His Indecent Proposal: Lander Montenegro

Chapter 12

NAKAHIGA siya sa ibabaw ng malumot na batuhan. May dugo sa gilid ng ulo niya, may galos ang mga braso at mga gasgas sa mukha. Hindi man ganoon kalalim ang binagsakan niya ay mukhang hindi maganda ang lagay ni Apple.

"Help..." Bumuka ang namumutla niyang mga labi.

Umiling ako.

"Please help... help me..."

Hindi ko siya maintindihan pero isa lang ang alam ko, ayaw ko siyang lapitan. Umangat ang isang kamay ni Apple. Naghalo ang dugo at luha sa buong mukha niya.

"Dito ka lang." Wika ko. "Dito ka lang para di ka na makita ni Just Lander! Dito ka lang para ako na ulit ang papansinin niya at ako na ulit ang papakasalan niya! Dito ka lang!"

Nanlaki ang mga mata niya nang magsimula na akong umatras. "Please... don't leave... me... here..."

Tumalikod na ako at umakyat paakyat sa binabaan kong pitak ng mga lupang may mga damo. Iiwan ko siya. Iiwan ko si Apple kasi walang makakakita sa kanya ron sa ibaba. Hindi na siya makikita ni Just Lander don. Doon na lang siya. Hindi na siya makakatayo ron. Doon na lang siya palagi.

Nanginginig ang buong katawan at nagluluha ang mga mata ko. Alam kong hindi tama ang ginawa ko, pero gusto kong gawin ito. Kahit natatakot ako, gagawin ko. Dahil ayaw ko na maging asawa siya ni Just Lander!

Nang lingunin ko si Apple sa bangin ay hindi na siya gumagalaw. Hindi na rin nakadilat ang mga mata niya.

...

"SAAN ka ba nanggaling na bata ka?!" salubong sa akin ni Lola Peach.

Nang bumalik ako sa mansiyon ay nagkakagulo na ang lahat ng mga tao roon. Marami sa mga guwardiya ang paikot-ikot at mukhang kabado. At bukas na bukas din ang malaking pintuan ng mansiyon na hindi naman madalas na mangyari.

"Bakit maputik ang mga paa mo?!"

Nakatayo ako sa harapan ni lola, puro putik nga ang mga paa ko dahil sa pag-ahon ko mula sa bangin ng tingnan ko si Apple doon. Naglakad na lang din ako pabalik at di na dinala ang kotse. Iniwan ko iyon sa tabi ng bangin para hindi makita ni Just Lander, para di niya maisip na binangga ko si Apple.

"Halika nga rine ng malinisan ka!" hinawakan ako ni lola Peach sa balikat at saka iginaya paakyat sa matayog na hagdanan ng mansion. "Kanina ka pa pinapahanap ni Ser dahil nagsumbong ang mga guwardiya na umalis ka! Bakit ka lumabas ng gate?! Sumabay ka pa sa pagkawala ni Ma'am Apple!"

Pero bago pa kami makahakbang sa unang baitang ng hagdan ay natigilan na kami. Nasa tuktok kasi niyon si Just Lander. Nakatingin siya sa amin ni lola habang nakakunot ang noo, sa itsura niya ay mukhang galit na naman siya.

"Jack." Bigkas niya sa pangalan ko habang nagtatagis ang kanyang mga ngipin.

"Ay, Ser! Papapaliguin ko lang si Jack kasi ang dungis niya! Ewan ko ba sa batang ire at kung saan nakarateng!"