#البطل_المغمور2 "زهور القمر"
#جمان_فريد
#الجزء_الرابع_والعشرين "ياقلبي ياأمي1"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
"علاش درتي هكي ياأنبار"
في حجرة المرشدة النفسيه..كانت مقعمزة انبار قدام الأخصائيه الإجتماعيه..تسمع لسؤالها..
وبعد ماسمعاته ابتسمت وقالت:هما ديما يشوفوا فيا ضعيفه وجبانه وشخصيتي مطموسه وماليش وجود واني وريتهم العكس..
الاخصائيه:وكيف ورتيهم العكس وانتي بالنسبع ليهم شخص مجهول مايعرفوش انك نفسها انبار..!؟
انبار؛اني نعرف ساد نستمتع وقت نشوفهم متوترين وخايفين ويتلفتوا حواليهم ويشكوا في بعض ويشكوا حتى في ارواحهم نستمع واني عارفه إني سبب في حالتهم هادي..
الأخصائيه رفعت حواجبها وقالت:امم..باهي تعرفي انك باللي ديري تزيدي تثبتي انك انسانه ضعيفه فعلا وخوافه..الضعيف بس يدير زيك توا..
اختفت ابتسامه الثقه المزيفه وحلت محلها ملامح الضيق..
الأبله؛انبار بنتي...انتي مش عارفه نفسك ومش فاهمتيها لتوا وممكن راي اللي حواليك فيك خلاك هكي...بنتي الانسان الطيب والهادي والمسالم مش انسان ضعيف وانهزامي بالعكس هو انسان طبيعي جدا اكثر من غيره لأنه ع الفطره..لايكره لايحقد لايأذي لايحسد لايعادي حد..يتمنى الخيؤ لغيره ومايعرفش يضر كان مانفعش وهادي قوة بحد ذاتها...انتي واضح ان هادي حقيقتك بش راي اللي حواليك اثر فيك...
نزلت انبار عيونها بحزن وبدوا الدموع ينزلوا منهم...
:بنتي ابعدي عن اي شي يلوث داخلك النظيف ومعاش تعطي وذانك لحد..حبي نفسك واعجبي بيها وقولي ان مافي شي هلبه اني زي الألماسة وسط كوم رشاد..
قامت عيونها وشبحت للأبله..
؛ايه امدحي نفسك لإنك تستحقي ولازم تعرفي ان البنادم المسالم صاحب القلب النظيف هدا قريب لربي هلبه وربي يحبه..
ابتسمت من بين دموعها..
:اني بننسى اللي عرفته وحتى انتي انسي..والاستاذ اسماعيل اكيد نسي من غير مانقولوله..
انبار بنبرة باكيه؛ماتخليش خالة تسنيم تعرف بالله عليك ياأبله والله يلزوا امي من الخدمه حني اصلا عايشين بمرتبها..
:راجلها مايصرفش؟
انبار؛لا بالعكس مسكين لما يولي عنده يصرف ومايخلي شي في خاطرنا بس يعني مرتبه شويه مايدير شي وامي تعاون فيه..
:كويس معاك هو؟
انبار بإبتسامه؛راجل طيب هلبه هلبه برغم اني مش بنته بس نحس روحي جايبه طباعه كلهم..
ابتسمت الأبله..
:ربي يحفظه وزي ماقتلك مافي حد حيعرف اي حاجه ماتخافيش..وعد مني وربي يشهد عليه..
ابتسمت انبار ومسحت دموعها وقالت:شكرا...
🍁🍁🍁🍁
يشبحله بحده وهو يضحك..
قرب منه خطوة ورا خطوة وهو يشوفله هدا ضحك وابتسم بخوف وبلع ريقه وقال؛شن الجو يارايس..
وصل فيه قعد يشبحله بنظرات تخوف...وبلمح البصر..
شده من رقبته وحطه ع الحيط..
اسعد بخوف:غير..صل ع النبي..خيرك..
الرايس بصوت هادي مخيف:تغني وتضحك وتبصر ومش مدور الوضع الزفت اللي حني فيه يا..وشتمه بلفظ نابي..
اسعد بصوت مخنوق؛اعطيني..فرصه...نتكلم....
شده ع رقبته بزياده لين تغير لونه بعدين طلقه ووخر خطوة وحط ايديه ورا ظهره وهو يقول:تكلم يا...وشتمه بلفظ بذيء
واسعد شاد رقبته ويكح لين روحه لين قريب طلعت..
الرايس بقرف:هيا..
قعد اسعد ياخد في انفاسه بعدين قال:يارايس..الولد شكله...كح مرة تانيه بعدين قال...تأثر بكلامك..قصدي كلام الشيخ عقيل..وجاني وقال خلاص الموضوع تم...
الرايس:وياحمار لين ناديك بش تخبرني!؟
اسعد؛والله جيت بنحكيلك بس قلت لما يكون الوقت والمكان مناسبين...
الرايس:اسمع جاي..اخر الاسبوع البضاعه بتوصل الصفقه هادي هي بس اللي تنقد سمعتي اللي ولت ع المحك في جرة غبائكم لو العمليه هادي فشلت..خلاص...خبط ايديه في بعض وقال..مسعود الرايس ينتهي...تعرف كان يصير هكي شن ندير فيكم!..
اسعد هز راسه وهو مازال ياخد في انفاسه وقاله؛ماتخافش المرة كل شي حيمشي تمام..
الرايس شبحله من فوق لتحت وقال؛ع العموم لو فرضنا صار شي..كله يتحمله ولد خالد..
اسعد؛عارف..وهو راهو مش ساهل كل شويه يقولي نبي ضمانات..
الرايس بغضب:يبي امه مش ضمانات..رقبته تحت رجلينا يدير اللي نبوه غصب عنه..
اسعد هز راسه وقال:اكيد اكيد..وانس هدا اللي فهمتهوله..
شبحله شويه بنظره مخليه اسعد يرعش مع بعضه..
بعدين هز راسه ومشي...
غمض اسعد عيونه وزفر براحه بعدين فتحهم وقال:راقيتله رسمي من لما جاته وجه الشووم كان نعرف شن قالتله خفاشة الليل هادي..خدي نفس..وساوا روحه ولبس توب العجرفه ومشي...
🍁وصل عقيل للمصلي وخش طول..
وشويه وخشوا وراه المساجين اللي يصلوا في الحبس..
وزياد منهم اللي كانت نظراته لعقيل نظرات شك وخوف...
يشبح فيه كيف بادي يصلي وفي عقله هلبه اسئله ومخاوف كبيره..
شويه وخش خليل...زياد قعد يشبحله هلبه..
بعدين غير عيونه عنه لعقيل...خدي نفس وقال همسا:يستر الله.... وبدي يصلي في النافله...
🍁🍁🍁🍁🍁
مقعمزة في الصالون تتفرج ع ديكوره وتتفحص في كل شي فيه بعيونها...لين جو ع اللوحه قعدت تشبحلها هي وخلاص..
ع جية ماجده ونرجس والصغار من الكوجينه..
ماجده وفي يدها سفره قهوة:تفضلي..
نوال ابتسمت بإحراج وقالت؛تعبناك..وخدت الفنجان..
ماجده:تفاهمي مع امك يانرجس مانبيش ننزل فيها من اول يوم..
ضحكت نرجس ومدت لأمها كيكه وهي تقول:خلاص ماما حولي الرسميات..
نوال:لابنتي تعرفيني ماناكلش في الحاجات هادي..
ماجده:علاش..
نرجس وهي تعطي في البنات الصغار:دايت ياخالتي...
ماجده:العفو ياربي غير شن فيك بش ديري الدايت!
ضحكت نوال..
نرجس قعمزت وقالت بضحكه:رشاقه ابله ماجده..وزنها ثابت ماما كان زاد كيلو تعيش ع الخضر بس..
ماجده؛هدا علاش رايحه بتموتي..شوفي بنتك ماشاء الله عليها كيف رايحه حتى من وجيهها مدور الله يبارك..
نوال بابتسامه؛حتى للعمر ياماجده لازم نحافظ توا اكثر من قبل..
ماجده؛ماقلته اني هالكلام اللي رحت عزوزه وعمري في الخمسين..
نرجس بإبتسامه؛صراحه ابله ماجده الله يبارك عليك حلوة ومهضومه تهبلي..
ماجده بضحكه:والله انتي اللي تهبلي خسارته خسارة اللي فرط فيك..
تلاشت ابتسامة نرجس وشبحت لأمها..
نوال غيرت الموضوع وقالت؛اللوحه هادي من وين شروها؟
ماجده شبحتلها ابتسمت بألم وقالت:اللوحه هادي راسمها زياد ربي يفك اسره رسمها لميمته الله يرحمها وهداهالها في عيد الأم..
نرجس:عندك ليها صورة خاطري نشوفها من كثر ماحكوا عليها الصغار..وشبحت لأمها..
ونوال ترشف من القهوة بدون ماتشبحلها..
ماجده:ايه اكيد..لحظه شويه بس..
وناضت ومشت من حداهم..
نوال:نرجس بنتك تفترش في الكيكه..
نرجس شبحت لبنتها عضت ع شاربها وقالت:علاش يابنتي!
وطبست تنظف اللي داراته بنتها..
ع جية ماجده وهي تقول:خلي عنك تو نكنسه بعدين..
نرجس وهي تلم؛لالا اهو نظفته...ونفضت ايديها في الصفره..وخديت كلينكس وقعدت تمسح فيها..
ماجده ابتسمت وقالت:هي هادي..
ريحان وجنان قعدوا يشبحولهم....
خدت نرجس الصورة وعيون نوال مع الصورة..
شافت نرجس الصورة ابتسمت وقالت:حلوة وتبان لطيفه وحنونه..
ماجده ودموعها في عيونها؛مافيش منها لافي الحنيه ولافي الطيبه ولافي الرزانه والعقل...
بلعت نوال ريقها وعقدت حواجبها وقالت:ترا..
نرجس شبحت لأمها بعدين مدتلها الصورة...
خدتها نوال وشافت الصورة..
حست بالضيق..وقعدت تفرك في باطن يدها اليسار بصوابعها..بعدين ابتسمت مجامله وشبحت لماجده ومدتلها الصورة وقالت..الله يرحمها..
ماجده خدت الصورة وقالت:آمين..
نرجس:الله يغفرلها ويرحمها..
نوال شبحت لريحان وجنان لقتهم منزلين عيونهم ودموعهم تنزل..
قلبها وجعها وقالت:لاياعمري لا..
ماجده ونرجس شبحولهم..
ناضت نوال ومشتلهم قعمزت قدامهم ع رووس صباعها وقالت؛خلاص حبيباتي....خلاص..وقعدت تمسح في دموعهم..
ريحان ببكي:استاحشت ماما هلبه ياريت نقدر نمشيلها.
حطت ماجده يدها ع فمها بش تكتم بكاها..
ونرجس تشوفلهم وهي ادمع متأثرة..
نوال حطت ايديها ع ايديهم وقالت:انتم تحبوا هلبه ولا؟
هما الزوز هزوا روسهم بإيجاب..
نوال؛كان تحبوها معاش تبكوا بش ماتزعلش..
جنان؛تعرف ان حني نبكوا توا؟
نوال؛تحس بيكم..وتزعل لو زعلتوا وتفرح لو فرحتوا..انتم تبوا تزعل..
الزوز بنبرة باكيه:لالا..
نوال؛خلاص امسحوا دموعكم ومعاش تبكوا بش ماما تفرح هي..
قعدوا يمسحوا في دموعهم وهي تشوفلهم بإبتسامه قالت:محلاكم ياربي..توا بعد مسحتوا دموعكم ماما تولي فرحانه..
فجأة رن تليفون ماجده...مسحت دموعها وخداته من ع الطاوله وقالت؛هدا بوكم تو بيقولي شويه وجايهم بيرفعهم للمدرسه..
فتحت الخط ومشت طلعت من حداهم بش ترد..
نرجس:شن رايكم اني نديرلكم شعركم زي بناتي توا..
ريحان وجنان تحمسوا وقالوا؛باهي..
ونوال ابتسمت..
ع جية ماجده؛هيا هيل بسرعه بروا قدامي للدار..
نرجس؛عادي نجي معاكم نديرلهم شعرهم..
ماجده؛عادي حبيبتي تعالي..
ناضت نرجس ومشت معاهم وهي تقول:حداك البنات ماما..
نوال هزت راسها وهي ساكته..
بعدين وقفت ع حيلها والتفتت شافت للطاوله كانت صورة اسيمه موجوده...قعدت تشبحلها هلبه وهي تذكر في كلام هيثم وسارة عنها....حست بالضيق مرة تانيه..
فجأه...سمعت باب الحوش الخارجي انفتح..
شافت من الروشن...لقاته هو خاش بروحه من غير السياره..
كان لابس رمادي في الأسود..بالطو اسود..وبنطلون رماي وماليه رماديه فيها رقبه..وقوانتيات سود..
قعدت تشبحله وهو يتكلم بالتليفون...
ماقدرتش تحول عيونها من عليه...
وهو بعد كمل مكالمته شبح للحوش..
جو عيونه عليها وهي واقفه فالروشن..
لما شافها ارتبكت..يدوب ابتسمت وحياته بحركة الراس..
هو ردلها التحيه...
هي بعدها طول مشت قعمزت بعيد عن الروشن وكانت محرجه ومتحشمه ع الآخر..وحال قلبها ولا معروف...
شويه وطلعوا البنات يجروا وهما فرحانات بتسريحة شعرهم..
ونوال تبع فيهم بعيونها وهي مبتسمه..
لين طلعوا من الحوش وماجده معاهم..
نرجس:محلاهم عسولات وهدرزتهم حلوة..
نوال هزت راسها بإبتسامه...
نرجس شبحت لصورة اسيمه وغيرت عيونها لأمها...لقتها تشبح في الفراغ وهي سرحانه...
🍁🍁🍁🍁
"يابنتي بالله عليك افتحي الباب بالله عليك"
عثمان؛جيهان بابا..تسمعي فيا..
"خلوني مانبي حد مانكلم حد بالذات انتي ياماما كسرتي راجح وتوا كسرتيني ودمرتي حياتي ع خاطر مكانتنا وسمعتنا الزفت ياريتني ماجيت جيهان خير الله وارتحت من هالعيشه اللي كل همنا فيها كلام الناس وشن يقولوا الناس"
عواطف ببكي؛انتي غير افتحي ونحلفلك بالله يابنتي مستعده نمشي نكب ع راس راجلك بش يرضى غير افتحي بس..
"خلاص انسي توا جومعه معاش يردني توا لو شن ديري خلاص"
عواطف؛لالالا مانقدرش نتحمل اني بنكلم راجح هو اللي يقدر عليها من دون خوته..
ومشت بسرعه..
وعثمان واقف في الباب وهو يسمع في صوت بكي بنته وقلبه متقطع عليها..
🍁🍁🍁🍁🍁
" صغيرة وغلطت ياولدي وبعدين هي دارت هكي لانها تحبك هادي حاجه ماتزعلش"
جمعه؛يام معاش تعبي روحك اني خلاص معاش نبيه..
عيشه شبحتله شويه وقالت:خيرك انت تقول ماصدقت!
جمعه رفع حاجبه وقال؛ايه ماصدقت باهي ومادام كل شي واضح هكي بنقولك من توا بعد مانطلقها بنخطب وحده تانيه وحده راغبها ونبيها من قلبي مش وحده ناخدها بش تناسب عيلتي وبرستيجها..
عيشه:قول هكي من الاول في وحده شيطانه حايمه عليك وتبي تاخدك من مرتك..
جمعه:اللي عندي قلته خلاص..ومادام مافيش بينا صغار اولها خيرها من عقابها..
ومشي من حدا امه..
وعيشه تقول؛والله ماني مخلياتك تسيب مرتك ع خاطر وحده ضايعه خطافة تريس..
🍁🍁🍁🍁
فتح باب الفيلا
وخش بسرعه وهو ينادي..
راجح:امي...يام..
ومشي وين مافي دار جيهان..
عواطف جاته وحضناته وقالت؛باهي اللي جيت ولدي..
راجح؛خيرها جيهان..
بعدت عنه وقالت؛خش شوفها سلم ولدي..
راجح شاف بوه تخطاه من من غير مايكلمه ووقف ع باب الدار وقعد يدق عليها وينادي عليها..
وبوه يشبحله بإستغراب..
راجح؛جيهان...جيجي افتحي الباب خل نهدرزوا شويه..
عواطف؛جيهان راجح جي افتحيله بنتي..
عثمان بخوف؛صوتها اختفي...
راجح طول قعد يدفع في الباب بش يكسره..
وامها بدت تندب ..وبوها خايف هلبه..
وبعد محاولات كسر راجح الباب وخش عليها..
لقاها مرميه ع السرير وكأنها فاقده الوعي..
جاها وقعد ينوض فيها؛جيهان..جيهان..خبط ع خدودها وهو يقول..جيهان..
عواطف:ووك عليا بنتي...
راجح طول لبسها برنوس بيجامتها ع راسها ورفعها وطلع بيها يجري وامه وبوه وراه...
🍁🍁🍁🍁
في المدرسه اللي تقرا فيها تهاني..
جي موعد الانصراف..
وهي كالعاده واقفه تراجي في الباص..
شويه جت سيارة دبل قابينه درست قدام المدرسه..
هي مركزتش عليها في الأول بس وهي تشوف للطريق جو عيونها عليها..
شافت معاذ..واقف يأشرلها..بمعنى تعالي..
تهاني بصدمه قالت همسا؛خيره المريض هدا مصح وجهه!
هو دار كلاكس بش ترجع تشوفله..
واثار انتباه اللي حواليهم..
تهاني قالت في نفسها"لازم نكلم اخته ديرله حل"
شويه جاها باصها مشت طول ركبت..
وتحرك الباص..
هو خبط بيده ع الدومان بعدين مشي...
🍁وفي مدرسة تانيه....
المجد...
كانوا سارة ودانيه واقفات مع بعض يهدرزوا..
دانيه؛ماقدرتش نقول لا..لقيت روحي غصب عني قلت باهي..وجعني هلبه ونبي نكون معاه..
سارة:دنو..انتي شن تحسي اتجاهه..
دانيه تنهدت وقالت:مش عارفه مرات نحسه عاجبني مرات نحس في روحي نحبه..بس الأكيد اني منجذبتله ومرتاحه ليه هلبه.
سارة؛لا كان هكي عطيه فرصة تانيه وامه يهديها ربي..
دانيه؛يارب...
فجأه..
جت سيارة كيا سيراتو بيضاء..
قلب سارة دق بقوة..وقالت؛خوك ولا؟
دانيه بضحكه؛خطيبك..
هو درس ونزل مرش السيارة وشبح لسارة وابتسملها..
هي ابتسمت ونزلت عيونها لوطا خجلا..
هو شبح لدانيه واشرلها تجي..
مشتله بسرعه..وقف ع الروشن..
مجاهد؛هاك عطيها..
هي خدت بوكس الهديه وقالت؛سعد الناس.
مجاهد؛تحركي يابنت..
ضحكت ومشت لسارة...
وقفت قدامها وعطتها البوكس وقالت:مرزنه..خودي..
سارة وهي مندهشه؛شن هدا..
دانيه؛خطيبك جايبه وين نندري عليه..
ع جية باص سارة شافاته..خدت البوكس وقالت؛سلام..
ومشت للباص..وهي ماشيه شبحتله بإبتسامه خجوله لقاته يشوفلها بإبتسامه حب..
غيرت عيونها وهي فرحانه..ركبت الباص...
وتحرك طول..
ودانيه مشت لسيارة خوها وركبت...
مجاهد؛اعرفي منها رايها في الهديه وقوليلي..
دانيه بإبتسامه؛تم ياقلم..
هوضحك و حرك راسه يمين ويسار وتحرك بالسيارة...
🍁🍁🍁🍁
"هاه شن قالوا ياولدي"
راجح؛هبوط ضغط شكلها ماتاكلش بكل..
عواطف بدموع؛قطعت الماكله والشراب..
حط يده في نصه وقال؛نقدر نعرف شن صار وراجلها وينه..
عواطف نزلت راسها وهي منحرجه..
عثمان؛اني تو نحكيلك..
راجح بحده وبدون مايشبح لبوه قال:نبيها هي تحكي معليشي..
امه قامت راسها وشبحت بإستغراب بعدين شبحت لبوه لقاته يشبح لولدهم بدهشه..
راجح؛احكي يام شن صار بش نعرف نتصرف..
عواطف هزت راسها..بعدين بدت تحكيله...
🍁🍁🍁🍁
الساعه الخامسه والنصف عصرا..
مقعمزه في الصاله تخيط في قوانتيات صوف بروحها..
وهي مستمعه ع الآخر..
خشت عليها شافت حالتها ابتسمت وقعمزت حداها..
مريم؛قريب تكمليهم؟
نسيبه بإبتسامه؛ايه ونخش ع شخاشير ولي العهد..
ضحكت مريم..
نسيبه بإبتسامه؛الفال ليك..
ابتسمت بغصه وقالت:ان شاء الله..
نسيبه؛عارفتك الفترة هادي مضايقه من حال جهاد معليشي وسعي بالك واعذريه انتي لو شفتي علاقتهم ببوهم الله يرحمه كيف كانت تفهمي اللي هو فيه..
مريم وعيونها معبيات دموع:اني مش متحمله نشوفه بهالحاله ومانديرله شي يخفف عنه..هو مش عاطيني فرصه..
نسيبه؛خليه ياخد وقته لين يستوعب اللي صار...نقولك حاجه اني بروحي خايفه هلبه من الزيارة ومش عارفه شن حتكون ردة فعله لو عاركني وهزبني نعذره وحنخليه ع راحته لين يهدا..
تنهدت مريم وشبحت لإيديها وهي تفرك في صوابعهم ببعض..
نسيبه؛تصير الحاجات هادي تصير ماضايقيش روحك..مادام هو يحبك حيعرف ان راحته عندك انتي ويجيك بروحه بروحه..
ابتسمت مجامله وهزت راسها بآيجاب..
ع خشت صالحه ومعاها عفاف وهي تقول؛واخيرا رقد سلامته..
نسيبه؛كان خلتيني اني نرقد ع اقل ندرب..
ضحكت عفاف..
صالحه قعمزت وهي تقول؛لاحقه ع الدوشه والتعب..
نسيبه بإبتسامه؛احلى دوشه وتعب..
عفاف:في الوسع ياما قلنا قبلك هالكلام..
صالحه؛بعدين تقعد تعيط وتريش وتقول وووك..تعالوله..
نسيبه بضحكه؛زعمه!؟
صالحه؛خودي الكلام الصح..
عفاف شبحت لمريم وقالت بإبتسامه؛الفال عندك..
ابتسمت مريم بإرتباك..
صالحه؛زعمه مافيش حويجه هكي ولاهكي ليكم توا فوق الاربعه شهور متزوجين..
مريم بلعت ريقها وقالت؛لالا متفقين ناجلوها الموضوع هدا لبعد.سته شهور.
عفاف:ماتقوليش ناخدي في الحبوب!
مريم؛لالا!!..
عفاف:ردي بالك يديرولك مشاكل بعدين..
مريم حكت رقبتها من الخلف بعدين قالت؛لالامش واخدتهم..
ع جية تهاني..
وقفت في الصاله وقالت؛مريم ترا شويه..
كلهم شبحولها..
ومريم اللي حست تهاني طوق نجاه من اكثر موضوع يوجع فيها لما يفتحوه قدامها مشتلها طول...
وصلت فيها وقالت:خير توهه..
تهاني:ترا تعالي شويه..
تباعدت ومريم لحقتها..
بعدين وقفت ومريم وقفت قدامها
تهاني؛اني عارفه ان انتي ماعندكش علم وبنقولك توا..خوك يضايق فيا هلبه يامريم مرة ع التليفون مرة يجي للمدرسه ويدير في تصرفات تجيبلي في الشبهه..
مريم وهي مصدومه؛يجيك للمدرسه!؟
تهاني؛ايه..ياريت ديري معاه حل مانبيش الموضوع يوصل لجهاد يامريم..
مريم بخوف؛لالااني تو نتصرف ماعليكش فيه تو نحطله حد..
تهاني:وهدا اللي نتمناه..سامحيني عارفه مالكش علاقه بس مافيش قدامي غير هكي..
مريم؛ولايهمك حبيبتي واحسن مادرتي..
هزت تهاني راسها ومشت لدارها...
ومريم معاه بعيونها لين درقت وتبدلت ملامح وجهها للغضب
••••••••••
مكالمه هاتفيه..
مريم بغضب؛مش قتلك فوتها البنت طلعها من راسك راهو مش زي البنات اللي تعرفهم خيرك ماتبيش تفهم..
"نقصي حسك وماتعيطيش عليا "
مريم؛لا بنعيط باش تفهم بش ماتخبربش عليا..
"ريت هالراجل المقوم ولا هالعيله الباهيه اللي قاتله روحك عليكم..وهادي حماتك اللي شايفه روحها ع مافيش مفروض تحمد ربها اللي في من عبرها ع وسخ عليتها وسمعتهم الكناسه"
مريم؛معاذ!
"لا معاذ لاغنته اقعدي فيها انتي وراجلك وعيلته"
وسكر عليها..
غمضت عيونها وتأففت بعدين فتحتهم ونزلت التليفون وقالت؛شكله مكبد فيها حق المتخلف هدا...هو خوي لكن حرام فيه....ان شاء الله ربي يطيحها في اللي خير منه...
🍁🍁🍁🍁
مقعمز يتفرج ع التلفزيون لكن عقله مش معاه...
استاقظ لما سمع تليفونه رن...
تنهد وقامه وشاف المتصل ارتسمت ع وجهه ملامح الامتعاض ورد...
جمعه؛السلام عليكم..
"وعليكم السلام...كيف الحال"
جمعه؛الحمد لله كيف حالك انت؟
"الحمد لله...جمعه اني اليوم بس عرفت باللي صار فلو فيها كيف نتلاقوا في مكان نهدرزوا شويه"
جمعه؛ماتعبش روحك الامر محسوم عندي..
"صل ع النبي واستهدي بالله هدا الزواج راهو"
جمعه؛قتلك ياراجح الامر عندي محسوم مانبيش ناقش فيه..
سكت شويه بعدين قاله..
"مادام انت هكي تبي خلاص وهدا الاحسن ليك وليها بس في حاجه واجب نعطوك بيها علم..."
جمعه رفع حاجبه وقال؛شن هي؟
"زوجتك حامل"
🍁🍁🍁🍁🍁
"يابنتي قوليلي هيا شن طلعت؟"
ضحكت سارة وقالت؛ياستي مجموعه سلسله مملكة البلاغه كامله لحنان لاشين..ومعاها شكولاته تهبل اول مرة نشوفها..
"حاسداتك فرخه سارة"
سارة؛اعوذ بكلمات الله التامات من شر ماخلق..
"خل ندير جو الحموات الحرف المحسديات ونديرله نهار احرف كيف ياخدلك انتي شكلاطه وحني نسانا"
سارة؛ديريها وتو تشوفي كيف نحصل عليك في المدرسه ونريشك كله الا خطيبي ايوه..
"ختشيبي صار!!..عطيك شن بيقول فمي معاش تستفزيني يابنت"
وسارة تضحك وهي تاكل في الشكولاته وتقول:الله فيها الزايد بنة الشكولاته من قرة عيني..
"تو نطلعلك من التليفون ونفقصهالك.."
وسارة تضحك وتزيد تستفز فيها اكثر...
🍁🍁🍁🍁
وفي عالم نقيض لهالعالم الجميل..
...السجن...اللي كل شي اسود..ومغموم..وكئيب..
كان في شيطان يزيد فيه كآبه ع كآبته بآثامه وتمرده ونفاقه..
الرايس؛بشر ماتختبرش صبري تعرف بالي مش واسع..
"واني عطيتك اللي عندي واختصرت عليك الفلاش مقابل المبلغ اللي قتلك عليه..بتسكر راسك بين البايع والشاري يفتح الله"
سكت شويه بعدين قاله؛تمام يابشر تمام..بعد كم يوم توصلك الحواله ويجوك جماعه يتفاهموا معاك..
"عبدالكريم اسمع ردبالك تلعب باهي عارفني شن نقدر ندير"
الرايس؛باهي باهي..خلاص الكلمه اللي طلعت مني معاش تولي..
وسكر عليه وهو يهز في راسه ويقول:ناسي ان ولده حداي..مش مشكله..تو نذكره...
خش ع سجل المكالمات واتصل بأحدهم...
•••••••••
"خيرك شن في"
زياد؛ماصدقت حصلتك في مكان فاضي..اسمعني جاي..في حاجه عرفتها اليوم قلبتني فوقي لوطي ياخليل.
خليل:جمدت الدم في عروقي ياراجل تكلم طول..
زياد بلع ريقه وقال؛ريت الشيخ عقيل..
عقد خليل حواجبه وقال:ايه.
زياد؛واني ندخل في حوايجه لداره..حطيتهم وجيت بنطلع سمعت صوت غريب..وين قربت منه لقيته جاي من تحت مخدته...ووين قمتها...شفت تليفون نوع بيلا وع الشاشه رقم دولي.
خليل اللي كان مصدوم من اللي سمعه قال؛اسمعني وماتسألني عن شي..خليك معاه عادي زي قبل ماتحسسه بشي..اللي قلتهولي ماتقوله لحد حتى فاتح..
زياد؛خوفتني راهو..
خليل؛انت دير اللي قتلك وبإذن الله مايصير شي يخوف...
زياد هز راسه وقال؛حاضر..
طبطب خليل ع كتافه وقال:برا انت من غادي اني بنمشي من هني..
زياد:تم...
ومشي كل واحد منهم من طريق...
🍁ومن واحد من هالطرق...
كان فاتح جاي من الحمام ومتوجه للمهجع...
وهو ماشي...
طلع قدامه واحد خافي وجهه بقناع..
هو وقف في مكانه لماشافه..
فاتح:من انت وشن تبي!
قعدت اللي قدامه يشبحله للحظات.
وفجأه في لمح البصر وصل في فاتح وطعنه في بطنه..
فاتح طلع صوت كله وجع...
اللي ضربه طلع الموس وجي بيضربه مرة تانيه..
ع جية خليل شافهم انفجع وقال بصوت عالي:شن في غادي..
هو طلع الكميه وهرب وفاتح طاح ع الارض بقوة..
وخليل مشاله يجري وهو مفجوع.....
•••••••••
"بسم الله...خيرك"
نرجس:خيرك ماما؟!
نوال وهي تشبح للطاسه متاع العصير وانكسرت قالت؛مش عارفه خيرها يدها اليسار ترعش هكي شكله سكري هبط..
ناضت ماجده:تو نجيلك جهاز القياس..
ومشت تجري..
والصغار يشبحوا لنوال..
ونوال تشوف ليدها وهي ترجف..
نرجس؛خيرك ماما؟
نوال بقلق ودموعها معبيات عيونها:مش عارفه...
قلبي غم عليا فجأه..
نجرس:ان شاء الله خير..
نوال ؛يارب يابنتي يارب..
#ياقلبي_ياامي
#البطل_المغمور2
....يتبع...
