احببتك والله يعلم بالخفاء

بارت 28

والساعه ١٢ باليل وابو سياف راجع للبيت وشاف ام سياف جلس جمبها وهو يعلمها ان اديم وافقت على بهاج
وطبعاً بصدمه ام سياف : وشو ؟؟
ابو سياف : اي وافقت ! ليه فيها شي ؟
ام سياف : اء لا مافيها شي بسس
ابو سياف الي بدا يعصب نوعاً ما : بس ؟!!
ام سياف : ماتوقعت اديم بترضا بهسهوله يعني تعرف اديم ماتحب الديره و و و
ابو سياف الي هدا شوي وقال : ارجع واقول لك مارح يقعدون بالديره دايم وغير كذا اديم حبت الديره اساساً والحمدالله وافقت والله يتمم لهم وترا ملكتهم الاسبوع الجاي
ام سياف الي زعلت نوعاً ما ماتبي اديم تتزوج الحين ولا تبيها تقعد بالديره بس ماتقدر تقول شي : امين يارب بس مو كأن الاسبوع الجاي بدري ؟
ابو سياف الي كان نعسان : لا مو بدري افضل بعد عشان نملك لهم ونرجع للرياض و وقت العرس نجي
ام سياف : طيب
وبعد ماقام ابو سياف للغرفه قامت ام سياف لا اديم تبي تكلمها تشوف اذا هي صدق موافقه او لا
ودخلت لغرفتها شافتها مرتميه بالسرير
قربت ام سياف : اديم ؟
اديم الي لفت بهدوء : هلا يمه
ام سياف وهي تجلس على السرير : قومي بكلمك بموضوع
قامت اديم بملل وقالت : موضوع الزواج صح ؟
ام سياف : ايه
اديم الي مالها خلق ترجع وتعيد الكلام : انا علمت ابوي
ام سياف : ادري وقال لي انك موافقه بس انا ابي اتأكد انتي صدق موافقه ؟ وتبين تتزوجين بهاج ؟
اديم الي ودها تقول " لا لا لا " بس ماقدرت تقول الا : ايه
ام سياف الي كان ودها اديم تقول كلمة لا عشان على طول تقلب السالفه وماتخلي اديم تتزوج ببهاج : ايه ! مارح تقولين شي ثاني ؟
اديم : قلت لك يمه ايه وابوي قال لك اني موافقه خلاص
ام سياف : طيب تدرين ان ملكتكم بعد سبوع ؟
اديم الي زادت صدمتها صدمه : ايششش ؟؟؟
ام سياف الي حست انها بتقول شي : ايه ابوك قال لي تو بس اذا ماتبين روحي كلميه قولي مابي اتزوج
اديم وهي في فراااااغ تااام وماتدري وش تقول : اءءء لا مو عشان كذا بس مو كأنه بدري ؟ يمه مابي الحين !
ام سياف : شسوي يمي ابوك حطتنا بالامر الواقع بس يلا انتي الحين نامي عشان بكره بنمشي للرياض
اديم : طيب
وطلعت ام سياف اما اديم الي لا إرادياً امتلت عيونها دمووووع واول ما طاحت الدمعه ماسحتها على طول وارتمت على السرير وتغطت باللحاف بحزن
________________
ومن بكره العصر الساعه ٣ عند ابو سياف والخادمه يشيلون الاغراض متجهين للرياض وبيرجعون قبل موعد الملكه
وعند ام سياف واديم داخل البيت وهم يشيلون اغراضهم الخفيفه
ام سياف : يلا تعالي معي نسلم على جدتك وعماتك قبل نمشي
اديم الي مالها خلق : لا يمه تكفين مالي خلق
ام سياف : كيف مالك خلق وش تبيني اقول لهم
اديم : قولي لهم اي شي بس سلميلي عليهم وعلى البنات
ام سياف الي ماقدرت تقول شي : الله يصلحك بس يااديم
اجل خذي اخوك واطلعي لابوك برا وانا بجيكم
اديم : طيب
___________________
وفي بيت الجد حمد تحديداً قسم الحريم الي دخلت عندهم العمه شيخه وبناتها
العمه شيخه : السلام عليكم
الكل : وعليكم السلام
وتقدمت العمه شيخه تسلم على الجده وبعدها ام رعد والعمه عواطف و وراها البنات يسلمون
وطبعاً افنان سلمت عليهم من دون نفس
وجلست : اخباركم شلونكم
الجده : بخير الحمدالله
العمه عواطف وهي تصب القهوه لها : سمي
العمه شيخه : تسلمين
ام رعد : اخبارك يام مشعل اخباركم يا بنات
العمه شيخه : الاخبار عندكم اخبار معاريسكم
العمه عواطف : بخير الحمدالله ومبسوطين
العمه شيخه : ايييه الله يجعله
الجده الي قالت وصدمة الكل : وان شاءالله ملكة بهاج واديم الاسبوع الجاي
هنا عم الصمت على الجميع ولا احد قدر يفتح فمه ابداً معاد افنان وام رعد هم الي كان عندهم خبر
العمه شيخه الي كانت تبي بهاج ياخذ وحده من بناتها : وشووووو ؟
الجده : الي سمعتيه
العمه عواطف بعد مالفت على ام رعد : ماشاءالله تبارك الرحمن مبروك مبروك يام رعد
ام رعد : الله يبارك فيك يارب
اما نوره والعنود وهم لا فين على افنان ويسألونها اذا صدق ولالا
افنان : اي والله صدق
نوره : ماشاءالله عليك وماعلمتينا
افنان : والله كنت بعلمكم بس امي وجدتي هددوني وانتم تعرفون تهديد جدتي عاد
العنود : عشان تهديد جدتي بس سامحناك
وعند امجاد الي صابتها نوبة غيره كبيييييره وهي الي كانت تحلم انها اتزوج بهاج ومن زمان تبيه
العمه شيخه : مو كأن اديم توها صغيره على بهاج ؟!
الجده : لا ماهيب صغيره ماشاءالله بنت وش حلاتها وش زينها بسم الله عليها ومابينها وبين بهاج الا ٥ او ٤ سنين
العمه شيخه بغيره : ايه الله يسعدهم ماقلنا شي !
افنان وهي ملاحظه على امجاد الي ودها تشق ثيابها من الغيره لفت على البنات
افنان : بنات شوفو امجاد شوي وتموت
نوره : ههههههههههههههههه اسكتي لا تسمعك
افنان : يع عاد تخيلو بهاج تزوجها والله لا اتبرى منه
العنود : الحمدالله انه بيتزوج اديم عاد وش حلاة اديم
افنان : عاد تصدقون ماتوقعت ولا واحد بالميه بيجي اليوم الي اشوف اديم زوجة لواحد من اخواني
نوره : الله يسعدهم يارب
افنان : امييييين يارب
__________________
وعند ام سياف متجهه لبيت الجد حمد تسلم عليهم وتودعهم
واول مادخلت شافت الكل متجمع عند الجده
ام سياف : السلام عليكم
الكل بفزه : وعليكم السلام
اتجهت ام سياف للجده وسلمت على راسها : تبين شي ياخالتي حنا بنمشي للرياض
الجده : ماتشوفون شر
العمه عواطف : الله يستر عليكم توصلون بالسلامه
ام سياف : الله يسلمك
ام رعد بأبتسامه: بس الوعد الاسبوع الجاي هاه ؟
ام سياف : بأذن الله
العمه شيخه مندون نفس : مبروك
لفت عليها ام سياف وقالت : الله يبارك فيك
نوره : وين اديم يا عمه ؟
ام سياف : تعبانه والله ماقدرت تجي بس تسلم عليكم كلكم
افنان : يالله
الجده : ماعليكم بتشوفونها الاسبوع الجاي
امجاد بصوت خفيف : ليتها ماتجي
هدى : بنت اسكتيي لا يسمعونك
امجاد : بالطقاق خليهم يسمعون
ام سياف وهي طالعه : يلا تبون شي ؟
الكل معدا العمه شيخه وبناتها : لا سلامتك
وطلعت ام سياف متجهه للسياره
وعند بهاج ورعد وهم راجعين من المسجد بعد ماخلصو من صلاة العصر ولف بهاج على سيارة ابو سياف وهو يشيل الاغراض
رعد : عمي بيمشي اليوم ؟
بهاج الي كان سرحان ويفكر في اديم وشاف اديم وهي طالعه وفي يدها سياف وفي يدها الثانيه ايباده واغراضها ومبين عليها حزنها
قعد بهاج يطالع في حزنها وفي قلبه جمره لين ماركبت السياره وهي اول مره تفرح انها بترجع للرياض على الاقل تبعد عن الديره اسبوع
ودخلو العيال للمجالس وبعدها ب ٥ دقايق دخل ابو سياف يودع الجد حمد والعيال
اتجه ابو سياف للجد حمد : سلام يبه
الجد حمد : وعليكم السلام ورحمة الله
ابو سياف : انا ماشي للرياض يابوي تبي شي ؟
الجد حمد : توصلون بالسلامه وانا ابوك وتوقع ( هد السرعه )
لف ابو سياف للعيال : ابوكم وين
رعد : في المزرعه ياعمي
ابو سياف : سلمولي عليه
سلطان : يوصل
طلع ابو سياف وهو يقول : فمان الله
ورجعو العيال يجلسون
وعند ابو سياف الي ركب السياره وشافهم جاهزين وقال : توكلنا على الله
وطلعو من الديره واديم في قمة الهدوء ولا فتحت فمها بكلمه
__________________
وبعد صلاة العشاء في الديره اتصلت تغريد على ام رعد تتطمن عليهم
ام رعد : هلا وغلا بغروده
تغريد بأبتسامه : اهلين يمه اخبارك
ام رعد : بخيرر وانا امك انتي اخبارك وشلونك وشلون حمد
تغريد بخجل : بخير الحمدالله راح يجيب اغراض وبيجي
ام رعد : الله يسعدكم يارب
تغريد : الا يمه ماقلتي لي وش صار على موضوع اديم ابوي كلم عمي لاني ادق على اديم ماترد علي !
ام رعد بفرحه : ايه ايه كلمه و وافق
تغريد : واديم ؟
ام رعد : وهي بعد موافقه وبنملكهم الاسبوع الجاي
تغريد الي منها انصدمت ومنها فرحت : كيف يعني اديم وافقت كذا ماقالت شي ؟
ام رعد : لا ماقالت شي ليه فيه شي ؟
تغريد : لا مافي شي بس استغربت
ام رعد : ومين يلقى بهاج ويرفضه !
تغريد بأبتسامه : يلا الحمدالله اديم ولا شهد
ام رعد : اي والله الله فكنا من شهد الا مانك جايتنا ؟
تغريد : مدري بشوف حمد
ام رعد : هههههههههه والله عشنا وشفنا تغريد تشاور زوجها
وفي هاذي للحظه دخل حمد للغرفه وكانت تغريد في الحمام وحاطه الجوال على مكبر الصوت لان كانت مشغوله بوجهها وشعرها وباب الحمام مفتوح واول ماسمع حمد كلام ام رعد ابتسم وقعد يسمع
تغريد بخجل : يمممه
ام رعد بضحك : وشهو بعد ماهو زوجك ؟
تغريد بأبتسامه وبصوت عذب : الا زوجي
ام رعد : لاااا انتي ذبتي ورحتي من زمان
هنا ابتسم حمد اكثر
ام رعد : الا تعالي ماقلتي لي كيف حمد معك كيف يعاملك ؟
تغريد بخجل : حمد طيب وقلبه مررررره طيب وينحب
ام رعد : الله يخليكم لبعض يارب يلا غردوه انا بقفل
تغريد : زين سلميلي على جدتي والبنات
ام رعد : طيب
وقفلت ام رعد وخلصت تغريد شغلها واخذت جوالها وجت تطلع من الحمام وانفجعت من حمد الي كان واقف ويسمع كلامهم
تغريد بفجعه : بسم الله
حمد بأبتسامه وبعد ماقرب منها : اجل تحبيني هاه ؟
تغريد الي في هاذي اللحظه ودها الارض تنشق وتبلعها : ماقلت حبيته قلت تنحب *
حمد وهو يقرب اكثر : اهاااا يعني حبيتيني
تغريد الي انخجلت وبعدت : انت وش تبيني اقول بالظبط
حمد : انك تحبيني
تغريد الي كانت تبي تفتك من الموقف وقالت بخجلللل كبير : خلاص طيب
حمد : طيب ؟
تغريد بتردد : اءء احبك
حمد ابتسم وقال : وانا بعد
هنا تغريد ردة له الحركه وقالت بأبتسامه شريره : وانت بعد ايش ؟؟
ضحك حمد من كل قلبه وهو يقول : وانا بعد احبك
تغريد الي كانت تبي تغير الموضوع : بهاج بيتملك الاسبوع الجاي
حمد وهو ينزل الاغراض ومايبي يحرج تغريد اكثر : ماشاءالله الله يوفقه على مين ؟
تغريد : على اديم بنت عمي طلال
حمد : ياحليلههه الله يسعده يارب
__________________
ومن بكره في الرياض تحديدًا في بيت ابو سياف بعد مااتصلت اديم على صديقتها ( سلمى ) تجيها وكانت تنتظرها
دق الباب وراحت اديم ركض تفتح الباب
دخلت سلمى و تحضن اديم : اددديم
اديم بصوت حزين نوعاً ما : سلوووم
سلمى : شفيك مبين انك ضايقه
اديم : ادخلي ادخلي اعلمك
ودخلت اديم وبجمبها سلمى وهم داخلين بيروحون للغرفه كانت ام سياف بالصاله
ام سياف : ياهلا بسلمى
سلمى وهي تتقدم وتسلم عليها : اهلين ياخالتي اخبارك
ام سياف : بخير ياخالتي انتي اخبارك امك عساها بخير
سلمى : بخير بخير الحمدالله
اديم : يمه انا باخذ سلمى لغرفتي فوق اذا تبين شي ناديني
ام سياف : زين
وطلعو البنات للغرفه واول مادخلو
سلمى : شفيك خوفتيني
اديم بعد ماجلست واخذت نفس عمييييق : تتذكرين ولد عمي الي ساعدني يوم كانت صوري مع نايف ؟
سلمى : ايه هذاك بهاج ؟
اديم الي بينت ملامح الحزن على وجها : ايه هو
سلمى : شفيه ؟
اديم : عمي جا وخطبني له وابوي وافق
سلمى بصدمه كبيييره : وشوووووو ؟
اديم : اي والله ياسلمى
سلمى : وانتي وش قلتي
اديم : ماقدرت اقول شي ماقدرت اعصي كلام ابوي !!
سلمى : كيف كذا يعني خلاص بتتزوجينه ؟
اديم : والملكه الاسبوع الجاي بعد
سلمى الي كانت في حالة صدممممممه كبييييره : اديم طيب شوفي الحادثه من ناحية إجابيه ثانيه !
اديم الي امتلت عيونها دموووووع : شلون شلووون انا كيف بطالع في وجهه بعد كل الي صار ؟ سلمى ماقدر مااااقدر
سلمى : طيب هو علم عليك احد قال لاحد ؟؟ لا وش المشكله اذا تزوجتيه وانتي بنفسك قلتي لي انه يلفت نظرك دايم وشخص لطيف وحبوب وقلبه نظيف ورهيف
اديم : وهاذي المشكله !! هاذي المشكله انه قلبه رهيف وادنى شي يكسره وانا عارفه اني بكسره كثييير واني ما استاهله
سلمى : طيب وش يرضيك اذا تزوج ذيك الي اسمها شهد بترضين ؟
اديم الي سكتت وقالت في داخلها " لا الحمدالله "
سلمى : اديم شوفي المسأله من ناحيه ثانيه انك بتعيشين مع واحد ساعدك وكان سند لك وستر عليك وماضرك ورغم ذا نسى كل الي صار وجا وخطبك
اديم الي عصبت فجاة: ايه جا خطبتي رغم اني قايله لك مابيه
سلمى الي مسكت فمها من الصدمه : انتي قلتي للرجال مابيك ؟
اديم بتردد : ايه قلته وانا صدق مابيه
سلمى الي طالعت في عينها وقالت : وانتي صدق ماتبينه ؟
سكتت اديم وماجاوبت لكن عيونها جاوبت بدالها
وعرفت سلمى ان اديم طايحه وتحبه من زمااان
سلمى : انتي عيونك تقول شي ثاني
اديم بصوت حزين وعيونها على الارض : يعني لو تقابلنا في دنيا غير دنيتنا هاذي يمكن بس بين كل هالمشاكل ماقدر
سلمى : اديم انا لازم ارجع للبيت بس الي حابه اقوله ان بهاج رجال على قد كلامه وشوفي إيجابياته قبل سلبياته وهذا اذا كان عنده سلبيات وانتي توكلي على الله والي يصير يصير وصدقيني مارح يطري عليك نايف ولا سالفته ولا حتى بهاج بيفتح معك ذاك الموضوع اذا انتي مافتحتيه والحف بعد انه نساه من زمان انتي توكلي على الله ولا تضيعين حياتك عشان هذاك الكلب نايف
اديم : هذا الي تقولينه ؟
سلمى بأبتسامه : هذا الي اقوله وان شاءالله اذا صار العرس انا اول الحاظرين
اديم الي ابتسمت بحزن وهو قلبها للحين مااقتنع : هههههههههه
سلمى وهي قايمه بتطلع و وراها اديم وعند الباب
سلمى : اي شي تبينه انا موجوده
حظنتها اديم وقالت : الله يخليك لي
وطلعت سلمى ورجعت اديم لغرفتها وهي للحين في حيرتها الي تاكل قلبها اكل
_______________________
وفي الديره عند البنات والعمه عواطف وهم يتجهزون عشان يروحون لسوق الديره اما ام رعد ماكانت تبي شي من السوق وجلست وطبعاً سمعهم ابو رعد انهم يبون السوق وكلف بهاج يوديهم وتقريباً هذا اكره شي عند بهاج لكن مايقدر يقول شي وكالعاده ينتظرهم بالسياره برا
وطلعت العمه عواطف و وراها البنات
العمه عواطف : جينا جينا
وركبو
بهاج الي لف على العمه عواطف : بغيت انام
العمه عواطف بضحك : امش بس امش وبدا بهاج يمشي متجهه للسوق
واول ماوصلو للسوق نزلو البنات مع العمه عواطف
اما بهاج بدا يتمشى في السوق لحاله
وكان سعود مع الهنوف بالسوق وينتظرها تخلص لين ماشاف عيال سعد الي مرر من قدامه وقالو : ماشاءالله دايم في اسواق الحريم
تجمعت الشياطين في راس سعود الي قفل جواله وحطاه في جيبه وتقدم لهم بكل عصبيه وقال : اذا انت رجال عد كلمتك
سطام ( واحد من عيال سعد ) : ايه رجااال وعصبً انك يا الرخمه ودايم خلك متواجد في اسواق الحريم هاه
هنا ماقدر سعود يمسك نفسه ونسى الهنوف ونسى كل الناس الي حولينه وتقدم بسرعه وهو يضرب سطام بأعلى قوه عنده
ورجع سطام بعد ما طاح يضربه وبدت الهوشه من هنا الين ما تدخلو اخوان سطام وكانو كلهم على سعود
طلعت الهنوف من المحل مفجوعه : سعودددد سعوددد
سعود وهو وسط الهوشه وتقريباً بدا يطيح من الضرب : بعدي يا الهنوف بعدي
وبدو يتجمعون الي بالسوق يشوفون المشكله
وعند بهاج الي كان يسمع الاصوات ومايدري وش القصه الين ماسمع واحد يقول : سعود ولد ابو سعود يتهاوش مع عيال سعد
هنا بهاج نسى انهم متهاوشين وبسرعة البرق وبركض اتجه لهم واول مالمح سعود والدمان الي على وجهه جن جنونه وبسرعه داخل بينهم في وسط الهوشه تحديداً وبدا يبعدهم عن سعود ويبعد هذا من جهه ويضرب هذا من جهه الين ماقدر سعود يقوم على حيله ويضرب معه
جت العمه عواطف وهي متمسكه في البنات من الخوف
وبصدمة نوره وهي تشوف سعود وحالته مسكت قلبها بخوف
وعند بهاج وسعود وهم يضربون بكل حيلهم وقوتهم وفعلاً هنا نسو انهم متهاوشين ورجعو يد وحده لكن ماكانو يقدرون يلحقون على عيال سعد وفجاة وبصدمة كل اهل الديره دخل مطلق في وسط الهوشه وهو العدو اللدود لعيال سعد وبدو يضرب هذا ويضرب هذا الين ما طيحهم كلهم على الارض وارتمو على الارض بتعب وكان بهاج يكمل على سطام
وشاف مطلق سعود الي كان منهلك من الضرب ومرتمي على الارض تقدم له وهو يمد يده له
شافه سعود وشاف فزعته له وهنا كأن العداوه الي كانت بينهم امسحت من حركه من مطلق  ورفع يده سعود بتعب وسحبه مطلق الين ماوقف
وعند عيال سعد الي بدو يبعدون عن السوق وبدو اهل الديره يتفرقون
بهاج الي رجع لسعود : ولد فيك شي صار لك شي ؟
سعود بتعب : لالا مافيني شي
العمه عواطف الي كانت خايفه على بهاج وبصوت عالي وهي تنادي بهاج : بهاج !!
لف بهاج : دقيقه ياعمه
وشاف سعود نوره الي كان مبين على عيونها الخوف وكانت تطالع في وسط عيون سعود ولف سعود على بهاج وهو يكلمه
سعود : قلت لك مافيني شي
بهاج وهو يلف على مطلق : وانت جاك شي
مطلق : انا مايجيني شي
ضحك سعود بأستهتار
مطلق : وش مو عاجبك
بهاج : بالله على الاقل اسكتو الحين
ولف على سعود وهو يقول له : اجلسو هنا وانا بودي عمتي والبنات للبيت وبجي لا تروحون مكان
ولف على مطلق : مطلق اجلس هنا انت بعد
مطلق من دون نفس : الشكوا لله
سعود وهو يقول لبهاج : الهنوف الهنوف ود الهنوف معك
بهاج : طيب
واتجه بهاج للعمه عواطف وهو يقول : ياعمه بوديكم للبيت الحين بس نادو اخت سعود نوديها لبيتها
نوره الي فزت وقالت : انا بناديها
العمه عواطف : استعجلي
وراحت نوره لعند الهنوف الي كانت خايفه وشافها سعود
وعند نوره اول ماوصلت الهنوف وهي تقول لها : الهنوف
الهنوف : ابي اروح لسعود
نوره : بتروحين له بس الحين عنده رجال انتي تعالي نوديك للبيت وبهاج شوي بيجيبه لكم
الهنوف : ماقدر اخلي سعود لحاله
نوره : مو لحاله معه بهاج واصلاً هو الي قال ودو الهنوف
الهنوف وهي تطالع فيها : هو الي قال ؟
نوره : ايه هو الي قال يلا تعالي
وبدت الهنوف تمشي مع نوره واول ماشافها سعود تطمن عليها
وركبو السياره
وعند سعود ومطلق الي جاب مطلق مويه من البقاله ومدها لسعود
اخذها سعود وهو يقول : شكراً
مطلق وهو يطالع في اهل الديره الي يطالعون فيهم وقال بعصبيه : قدام قدام شف قدامك
سعود وهو يلف عليه : ولد وش فيك انت خلهم بعدين شكرناك مافي رد ؟
لف عليه مطلق وهو يقول له : سعود انا ما اتحمل صوتك يعني خل نقول الحقيقه اشرب المويه وانت ساكت
سعود الي طالع فيه و وده يخنقه بس المشكله هو الي ساعده
ولف وهز راسه وشرب المويه
وبعد ١٠ دقايق وصل عندهم بهاج وهو مسرع ومسك كتف سعود وهو يقول : انت بخير ؟
لف عليه سعود الي كان مشتااااق له : بخير
وفجاة لا أرادياً حظنو بعض
سعود : مشكور
بهاج وهو يضرب راسه بخفه : مابينا ياغبي
سعود وهو يطالع فيه وبأبتسامه حزينه : انا اسف يا بهاج والله اني اسف
بهاج بأبتسامه : سلامة راسك وانا اخوك
وهنا كان مطلق يشوفهم وبأبتسامه خفيفه ومحد منتبه له وقام وقال : يلا انا بروح
بهاج : ماقصرت يامطلق
وطالع فيه سعود وقال : مشكور
مطلق الي يحب يناقر سعود في كل لحظه : مو عشانك عشاني مااطيق عيال سعد
لف سعود على بهاج يقول : تشوف !؟؟
بهاج : خلاص تكفون لا تبدون مره ثانيه
ولف مطلق وهو يبتسم ومن ناحيه وده يطلع من السوق بأسرع وقت من نظرات اهل الديره له بأستحقار
وعند بهاج لسعود : نروح المستشفى ؟
سعود : لا ياولد ماله داعي
بهاج : متأكد ؟
سعود : ايه ايه متأكد بس امش

حبايبي الاسبوع هذا وتقريباً نص الاسبوع الثاني مارح اقدر انزل  لكم بارت لان عندي اختبارات و مضغوطه شوي اعذروني وادعو لي 🤎