احببتك والله يعلم بالخفاء

بارت 38

ومن بكره العصر
قام بهاج من النوم وتلفت وشاف اديم ماهي موجوده وتذكر كل شي صار امس وانه رجع اخر اليل وشافها نايمه ونام بتعب قام ودخل الحمام وطلع وهو فيه فضول وين اديم ونزل تحت
بالصاله عند الجده وام رعد والبنات متمجعين عندهم ساره واديم وافنان
بهاج وهو داخل : ياولد
لبست ساره جلالها بسرعه ودق قلب اديم
ام رعد : ادخل
دخل بهاج وشماغه على كتفه والعقال بيده ومبين انه توه صاحي من النوم
تلفت وشاف البنات كلهم موجودين ومن بينهم اديم
الجده : صح النوم
تقدم بهاج يحب راسها هي وام رعد : صح بدنك
ام رعد : وش ذا النوم
جلس بهاج مقابل اديم : امس تأخرت بالنومه
كانت اديم ما تتجرأ تحط عينها في عين بهاج وهي تدري انها غلطانه
قربت منها افنان وبصوت خافت محد يسمعه الا هي واديم : شكل بهاج للحين زعلان علينا
رفعت عينها اديم لبهاج بحزن وقالت : شكله
ورجعت تسرح وهي ماتدري كيف بتراضي بهاج
الجده : اديم صبي لرجلك قهوه
فزت اديم وهي لاهيه بالقهوه بيدها وناظرت بهاج الي رفع عينه عليها وصبت الفنجال بتوتر ومدت له واخذها بهاج بكل هدووووء
بهاج لف على ام رعد : وين العيال
ام رعد : اخذهم جدك المزرعه يشتغلون
قام بهاج : اجل بروح لهم
ام رعد : لا شفت سلطان خله يجي برسله البقاله يجيب لنا اغراض
بهاج : ابشري
وطلع وهو وده يلتفت لا اديم بس ماقدر
وقامت اديم وراه وهي ماتتحمل ذا الزعل كله
وعند الباب نادت اديم بهاج ووقف بهاج على صوتها والتفت لها
اديم : للحين زعلان مني ؟
ناظرها بهاج بهدوء وهو مو زعلان بس كان خايف عليها
اديم : لا تنكر واضح انك زعلان علي !
ولا شعورياً امتلت عيون اديم دموع وهي تبرر وتحاول تخلي بهاج يسامحها : شف كيف تجاهلك لي ولا تكلمني ولا حتى تناظر فيني
تكتف بهاج يسمع تبريرها ويشوف عيونها الغرقانه
اديم : تكفى لا تعاملني كذا ماقدر اشوفك زعلان علي
بهاج الي حن عليها ومسك يدها يشد عليها ويقول : متى انا زعلت عليك ؟ حتى لو زعلت مااتحمل وارجع لك راضي
اديم : يعيني مو زعلان علي !!
بهاج : انا مازعلت انا خفت عليك بس !
اديم : طيب انا اسفه على الكلام الي قلته لك امس والا الانانيه بجهه وانت بجهه
ابتسم بهاج وقربها وحضنها وهو ماتعود يبعد عن اديم وقابلته اديم بنفس الحضن وابتعدت شوي ومسح بهاج على دمعتها الي بخدها وقال : كم مره اقول لا اشوف هالدموع ؟
ضحكة اديم ومسحت دموعها
بهاج : يلا ارجعي لا يشكون
اديم : طيب
ورجعت اديم وهي تراقب بهاج لين مادخلت لهم وطلع بهاج وهو مبتسم واتجه المزرعه
وعند البنات رجعت اديم تجلس وهي مبتسمه والفرحه واضحه عليها
ساره : وين رحتي
افنان : انا ذا الابتسامه ما ارتحت لها قولي وش صار
اديم قربت تهمس لهم : ابشركم بهاج سامحني
ساره : الحفييييي
اديم بضحكه : والله
افنان : طيب وحنا
اديم رجعت شعرها على ورا وقالت : اذا سامحني اكيد سامحكم
ساره : يلا الحمدالله عدت على خير
افنان : اي والله الحمدالله
الجده الي خرعت البنات : وش تهمسون به انتم بهالزاويه !؟
افنان : مو قاعدين نهمس بشي !
الجده : تعالو تعالو قربو عندي وسولفو زي الاوادم
طالعو البنات في بعض وقربو يتقهووون واديم تحس براحه من داخلها وشعور حلوووووو
وفي المزرعه دخل عليهم بهاج وهو يشوف حالة سلطان ورعد وهم يحوسون بالنخل يحاولون ينزلون الرطب والجد جمد جالس وبيده عصاته ويراقبهم
بهاج بضحكه وطنازه : عساكم على القوه
لف سلطان الي كان متعلق بالنخل وبصوت همس ومايسمعه الا بهاج ورعد : الله لا يقويك
بهاج بنجاسه : وشو ماسمعت ؟
توهق سلطان وقال عشان الجد حمد مايدري عنه : الله يقويك الله يقويك
ابتسم بهاج : ايه كذا
التفت الجد حمد على بهاج وقال : الحمدالله على السلامه مابغيت تقوم ؟
بهاج جلس : امس تأخرت بالنومه
جا رعد وهو منهد حيله ضرب بهاج بكتفه بخفه وقال : قم قم قم مع اخوك
لف بهاج بصدمه وقعد سلطان يضحك
رعد : ايه انت اجل بخليك تجلس وانا اكبر منك اتعب ؟
قام بهاج وهو ماتوقع ابداً انه بيشتغل معهم وجلس رعد بهدة حيل لف بهاج ثوبه على خصره ورقا النخل مع سلطان وسلطان ميت ضحك
_____________________
وعند البنات الي دخلت عليهم العمه شيخه وقامو كلهم يسلمون عليها
الجده : وينك من زمان ماجيتيني ماكأن بيتك بجمب بيتي !
العمه شيخه : مشغوله يمي مشغوله
الجده : وش مشغولهً به
قامت افنان تصب القهوه لها والبنات يراقبون بهدوء
العمه شيخه : بزواج هند
قعدو البنات بصدمتهم
الجده : زواج هند !؟
العمه شيخه : ايه هند انخطبت من شهر و واقفنا عليه والزواج ان شاءالله الجمعه الجايه
ام رعد : ماشاءالله الف الف مبروك الله يهنيها ويسعدها
العمه شيخه : الله يبارك فيك
الجده : و وراك ما علميتيني مدام السالفه صار لها شهر توك تجين وكأنك تعزميني على العرس !
افنان بعد ماجلست جمب البنات بصدمتها قالت : ماني مصدقه
ساره : اي والله هالجنيه من يتزوجها
اديم بهمس : اص لا تسمعكم
العمه شيخه : الخطبه محد يتكلم فيها انا جيت عشان اعطيكم خبر الملكه والزواج بنفس اليوم وهو الجمعه
ام رعد : على خير ان شاءالله
قامت العمه شيخه : يلا مع السلامه
الكل : فمان الله
وطلعت المزرعه عشان تسلم على الجد حمد واول مادخلت وكان مشعل معها واتجهو للجد حمد الي كان يشرف على العيال وقالت : السلام عليكم
قام الجد حمد من الكرسي هو ورعد الي بجمبه : هلااااا وعليكم السلام
تقدمت العمه شيخه تسلم عليه و وراها مشعل
وفوق النخل عند بهاج وسلطان لف بهاج بكرهه
سلطان : جت حبيبة قلبك عمتك
بهاج الي كان بيقول " عمة عينها " بس تدارك الوضع ونزل بهدوء وهو كارها هي و مشعل
واتجه لها يسلم من دون نفس وراح لمشعل
مشعل : وييينك يارجال معاد نشوفك
بهاج : الهتنا الدنيا
وجا سلطان يسلم عليهم بعد
واخذتهم السوالف وتلفت بهاج وصار هالوقت وقت نحشته من الجد حمد وراح بدون محد يدري عنه الا سلطان الي تلفت يمين ويسار وماشافه وقال
: يالخايس
__________________
وبعد اسبوع يوم الخميس ليلة عرس هند والكل متجمع ببيت الجد حمد وصلت سيارة حمد الي نزل منها العمه عواطف ونوره وتغريد والعنود ومحمد
تقدم رعد يرحب فيهم : يارمرحبا يامرحبا
تقدم له حمد يسلم عليه ودخلو البنات داخل
وفي جلسة الجده وام رعد وساره وافنان واديم دخلو البنات عليهم وفزو يسلمون عليهم وهم منصدمين من بطن تغريد الي كبر بسرعه وتقريياً ماباقي على ولادتها شي عشان كذا بتقعد بالديره
العمه عواطف : اخباركم عساكم طيبين
ام رعد : بخير دامنا شفناكم
الجده : حمدالله على سلامتكم
نوره : الله يسلمك ياجده
جلسو البنات حولين تغريد الي تعبت من الطريق وهم فرحانين فيها خصوصاً افنان الي طايره من الفرحه عشانها بتصير خاله
وقعدو بسوالفهم وضحكهم
وعند الرجال في المجلس الي كان موجود فيه الجد حمد وابو رعد وحمد ومحمد رعد وبهاج وسلطان
دق جوال بهاج " سعود " رد بسرعه وقال : سم ياسعود
سعود : هلا وينك
بهاج : بالبيت
اشر حمد لبهاج يناديه يجي عندهم وقال : اسمع تعال البيت حمد ومحمد جايين من جده تعال
فز قلب سعود ولا شعورياً وتذكر نوره وقال : مدري بشوف
بهاج : لالا مافي بشوف تعال يارجال نتقهوى ونتعشى سوا
حمد بصوت شبه عالي : تعال ياسعود
سعود ضحك : خلاص خلاص بجي
بهاج : يلا لا تتأخر
وقفل بهاج ورجع يسولف معهم وبعد نص ساعه وقفت سيارة ابو سياف هو وام سياف وسياف والخادمه
وفز سلطان يشوف من السياره وقال : اررررحب عمي طلال جا يا عيال
فزو العيال يرحبون ويسلمون عليهم وسلمو على ام سياف من بعيد وخصوصاً بهاج الي طاير فيهم ويقول اكيد اديم بتفرح بشوفتهم
ودخل مع ام سياف وهو ياخذ الشنطه الصغيره حقت يومين وقال : تعالي ياعمه تعالي من هنا
ودخلت ودخل ابو سياف ومعه سياف للرجال وبهاج يوصل ام سياف دخل و وقف عند الباب وبأبتسامه قال : ياولد اديم
فزت اديم وراحت وقالت : هلا..
وانقطع صوتها اول ماشافت ام سياف وشهقت
وقال بهاج بصوت خفيف : بسم الله عليك
بس محد انتبه وحضنتها بسرعه وبهاج يشوف المنظر وفرحة اديم قدامه بأبتسامه عذبه
وجو البنات ونزل الشنطه بهاج وطلع
بدو البنات يسلمون على ام سياف بحب وتقدمت ام سياف الجده : سلام ياعمه
الجده بحب : وعليكم السلام ورحمة الله
ام رعد : حي الله من جانا
تقدمت ام سياف تسلم عليها : الله يحييك
العمه عواطف : اخيراً شفناكم
ام سياف : شافتك العافيه يارب
جلسو كلهم وهم مستاااااقين لهالجلسه والجمعه الحلوه والضحك يسابق سوالفهم
وعند الرجال الي دخل سعود ورد السلام وقامو يسلمون عليه بحفاوه والكل يعرفه ويحبه من حبهم لبهاج
وعند البنات الي قامت الجده تجيب سطل الحنا وتنادي البنات الحوش الخلفي وطلعو البنات بفضول بس وقفو بصدمه اول ماشافو الحناء والجده جالسه تنتظرهم
افنان : جده وشو ذا ؟
الجده : صرنا ماعاد نشوف ؟
العنود : لا نشوف بس مو وقته ابداً
الجده : الا الا وقته يلا اجلسو قدامي اشوف
اديم الي كانت جالسه بصدمتها بصمت وهي اخر مره حطت حناء لما كانت صغيره
نوره : جده بكره العرس وتبين تحطينه الحين ؟
الجده : هذا ازين شي عشان شعوركم تطلع زينه
افنان : لا والله اسمحيلي هالمره
الجده : انتي اول وحده بحط لها امشي تجلسي قدامي اشوف
تلفتت افنان بقل حيله
العمه عواطف : مالكم مفر بس اخلصو عشان تغسلونه بدري
لفت تغريد الي كان بيدها صحن مكسرات وقالت : الحمدالله هالمره ماني معكم بروح اكمل اكل انا و وليدي
طالعو فيها البنات بقهر وهزت كتفها ودخلت اما البنات الي قعدو وهم للحين مو مصدقين وافنان كانت اول الضحايا وبدت الجده تحط الحناء بشعرها
اما اديم الي كان صعب عليها اكثر من البنات لان البنات متعودين دايم تفاجئهم الجده ولا اديم اول مره وبعد ماخلصو وكل وحده فوق راسها قماش الحناء وكل وحده تطقطق على الثانيه خصوصاً اديم
وتجمعو بالصاله يكملون قهوتهم قامت العمه عواطف و افنان وام رعد يسوون العشاء وقامت معهم اديم تساعدهم اما الباقي يسولفون ويتقهوون وفي المطبخ
عند اديم وهي تقطع البصل وحالتها حاله وعيونها تدمع وكل شوي تمسحها دخل بهاج وبيده اكياس من البقاله : ياولد ادخل ؟
ام رعد : ادخل ادخل يا حبيبي
دخل بهاج ونزل الاغراض
العمه عواطف : جبت الاغراض الي وصيتك عليهم ؟
بهاج : ايه ياعمه
العمه عواطف : جعلني ماخلا
تقدم بهاج يشرب مويه وانتبه لا اديم الي في مصارعه مع البصل ومابقى دموع في عيونها وقال : لالا ليه مزعلين زوجتي ؟
لفت اديم بأبتسامه حزينه
ام رعد : لو تشوف جدتك مسكتهم كلهم وحده وحده وحطت لهم الحناء
ضحك بهاج بطنازه واشرت اديم بالسكين تهدده : ترا البصل لاعب فيني لعب لاتخليني العب فيك
بهاج وهو يغسل يده بالمويه البارده وتقدم يسمح على عينها وهو يقول : افااا يخسى البصل يلعب بزوجتي ويبكيها خليه خليه انا انقطعه
كانت افنان تشوف حب بهاج لا اديم وطلعت وهي منحرجه اما ام رعد والعمه عواطف كانو يسوون العشاء بأبتسامه من هالحب الي يشوفونه قدامهم
اديم : لا اصلاً مابقى شي
غصبها بهاج تخليه وخلته وراحت عند ام رعد والعمه عواطف تشتغل معهم وهي كلها فراشاااااات وعيونها تطلع منها قلوب كل ماتطالع في بهاج وهو يقطع البصل
وبعد ماخلص لف وقال : وخلصنا
العمه عواطف : جعل يديك ماتمسها النار
ابتسم بهاج : اهم شي لا تبكون زوجتي حتى لو كان بصل مااتحمل دموعها
ابتسمت اديم بحرج
بهاج لف لها وهو يراقب ابتسامتها وشكلها بالحناء الي زودها جمال بنظر بهاج ولف على ام رعد لان يدري اذا طول النظر بينهم مارح يتحمل وبيحضنها وقال : يمه نسيت اقول ترا سعود هنا احتسبوه بالعشاء
ام رعد : تبشر انت وسعود
وتقدم بهاج وحب راسها وطلع وهو يأشر لا اديم تغسل عيونها لانها للحين حمرا
وطلعت عند البنات بأبتسامه
تغريد : شعللللليك اخوي يقطع عنك البصل
ابتسمت اديم بحرج وجلست : من علمكم
لفو البنات على افنان وابتسمت اديم : على طول ماتفوتين شي
العنود : شكله مغرقك حب
افنان بضحك : انا بقوم اساعدهم ماقدرت اولا اساعد من الرومانسيه الي بالمطبخ
وضحكو البنات بطقطقه
تغريد : قال لك من فيه عند الرجال ؟
اديم : يقول جو رجال ومنهم سعود صديقه
دق قلب نوره بقلق وهي تقول " مدامه جا يعني يقدر يمشي ويروح ويجي وانه بخير " وابتسمت بهدوء
تغريد : متى بتغسلون شعوركم ؟
فزت اديم : عن نفسي بقوم الحين لاني مقدر اتحمل اكثر
وراحت اديم الجناح تتروش وتنزل لهم والبنات كل وحده راحت تغسل شعرها
___________________
ومن بكره يوم العرس ( هند ، خالد )
( خالد ) واحد من اهل الديره
والكل تجمع واكتمل الحضور بدخول زوجة الشيخ عبد اللطيف وبنتها شهد
وبدت الطقاقه تبدا وبدا العرس يحيا واديم ونوره وتغريد والعنود وافنان وساره بجهه وكل وحده تقول الزين عندي الين مادخلت ام سعود والهنوف وراحت الهنوف عند البنات واكتمل صفهم بالجمال والضحك والحش وكانت شهد وامها مقابلينهم وشهد بفستانها الناعم و ملامح وجهها الطفوليه
والجده وام رعد وام سياف والعمه عواطف وام سعود بجهه
قربت تغريد لا اديم : هاذي الي كانت امي بتزوجها بهاج
لفت اديم وهي تحس بكره تجاها مو عشان شي بس فكرة انها كانت قادره تاخذ بهاج منها مزعجتها وقالت من دون نفس : ادري
حست تغريد بأنزعاجها وماقالت شي
دخلت العمه شيخه هي وامجاد وهدى والبنات شايفين نفسهم ك خوات العروس ومايتنازلون يناظرون او يلتفتون لحد
افنان : مالت على ايش شوفة النفس
نوره : كأنهم اول خوات عروس بالتاريخ
_______________________
وبجهه ثانيه في عرس الرجال والجد حمد وعياله واحفاده كلهم جالسين جمبه والكل يمر ويسلم عليهم
ودخل سعود الي كان عازمه ( خالد ) وتقدم يسلم على الجد حمد وكل الي بجمبه الين ماوصل لبهاج وقابله بأبتسامه
بهاج : عقبالك يا وحش
سعود سكت : اوووووه مطولين
بهاج بضحكه : حدك سنه سنتين وماشي ورانا
سعود الي كان فعلاً وده يتزوج ( يتزوج نوره ) ابتسم بهدوء
وبدت العرضه السعوديه تضرب وبدت صوتها يتوزع بالقاعه كلها وبشكل جمهوري والكل قام يلعب بالسيف من بينهم بهاج وسعود الي الكل يشهد على صداقتهم الطيبه والي من سنييييين
_________________________
وفي عرس الحريم عند شهد الي طلعت للمغاسل وانتبهت للحرمه الكبيره الي بعكازها جالسه بالكرسي منهد حيلها تقدمت بهدوء وقالت : خاله تبيني اساعدك ؟
ابتسمت ام مطلق وقالت : الله يجزاك خير يا بنيتي
ابتسمت شهد بهدوء وقالت وهي تستندها : تعالي معي
و وصلتها الين داخل الصاله وجلست ام مطلق على الكرسي بتعب وهي الي عازمتها ( ام خالد ) وقالت : مشكوره يا بنيتي
شهد : ماسويت شي
مسكتها ام مطلق قبل تروح وقالت : من انتي بنته ؟
شهد بهدوء : بنت الشيخ عبد اللطيف
ام مطلق الي انعجبت فيهااا وبشكل كبيييير : ماشاءالله الله يحفظك ويخليك لعين ترجيك طبقو
شهد : امين وياك ياخالتي
وخلتها وراحت للمغاسل وخلصت ورجعت تجلس جمب امها وام مطلق تراقبها بأعجاب وتتخيلها جمب مطلق
" وقت الزفه "
ودخل خالد على هند واكتمل عرسهم وبعد العشاء الكل افترق وطبعاً عرس الرجال انتهى قبل عرس الحريم وهاذي عادة اهل نجد
وبرا عند بهاج الي يستنى اهله وسعود ينتظر امه والهنوف معه وكانو نازلين يسولفون على جمب الين ما انتبه بهاج لللجده وام رعد طالعين واشر لهم يروحون للسياره و وراهم اديم وام سياف والعمه عواطف ونوره وتغريد وافنان والعنود وساره وفعلياً السياره ماتكفيهم
جا بهاج بأبتسامه وهو يعرف اديم من بينهم كلهم وقال : هاه نمشي ؟
ام رعد : ايه يابوي بس هقوتك السياره بتكفينا ؟
وفعلاً كانت سياره بهاج ماتكفي رغم انها جيب ابو رعد واخذها منه عشانها كبيره بس ماتكفيهم وقال جدتي تركب معي قدام وامي وخالتي ( ام سياف ) وعمتي عواطف المرتبه الثانيه والمرتبه الثالثه البنات
وفعلاً طبقو كلام بهاج والكل ركب والبنات الي ركب في المرتبه الاخيره ( اديم وتغريد وساره والعنود ) ومابقى الا افنان ونوره
افنان : مايكفي لي ولنوره وش الحل ؟
شافهم بهاج وتلفت وشاف سعود الي وصلو له اهله وقال بصوت عالي : سعود
لف سعود وقال : هلا
بهاج : عندك مكان لشخصين ؟
دق قلب نوره بخوف وهي ماودها تركب معه وقال : ايه ايه
بهاج لف على افنان وقال : روحو معهم
افنان الي كان عندها عادي لانها تحب الهنوف والهنوف تموت فيهم وقالت : زين
وركب بهاج ولف وراه وشاف كمية الزحمه وابتسم وقال : ماعليه قريبين قريبين
اديم بصوت ضحك : تكفى مكيف خل نتنفس
ضحك بهاج ورفع على المكيف و وده يقول ( ابشري او من عيوني ) بس ماقدر يقول قدام اهله
ومسكت نوره افنان بصمت وخوف
افنان : شفيك ؟
نوره : مانبي مانبي نركب معهم !
افنان بفضول : نعم وليه ؟
نوره : كيف نركب مع واحد غريب ؟
افنان : مو غريب اخو الهنوف وصديق بهاج ولو بهاج مايثق فيه ماقال لنا روحو معهم
نوره الي كانت متوتره بس قاطعتها افنان وهي تشوفهم ينتظرونهم وقالت : يابنت امشي عيب ينتظرونا
ولفت نوره وشافت بهاج مشى من زماااان و وكلت امرها لله ومشت وركبو مع سعود وركبت افنان وصارت بالوسط ونوره ورا سعود و الهنوف ورا ام سعود
وقالت ام سعود : الله يعينهم على الزحمه زين انكم جيتو معنا
افنان الي ردت وهي متعوده على سعود كثيييير كأنه واحد من اخوانه : اي والله زحمه مافي مكان
كان سعود يسوق بصمت بس كان يشم ريحة عطر وكأنها مألوفه عليه ايه بس ماعمره شم ريحة عطر نوره بس بدون سابق أنذار دق قلبه بفكرة الي وراه نوره
الهنوف : نوره ماعرفتك حسبالي انك ساره
ابتسمت نوره بتوتر بس مافتحت فمها وهنا صدق دق قلب سعود والحين تأكد الي وراه نوره صاحبة ريحة العطر الي اول ماركبت توزعت بالسياره
و وصلو عند البيت و وقف سعود وهو مافتح فمه بكلمه من مشو ونزلت نوره بكل هدوء و وراها افنان وتسكر الباب واخذ سعود نفس وكان وده يلتفت يشوفها بس ماقدر
ومشا بعد ماضرب بوري لبهاج ( ك سلام )
والتفت بهاج ورفع يده له
وعند بهاج الي اول ما وقف نزلو على طول
تغريد بطقطقه وهي داخله البيت : ذبحتو ولدي
ساره : انا خلوني اشوف حبيبي ولدي من رحت القاعه وهو مع الخدامه
افنان كانت تضحك وتسولف معهم عن الزحمه بس كانت نوره هااااديه وساكته
العنود : شفيها ذي
افنان وهي تلوح قدام عينها : هيه معنا يا الطيب ؟
لفت نوره بفزه : وجع وش فيكم
اديم : انتي الي وين غطستي
نوره : تعباااانه بروح ابدل وانخمد
العنود لفت : يلا وانا بعد
ومابقى الا افنان واديم وجت افنان بتقترح على اديم يسهرون بس قاطعتها اديم وقالت : مع نفسك ماشوف الطريق بروح انام
افنان الي كانه للحين متناشطه : هين خليتوني لحالي
وافترقو البنات وكل وحده راحت تبدل وتنام
وعند اديم الي اول مادخلت الجناح راحت للغرفه تبدل ودخلت بس دخل وراها على طول بهاج الي فزت بخوف تقدم بهاج بضحك : شفيك ؟
اديم غمضت ومسكت قلبها : احد يدخل كذا ؟
بهاج تقدم بخبث وبعدت اديم وكل مايتقدم بهاج خطوه تبعد خطوتين بتوتر وهي تدري بهاج على ايش ناوي وقال بخبث : وليه مو انتي زوجتي ولا غلطان ؟
اديم كانت متوتره وكل ماقرب بهاج تبعد الين مانصدمت و وصلت للجدار وابتسم بهاج بخببببث كبيييير
بهاج : ليه رحتي للزواج وماوريتيني الجمال والزين ولا انا محروم ؟
اديم الي كان قلبها بيطلع من مكانها : ماكنت فيه
بهاج الي بدا يدخل اصابعه بين شعر اديم ويلعب فيه : اهااااا الحين صار الغلط علي ؟؟
اديم حست بقرب بهاج لها بشكل كبيييير لفت ونحاشت للحمام وضحك بهاج بغبنه وهو يقول : طيب مصيرك طالعه
ضحكة اديم بصمت بعد ماقفلت باب الحمام وراها
ونزل ثوبه بهاج بضحك وارتمى بتعب على السرير
واديم الي بدلة ومسحة مكياجها كانت متوقعه بهاج للحين صاحي بس انقطع صوته وفتحت الباب بشويش وشافته في سبعين نوووووومه من التعب وابتسمت بحب وغطته زين وطفت النور ورجعت هي بعد تنام
____________________
ومن بكره العصر الي ابو سياف حدد وقت رجوعه للرياض والي هو بكره واديم ماودها يروحون بس ماتقدر تسوي شي اما العمه عواطف وبناتها وحمد الي اصلاً كانو ناويين يجلسون بالديره الين ماتغريد تولد لانها باقي كم شهر على ولادتها ومايبون يتعبونها بالروحات والجيات والمسافه البعيده عشان كذا ماخذين كل الاغراض الي يحتاجونها ومطولين بالديره
____________________
وفي بيت جدة مطلق المغرب
وهي تسولف على مطلق كيف كان الزواج انها انبسطت ومطلق منسدح وساند وجهه على خده و مستانس ان امه انبسطت بس قالت وبدون سابق انذار : يا مطلق ياوليدي انت تطيعني ولا ماتعطيني ؟
فز مطلق : افا وانا ولد ام مطلق امري يامي
جدة طلق : كم صار عمرك وانت للحين ماتزوجت ؟ وترا انا ابي اشوف احفادي قبل مايروح العمر علي
انصدم مطلق من هالموضوع الي ماعمر ام مطلق فتحته معه وقال بضيق : وش جاب الطاري الحين ؟
جدة مطلق : بس تشفقت على عرسك وانا احضر العروس واشوف الناس متى احضر عرسك ؟
مطلق الي يدري محد يزوجه من الديره وقال بضيق ورجع يتكي : مو الحين يمه مو الحين
جدة مطلق : متى ؟ اسمعني ياحبيبي وطع شوري انا امس شفت لك وحده ياتبارك الرحمن من جمال من اخلاقك بنتً تنحط على الجرح ويبرأ وسمعت انها بنت الشيخ عبد اللطيف
فز مطلق وانصدم صدمة عمره وقال : من ؟
جدة مطلق : شفيك بنت الشيخ عبد اللطيف ماغيره ماعنده الا بنت وحده !
مطلق : وكيف كلمتيها عرفتك ؟
جدة مطلق : ومن وين تعرفني انا امس تعبت شوي وجت تساعدني وماخلتني الين ماوصلتني الكرسي بنت قلبها نظيييييف وتلبق لك
مطلق الي كان يدري مستحيييييل يتزوج بنت الشيخ عبد اللطيف اذا هو مايقدر يتزوج بنت من بنات الديره كيف يتزوج بنت شيخ وقام بضيق ومسك شماغه وقال : وعلى قولك هالبنت الي قلبها نظيف بترضى فيني ؟
جدة مطلق بتكشيره : وليه ماترضى ان شاءالله وش الي يعيبك ؟؟
مطلق بضيق من الموضوع : يايمه لا تخليني اتكلم وانتي تدرين كل شي يعيبني لا شغله ولا عمله وباليالله امسك الفلوس كيف تبين بنت الناس تعيش معي ؟ ولا بعد بنت الشيخ عبد اللطيف
وبضحكه فيها غصه قال : اذا انا مقدر اصرف على نفسي كيف تبيني اصرف على بنت شيخ ؟؟؟ وهقوتك ابوها بيعطيني اياها
سكتت ام مطلق وهي الي نست موضوع الشغل وقالت بضيق : اذا على شغل بتنحل بس خلاص يايمه لا تزعل
مسح مطلق على وجهه بغضب وتقدم وباس يدها وقال : انا مازعلت واسف بس لاعاد تفتحين معي هالموضوع تماماً
وطلع من البيت بكل ضييييييقه وهو الي توه كان يحاول يطلع شهد من مخه وتفكيره كيف القدر رجعها له بهالسرعه
__________________
وعند سعود الي كان طالع من بيتهم وانتبه لمطلق الي ضايق ولا رد السلام ولا حتى رمى على سعود كلمه ولحقه وقال : شعندك اليوم هاجد غربيه !
مارد عليه مطلق وكمل مشي
استغرب سعود ومشا وراه وقال : ولد اكلمك انا
لف عليه مطلق بهدوء والي جلط سعود فيها : نعم يا سعود نعم
سعود : وش فيك ؟
مطلق بضيقه : مافيني شي خلني بلحالي
مشا مطلق ومشا وراه سعود وماتركه ابداً رغم ان علاقتهم بدت بهوشه وكره الا الحين مايرضى عليه بس مايبين
لف مطلق عليه الي حس انه وراه وقال : ياولد وشتبي مني ؟ ترا مو وقتك ابد ولاني رايق لك
سعود تقدم : ماجيت اتهاوش معك انا قل لي وش فيك وراك قالب وجهك ماتعودت عليك كذا
مطلق : انا هذا وجهي دايم بس محد يشوفه
استغرب سعود وجلس مطلق على جمب بضيقة صدر كبيييييره وجلس جمبه سعود
مطلق : ياخي وش هالحياه الي انا عايشها ؟؟؟ طفشت طفشت
سعود : وش صاير معك
مطلق : مو صاير معي شي بس متضايق من هالعيشه تعبت نفسي وتعبت امي معي الي حتى ريال واحد ماادخله للبيت ولا اهل الديره الي كل ماشافوني الداشر جا الداشر راح مالهم سيره غيري
سعود الي ماتوقع بيجي اليوم الي بيشتكي مطلق له عن حياته وضربه بظهره بخفه وقال : ماعليه تهون تهون
تنهد مطلق ولف على سعود وابتسم بضيق
وجا بهاج ويتكلم من بعيد وقال : تكتب بالتاريخ سعود ومطلق جالسين سوا
لفو عليه وانتبه لوجه مطلق المكشر وسعود الي ساكت وجلس بملل وقال : يوووه متهاوشين بعد !؟؟؟
سعود عشان يغير جو مطلق : من هو عشان اتنازل له واتهاوش معه ؟
ولف على مطلق وقال : عمك
بهاج الي حس على مطلق الضيقه وسعود يواسيه بطريقه ثانيه : ايه تهاوشو تهاوشو بعد بس ترا ماني مفرق بينكم اكلو بعض
سعود : اسمعو عازمكم على عشاء
بهاج : اببببشر
ولف على مطلق وقال : وانت بتجي ؟
مطلق لف عليه وابتسم بخبث : اكيد اهم شي تتخسر
سعود : ايه لقيتها من الله قومو قومو
وقامو كلكم ركبو بسيارة سعود واتجه سعود على المطعم
ودخلو المطعم وكان بهاج جمب سعود ومطلق قدامهم وقرب بهاج لسعود بصوت خفيف وقال : وش العلم ؟
سعود : مدري جاني متضايق
بهاج لف على الي بالمطعم وشاف الكل يطالع فيه بأستحقار : ما الومه شف ذول كيف يناظرونه
سعود بقهر : بفقع لهم عيونهم
وسكتو قبل لا مطلق ينتبه عليهم
وبعد العشا كان سعود واقف برا وفي داخله كلام وده يقوله لبهاج بس مايدري كيف وطلع له بهاج ومطلق للحين يغسل
بهاج : كثر الله خيرك
ابتسم سعود : عافيه بس هاه العشا الجاي عليك
بهاج : غالي والطلب رخيص
لف عليه سعود الي خلاص بيطق اذا ماقال لبهاج وشاف الفرصه مدام مطلق ماجا وقال : بهاج بكلمك بموضوع
لف عليه بهاج : ماعرفتك يا الجدي
سعود : لالا خل الضحك على جمب بتكلم معك بشي مهم
بهاج : عسى ماشر
سعود : خير خير
بهاج : وشو طيب
سعود : دقيقه خلني اجمع الكلام ؟
بهاج : اخلص
سعود الي مايدري كيف قالها بس قال : انا ابي اتزوج
لف بهاج بصدمه وضحك بكل قلبه
سعود الي انفرط قلبه قال بهدة حيل : قلت شي يضحك ؟
بهاج الي كان يعرف هالموضوع من زمااااااان ويدري سعود يبي من وقال عشان يصعب عليه السالفه : ومن الي امها داعيه عليها ؟
سعود : قصدك الي امها داعيه عليها
بهاج : ايه ايه كذا قصدي بس اخلص من
سعود بتردد : اخت حمد الكبيره
بهاج الي كان يعرف ان سعود متعلق فيها وقال : توك تقول لي ؟ ولا تحسبني ماني شايفك انك تبيها من زمان
سعود : مو هذا موضوعنا الحين قلي وش الطريقه
بهاج : وش الطريقه بعد رح اخطبها من ابوها زي الرجال
سعود : هقوتك يعطوني ؟
بهاج ضرب كفته بخفه : وكيف مايعطونك الناس تتمنى واحد زيك رجال وسيد الرجال
ابتسم سعود : اجل اذا شفت ابوي فاضي بقول له
بهاج : عجل علينا
سعود : يالله كيف ارتحت
بهاج : الله يسعدك ويهنيك وانا اخوك
لفو وشافو مطلق الي جاي وقال سعود : سكر على السالفه لا تقولها قدام الغبي ذا عشان ماياخذني طقطقه رايح جاي
وضحك بهاج
مطلق : هاه نمشي ؟
بهاج الي حس بفرحة سعود وقال بأبتسامه : يلا
مطلق : شفيك تتبوسم ؟
بهاج الي لف وشاف سعود الي خايف وقال : لا بس حبيت صداقتكم
واخذ سعود زفير براحه وقال : امش امش بس
وركبو السياره ومطلق حاس على بهاج الي ماسك على سعود حاجه
__________________
وعند اديم الي كانت جالسه بوسط البنات وهم يسولفون
جات لا اديم رساله من رقم غريب وفتحتها بسرعه بعفويه بس انصدمت اول ماشافت صورها ! ايه ايه صور اديم وبسرعهههه قامت بفزه
افنان : بسم الله شفيك ؟
اديم : اء لا لا مافيني شي بس بروح الحمام
وطلعت بسرعه وقلبها يرقع بس انصدمت اكثر اول ماشافت الرساله الي وراها مكتوب فيها " تعبت وانا اشوف صورك بس انتي مو معي المهم بعد ١٠ دقايق بدق عليك واذا مارديتي صورك بتروح لابوك وعمانك "
وهنا انجلطت اديم انجلططططططت وما جا على بالها الا نايف ايه ايه مافي غيره نايف
وكتبت وهي ترجف ومليانه خوف " من انت ؟ "
بس ماجاها رد وقعدت تدمع لا شعورياً ودخل فيها خوف مو طبيعي
وبعد ١٠ دقايق بالظبط دق الجوال وراحت اديم لا اخر روايه بالحوش وردت وسمعت الصوت الي كانت متوقعته وكان نايف
نايف : ادوم حبيبتي
اديم بصوت يرجف : وش تبي مني للحين ياكلب ؟؟ ماكفاك الي جاك من بهاج ؟
نايف بقهر وغبنه : لالا شفيك وانا مشتاق لك كذا تردين علي ؟ ولا صح سمعت انك تزوجتي بهاج يلا الف مبروك بس زواجكم مارح يستمر لانك بتطلبين منه الطلاق
اديم : تخسي ياكلب ما اتطلق من بهاج
ضحك نايف : تحسبين اذا كسر جوالي مارح ارجع صورك ؟؟
وبصوت حاقد من الليله الي ضربه وكسر يده بهاج فيها قال : اسمعي عاد عندك مهله يوم والله والله اذا ماجاني خبر طلاقك والذي خالقني صورك هاذي بتشوفينها بكل مكان وهاه مو بس عمانك وابوك لا بنشرها عند الله وخلقه بس يوم يا اديم بس يوم بعدها حياتك كلاها بقلبها على راسك مدام الامر بيدك اطلبي منه الطلاق وريحي راسك من الفضيحه الي حتى نشرت صورك مستحيل ابوه يخليك عندك ثانيه وبيخليه يطلق غصب فاامسكي كرامتك بيدك واطلبي الطلاق انتي وصورك احذفها وهاه والله والله لو ادري انك علمتي ذا الكلب الي اسمه بهاج حتى لو جا عندي وذبحني تحسبين صورك بتنحذف لا عندي جهاز ثاني وفيه كل صورك واصلاً مارح تستفيدين شي مصيره السجن ومصيرك الفضيحه
وقفل الجوال وقعدت اديم مصدووووووومه ماترمش لها عين وعيونها تنزل منها دموع ملت وجها ولا هي الي تحركت ولا هي الي رمشت كيف كيييييف بعد ماتعدلت حياتها تنقلب رأسً على عقب ؟؟؟ وش البلوه الي ما افتكت منها ذي
وطلعت للجناح بسرعه وبوجه يبكي دمممم واول مادخلت وسكرت الباب بدت تصارخ بحرقة دم وببكي الين ماانهد حيلها وغفت على السرير ببكي ومالها حل الا انها تتطلق من بهاج اخف من انها تنفضح عند الكل وبهاج يصير قاتل ومصيره السجن
___________________
اخر الليل رجع بهاج من عند العيال وراح عند البنات متوقع اديم عندهم ومن عند الباب : ياولد
جت افنان : بهاج !
بهاج : نادي لي اديم
افنان : بس اديم مو هنا
بهاج : وينها ؟
افنان : مدري قامت علساس بتروح الحمام وشكها غفت بالنوم
ابتسم بهاج وقال : زين
ورجعت افنان للبنات وراح بهاج ركض للجناح وهو ولهااااان على اديم ودخل الجناح وشاف هدوء الجناح ودخل الغرفه وفعلاً كانت اديم متغطيه بالفراش و واضح انها نايمه وفيه نور الابجوره خفيييف ابتسم برضا وتقدم وكانت اديم صاحيه وما غمضت لها عين بس يوم دخل بهاج مثلت النوم
بهاج بعد مانزل لوجها وبدت يمسح على شعرها بحب وخفه
ماقدرت اديم تمثل اكثر وفتحت عيونها وابتسم بهاج : ماهقيت اديم تنام بدري !
ابتسم اديم وقامت : بس غفيت
بهاج تقدم يحضنها وهو مشتاااق لها ابتسمت اديم بحزززززن كبيييير وبداخلها تقول " كيف ابتعد عن ذا الرضا والحب والحنيه كلها ؟؟؟؟ "
ورجع بهاج وحس فيها شي وقال : اشوفك ضايقه ؟
اديم الي تمثل السعاده وقالت : لا ابداً جوعان تبي عشاء ؟
ابتسم بهاج : لا تعشيت مع العيال ابيك انتي تعالي
وارتمى على السرير وسحب اديم لحظنه وقال : ابي انام كذا
اما اديم الي بدت تحس بدق قلبه المطمن الهادي ونزلت دمعتها بصمت اما بهاج الي صدق ماقدر ينام الا وهو حاضن اديم وبعد وقت طووووووويل وتفكير اخذ اديم غطت هي بعد بالنومه ويمكن هذا اكثر مكان اديم تحس فيه الامان ويمكن هاذي اخر نومه مع بهاج

سويت تعديل على البارتات وصار هالبارت رقم ( 38 )🤍