A Rocker May Get Tongue-tied (Complete)

Chapter Seventeen

"CRAYON, are you sure about this?"

Nakangiting umikot si Crayon sa harap ni Riley. Pagkatapos ng mahabang panahon, ngayon niya lang uli nasuot ang uniform ng high school division ng Empire University. Simpleng long-sleeved white blouse iyon na may pulang ribbon at chequered brown skirt na hanggang sa ibabaw ng mga tuhod niya. Knee-length black socks naman ang gamit niya.

Bahagyang natigilan si Riley habang nakatitig sa kanya. Napabuntong-hininga ito. "You look so cute, Crayon. I think I just fell in love with you more."

Tumikhim siya para ikubli ang sayang nararamdaman niya. "Bagay din sa'yo 'yang suot mo."

Pinasadahan niya ng tingin ang suot ni Riley. He was wearing white polo with red necktie, plaid brown pants and black leather shoes. Nakapamulsa pa ang mokong kaya ang cool nitong tingnan ng mga sandaling iyon.

Napangiti si Riley. "Masaya ako dahil ngayon ko lang naranasan ang magsuot ng high school uniform."

"Na-miss mo ang high school life mo. Nakakalungkot 'yon."

Iyon ang dahilan kung bakit nagpatahi siya ng gaya ng uniform ng high school division ng Empire U para sa kanila ni Riley. Gusto niyang maranasan nito kung paano maging high school student kahit isang araw lang. Sa dami ng nagawa ni Riley para sa kanya, gusto niyang bumawi dito kahit sa maliit na paraan lang.

"Ginagawa mo 'to para sa'kin?" nakangiting tanong ni Riley.

Inirapan niya ito saka siya napatiuna na sa paglalakad. "Na-miss ko lang magsuot ng uniform 'no."

Pabirong binunggo ni Riley ang balikat niya nang umagapay ito ng lakad sa kanya. "Thank you for doing this for me, Crayon. Kaya mahal kita, eh."

Natawa lang siya dahil kinilig siya. "Mag-tour na lang tayo sa high school division ng Empire."

Walang permiso ang "tour" nila ni Riley. Taga-Empire sila at may ID sila kaya madali silang nakapasok sa high school division. Ngayon niya lang nagawang sumuway sa batas ng unibersidad nila, pero himbis na matakot at kabahan ay na-e-excite pa siya.

Pasimple silang naki-sit in sa klase ng may klase. Impit na napapatili ang mga dalagita habang nakatitig kay Riley. Hanggang pala sa high school division ay sikat ang binata. Sinenyasan niyang tumahimik ang mga bata para hindi sila mapansin ng teacher na abala sa pagsusulat sa blackboard.

Riley chuckled. "Natakot sa'yo 'yong mga bata," bulong nito.

Tinapunan niya ng masamang tingin si Riley, pero natigilan siya nang makita kung ano ang ginagawa nito. Nakatingin si Riley sa blackboard habang sinusulat sa composition notebook nito ang lecture. He looked cute doing that.

Nilingon siya ni Riley. "Hindi ko naranasang magsulat ng lecture sa notebook dahil computer lang ang kaharap ko habang nagho-home study ako. Iba pa rin pala kapag blackboard ang nasa harap mo."

Napangiti lang siya. Para itong bata, cute at inosente.

Sa susunod na klase na pinasukan nila ay pinilit niyang ngumiti ng madalas habang nakikipag-usap sa mga bata para hindi "matakot" ang mga ito sa kanya. Napansin niyang bigla na lang siyang napaligiran ng mga binatilyo na gustong makipagkilala sa kanya.

Hinampas ni Riley ang kamay nito sa mesa, pagkatapos ay hinawakan siya sa kamay at hinila palabas ng classroom. Natawa lang siya. Malamang ay nagselos ito dahil sa mga binatilyong ayaw siyang lubayan.

Sunod nilang in-invade ang laboratory room kung saan gumagawa ng experiment ang mga estudyante. Sinuotan siya ng laboratory coat ni Riley, at gano'n din ito. Naka-face mask sila kaya madali silang naka-blend sa klase ng walang nakakakilala sa kanila.