#البطل_المغمور2 "زهور القمر"
#جمان_فريد
#الجزء_الرابع "مقسوم"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
في دارها واقفه ع المراية تمشط في شعرها وهي تفكر بقلق في اللي حيصير..
عرفت ان اللي جايين اهل جهاد..وداخلها مشاعر متناقضه بين الراحة والقلق..
ارتاحت لما تأكدت ان جهاد كان صادق معاها..
وقلق من نتيجة اللي قاعد يصير...
في صالة حوشهم..
كانت امها مقعمزة مع عفاف واختها ام سجى وسجى..
عفاف:ايه والله مع النو شرموله ودلاع ساد..
ام مريم بضحكه:ايه هو هدا..اشربوا قهوتكم..
ام سجى:شربناها ياوخيتي وتوا نبوا نخشوا في الموضوع اللي جينا ع خاطره..
ام مريم؛ان شاء الله خير..
حطت عفاف فنجانها وقالت؛خير خير وخيتي..اني جاية ومبعوته بعت من ولدي..شايف بنيتكم وعاجباته وجاني قالي يام سألت عليها وسمعت مايسر ونبيك تمشي تخطبيهالي..
ام مريم هزت راسها وهي ساكته ومبتسمه..
عفاف:بش نكون واضحه وصريحة معاك من الأول..اني ولدي مش مكمل قرايته..لكن خدام مع خوته في ورشة سيارات كبيرة ومعروفه والله مبارك في رزقهم..عنده فوقي شقه مقابله شقة خوه الكبير بنوهم المدة الاخيره..خوها بيبدا يأثث ماهو عرسه قريب..لكن هو مازال ماحط فيها شي..مزوقه وحاشاك حماماتها واتيات والمواد الصحيه..لكن مازال مش مأثث ولامركب كوجينه قالت صاحبة النصيب تختار بروحها..والحمد لله حتى السيارة عنده..يعني واتي ماناقصه شي..
ام مريم:والله شن بنقولك ياوخيتي بنتي هادي راس بنيه ع ستة ولاد نشبح فيها ونشبح للقمر...وعند بوها ووخيينها غاليه هلبه..قصدي ومانبيكش تواخذني حكاية مش متعلم هادي ماظنيش هي تتقبلها ولاهما..البنت تقرا طب راهو..
ام سجى:انتي تعرفي وزير الصحه اللي استقال..
ام مريم؛هدا اللي صايرة مشكله لولده..ايه من مايعرفاش..
ام سجى؛ولد اختي الكبير واخد اخته وراهو حتى هو مش مكمل تعليمه..
تفاجئت ام مريم..
عفاف:عندك حق تفكري هكي...لكن توا المهم البنت طيح في راجل ولد حلال يصونها ويخاف ربي فيها ياوخيتي..
ام مريم:مزبوط..لكن في النهايه الراي الأول والأخير ليها هي..
عفاف بإبتسامه؛باهي وينها هي خاطري نشوفها..
ام مريم:لحظة بس..وبدت تنادي..مريم...يامريم..
لحظات وخشت عليهم مريم..
كانت لابسه فستان صيفي لونه خمري كان عاكس عليها ومطلعها جمالها..
جمال ناعم وبريء..شد عفاف هلبه..
وخلا سجى تغار...
ومريم لما شافت عفاف حست براحه من اول نظرة بس ماكانتش عارفه انها امه..
جتها وسلمت عليها..
مريم:كيف حالك وحال صحتك..
عفاف:الحمدلله..تسلمي حبيبتي..
مريم وخرت عنها وهي مبتسمه بعدين سلمت ع ام سجى وسجى وقعمزت حدا امها..
امها استغربت فيها كيف مجهزة نفسها ولبست احلا ماعندها وهني بدت تشك..
ساد الصمت وهما يشبحولها..
ومريم متحشمه..
عفاف ابتسمت وقالت:شن دايرة في قرايتك..
مريم؛ماشية الحمد لله..
ام سجى:شن اسمك؟
مريم:مريم..
عفاف:الله ع اسم امي الله يرحمها..
بأصوات متقطعه قالوا:الله يرحمها..
عفاف:تبي تكملي قرايتك؟
ام مريم:مالاشنو..
مريم شبحت لأمها وهي منحرجه من اسلوبها في الرد..
عفاف بإبتسامه؛حتى اني هدا اللي نبيه..حنساعدوها لين تتخرج..حتى اني عندي بنية وحيده تقرا اول ثانوي وتبي تخش طب تلحق عليك بالك وتساعديها..
ابتسمت مريم..
وام مريم ابتسمت مجامله وبدت تضايق تبيهم يروحوا بسرعه...قالت لمريم بصوت يدوب مسموع..نوضي..
مريم ناضت وقالت..نستأذن...ومشت طلعت من حداهم..
وعيون عفاف معاها...
بعدين شبحت لام مريم وقالت؛مالا خلاص نعطيك رقمي ونراجي ردكم بش يجوا الرجاله وكان بديروا نظرة شرعيه..
ام مريم بإبتسامة مجامله:ان شاء الله..
وخدت ام مريم رقم عفاف...بعدين رنت ع جهاد اللي جاهم طول..
سقدتهم ام مريم..ومشت طول لدار بنتها..
فتحت عليها الباب وقالت وهي عاقدة حواجبها؛تعرفيه انتي؟!
مريم:من هو؟
ام مريم؛مريم بلا استعباط وقولي تعرفيه..بيناتكم شي..
مريم نزلت عيونها ليدها وقعدت تلعب بخاتمها..
ام مريم:مدام قعدتي ساكته معناها تعرفيه..قولي خيرك هبلتي بش تاخدي واحد مش مكمل تعليمه وانتي بتطلعي دكتورة..!؟ لا وامه بكل تقه تقولي يخدم في ورشة سيارات..
مريم:وشن الفرق بينها وبين ورشة الحداده ماما؟..
ام مريم رفعت حاجبها وهي ساكته..
مريم:ماما راهو راجل ومش حتندموا لو وافقتوا..حتندموا لو درتوا العكس..وهلبه..وعيونها تعبوا دموع...
امها:شن تهددي انتي ولاشنو..
سكتت مريم..
ام مريم؛يروحوا بوك وخوتك ونفتح معاهم الموضوع وهما يتصرفوا..اني هدا اللي عليا ودرته...
ومشت طلعت من الدار وسكرت الباب...
بعد ماطلعت دموعها مريم نزلوا..شبحت في الفراغ وهي تقول:درتها في روحي يام...اللي زي بنتك أمي مايرضاش بيها مش واحد زي جهاد...
مسحت دموعها بعدين ناضت بش تطلع تتوضى لصلاة المغرب..
🍁🍁🍁🍁
بعد المغرب..
مقعمزة تهدرز ع راجلها...
من البغدد زي مانقولوا قعدت تفضفضله وتحكي ع اللي يصير في حوش اماليها..
رتاج:والله خلتني نترحم ع اللي قبلها..واضح تبي تسيطر وتمشي كل شي..وبوي ماشي بالمسطره..
ضحك عادل وقال؛سامحيني قلبي..بس فعلا بوك يرعش ع النساوين..
رتاج؛مازعلتش هدا الحق...ماقاهرني حد كان امي مسكينه ديما مغلوبه ع امرها ديما..شخصيتها ضعيفه هلبه..
عادل:هدا علاش بوك داير فيها مايبي..
تنهدت رتاج وهي ساكته وقعدت تتفرج معاه ع التلفزيون بعدين هو قال..
عادل؛الاسبوع الجاي بنجيب همانه تقعد معانا هني..
شبحتله رتاج بصدمه..
وهو مكمل يقول؛البنت شهاده اعداديه وتبي تقرا في مكان هادي وانتي تعرفي غادي زحمة حوش العيله ودوشتهم..ضحك وشبح لرتاج وقال..قالت بنقعد عند ابله رتاج تو دلعني غادي وديرلي اللي خاطري فيه..
بلعت رتاج ريقها وابتسمت بالسيف وشبحت للتلفزيون..
عادل شبح للتلفزيون وقال؛وبالمرة معاش نخليك بكل نقعد معاك الأسبوعين كاملات..
رتاج بإبتسامه صفراء:ايه صح..
هو سكت وقعد يتفرج..
وهي تشوف للتلفزيون..بس عقلها مع الهم اللي جايها وفي نفسها تقول..
"نهارات سود ع راسي مغبرات...ياربي خيرني الهم لاحقني وين مانمشي..خيرني!؟'
وعيونها تعبوا دموع شدتهم بقوة بش ماينزلوش قدامه..
🍁🍁🍁🍁
في الكوجينه..
طيب في العشي وتهدرز مع بنتها..
عفاف؛زي الغزاله هكي شكلها زي الاجنبيات..
تهاني:مايطلع منه جهاد..
عفاف بضحكه:ايه..وتحسيها حشوميه وعاقله مش زي بنات هالوقت..
تهاني؛غير خيرهم بنات هالوقت يام مش كلنا بايرات وماننفعوش..
عفاف:اني نحكي ع الأخلاق والرزانه..الضمان وتطييب تتعلمهم...لكن كان جتني مش متربيه هي اللي مصيبه..
تهاني:باهي وع شن اتفقتوا..
عفاف:عطيتهم رقمي ونراجي في ردهم..ولو حاسة امها زي اللي مش عاجبها..
تهاني:علاش شن قالت...
عفاف؛وجهها تغير لما عرفت انه مش متعلم..مازال لما يسألوا عليه ويعرفوا عقاب الخير..نحس فيه مشروع فاشل..
تنهدت عفاف بضيق وقالت:هما اولاد وماسلموش اني بنت شن حيصير فيا..
عفاف قعدت تشبحلها كيف الدمعه في عينها وملامح القهر ع وجهها...
عفاف؛لو عند ربي في ليك #مقسوم حتاخديه يابنتي لو شن يصير..النصيب زي الموت مايقدر حد يمنعه..
شبحتلها تهاني وابتسمت بعدين قال:اصلا اني نبي نقعد معاك..وضمتها وقعدت تبوس فيها..
عفاف:اني مانبيكش بري عليا غادي..
وتهاني ع حالها..وعفاف تضرب فيها وتقول حولي وهي تضحك...
🍁🍁🍁🍁
واقف قدام لوحة من لوحاته يرسم ...
ع خشة صاحبه..
فاتح؛توقعت نلقاك هني حسيت المحاضرة اثرت فيك..
زياد وهو يشتغل:هلبه..كلامه كله في الصميم..
فاتح قعمز وقال:بالذات لما تكلم عن حب البنادم وكرهه لنفسه..عجبني كلامه لما قال اللي يكره نفسه يوجعها...
زياد:ولما قال البنادم مش ملك نفسه..هو ملك خالص لله اللي يدير فيه في روحه كله حيحاسبه عليه ربي..تصدق وجعتني روحي..قداش وجعتها قريب هلكتها..تنهد وقال..والله ماني عارف كان ربي سامحني ع اللي درته ولالا..
فاتح؛مالا اني شن نقول....مافيش مش كويس الا ودرته في روحي..وجعتها..وسختها...ماخليت مادرت فيها..كنت كاره روحي حق..
التفت شبحله وقال؛فاتح...اللي جاتك يومها مش امك صح..
فاتح نزل عيونه وابتسم بتهكم..
زياد؛مالا مني؟
فاتح تنهد وقال:المراة اللي ربتني..ماهو حني جماعة الطبقة الراقيه مايربوناش امهاتنا..قال كلامه متهكما..
زياد شبحله بضيق بعدين قال؛باهي خوتك..وخواتك..
فاتح؛عندي تلاته غير..زوز ولاد وبنت..طبعا زي ماتعرف اني الصغير..الكبير بكل مهاجر لألمانيا..والتاني يجري في جري الوحوش زي مايقولوا بش يدير ثروة ويستقل...واختي..متزوجه واحد...وسكت..
زياد؛خيره؟
فاتح؛كلب..
زياد عقد حواجبه..
فاتح قعد ساكت وهو يحرق من الغضب ويفكر...
حسه زياد معاش يبي يحكي..غير عيونه للوحه ورجع يرسم..
🍁🍁🍁🍁
"تفضلي"
نوال "ام فاتح" خدت الورقه وقالت:امتى بتطلع..
بشر "بو فاتح":غدوة الصبح..
نوال:تمام...عطيت صغارك العلم؟
بشر:ايه عرفوا..الا نرجس انتي قوليلها..
نوال هزت راسها وناضت وهي تقول:تمام..تصبح ع خير..
وخدت ورقة طلاقها ومشت طلعت من حداه....
🍁خدوا قرار الطلاق لأنهم وصلوا لطريق مسدود بالمرة برغم ان حياتهم ليها سنين طويله بارده تماما....
نوال تزوجت بشر وهي صغير..وهو كبير عليها هلبه..
كملت قرايتها عنده الثانويه والجامعه..لين خدت الماجستير والدكتوراة...استفادت هلبه من مركزه وفلوسه لين وصلت للي هي عليه اليوم..ومع هذا كله ماقدرتش تحبه ولاتحب حياتها معاه...وبعد هالسنين هادي كلها خدوا قرار تأخروا عنه سنين طويله🍁
🍁🍁🍁🍁
"قتلك مش متعلم ويخدم في ورشة"
بو مريم:وتوا طلع اللي يخدم في الورشه ومش متعلم ماينفعش..!؟
ام مريم:مش قصدي..لكن بنتك بتولي دكتورة راهو ماهيش ناقصة بش تاخد واحد اقل منها..
ياسر خو مريم الكبير:خلاص سكروه الموضوع زي ماتسكروا اللي قبله..
بوه؛علاش..ع خاطر مش متعلم ويخدم في ورشه!؟..
ياسر:بوي مريم جوها اللي خير منه مية مرة وردتهم..
بوه:واني بنعطي الناس هادم وقتهم زيهم زي اللي قبلهم ونشوف رأيي اختك فيهم..
ياسر:ولو اني عارف رايها من البدايه لكن حاضر ياحاج اللي تبيه ديره...
بوه:بروا أسألوا عليهم كويس وبعدين نردوا عليهم..
ياسر شرب من طاسة الشاهي بعدين هز راسه وقال:حاضر..
وامه تمرر في نظرها عليهم وهي خايفه وقلبهل حاس ان الموضوع هدا مش ماشي ع خير...
🍁ومريم بتموت من التخميم والقلق...
ومابطلتش دعاء ان ربي ييسر امرها ويستر عليها..
🍀🍀🍀
ومروا يومين..
خوتها ماكانوش واخدين الموضوع بجديه ومادوروش ولاسألوا..
وبوهم عابي عليهم ويراجي في ردهم..
وهي قاعده ع نار..معاش عرفت دير شي في حياتها..
لاتقرا..لاترقد..والماكله شبه قطعتها...
واحد من خوتها اسمه "معاذ" هدا اللي بدي يركز عليها وساوره الشك تجاهها..ربط الموضوع اللي جاها بحالتها المده الاخيره..ووصل لنتيجه ان اخته ع علاقه باللي جي خطبها...
وقعد ع اعصابه كل مايطرد هالأفكار من راسه ترجع وتعشش فيه اكثر...
وانجبر هو بروحه يمشي يسأل عنه...
🍁🍁🍁🍁
"مش صعبه ياولدي ركز شويه ربي يهديك ويفتح دماغك"
ام إحسان؛بعيد السو عليه..
المثنى؛ريتيه ياحناي ولا؟
احسان؛اشبحلي هني وركز معاي معاش تلهى..
المثنى بضحكة:حاضر..
احسان:هما هني..يبوا قيمة س..بش نطلعوها..
قطع عليه صوت رنين هاتفه..تنهد وقال:شويه وجاي..
حط البيرو وناض..
ومشي بإتجاه مكتبه..
ام احسان:هاك وليدي هاك..
المثنى:اووو فطيرة...
🍁في مكتب احسان..
وصل في تليفونه وخداه من ع الطاوله لما شاف المتصل تفاجئ واستبشر...
فتح الخط ورد:ايوه..
جاه صوتها الباكي والغاضب..
"خديت كلامك وتكلمت وخربت حياتي كلها..."
احسان عقد حواجبه وقال؛شن تقولي انتي اهدي وتكلمي كويس..
"كيف نهدا قولي كيف..خليت اللي يسوا واللي مايسواش يهينا ويمسح بكرامتنا الوطى...كله منك انت حسبي الله ونعم الوكيل فيك..."
وسكرت في وجهه..
وخلاته مصدوم ومش فاهم شي...
نزل تليفونه...ودور ع رقم هيثم واتصل بيه طول...
🍁🍁🍁🍁
قعمزت في وسط الحوش مقابله المكيف وهي تقول:الله ريحة بذنجال مقلي..شن دايرة عشي يام..
سدينه؛طعميه وبطاطا وبذنجال مقلي وشرموله..
دانيه:عطيك الصحة ياقلبي..وخدت شيشة المية وبدت تشرب فيها..
وامها تشبحلها..
ع جية رشيد قال:تعرفوا بوي شن قالي اليوم..
شبحوله وقالوا:شن قال؟
رشيد؛قالك بندخلك جامع في العطله..
سدينه بإبتسامه؛وهو في احسن من هكي..
رشيد؛قالي بيقريك خو الحيزبونه..
دانيه؛ايوااه..
سدينه؛وشن فيها..كان بتقرا قران بارك الله فيها..
دانيه؛تجلطي يام راك تجلطي..مش فاهمه انتي الحيزبونه هادي تبي تسيطر يام تبي تتحكم من اولها..
سدينه؛كان يسمعكم بوكم تقولوا عليها في الكلمه هادي حي عليكم..
دانيه:خل يسمع...
سدينه؛ايه نشوفوك بعدين..
رشيد؛باهي كيف توا؟
سدينه:راجي لين يروح مجاهد وقوله..
تنهد وقال:باهي...جي حدا امه وحط راسه ع رجله..
هي ابتسمت وقعدت تمسحله ع راسه..
ودانيه تشوفله بإبتسامه..
فرحانه اللي خوها تجاوز اللي صار معاه فيسع..وقعاد مجاهد معاه صلح منه هلبه...
مجاهد اللي قاعد يعوض في غياب دور الأب لعيلته كلها
ويحاول يدير كل شي يقدر عليه بش يسد هالفراغ الكبير...
🍁هالفراغ..
اللي كان كبير عند ملاك وعرفه..
وهما يشوفوا في ولاد جيرانهم كيف واقفين ع العمال اللي يبنوا في الخيمه..
المفروض يكون بوها اللي واقف ع راسهم..
هو اساس المناسبه هادي..
وامها هي اللي تجري وتعول مش عفاف...
••سجى:الله يبارك الخيمه كبيرة..
ملاك تنهدت بألم وقالت:مش حاسه بشي ياسجى مش فرحانه بكل..
سجى:وعلاش ان شاء الله ماتفرحيش..ماتحرميش روحك من الفرحه حرام عليك..غيرك يتمنوا يكونوا مكانك...
ملاك؛كيف تبيني نفرح ولابوي ولاأمي حاضرين..
سجى:عنداللاش ميتين..
ملاك:لكن هما مش ميتين ياسجى الناس كلها تعرف...
سجى؛اسمعي ماتنكديش على روحك عيشي فرحة عمرك..اللي بياخدك دكتور ياغبيه دكتور..خيرك من خليل اللي تاريخه اسود وقاعد مشكوك في وضعه..
ملاك بشي من الإرتباك؛شن جاب سيرة خليل توا؟
سجى:مش عبيطه اني ياملاك فايقه بيك راهو..نص النكد اللي انتي فيه ع خاطره..وخوديها مني والله مايستاهل ربي يحبك اللي فكك منه وعوضك براجل صح..مش زي بختي اني الأسود..فوق عيوبه قلبه مع غيري..اااه لو يرجع بيا زمان شويه بس...وتعبوا عيونها بالدموع..
ملاك تنهدت وقعدت ساكته..
سجى؛اسمعي مني افرحي وهيجي ولوحي كل شي وراك غدوة لما تعيشي متهنيه ومرتاحه مع راجلك وتحبيه تندمي ع هاليومين اللي ريحتيهم في النكد والبكي..
خدت ملاك نفس عميق بعدين هزت راسها وقالت:عندك حق..
سجى:ايوه هكي نبيك..هي بري قدامي وتي روحك بش تمشي للمركز..
ملاك :تمام..
ومشت خشت داخل وسجى وراها...
🍁🍁🍁🍁🍁
بعد العصر..
مقعمزين كلهم في المربوعه ومسكرين عليهم..
معاذ "اخ مريم":شد عندك...بوه تاجر مخدرات محبوس في بوسليم...هو وخوته سمعتهم زي الزفت وقالوا كانوا يخدموا مع بوهم لكن ماشدوا عليهم شي...الفرخ اللي جاي يخطب فيها ماينفعش بكل..
بو مريم:متأكد انت من كلامك هدا؟
معاذ:زي مانشوف فيك..
ياسر:كان سكرته من الاول ياحاج..
بومريم وهو يفكر بإستغراب:اني حسيت اختكم راغبه الموضوع هدرزت عليها ومارفضتش زي عادتها..
معاذ:فاهم شن معناه كلامك يابوي؟!
:كان قلت راغبه الموضوع معناها في بينها وبينه شي..
انحرجوا ولاده..
:مرات العيله عجبتها وارتاحتلهم..لكن كان هما طلعوا هكي خلاص..الموضوع تسكر..
ياسر:ايوه هو هدا...
ومعاذ قعد ساكت وهو يفكر ونار والعه فيه..
🍁🍁🍁🍁
وفي مكان تاني..
تحديدا في جنان الحوش اللي ساكنه فيه ملاك...
كانت والعه بالأفراح..واهازيج...والدربوكه..
بعد وصلهم خبر عقد القران..
حضروا اقارب عفاف وصاحبات ملاك..وقاموها بيها زي مانقولوا وخلوا ملاك تفرح....
في نفس الوقت...
سجن ابوسليم...
مكان الزيارة اللي يكون فيه حاجز زجاجي بين المحكوم والزائر ويتم فيه التواصل عن طريق الهاتف..
كان خالد حاط السماعه ع وذنه ويكلم في اللي جي يزوره؛منتصر...شن الريح اللي حدفاتك علينا يامنتصر..
منتصر بضحكه؛ريح عرس بنتي..
خالد؛اين بنت؟
منتصر ابتسم بتهكم..
خالد:دقيقة...!بنتك ملاك!؟
منتصر:تدوي جد ولاتتسهوك!؟
خالد:اقسم بالله ماعندي علم بحاجه..
منتصر؛خليل اللي بلغني..اني نعرف منه وانت لا!؟
خالد ماباش يحرج نفسه وولاده قدامه قاله:اني حالف ع الزيارة ما نبي حد يجيني...
منتصر:اها..باهي قولي..انت شن جوك هني..
خالد:خير من برا..
منتصر:تبي الحق لما خشيت انصدمك باللي ريته كل شي متغير هني..حتى الحراسه متشددة..
خالد:ومع هدا مش مهنيين ارواحهم..
منتصر:وانت؟
خالد:لا اني الحمد لله تبت توبه نصوحه وسيبت كل شي..
منتصر ضحك..
خالد:مش مصدق..عندك حق..حتى اني مش مصدق روحي..
منتصر:ياسيدي ربي يثبتك...
خالد:آمين..ولو اني عارفها دعوتك ماتوصلش السقف..
قعد يضحك المنتصر وهو يحرك في راسه يمين ويسار..
🍁🍁🍁🍁
في مديرية الأمن..
كان ماشي ومعاه واحد من الضباط..
:اليوم جاه زيارة المنتصر اللي كانوا يلقبوا فيه "بيجو"
راجح؛اها...
:بالنسبه لسعد الله ماقدرنا ناخدوا منه شي..
راجح فتح مكتبه وخش وهو يقول:مش مشكله حني نفسنا مش مقطوع..
لما خش لقي واحد يراجي فيه داخل قال للضابط:تمام تقدر تشوف شغلك..
حياه الضابط وطلع وسكر الباب..
وراجح مشي قعمز ورا مكتبه وحط رجل ع رجل واتكى ع الكرسي وقال:شن جو..
؛تمام...اليوم تلاقيت اني وشارون في الجامع..
راجح ضحك ونزل رجله اتكته بمرافقه ع المكتب وقال:شارون وجامع..هز راسه وقال..ايه كمل..
:قالي في واحد تابع لجهاز المكافحه عنده علاقه بواحد من المحكومين في سجن بوسليم وهو اللي يمشيله في اموره..
راجح؛ماجابش الإسم؟
:لا..
راجح:تمام تو نتحروا عنه...شن عندك تاني..
؛مافيش غير هكي..
راجح؛تمام..رشف وقال..تقدر تتفضل..
ناض العنصر وطلع..وخلا راجح يفكر في كلامه..
بعدين تنهد وقال:امتى يتم بلاهم بس والواحد يلهى بروحه شويه...
شبح لساعة يده بعدين نزلها وقام سماعة التليفون بش بيدير اتصال...
🍁🍁🍁🍁
في الليل..
جابوا الكسوة لملاك...
وعيلة هيثم كانوا حاضرين وع راسهم نسيبه..
اللي سألوا عنها خوات العريس وشافوها موجوده وتصفق وتضحك عادي جدا..
زادو تأكدوا من الكلام اللي قال نيار وارتاحت قلوبهم..
•••••
مكالمة هاتفيه.
نسيبه:والله رقصت حتى الرقيص..
خليل بضحكه:تحمستي..
نسيبه؛شن بندير خواته عيونهم عليا تقول اني العروسه..
خليل:قريب ان شاء الله..
ابتسمت يخجل وقعدت ساكته.
خليل:تي تعرفي بنديره عرس يحكوا بيه سنين القدام..
نسيبه بإبتسامه:إن شاء الله..
خليل؛احم..باهي فيها مشكلتك لو شفتك شويه..
نسيبه:هو عادي لأن لبسي ديما مستور في المناسبات..لكن انك تشوفني هكي مشكلات..
خليل بضحكه؛باهي علاش تقولي عادي من الاول رفعتيني فوق وجبتيني لوطا..
نسيبه بضحكه؛وضحتلك بس..هيثم مايرضاش..
خليل:ع عيني وع راسي الدكتور مانقدر نقول شي..
نسيبه ابتسمت وقلبها يدق بقوة..بحب..بسعادة...
🍁🍁🍁🍁
تاني يوم...
الخميس...
الساعه الحادية عشر صباحا..
واقفه في الكليه تمشي وتجي وهي تستنى...
لين شافاته جاي..
قعدت واقفه تراجي امتى يوصل فيها...
وصل فيها وقال؛شن جو..
مريم:زي الزفت..شن تاريخكم هدا كله اسود مخدرات ونهارات حرف!
جهاد رفع حواجبه:تو انتي مش قلتي قبل خوتي وبوي تو يرفضوك ع اساس شني قلتي هكي؟!
مريم:على انك مش متعلم..ع انك صايع ومتاع بنات...مش مخدرات..
جهاد:شن سمعتوا بالزبط..
مريم:عن بوك وعنك انت وخوتك..كوارث شن هدا..والله امس الليل كله واني نبكي..ونزلوا دموعها..مايصيرش منا مايصيرش..كان خليتيني نقتل روحي بس..
وقعدت تسمح في دموعها وهي تبكي زي الطفله المسكينه..مكسورة الجناح..
وقلبه يتقطع عليها..
مريم خدت نفس وشبحتله وقالت؛تعرف كيف..خلاص انسى الموضوع..اني غلطت ولازم نتعاقب شن ماكان عقابي حناخده لأني نستاهله...انت صحيت وبارك الله فيك..ابتسمت ولمعه الدموع في عيونها وقالت بنبرة مبحوحه..ماعرفتش راجل حق من بعد بوي وخوتي غيرك..ربي يحفظك..
وجت بتمشي..هو شدها من كم البلوزة وقال بإصرار وهو عاقد حواجبه ونظرة عيونه مليانه دموع:والله مانتسمى راجل كان خليتك مستعد ندير ع خاطرك اللي مايندار...
مريم بحزن:ماتقدر دير شي..
جهاد:لا نقدر بعون الله نقدر..وتو تشوفي شن ندير..اسمعي جاي..في مرة صليت في الجامع سمعت واحد يقول...
اللي تنزل عليه مصيبه ومش قادر يطلع منها مايدعيش ربي كان ب..
"لاإله الا انت سبحانك اني كنت من الظالمين" وربي يفرجها عليه...انتي ادعي بيه باهي واني معاك..
مريم ابتسمت ودموعها ينزلوا:قصدك وليت شيخ؟
جهاد؛لامش شيخ..بس واحد من هلبه خاطرهم ينصلحوا ويعيشوا حياة نظيفه..
مريم ضمت شواربها بحزن ونزلت عيونها ودموعها ينزلوا..
جهاد؛خلاص معاش تبكي وديري زي ماقتلك..وربي المعبود ماني مخليك يامريم..
قامت عيونها وقعدت تشبحله وقلبها بدي يدق بقوة..
هو ابتسم وطلق كم البلوزة وقال:خليك واثقه في ربي وفيا باهي..
هزت راسها بآيجاب..
جهاد؛ماتبي شي..
حركت راسها بالنفي وهي مبتسمه من بين دموعها..
هو رفع يده حياها وقال؛نتلاقوا...ولف ومشي..
وهي بعيونها وقلبها يدق بقوة...وشعور غريب قاعده تحس بيه اول مرة تحسه في حياتها..
اما هو لأول مرة ماتكونش نظرته لبنت نظرة شهوانيه خاليه من المشاعر..
هو توا مايحسش اتجاهها الا بنوعين من المشاعر...المسؤوليه...والشفقه بس..همه كله انه يستر عليها وخلاص...
🍁🍁🍁🍁
الساعه الواحده ظهرا..
طلعوا من المدرسه وهما يهدرزوا..
دانيه؛سعدودك عندكم عرس..
ضحكت سارة؛اهو جي الباص سلام توا.
دانيه بضحكه؛سلام..كلميني..
سارة هزت راسها ومشت ركبت الباص..
اما دانيه قعدت تراجي..لين جي الباص...
وصاحب الموطو وصل في نفس اللحظه..
مشت بسرعه ركبت الباص وقلبها يدق بقوة..
تحرك الباص وكالعاده هو وراهم..
وعيون جمعه عليهم..
استغل غياب جيهان وركب سيارته ولحقهم..
🍁بعد ماوصل باص دانيه لاول شارعهم حطها كالعاده ومشي..
راجح وقف الموطو..ونزل..حول الخوده وحطها عليها..
ومشالها بسرعه وهو يساوي في شعره..
هي ماشيه عادي لابيها لاعليها مش خاطر في بالها انه يلحق فيها..
لامش بس يلحق فيها.
"دانيه..دانيه"
فنصت عيونها من الصدمه وقلبها قريب وقف..
راجح؛امشي بالشويه وركزي معاي..
دانيه بخوف:شن تبي مني برا في حالك فكني من المشاكل..
راجح؛عارف اللي ندير فيه غلط بس مافيش قدامي غيره..دانيه اني نبيك جديات..
دانيه؛هونا حوشنا وتعرفه كلامك مع بوي وخوي مش معاي..
راجح؛واني هدا اللي بنديره يعني ماعندكش مشكله..
دانيه سرعت مشيتها..
راجح؛خيرك ديري فرينو..قولي كلمه وحده بس ايه ولالا..
دانيه قالت بسرعة وهي خايفه:ايه ايه...
وقصت الطريق..
هو وقف في مكانه وابتسم وحط ايديه في جيوبه وقعد يشبحلها لين خشت للعمارة..
بعدين شبح يساره وقال:باهي اللي قياد الاحوال هداكا مهناش..
ولف ومشي ابتسم بتنهيده وقال:ااه ياقلبي..
وين قرب يوصل في اول الشارع..
اختفت ابتسامته وحلت محلها ملامح الأستغراب..
لما بان عليه خطيب اخته واقف حاط يده في جيبه ويشوفله بإبتسامه تعالي وحاجبه مرفوع..
راجح؛يامحاسن الصدف!
جمعه؛لا مش صدف..تقدر تقول مريت صدفه من هني شفتك وانت خاش للشارع نزلت وقلت نستناك..
راجح ابتسم مجامله وقال؛اها..تمام..نقعمزوا في القهوة هادي..واشرله عليها..
جمعه هز راسه بالموافقه...
راجح؛تمام..هي تفضل..
مشي جمعه وهو يحاول يهدي اعصابه ويكتم غضبه..
وراجح وراه وهو مش طايقه بش مضطر يجامله ع خاطر اخته...
في نفس الوقت....
كانت مقبوله في بالكونة شقتها طالعه بخمارها تنشر في الدبش...ومن حسن حظ دانيه...شافت كل شي....
•••••••
راجح بضحكه متهكمه؛مافهمتش..
جمعه:سؤالي واضح شن عندك معاها البنت هادي؟
راجح؛تعرفها..
جمعه؛طالبة عندي..
راجح:اها!...
جمعه؛ماجاوبتيش ع سؤال..
راجح:خصوصياتي مانحكي فيها مع حد..
جمعه؛تمام واني نحترم الشي هدا..بس نبي نذكرك انت ضابط شرطه وليك رتبة كبيرة التصرفات ماتليقش بيك..
عقد حواجبه وقال:تصرفات شني..شن شفتني داير...!
جمعه؛تلحق فيها..وسامحني يعني..زي المراهق..
راجح ضبط اعصابه وقال:فعلا الحب هكي يدير...واني البنت نبيها وعطيتها علم اني بنبعت اهلي يخطبوها..
جمعه قريب مات من اللي سمعه..حسه قلبه قاعد ينحرق حرق..
شد روحه بقوة وقال؛اها...احم..بلع ريقه وعقد حواجبه وقال..كويس..لكن نبي نعرف انتي عندك علم انها مريضة سكر..
رفع راجح حواجبه..
جمعه؛وانت تعرفه المرض هدا وتعرف مشاكله..
ارتسمت ع وجه راجح ابتسامه وقال:حتى مقاس كندرتها عارفه بتغيب عني معلومه زي هادي..
جمعه شيشة الميه اللي قدامه وقال؛توقعت..
وخداها وفتحها وقعد يشرب فيها بدون ماياخد نفس..
وراجح يشبحله برفعة حاجب..
نزلت الشيشه وقعد يسكر فيها وهو يوزع في نظره قدامه بعدين شبح لراجح بنظرة مخيفه..
راجح نزل حاجبه اليمين ورفع اليسار..
مصمص جمعه شواربه بعدين ضحك نص ضحكه وقال؛ربي يتمم ع خير..
راجح بإبتسامه مجامله:آمين..
ناض جمعه وحط فلوس ع الطاوله وقال:نشوفوك..
راجح؛في امان الله..
جمعه راسه ومشي طلع بالشيشه لبس نظاراته..
وشد ع الشيشه بقوة...بعدين لوحها في المكب ومشي ركب سيارته وشغلها وهو يحرق في العجل..
وراجح وراه..يلبس في الخوده وركب الدراجه شغلها وتحرك طول...
يتبع....
