البطل المغمور (الجزء الثاني) زهور القمر

السابع والعشرين

#البطل_المغمور2  "زهور القمر"
#جمان_فريد
#الجزء_السابع_والعشرين "بداية كنعان"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
"ياعمري محلاه الله يبارك عسول"
رتاج:اسمعي بعد تجينا بنخليهولك انتي تشديه وتغيرله وتعطيه الشيشه وتلعبي معاه ايوه..
مجاهد اشر عليها وهو رافع حاجبه:بتجيني اني مش انتم يااخت..
رتاج:غير كان سكتت شوفناها شن بتقول..
دانيه بضحكه؛ترا شن بتقولي ردي هي.
"بنقول اللي يبيه مجاهد نديره"
ابتسم مجاهد..
رتاج؛واااي ياكبدي مانك ساهله ياسوير..
دانيه:خلاص خلي صاحبتي في حالها والهي بولدك..
رتاج؛اشبعوا بيها انتي وخوك..
وهما يضحكوا عليها..
بعدين سارة قالت؛خلاص توا بنسكر دنو نشوفك غدوة ان شاء الله..
دانيه:لاغدوة ماظنيش..
"خلاص معناها نتلاقوا بعد رمضان"
دانيه شبحت لمجاهد بإبتسامه وقالت:ان شاء الله..
"تمام...مبارك عليك مرة تانيه توجه ويتربى في عز الله "
رتاج؛الله يبارك فيك حبيبتي..
دانيه وجهت الكاميرا لمجاهد وقالت:ديريله حتى باي بعيد..
مجاهد وهو يشوف لدانيه قال:تو نوريك..
دانيه بضحكه؛ شن دخلك فيا انت دير لخطيبتك باي هيا..
هو حرك راسه يمين ويسار..
وسارة تتأمل فيه بحب...لما شبحلها نزلت عيونها وهي مبتسمه بخجل..
مجاهد؛امورك تمام..ماتبي شي ماناقصك شي ماخاطرك في شي..
وخواته يشوفوله بإبتسامه..
"لاشكرا...تصبح على خير"
هو ابتسم وقال:وانتي من اهله..
شبحتله..
اشرلها بيده..وهي ضحكت بخجل وردتها..وبعدين سكرت..
مجاهد ضحك وقال:سكرت..
دانيه لفت ليها التليفون وهي تفنص قالت:الجحشه ماقتليش تصبحي ع خير..
مجاهد:من برادتك..
دانيه ضيقت عيونها وهي تشوفله قالت؛الحق فيا اني..
هو ضحك بعدين قال؛نازل لوطا تبوا اي حاجه رنوا عليا...
دانيه؛تمام..
ومشي مجاهد طلع من حداهم...
رتاج وهي تشوف لولدها:رتيه ياوخيتي محلاه كيف جي دبدوبي..
دانيه بإبتسامه؛الله يبارك..عسل في عسل يتاكل...
شويه وبدي يعيط..
رتاج؛ترا بالله دانيه ساعديني...
🍁وقعدت دانيه مع اختها تساعد فيها ع ولدها...لعند مارجع رقد ورتاج خداها النوم..
وهي قعدت مقعمزة مكسده ع الفيس وماجاهاش النوم..
حست بالملل وقعد تفكر..
وخطر عليها كلامها بكري مع سارة عن المستشفى والدكاترة وحلمها وطموحها اللي زادت تعلقت بيهم..
شبحت لباب الحجره.
بعدين ناضت فتحاته وطلعت..وسكراته وراها..
وقعدت تمشي في الممر لين طلعت من قسم النساء والولاده...
شويه وطلع قدامها نفس الشخص اللي عطاها ميه راكب مع الدروج وهو يلبس في بالطوه ويمشي بسرعه..
هي خافت منه..لانها اذكرت كلامه بكري بالذات وين سألها "مريضة سكر"
بعده شافت زوز ممرضات راكبات يجروا وهما يقولوا..
:ياحصلتنا حصله مع الشايبي..
؛استعدي للهزايب استعدي...
ولقتهم يجروا هما الزوز في الممر اللي مشي منه هو..
ضربها الفضول تبي تعرف شن صاير..
مشت وراهم تبعتهم...
لين خشت في ممر قسم جراحة المخ والأعصاب.
لقت الممرضات خاشات حجره مفتوحه ووحده منهم سكرتها..
وشافت مراة كبيرة في السن واقفه قدامها وتبكي وتدعي..
وجعتها...وفي نفس الوقت قعد عندها فضول تعرف شن صاير داخل..
بعد عشرة دقايق طلع هو..
المراة؛هاه يادكتور شن حاله؟
؛اطمني ياحاجه اموره تمام..
؛نبي نخش نشوفه..
:لا الليله لا..خليها مع الصبح يكون فايق وحاله باهي..
المراة هزت راسها وقالت؛إن شاء الله...
هو قال؛لاباس عليه...
ع جية بنت تجري وهي لابسه البالطو قالت:دكتور..
حط ايديه ع بعض وقال؛مازال بكري يادكتورة علاش جايه توا!؟
:اسفه الله اسفه كنت نتعشى..
:تتعشي! اه سامحينا اسفين نوضناك من على عشاك خليناهولك في الرقبه..سامحينا بالله..
هي انحرجت هلبه..
هو حول ايديه وحطهم في نصه بعد ماوخر البالطو وقال بصرامه:اللي مش فاهم المهنه هادي وعارفها كويس مايخشلهاش..يعني كان بيكون عندك عشاك ولاهدرزتك ولاراحتك اهم من حياة المريض.مايلزمكش الطب خلي مكانك لغيرك..
والبنت تفرك في ايديها ببعض وهي محرجه ع الآخر..
وهو شبحلها من فوق لتحت ومشي من حداها..
فات من قدام دانيه وهي تشوفله كيف معصب بخوف..
بعدين شافت البنت وهي ماشيه وراه
تبعتهم...
شافتها وقفاته في الممر وتبان تتأسف وتترجى وهو كأنه زاد أنبها ومشي وخلاها...
وكأن البنت قعدت تبكي...
دانيه بخوف:حي عليا شن هدا يعني بيصير فيا هكي حتى اني !؟ ياربي الحكايه مش زي ماكنت متخيلتها بكل..
فجأة رن تليفونها شافت المتصل لقتها رتاج..
دانيه بعد ماتفكرتها:يانهاري اني ...
ومشت تجري...
🍁🍁🍁🍁
تاني يوم...
روح مجاهد بخواته..
من اول ماخشوا وريحة الوشق لاقتهم..
رتاج خدت نفس وهي تستنشق فيه حست بشعور حلو بالمره..
سدينه جتها وهي تصفق وتغني؛سلم وليدي اهو جي..
هو خش الحوش ضوي..
ورتاج ودانيه ومجاهد مبتسمين..
سدينه؛هاتي هاتي.. مداته رتاج لأمها...وهي سمت بالله وخداته...
سدينه:خل نرفعه لبوك يشوفه..
هي تأففت وقلبت عيونها ومجاهد ضربها ع راسها من الخلف ضربة خفيفه وقال:بري يام..
مشت سدينه وهي تحرك في راسها يمين ويسار ومجاهد مشي معاها..
رتاج؛مانيش خاشتله لو شن يديروا..ومشت للدار..
ودانيه تنهدت ومشت وراها..
🍁في دار مجيد..
مجيد:علاش جايبتهولي شن بدير بيه؟!
سدينه ضايقت..
ومجاهد قال:كيف تقول هكي يابوي مش حفيدك..
مجيد:ماهو امه معبرتني بوها ودايرتلي قدر..
مقبوله:مهما كان يامجيد تقعد بوها وشن مادارت تقعد بنتك..
سدينه شبحتلها بحده.
ومجاهد؛مرت بوي لو سمحتي تخليك بعيده ع المواضيع مادامها ماتخصكش..
مجيد؛مجاهد رد بالك من كلامك..
مجاهد:علاش في شن غلطت؟
مجيد:وهي في شن غلطت!؟
عقد مجاهد  حواجبه وقال:خلاص حني غلطنا سامحونا..هيا يام..
مجيد؛خيرك حمقت هكي شن قتلك اني!؟
مجاهد:لامحمقتش وانت ماقلت شي ولاهي قالت شني اني الغالط سامحوني..هيا يام..
مشت سدينه وهي مضايقه طلعت من الدار ومجاهد طلع وراها وسكر الباب..
مجيد؛ربي يهديك يامقبوله علاش دويتي..
مقبوله:الله المستعان..تو اني شن قلت بس..
مجيد؛ماقلت شي لكن هو زي المتحسس منك..ديما نقولك فيها حرج مجاهد مانتحملاش..
مقبوله"هالمجاهد اللي واقفلي في كل شي زي العظم بوغصاص":باهي اللي يريحك يامجيد معاش بنفتح فمي بكل..
مجيد ابتسم وقال؛ايوه ياعيني عليك نجيلي حلقومتي المطيعه..
هي ضحكت نص ضحكه بخجل..
🍁🍁🍁🍁
الساعه الثانيه عشر قبل الظهر..
في مكتبها ومعاها خالها يهدرزوا في موضوع فرحها هلبه..
نوال؛والله فرحتلك من قلبي واخيرا فكرت في نفسك..
الاشهب بإبتسامه؛باهي شن انتي شن رايك في الاختيار بحكم انك تعرفيها يعني وعشتي معاها فتره..
نوال:اني هدا اكثر شي فرحني اختيارك..ماجده مراة مافيش منها..تناسبك ومتأكده انك حتكون سعيده معاها..
الاشهب؛مادام هكي معناها افتحي معاها الموضوع وشوفي رايها..
نوال بإبتسامه:إن شاء الله..
الاشهب:وبالمرة شوفي موضوع مهاب ونرجس..
نوال تنهدت وقالت؛ع خاطرك حنحاول معاها لأخر مرة...
🍁وفهالوقت..
ماجده في الكوجينه دير في المحشي...
ونسيبه مقعمزة حداها تلف في البراك"دولمه"
ماجده بآبتسامه؛والله وصار منك يانوسه شكله عفاف قدرت عليك..
نسيبه بضحكه؛تحشمت منها وتعلمت..بالذات لما كانت معاي مريم ماشاء الله عليها كل شي تعرفه..واصغر مني بوين تعرفي هداكا الوقت فهمت معنى كلامك لما تقولي تعلمي تلقي روحك..
ماجده؛بش تعرفي خالتك..
نسيبه بصوت منخفض:ايااه تو بتبدا..
ماجده؛شن قلتي!؟
نسيبه ابتسمت بإرتباك وقالت؛الاسبوع الجاي بتبدا امتحانات خليل وزيزو بنمشي نوقف قدام مكان الامتحان بش نشوفهم..
ماجده طلقت اللي في يدها والتفتت وهي تقول:تمشي عينك..شوفي بطنك شوفي..شن ديري ماشيه بيها غادي!
نسيبه؛عادي نخليها ونمشي..ومدت لسانها..وضحكت..
ماجده:فكني من برادتك الزايده مشي مانكش ماشيه بتسكري راسك بنحرش خوك مانفعش خوك نطلع رقم للحبس ونتصل براجلك..
نسيبه وهي تضحك بصدمه:غير اهدي والعبي ارضي يامجدي هي فكرة وقلتها وخلاص..
ماجده؛حوليها من راسك..
والتفتت ورجعت تحشي في الكوسى وهي تقول:هدا اللي ناقص تمشيلي غادي هكي وبطنها قدامها وتقعد تهز بيها قدام الرجاله..
نسبيه من رواها وقعدت تعارك بهمس وهي تقول..
شن فيها هاه شن فيها..بعدين بنلبس عبايه واسعه..
التفت ماجده وهي طول دارت روحها تلف في البراك ومنسجمه..
شبحتلها ماجده شويه بعدين التفتت القدام..
ونسيبه شبحتلها بنظرة غضب ممزوجه بالزعل...
🍁🍁🍁🍁
وفي الزنقه متاعهم..
كانوا تهاني وسارة يمشوا مع بعض ويهدرزوا..
تهاني:اللي معانا علمني هلبه وخلاني نعرف كيف نتعامل صح مع الناس وكيف نختار الصحاب..
سارة؛عارفه انك واخده مني موقف بس انتي تعرفي اللي صار كويس ياتهاني..
تهاني؛عارفه..لكن مانستاهلش منك المعامله هادي..زمان ماكنتيش هكي توا تغيرتي هلبه ياسارة..
سارة بضيق؛مش عارفه شن نقولك..بس اني نفسي حاسه ان فيا حاجات تغيرت...وفي منها مش راضيه عنها..الظروف مرات تخليش شخص انتي نفسك تكرهيه..
تهاني وهي تفكر في كلامها؛صح..
وصلت سارة قدام حوشهم وقالت؛ماتقطعيش مرة وحده..
تهاني بإبتسامه؛نحاول...ومشي لحوشهم..
تنهدت سارة بضيق بعدين فتحت باب حوشهم وخشت...
🍁🍁🍁
الساعه العاشرة ليلا..
كانت سارة مقعمزة في دارها تقرا..
شويه دق باب دارها..
وهي لاهيه بكتابها؛خشي...
انفتح باب الدار..
شبحتله ابتسمت من قلبها وقالت؛بابا..
هيثم بإبتسامه:مانعطل فيك ع شي..
سارة؛لاحبيبي حتى لو كنت مشغوله نفضي روحي ليك..
ضحك وسكر الباب..
هي ناضت وقالت:تعالى قعمز..
هيثم هز راسه ومشي قعمز ع كرسيها..وهي مشت قعمزت ع سريرها..
هيثم شبح لكتاباتها بعدين شبحلها وقال؛شن جو القرايه..
سارة:الحمد لله ماشيه تمام..امتحاناتنا بعد العيد.
هيثم؛مافي شي صعب عليك الامور كلها تمام..
سارة:ايه الحمد لله..
شبحلها شويه وهي تشوفله بإبتسامه..
هيثم؛خيرك؟
سارة بعدم فهم؛خيرني!؟
هيثم؛فيك شي متغيره الفتره الاخيره.. تهربي هلبه وديما قاعده في دارك  حتى انك تتجنبي تشبحيلي مرات...درت شي ضايقك او زعلك واني مش منتبه..
سارة؛لاابدا بابا يعني علاش فكرت هكي!
هيثم؛باهي مش من اني..لكن في شي صاير معاك ومغيرك مخليك خافته شويه..
سارة قعدت تشبح لصوابعها وهي تحك فيهم فيدها وساكته..
هيثم؛صايرة مشكله في المدرسه..خطيبك؟
هي شبحتله وقالت؛لالا بابا والله مافي حاجه..
هيثم؛باهي طمني بالي وقوليلي شن صاير معاك..مش مقتنع ان مافيك شي فيك اني متأكد..
سارة شبحتله شويه وقالت؛نتفكر في ماما هلبه الفترة الاخيره..
هيثم؛الله يرحمها ويغفرلها..
سارة زادت ضايقت وين شافت لعيون بوها لما جابت سيرة امها..
دمعوا عيونها وقالت؛تمنيتها تكون موجوده معاي في كل شي حلو صار معاي..
هيثم؛كلنا تمنينا يابابا..لكنه قضاء الله وقدره والحمد لله ع كل حال..
سارة؛انت فاقدها بابا ولا؟
هيثم:اكيد يابابا وهلبه مرات نصبر نفسي ونتخيل فيها معاي وتكلم فيا نرتاح..
سارة بفرح؛حق بابا؟
عقد حواجبه بإستغراب؛اكيد..
سارة تنهدت وقالت؛ بنقولك حاجه بابا وبدون خجل نتمنى مجاهد يكون زيك يعني قيمتي عنده تكون زي قيمة ماما الله يرحمها عندك...
هيثم؛واكثر..
سارة؛مااعتقدش يكون في راجل زيك بابا..بالذات في حبك لماما..
هيثم حس بشعور ضايقه بس تجاهله وقال؛كوني زي امك وتو يكونلك مجاهد خير مني..
ابتسمت وقالت؛ربي مايحرمني منك بابا ولامن خشتك عليا يارب..
ابتسم وقال؛ولامنك بنتي...وماما كل ماتتفكريها ادعيلها هدا اللي تبيه منك ماما توا بس..
سارة هزت راسها وهي مبتسمه..
ناض هيثم وقال؛هي نخليك تكملي قرايه بس ماتفوتيش الساعه 12..
سارة بإبتسامه:حاضر..
هيثم؛موفقه بنتي..تصبح على خير..
سارة؛قدامك كل خير يارب..
مشي هيثم طلع من الدار..
بعد سكر الباب سارة تنهدت براحه كلامه معاها ريحها ع الآخر..
لكن شغله هو..وخلاه يفكر هل الكلام اللي قالاته سارة كان كلام عادي ولا كانت تبي توصل من خلاله رساله!
ولو كانت فعلا تبي توصلله رساله ع اي اساس!؟ شن شافت منه بش تقول هكي!؟
شن قاعد يصير معاك ياهيثم!؟
🍁🍁🍁🍁
"كلمت الولد الكبير وبلغته قال تونشوف شن يصير ونرد عليك"
سدينه؛كيف يشوف شن يصير ماكانش هدا كلامه في الأول؟
مجاهد:والله يام كان في فراسهم موال يبوا يغنوه ربي الغني عنهم وعن فلوسهم اللي عنده ساده وحني بإذن الله مش حنقصروا عليه بشي..
سدينه بضيق؛لكن اختك كان سمعت بتضايق..
مجاهد؛انتي ماتقوليلها شي توا لين نشوفوا شن يصير..
هزت سدينه راسها وهي مضايقه..وواجعتها بنتها اللي كانت متأمله هلبه يطلع لولدها نصيب من الورث تأمنله بيه مستقبله..والباين ان هالآمال حتنحرق..
🍁🍁🍁🍁
بعد يومين...
في السوق هي وسارة ياخدوا في حاجات في رمضان..
سارة وفي يدها القائمه:قعدوا روح اللوز ونكهة الفرواله والبرتقال..والقشطه العاديه وبالفرواله العسل..والجبنه السايله..
ماجده؛باهي باهي...
شويه رن تليفون ماجده طلعاته من الشنطه وشافت المتصل ردت..
ماجده؛ايوه نوال...
وضاق صدر سارة اول ماسمعت اسمها..
ماجده:الحمد لله..انتي شن حالك وشن حال نرجس والبنات....
"الحمد لله...برا انتي؟"
ماجده؛ايه في السوق طالعة ناخد قضيه رمضان مازال عليه اربعه ايام بس ان شاء الله كل عام وانتي بخير..
"كل سنه وانتي طيبه..باهي مالا بعد ماتروحي تو نعاود عليك لإني نبيك في موضوع"
ماجده وهي تحاول تخفي استغرابها؛إن شاء الله...
"السلام عليكم"
ماجده؛وعليكم السلام...وسكرت..
سارة؛خيرها شن تبي؟
ماجده؛مش عارفه قالت بعد تروحي نعاودلك ونقولك..
سارة تنهدت يضيق بعدين قالت؛هي خل نكملوا باقي الحاجات...
🍁🍁🍁🍁
"والله شن بنقولك الحق فاجئتيني هلبه"
نوال بإبتسامه؛باهي شن رايك في الموضوع مبدئيا..
"مش عارفه شن بنقولك..يعني انتي تعرفي التجربه اللي طلعت منها وبصراحه معاش تبي نخوض غيرها تبي نكمل حياتي مع ولد اختي وعيلته.."
نوال؛نحترم قرارك...لكن التجربه اللي عشتيها قبل كانت نتيجة اختيار غلط..وخالي ومش لأنه خالي صدقيني ياماجده حيكون اكثر اختيار موفق ليك في حياتك..خودي فرصة وفكري في الموضوع وبعدين عطيني ردك النهائي..
"باهي..لكن لو قعد ردي هو هو نتمنى مايديرش حساسيات  بيناتنا"
نوال؛لاابدا هو نصيب في النهايه والزواج مايجيش بالاجبار او المجامله..
"تمام ان شاء الله نفكر ونرد عليك"
نوال؛واني في الانتظار..سلمي ع الجميع وتصبحي ع خير..
"قدامك كل خير"
سكرت نوال وحطت التليفون ع الكامدينو..
ورجعت تقرا في كتاب "الوابل الصيب" لإبن القيم اللي فتره تقرا فيه ومندمجه معاه تماما...
🍁🍁🍁🍁
وماجده الموضوع لخبط عقلها وخلاها تفكر فيه هلبه..
هي مازال عندها رغبة تتزوج وتستقل بس تجربتها مع مجيد مخليتها متردده هلبه..
•••••••
نسيبه:وعلاش لا..
سارة؛وعلاش ايه..
الزوز شبحوا لسارة بإستغراب..
سارة:يعني خالتي طلعت من تجربه فاشله وسامحيني خويله..وانتي في عمرك هدا المجازفه بمرة تانيه غلط كبير..وبعدين حني هني تعودنا عليك وريحان وجنان مايقدروا يديروا شي من غيرك..
نسيبه؛اها انتي قصدك تبيها ترفض ع خاطركم؟
سارة؛وين الغلط؟
نسيبه؛شوفي سارة حبيبتي خالتي ملك نفسها مش لأي حد ولاهي ملزمه بأي حد..من حقها تتزوج وتستقل ويكون ليها حياتها الخاصه زي ماانتي حتكون ليك حياتك الخاصه بعد عام..
سارة:اها واني نتزوج وخواتي يقعدوا برواحهم ..
نسيبه؛وكأنك تفكري بأنانيه شويه وماتشوفيش لخالتي ماجده ولالمشاعرها كل همك انتي وخواتك وبس...
ماجده بضيق؛نوسه..
سارة؛لااني نفكر فيها واعتقد هدا كان واضح في بداية كلامي..
نسيبه بحده؛مانفكرنيش ببداية كلامك يكون احسن..
سارة؛باهي خلاص اني اسفه اني عطيت رايي..وناضت ومشت من حداهم وهي معصبه..
ماجده:شديتي عليها في الكلام..
نسيبه؛لا قلت اللي لازم ينقال اسلوبها وتصرفاتها ولوا ينرفزوا وتفكيرها اناني..
ماجده؛هي خايفه ع بوها..
نسيبه بعدم فهم؛-مش شن بتخاف عليه!؟
تنهدت ماجده وقالت نص اللي تعرفه؛خايفه لو بوها ينحط تحت ظرف يخليه يفكر في الزواج..
نسيبه؛مستحيل..هيثم يشوف لمراة بعد اسيمه من المستحيلات..ع اساس بيلقى زيها...
ماجده قعدت ساكته وهي تشوف لنسيبه..
نسيبه؛تو نكلمها ونخليها تحول هالشكوك الغبيه من عقلها..
وناضت ومشتلها للدار..
وماجده معاها بعيونها وهي تفكر في شي مخليها تشوف للمستحيل ممكن...
🍁🍁🍁🍁
"بعني معاش كلموه"
سدينه؛ماندري ماقاليش.
رتاج؛كان كلموه راهو قالك..
سدينه قعدت ساكت وهي تغسل لكنعان..
رتاج تنهدت وتشوف لولدها بحزن..
ع جية دانيه وفي يدها التليفون :وهدا اول دوش لحبيب خالته..
ابتسمت رتاج..
ودانيه تصور ونعلق وامها تضحك...
دانيه؛نعيما كنعانو..
رتاج بلغة طفوليه؛ينعم عليك دنوني..
وطلعاته سدينه بالفوطه وهي تغني..
بيك جبر وبيك جبر..
ورتاج تشوفلها بإبتسامه حب..
ودانيه تصور ومازال تعلق ومرة مرة تكلم في ولد اختها.
وهو يرد عليها بصوت امه...
ومحلاها من مشاعر واجواء دخلها كنعان ع العيله بجيته..
ومازال ياما جايب معاه كنعان من خير...
🍁🍁🍁🍁
مقعمزين قدام التلفزيون ويهدرزوا ع الضيف اللي قربت جيته..
ام مريم:والله الكانون مانستغنى عليه دبروا..
بو مريم بضحكه؛ياودي باهي تو يجيك قبل خشة رمضان..
هي ابتسمت بعدين قالت؛ربي يفتحها ع هالبنت في هالايام المفضله..
بوها:آمين...قاعده تقرا لتوا..
ام مريم؛هدا حالها صبح وليل مضبطه ع الكتابات وهالوراق وهدا الكمبيوتر وتقرا مضنها شهرين تانيات ودير نظارة..
بومريم؛ربي مايضيعلها تعب..
ام مريم؛امين..
:من في فالمربوعه؟
؛معاذ وصاحبه داوود..
:اها خل نشرب طاسة الشاهي ونمشي نسلم عليه يعز عليا الوليد هدا..
تنهدت امها وقالت؛خليني ساكته مانبيش نقول ياريت..
بو مريم سكت وهو مضايق وقعد يشرب في الشاهي.
••في المربوعه..
داوود؛انت اللي خربت ع روحك وع اختك..
معاذ؛حتى هو شكله ع سبله..
داوود؛لو كنت مكانه ندير احرف مادار..
معاذ:تو انت جاي تخفف عليا ولاتزيدني..
داوود؛جاي نقول اعقل وارزن مش كل بنت يمشي معاها الجو  متاعك..
معاذ:تي شن تقول انت بس خليك واقعي ياراجل توا كلهم زي بعضهم اللي تغمزلها طيح طول..لكن هادي رافعه خاشمها وشايفه روحها حسستني اني اقل منها ..
داوود؛في فرق بين رفعة الخشم..والادب الاحترام..راهو مازال في بنات في وقتنا هدا ماخشوش اللبز ودارو علاقات ولفوا دارو..مازال بنات متربيات صح بنات بيتيه..
معاذ:المشكله العيله اللي طالعه منها ابعد مايكون البيتيه..
داوود؛بالعكس..خل نكون معاك صريح..بعد ماشدوا خليل خالد مشينا داهمنا الحوش شفت بعيوني شي عكس اللي ريته في هلبه حياش داهمناها من قبل..واضح عليهم ناس محترمه غير الدنيا لعبت بيهم..
معاذ؛زيد دخلها في راسي خليها تعشش..
داوود؛المشكله ان الامل انت قطعته من ورا كشايفك وفوقها طلاق اختك..
معاذ تنهد وقال؛الحق دايرتني اختي هلبه..
داوود قلبه بدي يدق بقوة وهو يسمع فيه شن يقول عنها
معاذ؛صح تشوفها تجري تضحك تبصر تقرا..لكن كله من برا بس ومن داخل قاعده تكبت...وين نشوفها كيف مرات تسرح ودموعها في عيونها نكره روحي...
داوود بلع ريقه بعدين قال وهو يحاول يخفي شعوره:علاش تحمل في نفسك ذنب في سبب تاني للطلاق..
معاذ؛مش عارف مش قادر نحول الشعور هو من داخلي..
داوود ابتسم ع جنب وقال؛كله نصيب في النهايه..وماتعرفش الخيره وين..
معاذ تنهد وهز راسه وقال؛صح...وان شاء الله خيرتها فيها..
داوود بإبتسامه:ان شاء الله...
🍁🍁🍁🍁
مقعمزات الزوز في الدار...يتأملوا في الفرد الجديد اللي انضم للعيله..
دانيه؛زعمه اني نجيبت قنوش حلو زي هدا..
رتاج بإبتسامه؛واحلى منه ان شاء الله شوفي كيف ولدي جانا حني معاناها جيناتنا قويه طمني..
دانيه بضحكه؛ياحقيره..وبعدين هو شن بان منه بش تقولي يشبهلنا..
رتاج؛اول علامه واضح علامه بيوضيته زينا بالزبط..
دق باب الدار..
دانيه؛خش..
انفتح الباب وخش رشيد:رتاج اسمعي جو هدوكا ولاد راجلك اللي مات..
رتاج قلبها دق بقوة من التوتر..
رشيد؛قالك مجاهد تعالي انتي وولدك..
رتاج؛امي وين؟
رشيد؛في الكوجينه دير في قهوة..هيا نوضي..
رتاج:باهي باهي..
طلع وسكر الباب..
رتاج؛ياربي توترت.. بالله طلعيلي عبايتي دنو..
دانيه؛هدي هدي...وبلاش توتر.. وناضت بطلع العبايه..
••••••••
خشت عليهم وفي حضنها خوهم وهي تقول:السلام عليكم..
الزوز بإبتسامه:وعليكم  السلام..
:كيف حالك ابله رتاج..
رتاج:الحمد لله كيف حالكم انتم..
الزوز قالوا:الحمد لله...
واحد منهم قال؛ترا ورونا العزري..
رتاج مشت لمجاهد وعطتهوله بعدين قعمزت..
ومجاهد رفع كنعان لخوته...
شده الكبير وهو يقول:الله يبارك الله يبارك..وحطله حاجه في قماطه..
والتاني طبس باسه ع راسه بوسه لطيفه وحطله شي حتى هو..
بعدين الكبير شبحلهم وقال؛اول شي نتأسف ع التأخير كله بسبب اجراءات قانونيه ضروري منها..جبت معاي في الشنطه هادي نصيب خوي من ورث بوه..
رتاج نزلت راسها وهي محرجه..
خوه التاني خدي الشنطه وطلع منها الاوراق. وقال؛بالقانون و الشرع خدي نصيبه...قعد يشوف في الاوراق وقال..زي ماتعرفوا حني من قبل عيلة ربي ناعم عليها والوالد اللي يرحمه بعدين استقل بنفسه ودار العالم متاعه ويعتبر من اشهر رجال واكبر رجال الاعمال في البلاد وبرا منها...هادي ورقه فيها كل مايملك الوالد كل شي تقسمت علينا حني الاربعه اولا وبعدين باقي الورثه في العيله..
وكنعان طلعله...ارض في ***** مساحتها عشرة هكتار..
فيلا في بن عاشور..وعمارة في جنزور..
رتاج فتحت عيونها ع وسعهم وقلبها قريب يوقف من هول ماتسمع  ومازال خوه متابع...
شركه عقاريه موجوده في ******
شقه ضمن عمارة للوالد في بريطانيا لكل واحد فينا شقه ..
وشبحلهم وقال؛ومصنع البان ومشتاقتها مشهور في******
رتاج كادت تفقد الوعي من اللي تسمع فيه ماكانتش تحساب راجلها غني لهالدرجه ماكانش يبان عليه...
؛تقدروا تمشوا نسألوا تتأكدوا من اللي يملكه الوالد برا البلاد وخارجها..
خوه الكبير؛ومستعدين لأي شي..
مجاهد:بصراحه ان شايف انه محتاج تكونوا خوته اكثر من الفلوس والاملاك..انولد يتيم مش حيعرف بوه خلوه يعرف خوته ويحس بوجودهم معاه..
ابتسموا والكبير قال؛اكيد...
التاني قال؛طبعا ابله رتاج انتي حتكوني الوصيه ع املاك ولدك انتي الاحق...
رتاج وهي مازال عايشه حالة الصدمه هزت راسها بإيجاب..
:غدوة ان شاء الله نتلاقوا في مكتب المحامي بش نتموا باقي الاجراءات..بس عندي طلب اخير..
هما الزوز قعدوا يشبحوله ويراجو شن يقول..
؛مصنع الالبان في عنده مدير اسمه عبدالرؤوف محمود الشركسي  الراجل هدا ليه 30 عام قايم المصنع ع كتافه وبدون مبالغه..يعني نتمنى لو يقعد مستمر في شغله..
مجاهد شبح لاخته..
رتاج تنحنحت وقالت؛ان شاء الله..
🍁وطلعت رتاج من المربوعه ومازال في حالة صدمه..
تشبح في ولدها ومش مصدقه ان بين ايديها مليونير..
هدا اللي يقولوا انولد وفي فمه كشيك ذهب..
سدينه؛خيرك شن صار داخل؟
رتاج قعدت تمرر في نظرها عليهم وهي ساكته..
دانيه؛تي تكلمي مبردك...
رتاج؛تعرفوا اللي قايماته بين ايديا هدا ولى مليونير ومازال ماسكرش في الدنيا سبوع..!
امها واختها اندهشوا..
ومقبوله اللي تصنت عليهم كان حيقتلها الفضول وتعرف كل شي...
🍁وبعدين مجاهد حكي لامه اللي صار وكذلك بوه اللي قريب جاته الجلطه من الفرح..
ومقبوله اللي عيونها قعدوا يلمعوا بطمع...
دانيه وسدينه فرحوا هلبه لرتاج وولدها..
لكن رتاج كان مصدومه وخايفه..خايفه هلبه...
لعند ماجي اليوم اللي بعده ومشت مع خوها لمكتب المحامي..
وقبل يخشوا صدفه سمعوا الخوت عنده يهدرزوا مع بعض ويقولوا..
المحامي؛لو منكم سمعت كلام الوالده وماعطيتوش هدا كله..شقا بوكم وتعبه السنين هادي كلها بيريح ع الفاضي المرلة صغيرة وغشيمه غدوة يضحك عليها واحد وياخد كل شي..
؛مانكذبش عليك هدا رايي حتى اني لكن هدا حق الولد وحقها هي شرعا..نديروا اللي علينا وكل حد حر في ماله بعدين..
المحامي؛قدر الله وماشاء فعل..
مجاهد شد يد اخته..
هي شبحتله بعيون مليانه دموع بعدين شبحت القدام قوت نفسها تظاهرت بالثقه...
مجاهد حط يده ظهرها 
هي ابتسمت..ودقت الباب بعدين خشت وهو وراها والزوز قالوا؛السلام عليكم..
المحامي لما شافها انبهر بيها....
وهي قعدت تشبحله بقوة وتعالي..
ربيبها الكبير ناض وقف وقال:تفضلي قعمزي..
رتاج؛مش جايه نقعمز نبي نتموا شغلنا ونطلعوا طول...
شبحولها شويه..
بعدين المحامي قال؛مش مشكله...
وقعدت رتاج طول الوقت تظاهر بقوة خلت الموجودين كلهم يصدقوها وبما فيهم مجاهد خوها اللي عارف كل شي..
خدت رتاج الشنطه وقالت؛زي ماقاللكم مجاهد ردوا بالكم تنسواخوكم..
؛وانتي قلتيها خونا لما يحتاجنا يلقانا...
ابتسمت وهزت راسها وقالت؛تمام..بارك الله فيكم ع كل شي...
؛فيك بارك الله بس مادرنا شي يستحق الشكر..
رتاج:لادرتوا..درتوا شي معاش في حد يديره في وقتنا راعيتوا ربي في خوكم اللي من بوكم وماظلمتوشي ولاكليتوا حقه في الوقت اللي تلقى فيه ناس عديم شرف وضمير مايخافوش ربي ياكلوا في خوتهم اللي من بوه وامهم..الله يرحمك ياعادل ربيت رجاله..
الشباب احرجهم مديحها وقعدوا يشكروا فيها..
والمحامي زادت عجباته...
ومجاهد كان فخور لأبعد حد..
•••في الطريق..
رتاج؛كنت نبي نبكي وقعدت نقاوم في روحي بقوة تصدق فرحانه اللي مابكتيش لتوا..
مجاهد يسمع فيها وهو مبتسم..
رتاج؛ لكن تو نوريهم كيف حنربي ولدي وكيف حنرد بالي من ماله...تو يشوفوا المراة الصغيره والغشيمه شن دير..
مجاهد؛واني معاك مش مسيبك لين تتعلمي وتوقفي ع رجليك...مستعد نسيب خدمتي...
رتاج شبحتله بصدمه..
مجاهد؛خليهم كلهم يعرفوا ان في وراك رجاله مش بروحك..
ابتسمت ودموعها في عيونها وقالت؛مانقول غير ربي يديم حسم فهالدنيا وخيي ومايحرمنا منك..
مجاهد اكتفي بالإبتسامه..
رتاج مسحت دموعها وقالت مزحا؛سيب حتى سارة بش تفضالي بالمرة..
مجاهد؛كانش تبي خوك يموت عادي..
رتاج؛ووك عليا اعوذ بالله..تو شن جاب سيرة الموت!
مجاهد؛انتي قلتي سيب سارة وكأنك تقولي سيب روحك والبنادم من غير روح شن يكون!؟
رتاج؛ياكبدي ياكبدي الولد بدي يعبر عن مشاعيره قدامها ولوح الحشم ومايجي منه..
مجاهد بضحكه؛مازال ماريتوا شي..بعد ناخدها ياما تسمعوا..
رتاج؛من توا بيخربك الزواج..
مجاهد؛لا والله يزيد يعدلني ويخليني خير من قبل..
رتاج؛بس اسكت خلاص معاش عرفت نغلبك..
ومجاهد يضحك عليها...
كانت قاعد يتخطي بعد الخطوط الحمرا في بصارته عليها بش يطلعه من اللي كانت فيه..لان عارف وقع الكلام اللي سمعاته كيف كان عليه وهو يخفف المه لأقصى حد...
🍁🍁🍁🍁
"وعلاش ترفضي من غير ماترجعيلي"
ماجده؛وعلاش بعتي مفروض نسألك عن حاجه زي هادي!؟
هيثم؛لما يكون سبب رفضك اني وصغاري كان لابد ولازم وتسأليني...
ماجده؛ماارتاحتش نسيبه لين قالتك..
هيثم؛مش نسيبه اللي قالتلي..الأشهب اليوم جاني وفتح معاي الموضوع وقال انه متمسك بيك وسبب رفضك ليه هو اللي يزيد يتمسك اكثر..وقالي شن هو..قعدت يقولي انك لازم تعيشي حياتك وتستقري ويكون عندك رفيق لباقي العمر...
حسيت وقتها وكأني اني اللي قتلك ارفضي بش تقعدي مع صغاري..
ماجده؛لاوالله ولدي ماهدا قصدي..لكن..صغارك خدوا عليا هلبه كان سيبتهم شن بيصير فيهم..
هيثم؛فقدوا امهم من قبل ياخالتي واخدين مناعه..
ماجده؛ماتقدرش عليهم بروحك..
هيثم؛لانقدر..
ماجده؛ولدي تزوج..
انفجع..ايه فجعاته الكلمه "تزوج"...يتزوج بعد اسيمه!
مستحيل!! عقله رافض الفكره رفض تام..
هيثم؛مستحيل..
ماجده؛كيف مستحيل!
هيثم؛خليك مني توا وارجعي لموضوعك..شوفي خالتي لو انتي تبي الزواج ومقتنعه بالأشهب ماتترديش وماتخلي حد يكون عقبة في طريقك لااني ولااختي ولاصغارنا...
ماجده قعدت ساكته وهي تفكر..
هيثم؛هاه شن قلتي..
خدت ماجده نفس بعدين قالت؛باهي..
هيثم؛يعني موافقه..
ماجده ابتسمت بإحراج وقالت؛موافقه...
🍁🍁🍁🍁🍁
وسارة بعد سمعت بموافقة ماجده ع الأشهب..
قعدت ليلها كله سهرانه وهي تخمم  وتبكي..
هالقرب هدا حيمهد الطريق للشي اللي هي خايفه منه
هدا علاش كانت رافضاته..وتوا بعد ماولى امر واقع
مش عارفه كيف حتتصرف معاه....
🍁🍁🍁🍁
ماقبل رمضان بيوم...
في واحد من اكبر مصانع الالبان في العاصمه..
في مكتب الاداره كان موجود عبدالرؤوف مع ولده اسماعيل..
عبدالرؤوف؛حنعطيها مجموعه من الناس اللي تكون اهل لادارة المصنع اسماء تقدر تحافظ ع اللي درته  السنين اللي فاتت....
واسماعيل يشوف لبوه بضيق ومن داخله كان خايف عليه من الانهيار..
رن تليفون المكتب رد عليه:وصلوا.......اكيد دخليهم طول هادم اصحاب مكان .....وسكر وقال...جو..
اسماعيل شبح للباب للي كام من زجاج  اللي  يببن وجود لكخ من غير تفاصيل..
بان من ورا الباب صورة لراجل ومرة..
دق حد فيهم الباب...بعدين فتحه...
وخشت هي وهو معاه..
بوه ناض ووقف في مكانه وهو يرحل بيهم..
اما هو فان بعيونها المذهوله..
يشوف قدامه فب وحده..
لابسه بدله سودا ع بلوزة بيضا وشاربه فيها اللونين..
في يدها شنطة تنشد باليد..
جذابه..قويه..جميله...بس الاهم هدا كله ان طلع يعرفها من قبل...

#كنعان
#البطل_المغمور2

....يتبع....