البطل_المغمور2 "زهور القمر"
#جمان_فريد
#الجزء_الثاني_والثلاثين "فاتح وسارة2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
الساعه التاسعه والنصف صباحا..
مقعمزين في الكوجينه ع طاولة الفطور ويفطروا..
وهي واقفه عليهم تحوس..
كانت معصبه وتحاول تكبت عصبيتها..
تكره تنجبر على شي ماتبيشي...اكثر شي تكرهه اجبارها دير شي هي مش مقتنعه بيه..
زياد؛القرايه تبدا بعد اسبوعين..
هيثم؛ايه..امورك كلها تمام ماتخمم في شي..
ابتسم زياد...
ع جية سارة بصواني من الكيكه اللي دارتها ودستها في الثلاجه..
حطت قدام زياد وحده...وريحان وحده..
وهيثم يشوف للكيكه وشعور الرغبه تحرك عنده..
وهي ولت جابت زوز صواني تانيات..
وحده لجنان ووحده لبوها..
سارة؛دايرتها من اول امس ع خاطرك..
زياد شبح لصونيه بوه..
لقي فيها كيكه ماتشبهش الكيكه متاعهم..
شاف لبوه لقاه بادي ياكل وعيونه ع الصواني التانيات وهو يفرك بابهام يده اليسار في بطن السبابه..
شبحلها وقالت؛عطيك الصحه وتسلم ايديك لكن الجو هدا ليا هلبه فايته..
هيثم؛علاش!؟
زياد شبحله وقال؛من لما تكلمت ع خطر ادمان حلو والنشويات واني منقص منهم هلبه والحلو فايته..
ابتسم هيثم...
سارة؛لكن تعبت فيها هلبه ع خاطرك ذوق منها حتى شويه..
زياد؛سامحيني سارة مانبيش نخرب النظام اللي دايرة..عقد حواجبه وقال..جيبيلي زي اللي ياكل منها بوي..
سارة؛كيكة الشوفان..
زياد؛ايه..
سارة رفعت حواجبها ونزلتهم وقالت:باهي..
هو دف الصونيه لريحان وجنان وقال:اقسموها..
ابتسموا الزوز بفرح..لكن فيسع مااختفت هالابتسامه..
لما جبدت سارة الصونيه وقالت:سادهم اللي عندهم مش باهيه كثرة الحلو للي في سنهم..
ومشت ردت الطرف للحافظه..
وخواتها يشبحولها بضيق..
هيثم شبحلهم شويه بعدين رجع ياكل..
وزياد يشوفلهم وهو مبتسم قال:عندها الحق يتبعوا سنونكم سوسه..
جابتله سارة كيكه الشوفان وهي تقول:هاه سمعتوا زياد شن قال..
هما قعدوا ياكلوا من سكات...
وهي حطت لخوها الكيكه..
بدي ياكل وهو يقول...اممم..اهي حاجه قنينه وفيها فايده..ولا يادوك..
ابتسم هيثم وهز راسه بإيجاب..
سارة قعدت تلم في باقي الماعين من ع الطاوله وقعدت تغسل فيهم..
وهيثم ناض بعد كمل الكيكه وهو يقول؛هي بسرعه كملوا ووتوا رواحكم الناس يراجو فينا..
زياد؛تمام..
سارة وهي واقفه ع اللاوندينو شده ع قبضة بيدها بقوة وهي بتنفجر بالغضب...
وبدت تغسل في الماعين بعصبيه..
زياد التفت وشافلها بإستغراب...
بعدين رجع ياكل...
جنان؛سارة كملنا..
سارة وهي ترتب في الكوجينه:للحمام بسرعه..
الزوز قالوا:حاضر..ومشوا وزياد يشوفلهم بإبتسامه ..
بعد ماطلعوا التوأم..
التفت زياد لسارة وقال:سارة..
الفتت وقالت؛نعم..
اشرلها براسه تقرب..
هي قدمتله وقالت؛نعم..
زياد؛ديما تاكلوا قدام بوي في الحلو هكي..
سارة بعدم فهم:كيف هكي..
زياد؛يعني زي توا تاكلوا في كيكه منظرها مغري زي هادي وهو يقعد يتفرج عليكم..
سارة قعدت ساكته ماعرفتش شن ترد..
زياد؛لو مالاحظتيش ..يتسهف هلبه ع الحاجات هادي توا هو مريض ياسارة الممنوع عليه مرغوب بشده..
سارة بضيق؛عندك حق مالاحظتش..
زياد؛هلبه حاجات مش ملاحظتيها انتي..
سارة ؛شن قصدك!..
ناض وهو يقول:بعدين نهدرزوا..
ومشي طلع من حداها..
وهي معاه بعيونها لين طلع...
بعدين قعدت تفكر في المشيه..رجعت عصبت وقعدت تلم في الماعين بعصبيه...
🍁بعد ماكلمتها..
مشت طول لدارها قبل لتخشلها..شافت بوها كيف طالع من داره وهو لابس عربي وكان في غاية الأناقه..
بدي دمها في عروقها يغلي..
هو لقاها تشبحله قال:شن رايك بابا..
هي ابتسمت بالغصب وقالت؛الله يبارك عليك بابا..
ابتسم وقال؛وعليك بابنت بوك..ومشي من قدامها..
غمضت عيونها بغضب..
بعدين فتحتهم وخشت لدارها وسكرت الباب...
🍁🍁🍁🍁
منتعش وكله طاقه وحيويه..
وكأن ورد الربيع تفتح ع وجهه..
يطلع في الحاجات اللي بيرفعوهم للمزرعه في شنطة السيارة...
طلعت امه بعده وهي تقول:خلاص طلعت كل شي..
فاتح سكر الكوفني وقال:ايه كله..
عطاته المفتاح وقالت؛سوق انت.
ابتسم وقال؛تم..خداه ومشي ركب السيارة..
ع طلعة نواره قالت؛كله تمام ياهانم..
نوال؛خلاص اركبي نواره..
ومشوا الزوز ركبوا..
وفاتح خدي نفس وشغل السيارة وتحرك وهو يقول:ليا اربعه سنين ماسقتش سيارة..مليحه هادي..
نوال؛ليك اصلا.
هو تفاجئ...
نوال بإبتسامه:مالاحظتش انها جديده..
ضحك وقعد ساكت وهو يسوق...
وامه ونوارة يشوفوله بإبتسامه...
🍁🍁🍁🍁🍁
دارت لخواتها الصغار شعرهم بعدين قالت؛هيا بروا..
الزوز مشوا طلعوا مع بعض..
وهي طلعت وراهم ومشت للصاله..
لقت بوها مقعمز مع زياد ويوريله حاجه في التليفون..
وقفوا قدامهم جنان وريحان وقالت وحده فيهم..
ريحان؛واتيين بابا.
هو شبحلهم بإبتسامه وقال؛الله يبارك. هيا نوض زياد..
ناضوا هما الزوز وشبحوا لسارة واقفه وقاعده بالبيجامه..
استغربوا..
هيثم:وانتي شن تراجي!
سارة؛من بعد اذنك بابا اني مش ماشيه..
هيثم شبحلها شويه وقال؛واني مش عاطيك الاذن بري تحركي وتي روحك..
سارة بضيق:بابا اني مانبيش نمشي مانحبش نقعد في مكان اني مش مرتاحه فيه..
زياد؛علاش شن شفتي منهم انتي!؟
سارة:ماشفت من حد شي بس اني هكي الناس هما مش متقبلتهم مش بالسيف يعني..
هيثم؛سارة...بري..وتي..روحك..
سارة بإنزعاج؛يابابا خيرك ماتبيش تفهمني..
زياد بحزم؛قعاد بروحك فالحوش مافيش بري وتي روحك تحركي..
هي شبحت لبوها..
هيثم؛اسمعي كلام خوك..
هي مررت نظرها عليهم بعدين هزت راسها ومشت لدارها...
زياد شبح لبوه وقال؛خيرها هكي موليه!
هيثم شبح للتوأم وقال؛اطلع توا بعدين نهدرزوا فيه الموضوع هدا..
هز زياد راسه ومشي ..
هيثم للتوأم؛هيا بابا..
الزوز مشوا مع بوهم..
طلعوا كلهم...
اما سارة في دارها...
بعدت مالبست عباية سودا وشاربه كبيره سودا..
علقت بروش ليها تلبس فيه لما تطلع الطلعات العاديه او تمسي للجامعه..كان ع هيئه زهرة الغاردينيا..
بعد لبساته وقال بتحدي:انتم تبوا هكي..
وخدت شنطه صغيره حطت فيها تليفونها ومشت طلعت..
🍁🍁🍁
طول الطريق وهي متجهمه...
بوها وخوها يهدرزوا..
وخواتها بحداها يشبحوا للروشن وهما يلعبوا مع بعض في لعبه قراية لافتات المحلات...
كانت ريحان تغلط شويه في القرايه..وسارة تسمع فيها..
كل ماتسمع منها غلط تحس في اعصابها بيتلفوا..
ريحان؛محلات ابناء الغطس...
سارة شبحتلها وانفجرت فيها؛بخشي صف سادس ولتوا مش عارفه تقري كويس..
ريحان انفجعت وقعدت ساكته..
هيثم قعد يشبح لسارة من المرايه.
وزياد التفتلها وقال:خيرك شن دارت من غلط بش تكلميها هكي غلطت صلحيلها الغلط وتمت..
سارة شبحتله شويه بعدين رجعت شافت للروشن..
ريحان؛اسفه سارة..
وسارة مابتش ترد عليها..
ضايقوا خواتها هلبه من زعلها لأنهم مايحبوش يزعلوها..
وزياد قاعد مصدوم فيها ومش مستوعب التغيير الكبير اللي طرأ ع شخصية اخته..كان مخيف بالنسبه ليه..
اما بوها اللي تعود ع حالاتها هادي ماابداش اي ردة فعل..
▪▪▪▪▪
◇عارفها معصبه مني وقتها وع بالي ان السبب الوحيد لعصبيتها اجبارها ع المشي..سارة ماتحبش دير شي مش مقتنعه بيه..ولو انجبرت تقعد وقت طويل في حالة غضب.. ولو في حد اجبرها تخليه يندم..
▪▪▪▪▪
🍁🍁🍁🍁
"ياعيني ياعيني ع الروايح بناكله من طنجرته'
فاتح وهو يدير في الكبه؛امي داراته ع فكره.
نرجس:برا برا ..
نوارة بضحكه؛وانا شاهده..
نرجس بصدمه؛لالا!!ماما دارت عصبان!! اللي كانت تقرف لما تشوفه وهو طايب!..
فاتح ابتسم..
نرجس بضحكه دهشه:مفروض مانستغربش هلبه حاجات في ماما تغيرت السنين الاخيره...
ابتسمت نواره..
ع جية بنات نرجس..
ليان؛امتى يجوا ريحان وجنان..
نرجس:قريب ماما قريب..
فاتح؛خوات زياد التوامه..
نرجس؛ايه متصاحبين وهما يحبوهم هلبه..
فاتح تفكر اول مرة شافهم فيها كانوا صغار هلبه..
ابتسم وبعدين لهي بشغله..
🍁برا..
امه كانت تقطف في الورد البلدي بألوانه..
خدت مجموعه..
ومشت بيها لطاوله الرجاله..وحطت جزء منهم في فازة في النص..
وخدت الباقي ومشت بيهم لطاولة النساوين اللي كانت بعيده شويه..
وحطتها في المزهريه..
وابتسمت بحب...
فجأة سمعت صوت كلاكس سيارة..
التفتت شبحت للبوابه..
لقتها انفتحت...
وخشت سيارة خالها..وبعدها مباشرة خشت سيارة هيثم..
قعدت واقفه في مكانها وهي تراجي فيهم يدرسوا وينزلوا..
وشافت مهاب راجل نرجس ماشي ناحيتهم..
وهما بدوا ينزلوا من السيارات..
شافت هيثم كيف كان طالع بالعربي..
مش اول مرة تشوفه بيه...بس في كل مرة كان يبهر فيها وكأنها اول مرة..
تنهدت وغيرت عيونها عنه وقالت همسا:استغفرالله..
بعدين رسمت ع وجهها ابتسامه ومشت ناحية ماجده وسارة اللي كانوا جايين جيهتها ع طلعة نرجس..
🌼اما داخل..
كان يغسل في ايديه بسرعه وهو مرتبك..
بعدين مشي مسحهم...وحول المريول اللي كان لابسه وقعد يساوي في شعرها..
ونوارة تشوفله بإبتسامه..
هو شبحلها وقالت؛ريحه نوارتي ريحه..
نوارة؛ثواني..ومشت بسرعه..
وهو واقف يستنى ع نار وقلبه مش طايق صبر..
ع جيته عطاته الريحه..
هو طلع من المطبخ وقعد يبخ فيها..
بعدين عطاها لنوارة وسألها بغمزة عين؛شن رايك..
نوارة؛قمر ياخواتي..
ابتسم ومشي طلع من حداها..
وقلبه سابقه..خدي نفسه وزفر..
وعاود خدي نفس مرة تانيه ولما طلت عليه وشافها..
انحبست انفاسه..
عباية سودا...وهالمره شاربه سوداء..والاسود كان يزيد فيها جاذبيه...
خطرت عليه اول مرة شافها فيها وخطفت قلبه..
كانت لابسه نفس اللون..
وكل شي واسع وفضفاض ماينعرف منها شي...
لاشكل جسم ولاتفاصيله...
اللي كان زمان فاتح يشوف في البنات يسعوا لآظهارهم يش يلفتوا انتباهه..
ممكن نجحوا بإثارة الغريزة...لكن مافيش وحده فيهم قدرت تلفت انتباه قلبه غيرها هي..
زفر بطريقه غير ملحوظه...
بعدين قدم لزياد لما شافه..
وحضنوا بعض..
زياد:استاحشتك تصدق..
فاتح:كذاب..بعد وليت لحوشكم وغواليك شن مازال دير بيا..
بعد زياد وقال:قصدك انت مافقدتنيش!
فاتح بضحكه؛ع اساس انت فقدتني ياكذاب.
ضحكوا الزوز..بعدين فاتح قال:شن جو..
زياد؛تمام الحمد لله..
حاوط فاتح زياد من ظهرها ومشوا الزوز للرجاله.
وهما ماشيين مسامعه كان عند سارة اللي يسمع فيها تقول لخواتها..
"ماتباعدوش "
وهما ردوا عليها..
"حاضر".
ابتسم وكتم تنهيده كانت طالعه من القلب..
ولحظات وجت سيارة احسان...
خش للمزرعه..ومشاله مهاب يستقبل فيه...
نزلوا من سياراتهم ...
هو ومرته في حضنها ولدها...وامه ولده المثنى...
وهما جايين ...
نوال مشت استقبلت سنيه ورنيم...
ورفعتهم وين مافي النساوين..
واحسان والمثنى لما وصلوا في الطاوله..
هيثم صفر وقال؛نجم كرة السله الليبيه حضر..
المثنى ضحك بإحراج..ومشي لهيثم..
وسلموا ع بعض بالأحضان وهو ويقول:جبتها يانجم..
المثني:الحمد لله....
احسان؛ذاك الشبل..من هدا الاسد..واشر ع روحه..
ضحكوا..
هيثم؛انت ماشاء الله من يغلبك اللي يغلبك يجي يحاسبني..
واحسان فهم قصده بكلامه وقعد يضحك..
المثنى مشي سلم ع زياد وفاتح والاشهب بعدين قعمز..
هيثم:هدا المثنى ولد عمك احسان..لاعب كرة سله...كمل انت مثنى..
تنحنح وقال:نلعب في نادي الاهلي طرابلس للشباب..
الاشهب؛فريقهم خدي كاس الدوري الليبي مبارتهم الاخيره كانت في الشرق وجابوها..
المثنى؛ماكانتش ساهله بس الحمد لله وفقنا وخديناها..
مهاب:اختاروك نجم المباراة..
المثني بإبتسامه؛ماتوقعتهاش الحق..بس يعني في واحد هادي عطاني نصيحه مشيت بيها ..وخدينا الكاس وروحنا بيه..
احسان :بشن نصحك..
المثنى بأبتسامه؛العادات السبعه...
زياد وفاتح شبحوا لهيثم..
اللي كان داير روحه يتفرج ع المنظر اللي قدامه...
شبحوا لبعض وابتسموا..
احسان؛ايه قاري عنهم قبل..
ابتسم المثنى وهز راسه بإيجاب...
🍁عند النساوين..
سارة بإبتسامه:عطيهولي شويه..
مدت رنيم ولدها لسارة..
سارة خدت بلال وهي تقول؛بللو استاحشتك ياعسل..وقعدت تبوس فيه..
نوال؛نشوفوه عندك سارة...
كلهم شبحوا لسارة ماعدا نرجس شبحت لأمها وهي تفنص..
سارة شدت روحها بالغصب ودارت روحها ماسمعتش نوال شن قالت؛حلقتوه ولا؟
خفتت ابتسامه نوال..وماجده تشبحلها..
رنيم بإبتسامه:ايه..
خدت سارة نفس وقالت بإبتسامه؛عادي نتمشى بيه شويه..
رنيم؛اكيد حبيبتي..
ناضت سارة وفي حضنها بلال ومشت تباعدت عنهم ودموعها ينزلوا..
نرجس؛ماما ربي يهديك..
نوال؛في شن غلطت..
ماجده؛كيف يانوال ماتعرفيش شن صاير فيها!
نوال؛نعرف كويس...لكن وبعدين لأمتى بتقعد هكي.! مسايرتكم ليها اكبر غلط..لازم تعيش حياتها وتشوف نصيبها الحياة ماتوقف عند حد..
رنيم؛اني رايي من راي ابله نوال لازم تطلع من الحاله اللي هي فيها حرام اللي دير فيه فروحها هدا..
تنهدت ماجده وقالت؛من يتمناش الحاجه هادي يارنيم..بس بالشويه عليها..راهو اللي راته مش شويه..
تنهدت نوال وقالت؛ربي يصلح حالها...
🍁فهالوقت..فاتح شافها لما مشت ببلال بعيد عنهم..
فاتح؛شويه نمشي نشوف شن صار في الغدي ونجي..
زياد؛تمام..
ومشي طول لجهة الكوجينه...
تباعد عن الموجودين.وفات الكوجينه..ولحق سارة..
وقف في مكانه لما شاف بلال مقعمز في حجرها يلعب وهي تبكي...
وجعه قلبه عليها...
مشي للكوجينه بسرعه..خدي منها شيشه ميه وطلع وسط استغراب نواره..مشت وقفت في الروشن وشافت سارة وهي عاطيه بالظهر ومقعمزة..
وشافته هو يقدم ناحيتها بخطوات محسوبه...
🌼وصل فيها لقاها تبكي بألم...
هي شمت ريحة عطر رجالي قويه...
قامت راسها وشبحاته..
ناضت بسرعه بالولد وهي تقول؛شن دير جاي وراي مصح وجهك..!
فاتح انصدم في اسلوبها وقعد يجاوب فيها بإرتباك؛كنت جاي للكوجينه..وشفت تبكي..
سارة بحده ؛قول لاحقيني...
فاتح؛مش هكي بس..
قاطعاته وقالت؛دير اعتبار لصاحبك والراجل اللي حاسبك زي ولده..عيب حركاتك هادي في حقهم عيب كبير..
هو ماعرفش شن يرد عليها كلامها مزبوط ...
وخلاه يضايق من نفسه هلبه..
قال معتذرا؛اسف..سامحيني..بس لازم تعرفي اني والله مانبي نغلط لافيك ولافي صاحبك ولابوك الراجل اللي ماريت منه الا كل خير..صح لحقتك لكن بش نشوفك بس..ولما لقيتك تبكي لقيت روحي مشيت جبت هادي وجيتك..ومدلها شيشه الميه...
هي شبحتله بحده..وخدت منه شيشه الميه بعصبيه..
بعدين نزلت بلال ومشت لتركينه فيها شجره فتحت الشيشه وصبتها تحتها...
وهو يشوفلها بصدمه..
بعدين سكرتها وولتله مرة تانيه ومدت الشيشه وقالت؛تفضل...
هو خدي الشيشه ومازال مش مستوعب تصرفها..
هي قامت بلال وقالتله:وان شاء الله تكون وصلت مع اني اشك...
ومشت من حداه وهي معصبه..
وهو تبعها بعيونه...بعدين رجع شاف لشيشة الميه وهو يحاول يفهم قصدها بكلامها الاخير..
عيونه جو ع حاجه ملفته للانتباه...طبس خداها...
وهو يشوفلها..
بروش زهرة الغاردينيا...
قعد يشبحله شويه...بعدين ابتسم..وحطه في جيبه..
ومشي للكوجينه...
🍁🍁🍁
عدت الساعات الاولى بأجواء حلوة ع الكل..
حتى مع سارة اللي كانت تهدرز هي ورنيم ع القرايه وقعدت تعطي فيها في نصايح..
رنيم؛اني كملت الطب في سبعه سنين لكن انتي شطورة بزياده تكمليها بكري ان شاء الله..
سارة؛مش لهالدرجه..يعني اني خايفه هلبه من سنة ثالته يسموا فيها مقبرة الطلبه..
رنيم؛مقبرة اللي خاشين يتسهوكوا مش اللي خاشين يقروا..ماتسمعيش الكلام هدا..كان بتقعدي تسمعيلهم بتتعبي ومرات ماتكلميش..
سارة؛لا مستحيل..ان شاء الله مكمله فيها..
ابتسمت رنيم وقالت؛إن شاء الله...ايه وخوك زياد..
سارة:لا زياد ماشاء الله طلع منها واهوخاش سنه رابعه..
رنيم؛قالوا ياحدوا في العملي غادي في مستشفى السجن صح؟
سارة:ايه صح..
رنيم:قداش البلاد طورت وتغيرت فيها هلبه حاجات..
ابتسمت سارة..
ع جية نرجس قعمزت حداهم وقالت:شن جو صبايا..
رنيم بإبتسامه:الحمد لله..
نرجس:عن شن كنتوا تهدرزوا؟
رنيم؛ع القرايه...
نرجس:اها السنه هادي سنه تالته ساره...
سارة؛ايه..
نرجس؛معاك دانيه ولا..
سارة :اكيد...
🍁سارة لأنها كانت في العده قرت اخر سنه في الثانوي نظام منازل...اما دانيه راحت عليها اول سنه في الكليه...لهدا خشت السنه اللي بعدها الجامعه مع سارة....وقروا مع بعض🍁
نرجس؛موفقات..
سارة:شكرا...
نرجس تنهدت وقالت؛بنات بنستشيركم...لوجيت بنفتح مشروع ونبي نسوقله ونجيب زباين شن انسب طريقه برايكم!؟
سارة؛عن طريق مواقع التواصل..فيس..انستا سناب..والاحسن انك تتفاهمي مع صفحه مشهورة اوشخصيه مشهورة يديرولك اعلان بمقابل مادي..
رنيم؛حتى اني نقول هكي..
نرجس؛-قبل فكرت في اعلان تلفزيوني..
رنيم:ومن مازال يتفرج عليه التلفزيون..
نرجس بضحكه؛صح..ناضت وهي تقول..هي نوضوا نتمشوا مش جايين بش نقعمزوا حني..
رنيم بإبتسامه؛صدقتي..
ناضت رنيم ومعاها سارة..
ومشوا التلاته مع بعض..
وكانت الهدرزة اكثر شي بين رنيم ونرجس في مواضيع يتكلموا عنها المتزوجات..
الصغار..والحوش..وماإلى ذلك..
وسارة كانت في عالم تاني..
توزع في نظرها ع المزرعه الكبيرة الواسعه وتشوف للمناظر الحلوة اللي فيها..وفي عقلها قاعده ترتب في احداث حلوة وحزينه لقصة قصيرة..
ليها سنين معاش كتبت قصة قصيرة...والمقالات سيبتهم من بعد موت مجاهد..كتبت اخر مقال ليها كان بعنوان..
سقوط اوراقي..كان مؤثر هلبه وكل من قراه حس بالوجع اللي كانت تحس بيه هي وقتها..
ومن بعدها ابتعدت سارة عن الكتابه تماما..
بس توا حاسة برغبة شديده في الكتابه...
بعدت عن رنيم ونرجس اللي كانوا لاهيات بالهدرزة..
وهي كملت بروحها وقعد دور في مكان مظل تقعمز فيه..
لقت شجرة كبيرة مظلله..
مشت طول وقعمزت تحتها...وفتحت تليفونها ع المذكرة وبدت تكتب وهي منسجمه..
اللي جي في عقلها تكتب فيه..
🌼فهالوقت..
كان فاتح يوتي في روحه لصلاة الجمعه..
وقف قدام المرايه بخ من العطر متاعه...
شويه سمع اصوات الصغار..
ابتسم ومشي وقف في الروشن بش يشوفلهم..
يجوا عيونه عليها...
كان منظرها حلو بالمرة وهي مقعمزة تكتب..
بس تفكر الحركه اللي دارتها متاع شيشة الميه رجع يفكر فيها ويحاول يفسر كلامها لما قالت ان شاء الله تكون وصلت..
فجأة دق باب الدار اللي هو فيها...
"فاتح ياحبيبي مستنينك برا"
فاتح وهو يشوفلها؛جاي جاي...تنهد من قلبه..
بعدين لف ومشي للباب وطلع من الدار....
🌼ومشوا الرجاله كلهم للجامع في السيارات...
والنساوين بعد صلاة الظهر تعاونوا ع تجهيز الغدي...
بعد ماكملوا بشويه...
روحوا الرجاله...وطبعا للغدي طول...
🌼🌼🌼🌼🌼
"اممم..الكبه فضيعه"
هادي سارة اللي ماقدرتش تقاوم رغبتها في التعبير عن اعجابها بالكبه...
ماجده؛تبارك الرحمن هو غير الكبه بس...رشدة الكسكاس زي العسل..
نرجس؛عطيها الصحه نوارة..
سنيه؛هاني مراة كبيره ويقولوا خبرة في رشته الكسكاس لكن والله هادي اول مرة ناكل زيها..
نوال؛نوارة خبره في الماكله الليبيه..
ماجده؛وطيب فيها خير منا..
رنيم؛عطيها الصحه نبي طريقة الكبه تجنن..
سارة وهي تاكل وتتلذذ فيها:امم...حتى اني..
نوال بإبتسامه؛شويه وتجي...ايه ماقلتوش رايكم في العصبان..
نرجس شدت ضحكتها..
ماجده؛قنين حتى هو..
سنيه؛حتى اني عجبني..
نرجس بضحكه:داراته ماما..
ماجده بدهشه؛نوال!!
قعدت تضحك نرجس..
وسارة وهي تاكل في الكبه وخاشه ع تالت طرف قالت في سرها"هدا علاش ماحبيتاش"
سنيه؛شني اول مرة مالا؟
نوال وهي تضحك بإحراج هزت راسها بإيجاب..
ضحكوا كلهم ع ملامح التعجب اللي بدت ع وجه سنيه اول مرة تعرف ان نوال ماتعرفش طيب..
••احسان؛والله ماشاء الله يافاتح لازم تفتح مطعم انت..
فاتح بإبتسامه؛نفكر..
المثنى:عندي صاحبي بوه طباخ معروف عبدالله المقريف..
الاشهب:اوو اشهر من نار ع علم..
المثنى؛نوصلكم ببعض عادي مرات يفيدك..
فاتح وهو مبتسم؛ان شاء الله..
هيثم؛ماتراجيش ابدا طول نفد مشروعك ومعاش ضيع وقت..
فاتح؛بإذن الله...
الاشهب؛العصبان مش انت دايره ولا؟
فاتح ضحك وحرك راسه بالنفي..
مهاب:ولا نوارة..
فاتح بضحكه:ولانوارة...
الاشهب بإستغراب:مال منو؟
فاتح بضحكه:بنت اختك..
الاشهب انصدم وقعد يضحك..
واحسان حرك عيونه ناحية هيثم..
اللي كان يسمع في حديثهم وهو ياكل وع وجهه ملامح ابتسامه خفيفه
الاشهب هدا ضحك وقال؛ماتواخدونيش بس هادي اول مرة بنت اختي طيب فيها..لا وخشت ع العصبان..
مهاب؛بس كبدايه انجاز..
احسان؛صح بنته قنينه...
فاتح وهو ياكل هز راسه وهو يقول:اممم..
والباقي قعدوا مستعمين بس..
زي زياد اللي خدي طبع بوه وهو كره الكلام ع الطعام..
وهيثم اللي كان مستمتع بالحديث...
••جتهم نوارة وهي تقول؛مش عايزين حاجه تاني ياهانم..
نوال:لاصحيتي نوارة قعمزي تغدي..
ابتسمت نوارة وقعمزت..
سنيه؛عطيك الصحه يانوارة رشيده زي العسل..
رنيم؛والكبه حاجه تانيه..
هي وزعت نظرها عليهم بإبتسامه ارتباك بعدين قالت؛اقول ايه بس..صراحه اني ماعملتش حاجه المراة غير المبطن..
نوال بإستغراب؛كيف؟
نوارة؛فاتح ياهانم ...
كلهم اتفاجئوا...
وسارة ضايقت هلبه...ردت طرف الكبه اللي كان في يدها لمكانه وحطت الشوكه اللي كانت تاكل بيها..
وخدت طاسه ميه وقعدت تشرب.
ماجده؛الله يبارك عليه...
سنيه:ايه والله الله يبارك عليه..
رنيم؛لو منه نفتح مشروع الربح مضمون من غير كلام..
نرجس بإبتسامه؛ايه هدا اللي في بالنا هدا علاش بكري سألتكم ع طريقة الاعلان وسارة عطتني طريقة حلوة..
سارة ابتسمت بالغصب..
ونوارة تشبحلها بعدم تقبل..
ماجده؛ربي يفتح عليه ويرزقه..
نوال ونرجس ونوارة؛آمين..
ورجعوا يتغدوا وهما ساكتين..
نوال شبحت لسارة لقتها وقفت ماكله قالت:تغدي سارة..
سارة:لا خلاص الحمد لله..
نوال؛صحتين..
سارة؛شكرا..
ونرجس قعدت تشوفلها كيف ترد ع امها بالسيف طارتلها منها...
من الاساس واضح عليها انها جايه بالسيف...
🌼🌼🌼🌼
وبعد الغدي..
انتشروا في المزرعه اللي يتمشوا واللي مقعمزين في تركينه يهدرزوا..
والولاد مع البنات الصغار يلعبوا فيهم بالالعاب الموجوده في المزرعه..
درجيحه...زلحيبه ع قولتنا..
••ريحان؛مافيش كورة..
ضحك المثنى..
زياد؛كورة شني هادي!..
ريحان:مانحباش لعب الصغار هدا نبي كورة.
ليليان "بنت نرجس":ياكبيره انتي..
ضحكوا..
طنشتها ريحان وقالت؛مافيش كورة!؟
فاتح؛للاسف يازعيمه مافيش كورة...
ريحان؛خسارة..
المثنى؛قلتي لعمي هيثم ع الموضوع هداكا..
ريحان بخيبه؛قتله قال مش توا..
زياد؛موضع شنو هدا..
ريحان؛نبي نخش نادي كورة سله..
زياد؛ايوه! والتكواندوا..
ريحان؛عمتي تعلم فيا..اني توا نبي كورة السله مليحه..
ابتسم المثنى..
فاتح بضحكه؛والله انتي المليحه باهي..
ليان:انتي بنيه مفروض ماديريش هكي..
ريحان؛ايه اني بنيه لكن مش دلوعه وسحنونه زيكم...
الولاد قعدوا يضحكوا..
وجنان كانت حاصله في التوكه متاع شعرها بطيح ..
مشت من حداهم دورت سارة مالقتهاش..
شبحت جهة بوها لقاته واقفه في تركينه ويتكلم بالتليفون..
مشتله طول..وين وصلت فيه..ضرباته ع رجله ضربات خفيفه بش يشوفلها..
هو شبحلها شد يدها وقال؛تمام دكتور..بإذن الله حنكون غادي ومعاي ولدي.....وانت...وانت طيب السلام عليكم......سكر هيثم وشبحلها؛نعم بابا..
جنان؛التوكه حصلت في شعري..
حط تليفونه في جيبه وقعمز ع روس صوابعه وقال:تعالي هكي بابا..
لفها من جهة التوكه ليه..وقعدت يحول فيها بالشويه..
ونوال وهي جاياته من بعيد كانت تشوفله بإبتسامه..
ساوا التوكه وشعر بنته بعدين قال:خلاص بنتي..
جنان؛شكرا بابا..بعدين شبحت لنوال اللي وصلت فيهم وقالت؛السلام عليكم..
هو وقف ع حيله والتفتلها وقال؛وعليكم السلام..
جنان عقدت حواجبها وهي تشوف لنوال..
نوال بإبتسامه وهي تهرب بعيونها عنه؛ان شاء الله عجبك الجو..
هيثم وهو محول عيونه عنها؛ايه تمام..
نوال؛كويس...دكتور نبي نطلب منك طلب..
هيثم؛تفضلي..
نوال ابتسمت وبدت تتكلم..
وجنان تشوفلها بغل...
وسارة كانت في جهه معينه مقعمزة بروحها..
قرت سورة الكهف...بعدين بدت تقول في وردها من الصلاة ع النبي...
كملت...بعدين ناضت ومشت بتنضم للباقي..
كانت تبي تروح بس مازالت مجبرة ع القعاد لين بوها يقول هيا..
وين وصلت للمكان اللي كلهم موجودين فيه..
شافت بوها واقف مع نوال والزوز يهدرزوا...
انضغط ع اعصابها بما فيه الكفايه معاش قدرت تتحمل...
طول مشتلهم...
وهي ماشيه فاتح بس اللي ركز عليها..تبعها بعيونه لين وصلت فيهم...
نوال؛ خلاص بينا اتصال..
هيثم؛تمام..
"بابا"..
الزوز فجعهم الصوت شبحولها وهو قال؛خيرك بابا شن في!؟
سارة وهي تحاول تكبت غضبها؛هيا نروحوا خلاص ورا قرايه..
نوال؛مازال بكري.
سارة بحده؛لامش بكري ساد ماقعدنا..
نوال صدمها الرد والاسلوب...
وهيثم عصب منها باس دار روحه عادي وتفاديا لما هو اكبر من هكي قال؛تمام..جهزوا انفسكم..وكلمي خوك...اني في السيارة..ومشي من حداهم..
سارة هزت راسها وقالت؛حاضر..
وجت بتمشي وقفت لما سمعت نوال قالت..
نوال؛شفني حاجه ضايقاتك ولاسمعتي شي زعلك..
سارة برفعة حاجب؛اكثر من هكي!
نوال عقدت حواجبها بعدم فهم..
وسارة خدت اختها ومشت هي وياها..
جنان بغضب؛نكرهها...
سارة سمعت اختها شن قالت قلبها وجعها يعني حتى خواتها الصغار يشوفوا في اللي تشوف فيه..
يعني مش هواجس ولا وسواس منها...!
وصلت وين مافي خوتها وقفت بعيد شويه ونادت:زياد..
شبحولها..
وفاتح مركز ع ملامح وجهها باين فيهم الغضب والخوف.. زياد؛نعم..
سارة:بابا قال هيا..
فاتح؛مازال بكري..
شبحتله من فوق لتحت وخدت اختها ومشت..وريحان لحقتهم..
زياد ركز ع وضع اخته وتصرفها بعدين شبح لفاتح..
فاتح بلع ريقه وقال؛مرات عنده خدمه...
زياد؛مرات...تنهد وقال..بيناتنا آلو..
وفاتح هز راسه بإيجاب وعقله عند سارة..
مشوا مع بعض ومعاهم المثنى..
سلم ع الرجاله..ومشي لسيارة بوه ومعاه فاتح..
وعيون احسان مع سيارة هيثم..
وصلوا فاتح وزياد ع وصلة سارة وخواتها..
ركبوا السيارة وعيون فاتح تسرقلها في النظر..
زياد صافحه وقال؛نشوفك..
فاتح؛إن شاء الله...
ومشي زياد ركب..بعد ماركب زياد...
طبس فاتح ع الروشن وقال؛ان شاء الله ماريتش منا حاجه ضايقاتك بس..
سارة شبحت للروشن اللي جنبها بإزدراء ...
هيثم بإبتسامه؛لانهائيا....درتو الواجب وزياده بارك الله فيكم وان شاء الله ديما عامر..
فاتح؛ان شاء الله..ربي يحفظك دكتور..ربي يحفظكم..تصبحوا ع خير.
هيثم؛قدامك كل خير..
سرق فاتح نظره لسارة بعدين وخر عن السيارة..
وهيثم تحرك طول...وطلع من المزرعه وفاتح عيونه متسائل وهو مضايق قال...في حاجه صارت ضايقتها...
التفت شبح حواليه..بعدين تنهد ومشي لباقي ضيوفهم..
🍁في الطريق..
زياد؛مش ع اساس بعد صلاة العشي مروحين..
سارة؛اني عندي قرايه..
بوها شبحلها من المرايه..
زياد؛قراية شنو؟
سارة؛خاشه كورس يازياد..
زياد هز راسه وشبح القدام وهو مش مقتنع..
وهي شبحت للمرايه لقت بوها يشبحلها بنظرة خوفتها.
هربت منها وشبحت للروشن..
وقعدوا طول الطريق ساكتين الا عن بعض الكلمات المقتضبه..
لين وصلوا للحوش...
خشت السيارة ودرست..
وهما نزلوا منها...
••بعد ماخشوا للحوش..
هيثم سكر الباب وحط مفاتيحه ع المدخل وشاف لسارة وهي ماشيه لممر الديار مع خواتها..
سارة:هي بسرعه قدامي..
"سارة"..
وقفت والتفتت لبوها وزياد يشوفلها وهو عاقد حواجبه..
هيثم؛ريحان جنان للدار..
الزوز قالوا:حاضر..
ومشوا مع بعض لدارهم..
قدم هيثم كم خطوة بعدين وقف وقال:مش ملاحظه ان الفترة الاخيره قاعده تتمادي في اسلوبك وتصرفاتك..
رفعت حواجبها وقالت؛نتمادى على مني بالزبط.
هيثم بحده؛ماترديش ع سؤالي بسؤال سألتك جاوبي..
هي بلعت ريقها وقالت؛تصرفاتي عاديه وماتماديت ع حد..
هيثم؛يعني مش شايفه انك غلطتي بكل..
سارة؛لا..
زياد:الحق حتى اني تصرفاتك ماعجبتنيش طول اليوم وانتي قالبه وجهك واسلوبك في التعامل ماعجبنيش.
هيثم؛زيد عليها الطريقه اللي جت كلمتني بيها واسلوبها الزفت مع ام فاتح..
سارة؛خلاص مادام مازال قاعد خاطركم في القعاد غادي ولوا..
زياد بغضب:سارة..
هي رمشت عيونها بسرعه من الفجعه بعدين شبحت لبوها لقاته يشوفلها بنظرة وجعت قلبها..
هيثم :من توا لين تعرفي كيف تتعاملي مع بوك صح لسانك معاش نبيه يخاطب لساني..
ومشي طول للدار..
هي شدت روحها ماتبيش تبكي مشت طول لدارها خشت وسكرتها وقعدت تبكي..
وزياد لحقها..وقف قدام دارها ودق الباب..
وقفت بكي ومسحت دموعها بعدين فتحت الباب..
خش زياد وهي مشت قعمزت ع سريرها..
سكر الباب وقال؛خيرك هكي موليه..مركزة ع اسلوبك مع بوك كيف كان!
سارة؛هو طلعني عن طوري جبرني نمشي واني مانبيش وهو عارفني مانحبش ندير شي مش مقتنعه بيه ولانمشي لمكان مانرتاحش فيه..بالذات الناس هما ماخشوليش راس..
زياد؛علاش شن ريتي منهم!؟
سارة؛مش لينا مش لينا يازياد ناس تاريخهم اسود وحتى فلوسهم مش معروف اصلها....
زياد:انتبهي لكلامك..لااني ولابوك نرضوا نتعاملوا مع ناس ماينفعوش..في حاجات انتي ماتعرفيهاش...ولدهم صاحبي ماتنسيش..
سارة؛هادي الحاجه اللي مخليتني مستغربه فيك كيف تصاحب واحد زي هدا وانت كويس شن كان..
زياد؛واني شن كنت!
سارة؛لا معليشي مافيش مجال للمقارنه انت من يوم يومك متربي صح ومستقيم وكلنا بعد وفاة امي الله يرحمها تخبطنا وياما صار فينا..انت حتى لما كنت مدمن اصلك غلبك وخشيت الحبس بش دافع عن شرف بنت ماتعرفهاش..لكن هو شن كان غارق في الفساد لودانه ولما خش الحبس خشله لانه ضرب راجل اخته..فرق كبير كبير هلبه بينك وبينه..
زياد؛تعرفي اني مصدوم فيك...مصدوم هلبه..ماكانش هدا كلامك زمان تذكري لما كيف كنتي دافعي ع صحبتك مع تهاني وتمشي وتجي لحوش عمي خالد الله يرحمه رغم انهم كانوا غارقين في الفساد لودانهم ع قولتك..
غمضت عيونها بشده وقالت؛رجاءا حتى هادم معاش تجيبلي سيرتهم..
هو رفع حواجبه وقال؛قصدك قطعتي علاقتك بتهاني!
نزلوا دموعها وقالت؛مالا تبيني نقعد مصاحبه وحده خوها قاتل راجلي!؟
هو قعد يشوفلها وهو ساكت..
وهي تشبحله بحده ودموعها مازالوا ينزلوا..
هز زياد راسه..وفتح الباب وطلع وسكره..
وهي حطت يدها ع صدرها وقعدت تبكي..
شويه وتحسست مكان البروش مالقتاش..
قعدت تفتش في شاربتها مالقت شي..
حولت الشاربه وقعدت تنفض فيها...مافي شي..
وقفت وقعدت دور ع الارض لين طلعت برا الدار وهي دور...
وصلت في باب الحوش لبست شاربتها..
وطلعت منه ومازال دور..
سارة؛ياربي وين مشي!
شافت لسيارة بوها...فتحت وقعدت دور فيها ودموعها مابطلوش نزول..
لما مالقتهاش قالت ببكي؛ والله ماكنت نبي نمشي والله ...
🍁البروش جاها في بيانها مع عبايه وشاربه قعدت تلبس فيهم..والبروش مرافقها وين ماتمشي ماعدا المسجد
عندها هدا ذكرى غاليه عليها من مجاهد التفريط فيها جريمه بالنسبه ليها🍁
بكت عليه هلبه..وبكت بسببه ع كل شي صار معاها اليوم
منظر بوها وهو واقف على نوال مش راضي يغيب عن عقلها وزادها على مابيها زعل بوها منها..
🍁🍁🍁🍁
الساعه الحادية عشر ليلا..
مقعمز في داره..
ع كرسي جاد وهو حاط رجل ع رجل ويشوف للبروش اللي شاده في يده بنظرات كلها حب...
اللي جاه منها ماخلاشي يزعل منها ولو شوي مايشوفش فيها غالطه...عندها الحق في نظره..وحده زيها هي كان لازم يعرف كيف يتصرف معاها صح..
بس مازال لتوا مش فاهم قصدها من حركة شيشة الميه..
دق باب داره..
فاتح؛خش..
انفتح الباب وخشت نوارة وهي تقول:انت لسه مانمتش؟
حرك راسه بالنفي وتنهد..
قعمزت ع كرسي تاني في داره وقالت؛بتفكر فيها صح..
ابتسم...
نوارة؛اقولك الصراحه وماتزعلش مني..
فاتح بإبتسامه؛قولي..
نوارة:البنت دي ماتستاهلكش..رافعه مناخيرها للسما وطول الوقت وشها مكشره اكنها عاصرة ع نفسها لمونه..شفتها عملت ايه لما جبتلها الميه..
فاتح؛مادارتش غلط البنت متربيه وملتزمه ومش متاع دوة زايده واني لاحقها وكنت ناوي نكلمها ونسيت حتى خوها وبوها..
نوارة؛هو انت كنت حتقولها حاجه غلط لاقدر الله!
فاتح؛اكيد لا..لكن تصرفي غلط...
نوارة:اين كان انا بصراحه كده مستخسراك فيها..
فاتح؛نوارتي..مانرضاش فيها راهو..
نوارة:ماده اللي واجعلي قلبي انك بتحبها قوي خايفه تجرحك وانت حساس بطبعك..
فاتح بإبتسامه؛هداكا قبل مش توا..وبغدين طمني بالك حتى الجرح منها راضي بيه....
نوارة؛انا اقوم انام احسن ماتنقط..
فاتح بضحكه؛بعيد السو عليك نوارتي.
ناضت وهي متنرفزة قالت؛تصبح على خير..
ومشت طلعت وسكرت الباب..
وهو تنهد ورجع يشوف للبروش..
🍀🍀🍀🍀🍀
ومر من هداكا اليوم...
اسبوع..
هيثم ماباش فيه يشبح لسارة حتى الشبح كل ماتجي تكلمه يمشي ويخليها..
ولو جت تقعمز حداه ينوض ويمشي لداره..
زادت نفسيتها تعبت وقلبها وجعها حبها لبوها مافيش زيه حب..
تتحمل كل شي الا زعله..
••دانيه:كم مرة حذرتك ونصحتك اني..
سارة بدموع:مش بيدي يادانيه هديكا المراة ماتبيش تخليه في حاله..
دانيه؛تمام وان سلمنا جدلا ان كلامك صح انتي هكي تمهديلها في الطريق..لما تبدا علاقتك ببوك مش كويسه وتكبر بينكم الفجوه تكبر في راسه فكره الزواج يبي من يريحه وينوسه ويخفف عنه حموله..فاهمه عليا ساره..
سارة؛اني الفترة هادي دماغي مشوش هلبه ومش عارفه كيف نتصرف...
دانيه؛لاصفي ذهنك سارة خاشين ع سنه تالثه راهو السنه هادي تحدد مصيرنا..
سارة خدت نفس وقالت:مزبوط..خل نصالح بابا قبل والباقي يجي بعدين...
طلعو الزوز من المعهد اللي ياخدوا فيه الكورس سلموا ع بعض وكل وحده فيهم مشت لسيارتها ركبت وتحركوا لحياشهم..
🍁🍁🍁🍁🍁
" وافقت وبإذن الله يصير النصيب"
ابتسم وهو يحاول يخفي فرحته وقال:ع خير ان شاء الله..
معاذ:ان شاء الله..مانكذبش عليك داوود فرحان بيك اللي وليت نسيب مش بس صاحب..
داوود بإبتسامه؛تسلم ياصاحبي..بس في عندي طلب..
معاذ؛تفضل.
داوود؛من بعد اذنك واذن عمي وخوتك كلهم..لوتسمحولي نشوف مريم في المستشفى ونهدرز اني وياها شويه..
معاذ:علاش مش في الحوش..
داوود؛صراحه نبي نشوف طبيته المكان اللي تقرا فيه وشن نظامه زي ماتفاهمنا بتكمل سنة الامتياز عندي لازم نكون عارف كل شي كويس.
معاذ؛حقك..مافيش مشكله..واني عارفك ياصاحبي ولد اصل وبيتيه والغلط مايجيش منك..
داوود بإبتسامه:بارك الله فيك...
🍁🍁🍁🍁
"انت درويش مش فاهم هادوا يستغلوا فيك يانيه"
رشيد؛شن تقولي يام ربي يسامحك..راهو وضعهم مضعضع معاش زي قبل..
سدينه بعصبيه؛مضعضع ولامتقربع شن دخلك بيهم! خليك في حالك والهى في قرايتك اللي قريب تبدا السنه هادي شهاده..
رشيد؛تمام يام ماتعطي شي انتي حرة لكن اني هدا بوي ومش مخليه..سامحيني..
ومشي طلع من حداها.
سدينه؛ماتخليشي ولدي ماتخليه لين تاكل كفوف باهيات منه يفوقوك غير ان شاء الله تاخدهم بكري ومايصيرش فيك زي امك...
ع خشة دانيه للحوش...
مشت طول للصالون قالت:السلام عليكم..
سدينه؛وعليكم السلام..خيرك عطلتي!؟
دانيه؛زحمة الطريق يام..رتاج روحت.
سدينه:ايه في دارها ترقد في عطاالله..كان لقيتها مرقداته جيبها وتعالوا اشربوا معاي قهوة..
دانيه؛حاضر..ومشت..
وسدينه تنهدت وسرحت بأفكارها لبعيد..
🍁🍁🍁🍁
مقعمزين عيله وحده يشربوا في قهوة العشيه ويهدرزوا..
مليحه؛عليك ذوق عندها يامديحه يقتل..
مديحه؛وهي الله يبارك عليها جميله..
اسماعيل بإبتسامه؛معجبات بيها هلبه..
نادر شبحله ع جنب..
مديحه؛غير خسارتها جت ارمله كان هدا خديتها للمريوح هداكا..
نادر:تو اني في حالي دوري فيا علاش
مديحه؛نبي نزوجك ونفرح بيك..
هو قعد يشرب في القهوة من سكات..
مليحه فنصت في اختها..
واسماعيل يشبح لخالته بإستياء..
نادر حط فنجان القهوة؛شن رايك فيها لإسماعيل خالتي..
مليحه صدمها السؤال..شبحت لإسماعيل لقاته يشرب في القهوة من غير مايشوفلها..ابتسمت ورجعت شافت لنادر وقالت..لاطبعا ولدي الوحيد عزري وياخد ارمله وعندها عيل علاش شن ناقصها..
نادر شبح لإسماعيل شاف ملامح الضيق بانت ع وجههه..
نادر؛لاهو ناقصه شي ولاهي..
مليحه بضحكه؛خيرك انت تبي تاخدهاله زايد ناقص! وبعدين سمعه ونعرفه عاقل واختيارته ديما صح..ولا وسمعه...
ابتسم بالغصب وهز راسه بإيجاب..
نادر"جبان":ايه ع هالسيرة اسمعوا هادي..قالك مرة في نمله اطلقت من راجلها قولوا علاش!؟
مليحه بضحكه؛علاش!
نادر؛طلع نملنجي...
امه وخالته وقعدوا يضحكوا..
نادر؛اسمعوا هادي..هادي...قالك مرة في عزوز ليبيه تبيع في كرموس في الصين جاها خامس زبون قالتله خلاص ياوليدي بطنك توجعك..
وخالته ميته بالضحك..
وامه قالت بضحكه؛باهي نوض من قدامي ياتافه نوض اخدم ع راسك..
ناض وقال؛معاش تلزي يام خير مانسكره الدكان اللي فاتحه ونقعد في وجهك اربعه وعشرين ساعه..
مديحه:بتمشي توا لاكيف..
نادر بضحكه؛بس قبلها عندي موعد نمشيله وبعدين نتوكل للدكان..وغمزلها..بعدين ركب فوق..
مديحه:بيمشي لحبيبة القلب ياحنه..
مليحه؛اها...بعدين شبحت لإسماعيل لقاته سرحان..اسماعيل..
استاقظ وشبحلها؛نعم..
مليحه؛وين رحت..
تنهد وقال؛قاعد..شبح ايمينه مالقاش ولد خالته..مشي..
مديحه؛ايه مشي للخدمه..
هز راسه وقال:خل حتى اني نمشي نشوف اموري..
ناض وحط الفنجان ع الطاوله وقال..انستوا بعض ومشي..
امه قعدت معاه بعيونها لين مشي..
مديحه؛لاحظتي ولدك..
رفعت حاجبها وقالت؛لا ومانبيش نلاحظ شي..وشربت من فنجانها وهي معصبه واختها تشوفلها برفعة حواجب...
🍀🍀🍀🍀🍀
ويعدي اسبوع تاني..
وهيثم قاعد يعاقب في سارة..
وسارة ماملتش وهي تحاول منه..
لأول يوم ليها في الكليه بعد العطله..
••سارة؛بابا ماشيه للكليه..
وهو لاهي بآيباده وماباش يعدل عليها..
وزياد يشوفلهم من الكوجينه..
قعمزت جنبه وشدت ذراعه وهي تقول؛بابا حرام عليك ماديرش فيا هكي عذاب هدا راهو..
هيثم ولاكأنه في حد يكلم فيه..
سارة؛بابا حبيبي..اني سارة راهو..
هيثم بدون مايشوفلها؛مااعتقدش..
خدت يده وباسها وشدتها بإيديها الزوز وهي تقول؛لا والله هي نفسها بس اني الفترة هادي مضغوطه ودماغي مشوش سامحني بالله ماتقاطعنيش بابا مانقدرش تنتفس بعدين..
هيثم ؛مالا كيف عايشه..
ضحك زياد..
سارة بضحكه،خلاص يادوك عاد قلبك ابيض..
تنهد وقال؛بري لجامعتك بري..
سارة؛اشبحلي قبل..اشبحلي وقولي بري لجامعتك..
شبحلها ببرود وقال؛بري لجامعتك..
سارة بضحكه؛ييي ربي ينجي هالوجه...
هيثم شد ضحكته وشبح لآيباده وقال؛بري..
ناضت وهي تضحك وقالت:خلاص اليوم سمحتلك تشرب زوز فناجين قهوة..
شبحلها وعيونه لمعوا بفرحه..
سارة بضحكه؛صدقت انت! مستحيل نخربه ولو شويه النظام اللي درته..
هيثم رفع الايباد وقال؛بري من قدامي خيرلك..
هي هربت تضحك..
وزياد طلع من الكوجينه وهويضحك قال:دثرونا بدعائكم..
هيثم بإبتسامه:ربي يفتح عليكم..
ومشي زياد طلع...
لقي سارة راكبه سيارته وبتطلع.
وهو مشي للباب فتحه وطلع لسيارته اللي كان مدرسها برا..
ع طلعة سيارة تهاني من حوشهم..
شبح للسيارة..وشافها..
وكانت هادي المرة الاولى اللي يشوفها فيها بعد ماطلع من الحبس زادت جمال ع جمالها..برغم وجهها صافي مافيه شي..
فاتت بسيارتها من قدامه بدون ماتعيرله اي انتباه..
وهو هايم معاها بنظرات عيونه..
ع طلعة سارة وهي تكلكس تبيه يحول من قدام الباب..
هو استاقظ وشبحلها وهز راسه...
ركب السيارة...وشغلها وتحرك...
وهي طلعت بعده..
🍁🍁🍁🍁
في القاعه...
مقعمزات يراجو في استاذ الماده لأول محاضرة يخش..
سارة؛معليشي لوسمحتي تعرفي من بيعطينا في الباتو؟
؛سمعت قالوا دكتور اسمه الشايبي..
سارة؛اها..
دانيه بقلق؛ان شاء الله خير وخلاص..
سارة؛خلاص معاش توتريني..
ع خشة تهاني للقاعه...
الزوز قعدوا معاهم بعيونها لين قعمزت في كرسي في طرف المدرج..
دانيه غيرت عيونها ودموعها عبوا عيونها..
اما سارة...
《 تعرفي اني مصدوم فيك...مصدوم هلبه..ماكانش هدا كلامك زمان تذكري لما كيف كنتي دافعي ع صحبتك مع تهاني وتمشي وتجي لحوش عمي خالد الله يرحمه رغم انهم كانوا غارقين في الفساد لودانهم ع قولتك..》
غيرت عيونها عنها وشبحت القدام بضيق..
ع خشة دكتور الماده..
دانيه لما شافاته فتحت عيونها ع وسعهم..
سارة بصوت هامس؛نحسابه بيطلع شيباني..!
دانيه؛نعرفه..
سارة بإستغراب؛تعرفيه!؟
دانيه وهي متفاجئه ؛نفسه اللي حكيتلك عليك زمان متاع موقف الميه..يلي عرف اني مريضه سكر..
سارة:اه ايه تفكرت..
هو بعد حط حاجاته ع الطاوله جبد الكرسي وقعمز وحط رجل ع رجل..
ومرر نظره عليهم..
وحده من الطالبات ورا دانيه وسارة
؛يهبل...
:شخصيه..خير من التحف الاثريه اللي قرونا السنه اللي فاتت.
سارة ودانيه شدوا رواحهم بقوة عن الضحك..
هو بعد مالقى نظرته عليهم قال؛ااا...معاكم..الدكتور عطيه رافع الشايبي..بنعطيكم في مادة علم الامراض..حط كفوف ع بعض وقال...مش حنحكي ع نفسي اي شي حتعرفوني مع الوقت واني حنعرفكم مع الوقت..رفع سبابته وقال..حاجه وحده نبيها منكم وتوا..االلي مايحبش يحضر يتفضل يطلع من توا..لاني بعدين مانقدر نضمن نفسي كيف نتصرف لو شفت مستهتر بيا او بالماده..اللي عارف روحه مش جاي يقرا يتفضل من توا..
كلهم قعدوا يشبحوله وهما ساكتين..
الشايبي؛اخر مرة نعاودها اللي عارف روحه مش متاع قرايه يطلع..
ونفس الشي كلهم ساكتين ومافي تحرك.
الشايبي؛تمام...خل نخش في الموضوع طول..
وقعد يعطي في نبده عن الماده ويتكلم عنها باستفاضه..
ودانيه مركزة عليه..
لاحظت انه يشرب في ميه هلبه..
ومرة مرة يمسح في جوانب فمه بالسبابه والابهام..
دانيه؛مريض سكر..
سارة،شني..
دانيه:الدكتور مريض سكر..
سارة قعدت مركزة عليه..
الشايبي؛ترا اكتبوا..
والطلبه بدوا يكتبوا ودانيه الوحيده المركزة معاه..
هو مرر نظره عليهم وهو يتكلم لين جو عليها..
حك منتصف جبهته بصوابع ايديه الوسطي والبنصر وهو يشوفلها..
هي نزلت عيونها عنه بخجل..وخدت البير وبدت تكتب..
هو يدوب ابتسم بعدين كمل كلامه..
#فاتح_سارة
#البطل_المغمور2
...يتبع...
