Reclaim The Game (COMPLETED)

Chapter 30

#RTG30 Chapter 30

"See you next week?"

"Thank you, Doc," sagot ko bago ako lumabas ng kanyang clinic. Ilang linggo na rin akong pumupunta sa clinic. Walang nakaka-alam kung hindi ako lang. Ilang beses ko na rin kasing sinubukang kausapin si Sean... Ilang beses ko na siyang binigyan ng pagkakataon para siya mismo ang magsabi sa akin ng mga nangyari bago ako ma-aksidente.

Bakit ako pauwi sa Vizcaya?

Nag-away ba kami?

Ano'ng pinag-awayan namin?

Bakit nagi-guilty daw siya sa nangyari sa akin?

Ang daming tanong... pero ayaw niyang sumagot.

Kumain lang ako sandali tapos ay bumalik na rin ako sa opisina. Sanay naman na ako sa ganitong routine... pero ang pinagka-iba lang ngayong araw, bigla kong naka-salubong si Sancho nang pabalik na ako ng opisina.

"Hi," simpleng bati ko sa kanya. Simpleng tumango lang din siya... at saka umalis na. Hindi ko naman siya masisisi. Ilang beses niya rin akong sinubukan na kausapin, pero lagi akong umiiwas sa kanya. Masyadong magulo pa kasi. Mag-uusap na lang kami kapag maayos na ang lahat.

Basta ang importante ngayon, kami ni Sean.

Kailangang maging malinaw sa amin ang lahat.

Huminga ako nang malalim bago nagpa-tuloy sa paglalakad. Pagdating ko sa opisina, sakto na nakita ko si Iñigo. Wala na naman si Jax, na madalas mangyari. Si Yago, wala rin pero mas madalas na nandito siya sa opisina.

"Iñigo," pagtawag ko.

"Yup?"

"Pwede ba akong umabsent ng Monday at Tuesday?"

"Sandali, check ko lang calendar natin," sabi niya sabay check doon sa virtual calendar ng firm. Nandun naka-lagay kung may kailangan ba kaming puntahan na hearing o kaya arraignment o kaya private meeting sa mga clients. Naka-share iyon sa aming para hindi malimutan.

"Importante ba? 'Yung kay Mr. Crisanto kasi, pero kung importante, ako na lang muna pupunta."

Tumango ako.

Importante 'to.

Nagka-sundo kami ni Iñigo na siya muna ang pupunta kay Mr. Crisanto. Kailangan lang naman siyang iupdate sa galaw ng appeal niya, pero maayos naman na iyon. Pwede naman na si Iñigo na lang ang magpaliwanag.

Lumabas si Iñigo kaya ako ang naiwan sa opisina. Agad kong tinawagan si Sean.

"Hey," masayang bati niya.

"Saturday to Tuesday. Maldives," sabi ko.

"What?"

"Sabi mo iyon ang paborito mong bakasyon natin. Ulitin natin," sagot ko sa kanya.

Sa ilang linggong pagpunta ko sa doctor, hanggang ngayon ay wala pa rin akong naaalala... pero sabi niya ay baka kailangan kong balikan iyong mga bagay na ginawa namin ni Sean dati. Naka-tira naman na ako sa condo pero wala pa ring silbi. Siguro ay kailangan na naming pumunta sa Maldives.

"Let me check my schedule."

"Free your time," sagot ko sa kanya. Masyado ng nagtatagal 'to. Kailangan na naming ayusin ang dapat ayusin at tapusin ang dapat tapusin. Hindi na kami bata. Hindi na dapat kami nagsasayang ng oras.

"Okay..."

"I'll book the tickets and accommodation. Paki-handa na lang iyong passport mo," sabi ko bago ako nagpaalam at tinapos iyong tawag.