His Bad Ways

Chapter 22

Chapter 22

"GOOD MORNING..."

Malamig na tingin ang isinagot ni Xerxes sa akin.

Tama nga si Fury, alas-siete ng umaga lumalabas ng kuwarto ang daddy niya.

Nag-alarm talaga ako para magising ako ng alas-sinco. Naligo agad ako at naghanda ng almusal; bacon, hot dogs saka itlog na pula na may kamatis. Lahat iyon ay stock sa ref na pinakialaman ko lang. Saka na ako magluluto ng pakbet, kare-kare, adobong atay ng manok at iba pa, kapag inutusan niya na akong mamalengke para sa stock next week.

Nilingon ko siya at nginitian. Magaan na magaan ang pakiramdam ko ngayon. "Kain ka na, o."

Sabi ni Fury, araw-araw may meeting ang daddy niya. Hindi raw nag-aalmusal si Xerxes kapag umaalis, kape lang daw ang tinitira ng lalaki sa umaga.

"What are you doing?"

Parang gusto kong matunaw sa titig niya. Gusto ko ring matulala sa kanya.

Ang liwa-liwanag ng bukas ng mukha niya dahil sa pumapasok ng sikat ng araw sa sliding door ng terrace sa sala. Parang higit siyang gumuwapo kaysa kahapon. Bawat minuto yata ay higit siyang gumuguwapo.

Ipinilig ko ang ulo ko at muli ko siyang nginitian. "Ito, ipinagluto kita kasi alam ko na maaga ang alis mo ngayon."

Naka all black siya from his shoes to his polo. Ang naiba lang ay ang suot niyang tie at ang silver na relo sa kaliwang pulso niya. Basa pa ang kanyang buhok kaya alam kong bagong paligo siya, naaamoy ko pa ang swabeng amoy ng tiyak na mamahaling after shave na ginamit niya.

Kung noon na mumurahin at luma ang isinusuot niya ay malakas na ang kanyang dating, ano pa kaya ngayon?

Siguro ang dami niyang naiko-close na deal at marami siyang napapahangang tao. Noon pa man ay matalino, madiskarte at resonable na siya. Higit siguro siyang magaling ngayon na nakapag-aral na siya sa ibang bansa. Ang balita ko nga sa half-brother niyang si Van ay napalago ni Xerxes ang isa sa mga kompanyang ipinagkatiwala ng daddy niya sa kanya.

"Pasensiya ka na at 'yan lang ang nailuto ko, ha? Iyan lang kasi ang meron sa ref." Ipinaghila ko siya ng silya.

Pero kahit iyon lang ang mga ulam na inihanda ko ay tiniyak kong presentable at mabangong-mabango iyon, lalo na ang sinangag.

Ipupusta ko ang lahat ng internal organs ko na pagbukas pa lang ni Xerxes ng pinto ng kuwarto niya ay naamoy niya na ang bawang sa sinangag. Weakness niya iyon kaya sinadya ko talagang damihan ang pritong bawang.

"Kain na, tulog pa si Fury, e." Sinandukan ko ng sinangag ang plato. "Sige na, kain na. Anong gusto mong hapunan mamaya? Gusto mo ba ng pakbet? Binagoongan? Iyong mga wala sa abroad? Malamang namiss mo iyon."

Feel na feel ko ang pagsisilbi ko sa kanya. Ipinagsalin ko pa siya ng fresh juice sa baso.