روحي بإيدي ، ضلينة يومين نسوي حملات للبيت
وحتى سما ويقين اجن ينظفن ويانة كملنة كلشي وقبل الخطوبة بيوم رحنا اني وامي ويقين وسما، لمركز سوينة تنظيفات للبشرة والجسم وسوينة اظافرنا اني والبنات اكريلك كملنا وخابرنا على سراب يرجعنا للبيت
سراب: اگلچ يمة انة هم اريدلي مرة
ام جاسم: شني يمة غرت من اخوك
ضرب ستيرن السيارة بيدة وضل يهز براسة
سراب: اني اغار من جساس ابو راس وسفة عليچ يمة
ضلوا يتعاركون هو وبيبيته لحد ما سراب شغل اغنية بنات الليل بعلو صوتها بحيث انطرشنة ويطگ اصبع ويغني وياها واني ربطت فيشة وياه اطگ اصبع
سراب: ولج فريهاااا فريهااااا لا تخافين عليها
YOU ARE READING
جُحر الجَساس
Mystery / Thrillerسمراءُ يا بُنّ الجمال ونفحِهِ ياقهوةً منها الفتونُ يضوعُ من قالَ إن الليل ليسَ بفاتنٍ ذابت على حسن المساء شموعُ وبلونهِ عبقُ السكون وغابةٌ فيها يضمدُ شوقهُ الموجوعُ ترنوا العيونُ إلى المساء تأملاً والليل سكرٌ والأنامُ هجوع للسُمر وقعٌ في الوجود وفتن...
