البطل المغمور (الجزء الثاني) زهور القمر

الجزء الخامس عشر

#البطل_المغمور2  "زهور القمر"
#جمان_فريد
#الجزء_الخامس_عشر "كفاح"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
🍁في الطريق...
كان جهاد اللي يسوق في السيارة يفكر بإستمرار مابطلش تفكير في وضعهم اللي بادي يدهور تدهور كبير..
وامه حتى هي في سرحانه تخمم كيف بيديروا وكيف بيصير فيهم..
خطروا عليها ايام عاشت فيهم اتعس الظروف وشافت فيهم المر..وبعد ماخلاص كانت نستهم رجعت تعيشهم من جديد..
وغيرهم سارح في عالم وردي حلو...كله الوان مبهجه..
معبي ورد وفراشات ملونه وحب في حب..
هادي كانت سارة...
لما وصلوا للحوش...
حطهم جهاد ومشي يشوف حاله يشوف شن يقدر يدير ويدبر...
اما سارة وعفاف خشوا للحوش..
سمعت عفاف صوت تعرفه كويس..
سرعت خطواتها لين وصلت للصاله وشافت صاحبته
عفاف؛حاجه صالحه..
صالحه ودموعها في عيونها؛عفاف بنتي..
وجتها عفاف وضمتها وبدت تبكي..
وصالحه طبطب عليها وهي تقول:معليشي بنتي معليشي هكي ربك كاتب..
ومريم ونسيبه وتهاني وسارة يشبحولهم بحزن...
شويه نسيبه شافت سارة وقالت؛تعالي سارة خودي مفتاح الشقه..
سارة مشتلها خدت المفتاح وقالت؛وين التوأم..
نسيبه؛يعلبوا برا..
هزت راسها ومشت طلعت من الصاله..
عفاف:قلنا شكلها صالحه دارت زي مادارو باقي الناس.
صالحه؛لا والله مانديرها..مانكذبش عليك ملاك وراجلها كانوا يشدوا فيا وين نقول نبي نروح وين شديت في الصحيح قالي راجلها اقعدي معانا وانا نقوله لا هداكا حوشي..قالي..مررت نظرها عليهم وهي مضايقه...لو بتقعدي عندهم مانقدرش نخلي ملاك تواصلك..
ابتسمت عفاف بتهكم..
نسيبه؛وعلاش!؟
صالحه؛قال نحساب خليل تاب وفاته الجو القديم حق لكن بعد اللي صار اني خلاص معاش نبي شي يربطني بيه وبعيلته نبي نعيش حياتي من غير مشاكل ساد اللي صار قبل..
تهاني ابتسمت تهكما..
عفاف:كان قعدتي معاهم ياحاجه خيرلك..
صالحه:وتبيني نبيعكم! نبيع الناس اللي وقفت معاي في وقت الشده وماخلونيش اني والصغار اللي معاي نباتوا في الشارع...مانيش قليلة اصل اني ياعفاف..
عفاف:لاحشاك ياحاجه...مانقول كان ربي يسامح نيار والحق مانقدر نلومه معذور حتى هو..
صالحه سكتت وماعلقتش..
عفاف تنهدت وقالت:مالا وين عرفه؟
تهاني:برا يلعب...
🍁في الجنان...
"معناها انتي توا تقدري تلعبي"
ريحان:ايه ونخش لنادي الكارتيه..
جنان؛بالشويه مازال راهو..
ريحان؛عارفه نحكي ع بعدين..
عرفه؛باهي هاكي الكورة ومعاش تضربيها ع حاجه فيها مسمار..
ريحان خدتها وقالت:باهي..برا اوقف بعيد بعيد..
ضحك عرفه ومشي وقف وين ماقالتله وقال:وريني شن بديري..
ريحان؛تو تشوف...
وحطت الكورة قدامها...
وخرت كم خطوة بعدين قدمت بسرعه وضربت الكورة ودارت هدف..
وعرفه مصدوم..
ريحان حطت ايديها في نصها وقال؛هاه شفت ولالا..
جنان بضحكه؛صحه لأختي..
عرفه ضحك ولف ومشي جابها حطها قدامها وضربها بقوة..
وجت بين ايدين ريحان اللي رفعتهم بش تشدها..
جنان؛صقع عليك..
وريحان ترقص في حواجبها..
وعرفه يضحك عليهم..
🍁فهالوقت..
خش رفيق للحوش..
شاف سارة وهي خاشه دار الدروج وسكرت الباب وراها..
قلبه والعه فيه النار تحرق في روحه حرق...
مشي طول خش للحوش..
فات من قدامهم في الصاله وماسلمش وكلهم مستغربين فيه..
وهو خش جناحه بغضب..
خبطه الباب فجعت سجى اللي كانت لاهيه بتليفونها ..
وولدها ناض يعيط..
سجى وهي مخلوعه؛خير دعوتك..
رفيق ؛ضم فمك خيرلك..
ومشي خش للحمام وسكره عليه..
وخش تحت الدوش وفتحه عليه والميه الباردة تصب عليه وهو بحوايجه..
كان يبي يبرد ع روحه شويه...لكن الميه كان وكأنها بنزينه تزيد تشعل في النار اكثر واكثر...
🍁وعدت الساعات عليهم زي ماسبقها من ساعات كلها هم وتخميم وبس...
••بعد العصر...
كانوا كلهم داخل...
ماعدا سارة وتهاني اللي في الجنان يسيقوا فيه..
تهاني:الله!
سارة وهي شاده السياقه وتتكلم بحماس وفرح؛والله ياتاهو ليله كامله ماغمضتلي عين...لتوا قلبي يدق بقوة..
تهاني بضحكه؛سعدودك قداش حلو الشعور اللي حاسه بيه يارب يجي يوم ونحسه..
سارة بإبتسامه؛ان شاء الله مع الشخص الصح اللي يسعدك تاهو..
تهاني ابتسمت بحسرة وكملت جبد في الميه..
وسارة معاها وعقلها بس مع مجاهد...
🍁🍁🍁🍁
في وحده من الحدايق العامه..
كان مجاهد يدهور ببوه ع الكروسه كانوا الجو بينهم ودي وهدرزتهم حلوة..
وقعمزوا مع بعض في تركينه ومجيد فتح معاه الموضوع..
مجاهد بضحكه؛زواج شني؟
مجيد؛كيف زواج شني..بتقعد عازب عمرك كله؟
مجاهد بإبتسامه:اكيد لا..بس استغربت انك انت فتحت معاي موضوع زي هدا..
مجيد:علاش!؟
مجاهد بضحكه؛خلينا في المهم..الحق حتى اني بنفتحه الموضوع هدا بس نراجي في حاجه..
مجيد؛كويس...والعروس واتيه..
عقد مجاهد حواجبه وقال:واتيه!؟
مجيد؛ايه بنيه ماشاء الله عليها بنت عيله ومتدينه وتناسبك..بنت اخت مقبوله..
مجاهد بدون مايحس قال بنفاذ صبر:يادي مقبوله وسنين مقبوله اللي خاشه في كل شي..
مجيد وهو يفنص فيه؛مجاهد!
مجاهد بهدوء؛سامحني يابوي لكن اني عندي بنيه حاطه في بالي ونبيها..
مجيد؛من هي!؟
مجاهد:تو يجي وقتها ونقولك..
مجيد؛ باهي..في النهايه انت اللي بتتزوج ومن حقك تختار واني عارف اختيارك..
مجاهد هز راسه وهو مبتسم...
🍁🍁🍁🍁
مقعمز في مكتبه يشوف في ملف قدامه..
دق الباب..
راجح؛خش..
انفتح وخش داوود وهو يقول؛راجح..
وسكر وراه الباب..
راجح شبحله بتساؤل..
داوود قعمز قدامه وقال:في بالي هلبه اسئله..هلبه حاجات غامضه ومش واضحه..
راجح:زي شني..
داوود؛كابوريا اللي مقتول هو وجماعته في ********* كان يخدم لصالحنا فعلا؟
راجح هز راسه بإيجاب..
داوود؛باهي علاش خليتوه يهرب علاش ماانشدش وتحاكم..
راجح؛ماخيلنا حد يهرب ياداوود..
داوود؛تبي تقول هو لعب لعبته وكان ناوي يهرب من البلاد..
راجح؛هدا الواضح..
داوود قعد ساكت وهو يفكر بعدين قال:المنظمه هادي بش تنحل وتنتهي لازم تنضرب من تحت لفوق..
راجح؛وهدا اللي قاعد يصير..ولازم تنضرب من داخل..ينخروها نخر..
داوود رفع حاجبه وابتسم بعدين قال:ايه..مش حنعرف الا لما يجي الوقت المناسب..
ضحك راجح وهز راسه بإيجاب..
داوود ناض وقف حياه..بعدين مشي طلع من المكتب..
وراجح رجع يشوف في الملف اللي قدامه..
🍁🍁🍁🍁🍁
"شكلي مش حنلحق عليه خسارة"
عواطف:اقعدوا للعشي باهي..
جيهان؛لاياماما عشي شني ساد الغدي وبعدين امه تراجي فينا..
عواطف:مانوصيكش عليها بنتي ماتخليهاش تشد عليك شي..
جيهان؛اهم شي عندي لانعول ولانمد يدي ع حاجه مش واخديني خدامه..
عواطف؛ماتخافيش مفهمتها كل شي قلتلها بنتي مدللة ومش واخده ع التعب..
جيهان هزت راسها وقالت:كويس..المهم توا الهديه هادي عطيها لراجح متاع خطيبته..
عواطف؛والله حتى اني فاضيه متعبه روحك وجايبه هديه من غادي كان خديتي حاجه من هني وقلتي من غادي والله ماهي زابطه حاجه...
جيهان بضحكه؛ع خاطر راجح بس..
عواطف:ربي يهديه هالراجح وخلاص...
جيهان:هي خلاص بنطلع جومعه مايحبش يستنى..
سلمت ع امها بالخد وقالت..سلمي ع راجح هلبه..
عواطف:يوصل...
سقدت عواطف جيهان..
اللي مشت ركبت سيارة راجلها وهي تقول:عطلت عليك.
جمعه؛ساعه!
جيهان:عطيتها الهديه اللي طلبها راجح..
هو قلب عيونه وتنهد بملل بعدين شغل السيارة وتحرك..
وهي تشبحله بطرف عينها...
🍁🍁🍁🍁🍁
"الحال معاش زي قبل واني مجبورة نولي نخدم زي زمان"
صالحه؛اطيبي للعراس!؟
عفاف؛خير مانمد يدي ياصالحه ونكون حمل ع صغاري خل نعاونهم..اللي هدا توا دار عيله وان شاء الله يلقى مايوكلهم..
صالحه؛يرضولك بيه..
عفاف:مانراجي فيهم يرضوا ولا لا...
صالحه تنهدت وقالت؛خلاص اني وياك غدوة الصبح ان شاء الله نمشوا لكونيه تعرف مناسبات طرابلس كلها تو تلقالنا وين ندكوا رووسنا..
عفاف هزت راسها وقالت؛باهي...
ومن الجنان...لفوق السطوح وين مافي الولاد يتكلموا في نفس الموضوع..
رفيق وهو يأشر ع نفسه؛تبيني اني نخدم عند حد يأمر وينهى ويتحكم فيا اني بعد ماكنت صاحب ورشه نولي نخدم عند الناس!
جهاد؛خلاص خليك كمل فلوسك ع السم اللي تشرب فيه ومرتك وولدك يوكلوهم ماليها..
رفيق:اخر حل اللي قلته هدا..
جهاد خبط كفوفه ببعض وقال:هو هذا الحل الوحيد مافيش غيره..خبط كفوفه مرة تانيه وقال...مافيش غيره..الفلوس خلاص راهو..بح...
رفيق؛نبيعوا المزرعه..
جهاد:مستحيل...نستحقولها المزرعه..
رفيق؛وفي شن مستحقلها وهي مزرعه بالإسم بس مافيها شي..
جهاد؛ولو نحتاجوها في حاجه اكبر..توا مادام فينا صحة وجهد نخدموا..
رفيق:باهي وين ياباشا في حد هني يرضى يخدمني اني وياك..
جهاد؛برا طرابلس في الضواحي..مش كل ناس سامعه باللي صار..
رفيق:وبرا طرابلس فوق البهدله تمرميد!
جهاد؛هدا الموجود...شن قلت!.
رفيق حط يده ع شعره شده بقوة من العصبيه بعدين طلقه وقال:باهي باهي باهي..
جهاد ارتاح لأنه وافق...غمض عيونه وزفر بعدين فتحهم وشبحلهم بإمتعاض...
••ومنهم للي تحت منهم..
شقة خليل...
نسيبه؛اليوم تمت اجازة المعلمين غدوة لازم نمشي..
سارة:تمام ماتخميمش فينا..
نسيبه؛مش معطله كلهم ساعتين مش اكثر..
سارة؛باهي...
نسيبه سكتت شويه بعدين قالت بنبرة زعل؛كلمتي بوك؟
سارة:ايه خالتي عنده..
نسيبه تنهدت وهزت راسها...
سارة:عميمه خلينا نتعشوا هني اليوم..
نسيبه؛حتى اني هكي فكرت  الثلاجه معبيه نتعشوا هني الليله وغدوة نزل معاي حاجات لوطا نفطروا بيهم..
سارة بضيق:حسيت الوضع مش تمام...يعني بكري سمعت خالتي عفاف تقول لتهاني بالشويه ع الزيت والطماطم واللحم طيبي مايدير بنه..
نسيبه بضيق:ايه..برغم خليل جاب بضاعه قبل مايصير اللي صار لكن ماسدتش وحني عيله..وهما العرس خدي منهم هلبه حطوا فيه اللي هناك وتوا الورشه ينشوا فيها الذبان معاش في حد جاهم..
سارة:قلبي وجعني..
نسيبه هزت راسها وقالت؛يفرجها ربي من عنده..
سارة بحزن:آمين...
🍁🍁🍁🍁🍁
وعدت هالليله زي الليالي اللي سبقوها..
قله نوم وراحه...وتخميم في تخميم...
وطلع اليوم التاني...
جهاد جر رفيق جر بش يطلعوا يدوروا ع خدمه في الضواحي..
بعدهم بساعتين..
طلعوا عفاف وصالحه لكونيه بش يشوفوا مصلحتهم عندها وطول الوقت وهما يدعوا ينولوا مرادهم...
ونسيبه مشت للمدرسه...
وياريتها مامشت...
••تشبح للطاوله اللي قدامها وقالت:شن هدا!؟
المديرة؛ملفك ابله نسيبه..
رفعت نسيبه حاجبها وشبحتلها..
المديرة؛ما تواخدنيش ياأبله بس اني من بعد اللي صار مانقدرش نخليك في المدرسه وهدا راهو طلب اولياء الامور في اجتماع مجلس الأباء اللي درناه امس..اسفه جدا للضرورة أحكام..
ابتسمت بتهكم..ومدت يدها وخدت ملفها وهي تحاول تتحكم في رعشه الغضب...حبست دموعها بكل قوة..
ورسمت ع وجهها ابتسامه لامباليه مصطنعه وقالت:تمام مافيش مشكله...شكرا ياابله..
المديرة هزت راسها وقعدت ساكته..
ونسيبه لفت ومشت طلعت حتى من غير ماتسلم خافت لو تكلمت تاني تبكي..
عمرها ماتخيلت يجيها يوم تتعرض لشي زي هدا..
ليها سنين في مهنة التدريس وكان محط احترام واهتمام الجميع..
لما سيبت مدرسة البنين الثانويه كادر المدرسه بالسيف خلوها تطلع..
وتوا من مدرسة ابتدائيه تطرد طرد...وزي مانقولوا تنلز لز..
هي هكي الدنيا..يوم فوق ويوما لوطا...
مرة في الرخاء ومرة فشده..والرابح هو اللي يصبر ويصابر ويرابط...
🍁🍁🍁
"شن بنقوللكم ياوخياتي لتوا ماعنديش الحق بس تو نزيد نشوف ونرد عليكم"
عفاف برجاء:بالله عليك ماتنسينا مستحقه والله..
:ان شاء الله ان شاء الله وخيتي خل رقمكم وين نلقى نكلمكم..
عفاف بلهفه:حاضر..هاتي هاتفك نسجلك رقمي..
المراة مداته لعفاف..
وصالحه تشبحلها وهي متأسفه ع حالها مش هاينه عليها عفاف يصير فيها هكي...
🍁وكنة عفاف وهي مروحة في سيارتها..
كانت تبكي بصمت لعند ماحست روحها مش قادرة تسوق..
درست وهي شاده الدومان وتبكي..وتبكي..
لعند ماتفكرت جزء من المكالمه اللي صارت بينها وبين راجلها..
"حبيبتي نوصيك مرة تانيه خليك قويه يانوسه اني نقوى بيك انتي بعد الله...خليك قوية حبيبتي تمام"
غمضت عيونها وخدت نفس عميق...بعدين فتحتهم وقعدت تمسح في دموعها...وهي تمرر في نظرها حواليها تشوف كان في حد شافها وركز عليها...
ثبتت نظرها يمينها ع مبنى عليه يافطه..
مكتوبه عليها "المروج "رياض وحضانة أطفال...
ومكتوب تحتها"مطلوب موظفين"
شدت الدومان بقوة..وقعدت تفكر..
لو فكرت تشوف مدارس تانيه ممكن يعرفوا باللي صار معاها ويرفضوها...بس روضة الأطفال ممكن مايدققوش ع امور زي هادي...
ممكن...
قالت لنفسها خل نجرب حظي..
نزلت من السيارة ومشت خشت لمبنى الروضه...
•••••••
:هو لتوا شبه اكتفينا قعد بس مكان فاضي لأبله ترد بالها من صغار الحضانه..يعني تلعب معاهم تغيرلهم تخش معاهم الحمام وهكي يعني..تقدري .
نسيبه تحاول تبان عاديه ومن داخل قاعده تتحطم:ان شاء الله...
:خلاص عبي البيان هدا وراجي منا اتصال..
نسيبه هزت راسها وخدت البيرو وبدت تكتب ومش قادره تتحكم في رعشة يدها..
ومديرة الروضه تشبحلها لين كملت .
دفتلها نسيبه الورقه وقالت؛ياريت تردوا عليا في اقرب وقت..الوظيفه هادي ضروريه بالنسبه ليا..
ابتسمت المديرة وهزت راسها..
ونسيبه طلعت من عندها وهي تحاول تتماسك ع قد ماتقدر...
ولأن نفسيتها كانت تاعبه ماروحتش للحوش طول..
مشت درست بسيارتها حدا البحر وسكرتها عليها ورجعت تبكي من جديد..
🍁🍁🍁🍁
فهالوقت في الحوش..
سارة كانت مقعمزة برا مع خواتها..
وداخل تهاني ادير في القهوة...
ومريم في شقتها ضم فيها..
وسجى في جناحها شادة تليفونها وولدها وبس..
ع خشة راجلها للحوش وهو معصب..
كانوا كل مايخشوا ورشه يطلبوا يخدموا فيها مايحصلوش..
ماتحملش الوضع روح وخلا جهاد بروحه مازال يدور ويدور..
وهو ماشي بيخش للحوش..
سمع صوت يهز في كيانه هز...
سارة؛ماتبعدوش...
خواتها؛-حاضر...
تبع الصوت لين وصل في مكانها حدا الكوجينه..
كانت مقعمزة تكتب ع اللاب توب متاعها..
ساوا روحه وقدملها لين وصل فيها..
رفيق:سارة شن جو..
هي غمضت عيونها وفتحتهم بضجر وناضت..
رفيق:لا بالله خليك بنقولك كلمتين بس ارجوك ولو لمرة وحده اسمعيني..
سارة بحده:انت بش تفهم قولي بس تفهم اللي في بالك مستحيل يصير طلعني من راسك لو سمحت ومعاش تعب روحك معاي..
وجت بتخش..هو شدها من ذراعها..
سارة بعيطه؛شن دير...وجبدت ذراعها..
خواتها قعدوا يشبحولها..
ومريم وقفت في البالكونه وقعدت تشبحلهم..
وتهاني طلعت تجري من الكوجينه..
رفيق بنظرات كلها غضب:مستحيل معاي اني بس لكن مع غيري ديري مواعيد وتقعمزي وتهدرزي..
تهاني :رفيق!
رفيق:سكري فمك انتي..وانتي اشبحيلي جاي..شوف لعيوني كويس..ياسارة كان ماكنتيش ليا مش حتكوني لغيري..واللي يفكر ياخدك مني ورب الكون..نقتله بالله نقتله..
سارة من الخوف مشت تجري وخشت داخل وخواتها لحقوها..
تهاني بقهر:حشمتنا حشمتنا الله يحشمك..
ومشت خشت لحقتها تجري...
اماهو لف ومشي وهو يقول:نقتله
ومريم معاه بعيونها وهي تشوفله بإزدراء بعدين خشت داخل..
🍁وسارة ركبت لشقة عمتها هي وخواتها وسكرتها عليهم..
ونبهت خواتها مايحكوا شي من اللي شافوه نهائي لعمتهم..
وقلبها من داخل يرعش من الخوف ع مجاهد وتهاني مسكينه مالقتش قدامها غير البكي..
ماتقدر دير شي غير انها تبكي ع حظها وع حال حياتها اللي ماباش يتعدل بكل..
🍁🍁🍁🍁
في السجن ..
وقت الغدي...
المساجين قعدوا يخشوا للمطعم واحد ورا التاني..
اسعد؛ننقاني جعان...نشوفوا اليوم شن دايرلنا الشيف..
وخش ووراه جماعته..
وخش بعدهم خليل..
ومع خليل زياد وجماعته..
الحرس خلوا الكل يخشوا ماعدا زياد شده اللي تعارك هو وياه امس..وقاله..لف وارجع..
وقف خليل واللي معاه والتفتوا وقعدوا يشبجولهم..
زياد عقد حواجبه وقاله؛كيف!
واحد تاني قاله؛اللي سمعته..تحرك اطلع..
خليل جاهم وقال:علاش شن دار بش تحرموه الغدي!؟
؛انت مادخلكش برا في حالك..
خليل:لا مش ماشي لين يخش معاي..
؛مالا اطلع انت وياه..
خالد ناض وجاهم وهو يقول:امسحها في وجههي ويخليهم يخشوا..
خليل قال:اني طالغ..
ومشي طلع وزياد شبح لخالد شويه بعدين لحق خليل..
عقيل واسعد والعجيلي كانوا اكثر من مركز ع وضع خليل مع بوه...
خالد وهو مضايق ومحرج مشي ولى لمكانه والعيون عليه...
🍁برا..
زياد؛خليل..
خليل:امم..
زياد؛شن صاير بينك وبين بوك..علاش تعامل فيه هكي..
خليل؛مانبيش ندوي فيه الموضوع هدا..
زياد تنهد وقال:ع راحتك..
جو الزوز حدا حيط وقعمزوا ع رووس صباعهم..
وقعدوا ساكتين..
بعدين خليل قال لزياد:حاول هني تمشي جنب الحيط..
زياد؛قصدك تبيني نشوف صاحبي يغلطوا فيه ونسكت..
خليل:ايه اسكت..ع خاطر بوك تسكت..
زياد بضيق؛ماتعلمتش منه حاجه زي هادي..ماتعلمتش نرخي بصحابي وقت يحتاجوني نعطيهم ظهري..
خليل:لكل مكان قوانينه والمكان هدا لازم تمشي بقوانينه بش تطلع منه..
زياد:باهي علاش انت ماديرش هكي؟
خليل ابتسم وقال:انت امانه عندي يازياد..عمتك توصي فيا عليك..
زياد ابتسم وقال؛تعرف...توا بس عرفت ان عمتي مايصلحش بيها راجل غيرك ولاانت يصلحلك غيرها..
خليل ضحك..
زياد؛جديات ليوم الدخول واني مش راضي ع زواجها منك..لين ربي خلاني نسمعك تحكي بالتليفون صدفه بش يثبتلي اني غالط..
خليل؛زياد...للموت زياد..مايطلع منك شي...مش حني بس اللي ننضروا..
زياد؛تي خلاص ياراجل فهمت معاش تعاملني زي المفرخ..
قعد يضحك خليل..
ع جية فاتح وفيده سفرة؛شباب..
شبحولها وهما متفاجئين..
زياد؛كيف طلعت بيها..
قعمز ع روس صباعه وحطها قدامهم وقال؛هداكا بو كرش خش فيها وخلاني نطلع.
خليل؛اسعد!
فاتح:ايه..
زياد:كيف صار..
فاتح؛مش عارف مافكرتش الحق همي كله نطلعلكم غداكم بس..
زياد؛جديات مستغرب في هالحاله مجرم زيه الشرطه ديرله اعتبار علاش..
فاتح؛ماهو الدنيا توا ماشي هكي..الاعتبار يندار للمجارم والفاسدين بس..
زياد؛وباهي شن تغير في وضعه السجن..
خليل:تغدوا تغدوا وبلاش كلام في مواضيع تغم..
فاتح بضحكه؛صدقت..
خليل؛تعرف تطييبك خير من تطييب امي..
ضحكوا..
خليل بضحكه:حي عليا كان تسمع..
ضحكوا تاني وزياد قال..
زياد بضحكه؛عندي اختي تغير منه فاتح..
وبدي قلب فاتح يدق بقوة وخاف صوته ينسمع..
زياد؛وين نمدحوا ماكلته تقول معاش تبالغوا اني نطيب خير منه..
قعد خليل ياكل وهو يضحك..
وفاتح يتفرج ع السفره وهو يعاني من قلبه ويذكر في اليوم اللي مشالهم فيه للحوش وين كتبلها رقمه شن دارت..
يدوب ابتسم بعدين قعد يشوفلهم وهما ياكلوا..
فاتح؛سهفتوني..
حطله زياد خبزة في فمه..وقعد ياكل في الماكله التانيه..
فاتح بصوت مغموم؛سم..
وزياد وخليل يضحكوا عليه..
🍁🍁🍁🍁
"وعلاش ماتبيش تنزلي"
سارة؛بنكمل المقال بش نبعته..
نسيبه؛نخلي معاك البنات كان هدا..
ريحان؛لانبوا نلعبوا لوطا...
نسيبه:لا حبيبتي الجو مش جو لعب عجاجات وغبيري..
سارة؛خلاص اسمعوا الكلام..
سكتت ريحان وهي مضايفه..
ونسيبه مشت طلعت من الشقه...
سارة بهمس ودموع خوف؛يارب امتى يطلع بابا بس...
🍁لوطا..
نزلت نسيبه وقعمزت مع العيله..
وتهاني كانت خايفه لو تكون سارة حاكيتلها حاجه..
عفاف؛خيرها سارة مانزلتش بكل لاع الغدي ولاتوا..
نسيبه:عندها مقاله مشغوله بيها..
عفاف؛باك ماعجبهاش الغدي نديرولها حاجه تانيه..
نسيبه؛لالا شن ماعجبهاش هي هكي لما تكون مشغوله بحاجه  ماتاكلش..
عفاف هزت راسها بعدين قالت؛وينه جهاد لتوا..
مريم:في الخدمه قال بنعطل..
عفاف؛حصل خدمه!؟
مريم:ايه في سوق الأحد..
عفاف؛غادي!
مريم بإبتسامه:لكن قال ورشة ماشاء الله عليها وصاحبها راجل كويس..
عفاف تنهدت بضيق وقعدت ساكته..
صالحه تبي تغير الجو:شن رايكم نديروا عاله..
نسيبه:ياريت..
مريم؛خلاص تو نوتيها..وناضت تجري..
عفاف غمضت عيونها وقعدت تضحك غصب عنها..
وهما ضحكوا معاها..
عفاف بضحكه؛سلامتها وخلاص..
🍁وقعدت مريم باقي اليوم وهي تهدرز وتبصر وتنكت يش طلع الكل من حالة الحزن ونجحت..
وكانت تعاون فيهم ع كل خشت قلوب الكل بطيبتها وروحها الحلوة.
بالذات عفاف اللي حبتها هلبه..
بس هي من بين قلوب كل الناس تبي تسكن قلبه هو..
اللي قلبها تقطع عليه وين شافاته مروح مهدود من الخدمه..
ارتمي ع السرير طول .
مريم:ماترقدش خل نجيبلك تاكل..
جهاد وهو مغمض عيونه قال بنعس:مش قادر تاعب هلبه..
وبعدين راح في النوم..