His Indecent Proposal: Lander Montenegro

Chapter 17

NAKAPANGHIHILAKBOT!

Ngayon lang ako nakakita ng ganoon. Totoo pa lang nakakapatay ang bagay na iyon na tinatawag nilang baril! Masakit sa tainga ang tunog niyon, umuusok pa ang dulo matapos kalabitin ni Just Lander ang gatilyo. Kitang-kita ng aking dalawang mga mata kung paano sumabog ng dugo ang mukha ni Chandra. Bumagsak siya sa sahig ng wala ng buhay at hindi na humihinga!

Sumuka ako sa aking kinauupuan dito sa banyo. 

Dinala ako rito ni Just Lander at dito iniwan. Hindi ko alam pero umikot ang aking sikmura sa aking nakita. Tiyak na ganoon din ang aking magiging hitsura kung ako ang binaril ni Just Lander noong isang gabi.

"Nakow! Eh, ano bang nangyari sa'yo?" sumulpot si lola Peach. "Bakit ka puro modta?"

Umiling ako. "S-sa cake po ito, icing... nasubsob po kasi ako sa cake, Lola..." garalgal ang aking tinig.

"Diyos ko! Eh, ano?! Kumusta yung cake?!"

Napangiwi ako. "S-sira na po iyong kalahati ng cake... natumbahan ko po kasi..."

"Pucha, 'buti buhay ka pa?"

"P-po?"

"Gawa yata sa diyamante ang cake na iyon, pagkamahal-mahal ba naman! Kaya nakakapagtakang buhay ka pa kung ikaw ang dahilan kung bakit nasira iyong cake ni Ser."

Napahagulhol na ako.

Lumapit sa akin si lola at umupo upang yakapin ako.

"N-nakita ko po..." humigpit ang pagkakayakap ko kay lola. "M-may pinatay si Just Lander sa harapan ko..."

"Alam ko, hija." Kumalas sya sa akin. "Normal na lang iyon na gawain nya."

"Normal?"

"Laro lang ang pagpatay sa kanya. Balewala sa kanya ang buhay ng iba."

Napalabi ako. "Pwede po palang laruin ang pagpatay?"

"Putragis naman, ang tanga, oh. Siyempre hindi pwede iyon." Humawak si lola sa mga kamay ko. "Dahil masama ang kumitil ng buhay."

"Ibig sabihin, masama po si Just Lander?"

Napayuko si lola bago sya napatango.

"Ibig sabihin, masama rin po iyong ginawa kong pagtatangka sa buhay ni Apple?"

"Masama iyon. Walang sinuman sa atin ang may karapatang bumawi sa buhay ng isang tao."

"Paano po iyon, Lola, masama po ako?"

"Hindi mo naman alam ang nangyari dahil bobita ka. Pero ngayong alam mo na ay wag mo ng uulitin, ha?"