البطل المغمور (الجزء الثاني) زهور القمر

تابع

#البطل_المغمور2  "زهور القمر"
#جمان_فريد
#الجزء_الرابع_والعشرين "ياقلبي ياأمي2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
مقعمز في المكتب متاعه...
وقدامه واحد من جماعه يعطي فيه معلومات عن احدهم..
:الراجل يبي يتخلص من سيطرة عبدالكريم عليه وقال مستعد يدفعلك اضعاف المبلغ اللي انت طالبه..
بشر:عرض مغري لكن مانقدرش نقبله..لو بعت الفلاش لحد تاني اني وعيلتي نولوا في عداد الموتى..
:تقدر توفرلهم حمايه..
بشر؛وولدي اللي معاه في الحبس كيف بنحميه منه..حني اللي برا لهربنا لأبعد مدى في الكون بكبره يجيبنا يجيبنا...ع العموم خلاص هو لان ورضي بعد عناد طال ع الفاضي.
خل نعطيه الفلاش واني مأمن ع نفسي خير مانضيع ونضيع عيلتي معاي..
:اللي تبيه استاذ بشر..برغم اني كنت شايف صفقة المسؤوله فرصة العمر..
بشر؛ تي غير شن قعد فيه العمر..! اني نبي نأمن مستقبل صغاري وصغارهم اني خلاص راحت عليا..
🍁🍁🍁🍁🍁
"سمعتوا ياهوه"
كل من فهالمهجع قعد يشبحله بإنتباه..
مراد وهو مفجوع؛فاتح لقوه مطعون في الممر اللي يرفع للحمام..
كلهم فجعهم الخبر..
بس صدم زياد هلبه وخلاه يجمد في مكانه..
ع طلعة عقيل من داره...
عقيل؛خيركم شن في ان شاء الله خير!
وائل:فاتح لقوه مطعون...
عقيل بصدمه وأسف:إنا لله وإنا إليه راجعون !
زياد وهو يسمع فيه...
في عقله بدي يربط في الأحداث ببعض...
لما فاتح قاللهم عن معرفة امه لأسعد وانه كان يجي لبوه زمان...
وعن صفة اسعد وسبب دخوله للسجن...
وعن اللي عرفه مؤخرا على الشيخ عقيل..
شبحله وهو يفكر..
وقلبه محروق ع صاحبه...
سراج؛زياد..
عقيل شبحله لقاه يشوفله ضيق عيونه وهو يشبحله..
وائل؛زياد خيرك!
قربله عقيل وطبطب ع كتفه وقال:هون عليك هون عليك ان شاء الله جت بسيطه وينجى منها برحمة الله سبحانه وتعالى ولطفه..
زياد ودموعه عبوا عيونه رفع حاجبه ونزلهم في نفس الوقت وقال:إن شاء الله...
غير عيونه عنه ومشي لداره وسكرها عليه...
🍁فهالوقت..
اسعفوا فاتح لمستشفى الحبس ومعاه من السجن العجيلي..
والأطباء غادي دارو كل يقدروا عليه لإنقاده...
وهو تحت العمليات..
امه في حوش الدكتور هيثم..
تحديدا في دار نسيبه اللي كانوا قاعدين فيها..
تصلي وتدعيله...كلها خوف عليه بزياده..وقلبها مقبوض..
"يارب احميه واحفظه بحفظك يارب كون مع ولدي واصرف عنه كل شر يارب حرمته مني وحرمت روحي منه وتوا نبي نعوضه بش يعوضني يارب برحمتك ماتحرمناش من بعض"
🍁وقعدت هديكا الليله من غير نوم..
وكأنها تتقلب ع جمر...لين سمعت صوت الآذان لصلاة الفجر..
ناضت صلت...ورفعت دعواتها للسماء وقلبها كله رجاء انها تستجاب...
وبعدين طلعت من الدار ونزلت تحت..
كان الحوش هادي وماتسمع في حس حد...
مشت خشت للكوجينه....شربت ميه...
وهي تشرب شافت لباب الكوجينه الخارجي شويه...
حطت الطاسه في مكانها...ومشت للباب..
بعد تردد فتحاته..غطت روحها بشالها الغليظ...
وطلعت منه...
مررت نظرها ع الجنان في هديكا الجهه..
معبي ورد وعطر ونعناع...
كانت الواقفه في الجنان هدا الوقت وتنفس الريحه الحلوة والهوا النظيف كفيله انها تزيل كل مافيها من توتر وتخليها تسترخي ع الآخر..
لكن ماهي لحظات وسمعت باب الحوش انفتح..
وصوت سيارة خشت..
خدت نفس بعدين لفت بتخش لكن وقفت في اخر لحظه لما سمعاته يتكلم بالتليفون..
"ايوه..صباح النور...ان شاء الله خير!....................فاتح.."
قلبها تسارعت نبضاته...
"انا لله وانا اليه راجعون.....وشن حالك توا!؟.............باهي باهي اني شويه وماشي غادي........علاش!!؟......باهي باهي بالله طمني اول بأول"
🍁هيثم؛وعليكم السلام..
نزل التليفون وقال بأسف شديد:لاحول ولاقوة الابالله لاحول ولاقوة الا بالله..
"خيره ولدي"
التفت لما صوتها بنبرة البكاء اللي كانت واضحه..
قعد يشوفلها ومش قادر ينطق بكلمه..
نوال قدمتله ودموعها ينزلوا وذقنها يرجف وهي تقول؛بالله عليك قالي خيره بالله عليك..
هيثم تنحنح وقال:مافي شي خطير ماتخافيش حاجه عارضه..
نوال بنبرة باكيه:عارضه كيف عارضه..مزكوم..جاياته برده...محموم...هادي هي الحاجات العارضه دكتور..واللي خبروك بيه مش عارض بس تسترجع منه...شوف وجهك كيف مولي...دكتور قولي الحق ولدي خيره!..
ع طلعة ماحده اللي كانت تسمع في اصواتهم شافت حالة نوال بخوف قالت؛خيركم شن في؟!
نوال مسحت دموعها وقالت بحده؛دكتور قولي ولدي خيره توا..
ماجده:خيره ولدها؟..
ع طلعة سارة قعدت واقفه في الباب وهي تشوفلهم..
نوال بإنفعال؛قتلك تكلم توا قول..
هيثم بغضب؛نقصي صوت...وانتي هكي مانقولك شي..
نوال ببكي؛حرام عليك ديما هكي دير فيا تعذب فيا بيه وكأني مش امه..
جتها ماجده شدتها وقالت:استهدي بالله بنتي...وانت قول الولد خيره..
هيثم وهو عاقد حواجبه قال؛تعرض للطعن في السجن..
ومالحقش يكمل كلامه الا نوال فاقده وعيها..
وماجده شدتها ش ماطيحش ع الأرض وهي تقول:نوال..نوال..
هيثم بخوف؛خشي ديري مية وسكر فيسع..
سارة بربكه؛حاضر..
وخشت تجري...
وهو مشي بسرعه لسيارته..فتحها وطلع منها شيشة العطر متاعه وجي بيها لخالته وقال:خليها تشمها..
بخت ماجده منها ع يدها وقربتها لأنف نوال..
فتحت عيونها بالشويه وقالت بصوت يدوب طالع؛فاتح..
ع طلعة سارة بطاسة الميه والسكر...
••••••••••••
في الصاله داخل الحوش..
نوال بغضب وعيونها معبيات دموع؛قتلك بنمشي لولدي يعني بنمشيله..
هيثم بغضب؛مش عناد هو..حني من الاول متفقين شن ماصار تقعدوا هني ماتطلعوش بكل..
نوال؛مانقدرش نقعد مقعمزة هني وولدي ملوح في المستشفى ومش عارفه شن صاير فيه..
هيثم:قتلك تو يكلموني من غادي يبلغوني باللي يصير معاه اول بأول..اصلا كان مشيتي غادي شن بديري..
نوال؛عندك حق مش ولدك لو كان ولدك اللي صاير فيه راك مشيتله تجري حتى لو ماقدرت ديرله شي.
سارة وماجده بهمس:لاقدر الله...بعيد السو...
ونرجس مقعمزة تشوفلهم كيف يتناقشوا وهي تبكي..
هيثم بنفاد صبر؛ماعنديش وقت نضيعه في نقاش زي هدا..من هني مش تطلعي خطوه وحده وتم الكلام..
نوال:واني قلت بنمشي يعني بنمشي..
قعد هيثم يشوفلها بحده بعدين قال:تمام..امشي لكن بعدين دوري وين تقعدي..
ماجده وسارة شبحوله بصدمه...
وهو قال كلمته ومشي طلع...
نوال:الله الغني عنك..ربي الحافظ مش انت..
نوضي نرجس لمي حوايجك وحوايج بناتك..
ماجده:تي شن تقولي..
ونوال مشت طول وبنتها وراها..
ماجده؛وووك منك ياهيثم..
وطلعتله تجري...
وسارة معاش عرفت شن دير مشت لحقت نوال وبنتها بش تتعذرلهم وتخليهم يقعدوا..
🍁🍁
سارة؛ابله نوال صدقيني بابا خايف عليكم رغم اني مش عارفه من شني بالزبط بس اني نعرفه لما يخاف على حد مايعرفش شن يقول ولاكيف يتصرف..
نوال وهي تسكر في شنطتها؛ماتعبيش روحك بنتي وتبرري اساسا عنده حق قعادنا هني يجيبله المشاكل..
وخدت الشنطه وطلعت بيها..
ونرجس وراها وهي تقول؛قدامي ماما..ودموعها ينزلوا..
سارة ضايقت هلبه...لحقتهم وقالت..ابله نوال بالله عليك اسمعيني اللي ديري فيه غلط..اصلا بابا مش مخليكم تطلعوا..
وهما ينزلوا وهي وراهم...
وصلوا لوطا..
ومشوا للباب..
طلعوا منه..
شافوا ماجده واقفه ع هيثم تكلم فيه.
نوال خدت نفس وتصنعت القوة..
ومشت وبنتها وراها ببناتها...
هو شافهم قال برفعة حواجب؛شورها ماصدقت!
ماجده بنرفزة؛من اسلوبك البايخ..
وهما ماشيين بإتجاه..
جاها وقف قداها وهو يقول بعصبيه وبحركه اليد:خشي داخل خشي وكبري عقلك وبلاش منها طروح الاطفال هادي..
ماجده حطت يدها ع وجهها بيأس..
وسارة عضت ع شاربها وهي مفنصه عيونها..
ونرجس قعدت تشبح لأمها..
نوال بملامح وجه حاده ونظرات عيون كلها اصرار قالت:بنمشي لولدي...
🍀🍀🍀🍀🍀
في الطريق..
يسوق بملامح وجه متجهمه...
وفي جنبه خالته تشوفله بتجنب...
وهي وراهم تشبح للروشن من عينها الوحيده الباينه من البمبوك...
اللي كانت الدموع تنزل منها..
فجأة وقفت السيارة..
هي شبحت لهيثم..
وحولت البمبوك وقالت:خيرك وقفت..
ماباش يرد عليها...
نوال؛نكلم فيك..
التفتلها كيف جي بيتكلم سكت بشي من الارتباك..
بعدين شبح القدام وعقد حواجبه وقال؛غطي وجهك في واحد جاي توا..
هي شبحت القدام شافت واحد جيهتهم غطت وجهها..
وصل فيهم الراجل ودق ع الروشن..
نزل هيثم المرش وقال:السلام عليكم..
:وعليكم السلام دكتور اني من طرف الرائد راجح..
هيثم؛ترا بعد شويه...
بعدالراجل..وهيثم فتح الباب ونزل...
تباعد هو وياه شويه وقال؛دير بالك عليها وماتخليهاش تتصرف غلط..
:حاضر..
هو التفت واشرلها..
هي فتحت الباب ونزلت..
وجاته والراجل يشبحلها كيف لابسه فراشيه ومغطيه وجهها ومش باين منها غير عينها..
وصلت فيهم وهيثم قاللها؛ردي بالك..
هزت راسها ومشت مع الضابط..
وهيثم قعد معاهم بعيونه لين درقوا..
تنهد بعدين ولى ركب للسيارة وقعد يقول بتذمر:اكثر صفة نكرهها في المراة المعانديه..المراة المعانديه لاتطاق..مافيش راجل يتحمل المراة المعانديه اللي تسكر في راسها وتمشي كلمتها...
ماجده ؛باهي سلم ولدي هدي روحك مش باهي ليك الأعصاب..
هو تأفف بعدين قال:استغفر الله العظيم واتوب إليه..
سكتوا لحظات بعدين ابتسمت ماجده وقالت؛الله ع الفراشيه والبمبوك ذكرت امي الله يرحمها كانت وين تجبد البمبوك تقول..
ماتجبد البمبوك كان السمحه
تخاف على زينها يبان منه لمحه...
هو جي بين عيونه شكل وجهها لما التفت وشافلها اول مرة يشوف كويس هالمرة وبدون قصد..
وبدون قصد ارتسمت ع وجهه ابتسامه خفيفه...
وماجده متابعه تقول..
ماتجبد البمبوك كان عزيزة..
ذات اصل طيب ثابته ركيزة...
تنهدت بعدين قالت...يامحلا زمان وايام زمان خسارتها معاش تولي..
شبحتله لقاته يشبح القدام وهو مبتسم ضحكت وقالت:شني تفكرت حناك؟
هو استاقظ عقد حواجبه وشبح لخالته شويه بعدين قال؛ايه..قصدي لا..يعني عجبني البيت اللي قلتيه..
ماجده؛خيرك اللطف تلكلك شن جاك..
هيثم بإنزعاج :عقلي مش معاك ياخالتي..
ماجده بقلق؛وليدي قولي الحق شن في ورا نوال وعيلتها واضح في حاجه خطيره..
هيثم؛قتلك ماتسألنيش هلبه خالتي وماتخافيش كل شي ماشي تمام ان شاء الله...
ماجده؛ان شاء الله يارب..ربي يسترها معاها ويكفينا كل شر..
هيثم:آمين..
•••••••••••
نوال بعيون مليانه الم ودموع:حق حاله باهي؟
راجح بإبتسامه؛اطمني استاذه والله وضعه ولى كويس ومافيش خوف عليه..
نوال خدت نفس بعدين قالت؛باهي نبي نشوفه..
راجح؛للأسف ممنوع..
نوال؛ثواني ثواني بس..
راجح؛صعب جدا..
نوال:فم الباب..
مرر راجح نظره القدام بعدين شبحلها وهز راسه بإيجاب..
🍁خلاها توقف في ع الباب تشوفه..
تشوفه وهو في هديكا الحاله.....ويخطر عليها كل اللي مر بيه وعاشه..اكثر من تعذب في صغارها..اكثر من تحمل آثام بوه واهمالها هي...اكثر واحد تأثر بالفراغ اللي خلاته هي وبوه في حياة صغارهم...
جي بين عيونها موقف كانت ناسياته وتوا بس خطر عليها..
وقتها كان عمره ثمان سنوات لما جاها وقاللها...
🍁"ماما...ماما.."
وهي مقعمزه تقرا لاهيه برسالة الماجستير اللي تحضر فيها...
فاتح؛امي..
نوال بدون تشبحله تأففت بعدين قالت؛مش قتلك قبل ناديني نونو ومعاش تقول امي ولاماما..
فاتح؛علاش صحابي يقولوا امي واني لا...
نوال بضجر:افف..فاتح قول شن تبي..
فاتح شبحلها بنظرات حزن واحباط..
هي شبحتله وقالت بتساؤل؛اممم..قول؟
طلع الورقه من ورا ظهرها وقال بشي من الخجل:شوفي..
هي شبحت للورقه وخدتها..
وقعدت تقرا فيها..
كان تعبير عن الأم...كان مكتوب هلبه كلام مش مرتب بس كله كان يعبر فيه عن مشاعره اتجاه امه..
الابله عطاته عليه درجة كامله ع غير العاده في مادة التعبير..
هي ابتسمت بتهكم وقالت؛الابله الغبيه هادي ع شني عطاتك درجه كامله..الاملاء زي الزفت والخط منتهي..ومافي شي مفهوم في اللي كاتبه بعدين مش عارفه اني امتى يبطلوا يعطوا مواضيع تقليديه وممله في هالماده..هاك شد ورقتك شد..خسارة الفلوس اللي يحط فيهم بوك ع المدرسين اللي حاطهملك..انت بالذات مش عارفه لمن طالع خوتك متفوقين وديما من الأوائل الا انت..شد..
هو كان ضام شفايفه لداخل بقوة وهما يرجفوا مد يده وخدي الورقه..
نوال؛برا لنوارة خل تبدلك حوايجك وتغسلك وتغديك..
ورجعت لهت بالكتاب اللي قدامها..
وهو لف وطول دموعه طاحوا ومشي بسرعه طلع من حداها..
🍁قلبها زاد تفتت من كثر الالم ووجع الندم اللي مالاش نهايه
قعدت تبكي وهي تكتم في صوتها وراجح اللي واقف بعيد عليها يشوفلها بتعاطف بعدين قال:استاذ نوال...
نوال بصوت باكي؛شويه بس..
راجح شبح للضابط..
الضابط طول سكر الباب...
نوال غمضت عيونها بألم وقعدت تبكي بالعبره..
وراجح يشوفلها بأسف ومش قادر يديرلها شي بش يخفف عنها...
🍁🍁🍁🍁
تأفف وقال؛وينها لتوا؟!
ماجده؛وسع بالك ولدي وسع بالك اكيد الحكايه صعبه ومش ساهله مستشفى حبس راهو تلقاها فاتت ع سته وستين حاجه لما خشت وبتفوت عليهم نفسهم وهي طالعه..
هيثم؛موضوعها ساهل هي ياخالتي في عندنا داخل من يدخلها طول..
ماجده؛اهيا جت مولاة الفراشيه والبمبوك..وضحكت..
هو يدوب ابتسم....
وهي وصلت في السيارة وركبت طول..
ماجده؛هاه شن حاله..
بصوت مبحوح؛الحمدلله مافيش خطر ع حاله..
هيثم:شفتيه.
نوال:ايه من بعيد..
هيثم؛تعرفي ان مافيش مرة تانيه ولا؟
نوال بحزن؛ايه..
هيثم؛تو تعرفي اخباره اول بأول اطمني.
نوال؛لازم يغيروله السجن مايقعدش فيه هدا..
هيثم هز راسه وقال؛يصير خير..
ماجده بقلق؛يغيروا لزياد حتى هو كنهدا مانعرفوا شن يصير بعدين بعيد وبر..
شغل هيثم السيارة وهو يقول؛خير خير يصير خير...
وتحرك طول...
🍁🍁🍁🍁🍁
طلعت من دارها بعد ماجهزت نفسها بش تمشي للجامعه..
لقاته واقف في الكوجينه يفطر ع الواقف..
مريم؛جهاد تقدر تفضي روحك العشيه..
جهاد؛علاش..
مريم؛نبي نمشي لحوش ماليا..
جهاد:باهي...
مريم بضيق؛جهاد..
جهاد؛تبي فلوس..
قربت منه ووقفت جنبه وقالت؛لامانبيش فلوس نبيك انت..
هو عقد حواجبه ووقف ماكله..
هي غمضت عيونها وقالت؛قصدي نبي نهدرز معاك..فتحت عيونها وقالت..نبيك تفضفضلي زي قبل تشاركني حزنك..
شبحلها وقال؛ماتشغليش بالك عليك في قرايتك وبس هدا الشي الوحيد المهم في حياتك يامريم..
نفض ايديه وقال؛هيا...ومشي...
وهي لملمت حطامها كالعاده ومشت وراه وتحاول دير روحها عاديه حفاظا على ماتبقى من كرامتها...
🍁🍁🍁🍁
"الحمد لله من امس لليوم تخطى الخطر وحاله ولى كويس يعني مايخوفش...شن صار هني!؟"
خليل:قول شن ماصارش...قلبوا علينا الدنيا قلب والتحقيقات ليلة كامله شغاله وماوصلوا لشي..وبش يعاقبونا حرمونا من ساعة التنفس والفطور وشكله باقي اليوم بيمشي ع الميه بس...
اسعد؛بيت السبع مايخلاش من العظام حكايه الماكله خلوها عليا.
العجيلي؛مالا بنجي نبات حداك ياكبيرنا ياتاج راسك يلي مافي غير امك جابت هالصنديد المصنع المنع..
وجماعة المهجع يضحكوا..
اسعد؛انت بالذات ماك طايل مني حاجه..
العجيلي؛ بعدين والله القوي يااسعد نقعد النهار طوله نحكيلك عن فوايد النوم بكري...
اسعد بانزعاج؛تي باهي ياحصله وانت كان فتحت معاش تسكت...
العجيلي؛الله يحفظك ياكبير الله يحفظك ياغالي..وقال همسا..في ثلاجة الموتى..
خليل شد ضحكته..
والعجيلي يشوف لأسعد بإبتسامه عريضه..
🍁وفي المهجع التاني..
قعد زياد حابس روحه في داره ماباش يطلع منها...
داير روحه يقرا...بس قلبه كان واكله ع صاحبه ومرعوب من الوضع اللي كله غامض ويخوف الباين فيه مش زي المدرق.
وبدت بفاتح ومش معروف عند تنتهي..
🍁🍁🍁🍁🍁
الساعه الحاديه عشر صباحا..
يسوق في سيارته واللي يشوفه ملامح وجهه يقول حامل ع ظهره هموم اهل الأرض مجتمعه وزايده كلام امه اللي يزيد فيه على مابيه..
عيشه؛توا بنتي بتردي بالك الشهور الاولى وضعك فيها حساس معاش نبيك تحركي شي ولاديري شي وكان تاخدي اجازة من مدرستك خيرلك..
جيهان وهي مبتسمه:نفكر ناخد اجازة.
عيشه؛ايه احسن..وانت جموعه اقعد دابك داب مريتك ورد بالك منها الفترة هادي حساسه ولدي لازعل ولانفسيه تاعبه ريحها ع قد ماتقدر..
جمعه في نفسه"واني نفسيتي تتقربع عادي! الشيطان يوسولي نديرها توا ونقلب السيارة.."...افف..استغفر الله العظيم..
جيهان تلاشت ابتسامتها..
عيشه؛خيرك!؟.
جمعه؛نستغفر ربي..الاستغفار يفرج الهم ..
عيشه شبحت القدام وهي تحرك في راسها يمين ويسار..
وجيهان غيرت عيونها عنه وشبحت ليدها اللي حطتها ع بطنها وقالت في نفسها.."جيت في وقتك ياعمري بيك انت حيقعد بوك مربوط بيا وبخوتك حنزيد نربطه لأخر العمر..شبحتله برفعة حاجب وقالت في نفسها..
"ومش حتكون لغيري ياسيد جمعه"
🍁🍁🍁🍁
وفي المدرسه الثانويه للبنات..
الابله؛هي افتحوا الكتابات خل نأشرلكم ع اهم الرسمات اللي بيخشوا للإمتحان...
فتحوا البنات كتاباتهم..
وانبار قالت؛افف سخنت..حولت كبوطه وحطاته جنبها وبدت تكتب..
ودانيه شبحتلها شويه وجت بتغير عيونها ثبتتهم فجأة لما شافت لشعر انبار اللي طالع من تحت الشاربه..
استغربت في لونه..
بعدين غيرت عيونها عنها وشبحت للأبله وبدت تأشر معاها..بس عقلها قاعد يفطر في لون شعر انبار الرمادي..
والفكرة تجر لين وصلت لنتيجه صدمتها..
شبحت لأنبار بصدمه..
وانبار لاهيه تأشر مع الأبله...
الأبله؛خلاص كلكم اشرتوا..
هما بأصوات متقطعه؛ايه...نعم..
الابله؛تمام...موفقات...ومشت طلعت من الفصل..
دانيه شبحت لأنبار بعدين قالت:ترا قوليلي ع اخر رسمتين ماكنتش مركزة معاها..
انبار ابتسمت بفرح وقالت؛باهي..هاتي كتابك..
خداته وقعدت تأشرلها ودانيه تشوف لشعرها..
بعدين تجرأت ومدت يدها وشداته وقالت؛طبيعي ولاصبغه..
انبار انصدمت وشبحت لشعرها بعدين قالت؛صبغه.
دانيه طلقت شعرها وقالت؛علاش اللون هدا بالذات..
قعدت انبار تشبح لدانيه ودانيه تشوفلها.
بعدين قالت؛اني عندي مشكله يعني..عيلة ابويا كلهم عندهم شيب مبكر واني ورثته منهم..وزي.ماتعرفي حاجه زي هادي محرجه هلبه...وياما ضايقتني امي ماعرفتش شن ديرلي..
لكن عمي يوسف راجلها اقترح عليا نصبغ شعري باللون هدا بش معاش يبان وكيف ماقال نولي مميزة..ابتسمت ودموعها في عيونها وقالت...وحق حبيت شعري بعد صبغته..
دانيه؛انتي؟
انبار شبحتلها شويه بعدين ابتسمت وهزت راسها بإيجاب..
ابتسمت دانيه وخدت كتابها وقالت؛شكرا...
انبار؛العفو..
قعدت دانيه تكتب ع كتابها بالقلم ودفاته لأنبار...
انبار خداته وبدت تقرا..
(طلعي روحك من المشاكل مش ليك ياانبار)
ابتسمت وقعدت تكتب بعدين دفت الكتاب لدانيه..
خداته وقعدت تقرا..
(الموضوع تسكر خلاص)
شبحتلها دانيه بإبتسامه..
وانبار ابتسمت وغمزت بعينها..
ضحكت دانيه وقالت بحركة الشفايف"ياخطيره"
فهمتها انبار وضحكت..
ع خشة ابله الماده التانيه...
الزوز بسرعه دسوا كتاباتهم وطلعوا كتابات وكراسات الحصه الحاليه...
🍁🍁🍁🍁
في العياده..
عندها مراجعه وفي نفس الوقت بتشوف جنس المولود...
الدكتورة؛توا في بداية السادس انتي اكيد يبان ..
رتاج؛يارب نبي نعرف ونرتاح...
امها شدت يدها وطبطت عليها..وهي شدت ع يد امها..
والدكتورة بدت الفحص..
طلعت صورته ع الشاشه...
سدينه وعيونها معيبات دموع:ياعمري..
ورتاج تشوفله ودموعها ينزلوا...
الدكتورة ابتسمت وقالت؛لاخلاص ولى واضح توا..
رتاج وسدينه شبحولها بلهفه..
والدكتورة التفتت بتخبرهم...
🍁🍁🍁🍁🍁
الساعه السابعه مساءا...
في حوش اهل مريم...
امها؛لا لازم تمشي تشوفي كان الوضع بيناتكم عادي ومش دايرين برنامج..قريب تسكري خمسه شهور راك..
مريم:وكان ياماما يعني شن فيها..هلبه حملوا بعد السنه..
امها؛لالا يابنتي لا وضع زي هدا ماتهمليشي ماتندريش مرات لاقدر الله في مشكله تتعالج توا خير من بعدين..
مريم تنهدت بضيق..
امها قالت؛بنت قولي الحق صايرة حاجه في الموضوع هدا وماتبيش تقوليها..
مريم؛شن بيصير يام يعني...!
ع دقة باب الحوش..
واحد من خوتها فتحه؛اووو خالتي خديجه..
مريم في نفسها"شن جابها هادي توا..."
ع خشتها وهي مبتسمه؛السلام عليكم....مريومه..
ابتسمت مريم مجامله..
وجتهم سلمت عليهم بعدين قعمزت..
مريم؛شن حالكم؟
مريم وامها:الحمد لله..
ام مريم؛من جابك؟
خديجه؛جابني رضوان وتسقد بيروح بدنيا مرت ضرار من حوش ماليها تغدت عندهم اليوم بروحها ضرار ولدي ياناري قاتل روحه في الخدمه ليل نهار ومعاش حصل وقت لشي..
ام مريم؛ربي يعاونه...
خديجه:آمين..ايه مرومه شن تخبرينا مافيش حويجه..
ام مريم:كيف كنت ندوي في نفس الموضوع..
وهي بدت تسمع في كلامهم ونصايحهم ومن داخلها نادمه اشد الندم ع جيتها....
🍁🍁🍁🍁
وفي مكان بعيد جدا....
كان في من واصل لاقصى مراحل الغضب والألم..
بشر..
بعد ماسمع باللي صار لفاتح وفهم كويس المغزى اللي يبي يوصله الرايس من رسالته...
بعد ماطلع.غضبه ع اثاث مكتبه كله قال وهو يتنفس بسرعه من الغضب:اسمع..كلمه توا وقوله ابعت من تبي يجي ياخد الفلاش معاش نبي منه شي..
المحامي؛حاضر..
ومشي طلع من حداه..
وبشر من القهره والغيظ....عض ع يده بقوة وهو يصرخ في صرخه مكتومه..ودموع القهر ينزلوا من عيونه.
•••••••••
الرايس:يعني كان ضروري ندير هكي بش هو يسمع الكلام..
"سيد مسعود.ابعت اي حد من طرفك بش يستلم.الأمانه"
الرايس؛تمام تمام...قوله غدوة يكونوا عندك...
وسكر..بعدين رفع حاجبه وقال؛ماتمشوش الا هكي...وقال شتم بذيء...
فجأة دق باب داره..
"ياشيخ العشي قربب يذن"
عقيل:جاي جاي...دسه التليفون..
بعدين سوا هيئته ومشي طلع....
🍁🍁🍁🍁🍁
وتاني يوم...
في سويسرا..
كانوا جماعة الرايس عنده في الفيلا...
سلمهم بشر الفلاش وحس انه وقتها يعطي في روحه...
اللي خدي الفلاش قال؛يسلم عليك.الرايس هلبه ويقول..
وطلعه سلاحه ووجهه ع راسه بسرعه وكمل يقول..بنستاحشوك..
وبشر في خلال اقل من ثانيه اللي حصل فيها اكبر صدمه في حياته..
مر قدامه شريط في كل شي سيء داره في حياته واخرهم اللي صار اللي ولده...
خاف هلبه هلبه...بس خلاص زمن الفرص انتهي..
واطلق عليه راجل الرايس وأرداه قتيلا.
بعدين بسرعه قلبوا الحوش كله وقعدوا يدوروا فيه مالقوا شي مهم..
وبعدها طول طلعوا هاربين من الحوش...

#صلوا_على_الحبيب
#ياقلبي_ياأمي
#البطل_المغمور2