#البطل_المغمور2 "زهور القمر"
#جمان_فريد
#الجزء_الأربعون "نهاية العام"
رمضانكم مبارك
( الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ ) الرعد-28
💐💐💐💐💐💐💐💐💐💐💐💐💐💐💐💐
"عندي ليك اقتراح ونتمنى ان تقبله وتساعدني.."
فاتح:إن شاء الله..تفضلي نسمع فيك...
ابتسمت وقالت؛اول شي نعرفك بنفسي اسمي حنين الزايدي..اني طالبة في كلية الاعلام..من مده شفت في الفيس مركز علاج الادمان التابع للدوله منزلين اعلان يبوا فكرة دعايه توعويه عن مخاطر المخدرات...واني بصراحه عندي فكره ونبيها تتنفد بس تبي دعم ورعايه..
فاتح بإبتسامه؛وعلاش ماعطيتهاش لصفحة المركز..
حنين؛بصراحه مش واثقه هلبه انهم يقبلوها لأنها تبي هلبه ميزانيه..اني نقدر ندفع نص حق الدعايه مش كلها وهما مااعتقدش يقدروا ع الباقي..وبصراحه اكبر اني خايفه حد ياخد الفكره وينسبها لنفسي ويضيع تعبي والهدف اللي نبي نوصله..
فاتح؛عندك حق تصير..
حنين ابتسمت وقالت؛الفكرة مختلفه وجديده بالمرة مش زي المعتاد اعلان تقليدي الناس تعودت تشوفه وممكن مايهمهاش اساسا...
فاتح:شوقتيني نعرف شن هي...
هي تنهدت بحماس وقالت؛ابطال الاعلان نبيهم يكونوا ناس فعلا عاشوا تجربه ادمان سابقه...
رفع فاتح حواجبه..
حنين هزت راسها وقالت؛زي مافهمت..نبيك انت واحد من ابطاله وصديقك الدكتور زياد...واكثر شي جديد في الفكره هادي هو توعية المروجين نفسهم لأنهم حتى هما ضحايا هالمجرمين اللي يستقطبوا فيهم بإستغلال ظروفهم وحاجتهم..يعني نبي حتى الدكتور خليل يكون موجود في الاعلان..
🍁ع بعد مسافه منهم..
لباب المطعم اللي خشوا منه...
سارة ودانيه ورتاج ومعاهم جنان...
وعيون جنان ع البروش اللي لبساته اختها وهما في السيارة..
سارة مررت نظرها ع المطعم وهما خاشين داخل...
جو عليه من بعيد...
شافاته مقعمزة ع طاوله مزينه ..هو وبنت حلوة..
تهدرز وهو منسجم معاها وملامح الابتسامه مافارقتش لاوجهه ولاوجهها..
رتاج ودانيه قعمزوا عادي مالاحظوا شي..
لكن جنان قعمزت وهي تتلفت لفاتح تشوف فيه بعدين تشبح لأختها...
قعمزت سارة وهي داخلها بركان يغلي ويفور..
بس مظهرها من برا بارد جدا...ثلج...
رتاج؛حي ع القهوة ريحتها خيال..خل بنطلبها هي الاولى..
دانيه بإبتسامه؛حتى اني سهفتني...
وسارة تشبح لفاتح وحنين..
••فاتح:نعرف مخرج صديق ليا هو اسمه مهند كعيب اكيد تعرفيه..
حنين بضحكه اندهاش:ومن مايعرفش استاذ مهند..!
فاتح بإبتسامه؛تمام تو نكلمه ونحدد معاه ونتلاقوا كلنا في نفس المكان..
حنين:كلنا!؟ يعني حيوافقوا الدكاترة..
فاتح:شوفي اني عارفهم مايفوتوش فرصه فيها خير هلبه زي هادي بس نقولك نحاول نقنعهم..
حنين؛تمام نتواصل مع حضرتك ع حسابك ع انستاعادي..
فاتح:تمام منه حيجيك الرد بإذن الله..
حنين بإبتسامه: إن شاء الله..بارك الله فيك استاذ..
فاتح:فيك بارك الله...
ناضت حنين وهي تقول؛السلام عليكم
فاتح ناض وهو يقول؛وعليكم السلام..
مشت حنين وقعد فاتح معاها بعيونه وهو يفكر في قصة الاعلان..
تنهد بعدين مشي خش داخل بدون مايلاحظ وجود سارة من الزحمه ومن بعد المسافه...
••رتاج؛كان تناديه ياسارة نصور معاه ونبعتها لحماتي..
دانيه فنصت في رتاج..
رتاج؛خيرك تفنصي حماتي نديدة امه...والله ديما تهدرز عليه وتدعيله ع كلامه اللي يقول فيه بالذات وين ينصح الرجاله يساعدوا نساوينهم يومها شفتله فيديو كلامه فيه مؤثر ماشاء الله عنده خلفيه دينيه..
جنان؛بابا قال فاتح حافظ نص القرآن..
المعلومه هادي سارة اول مرة تعرفها عن فاتح..
بس مش اول مرة تسمعها...
مجاهد حتى هو كان حافظ نص القرآن..
قلبها انقبض...وتجمعت مشاعر خوف في صدرها...
دانيه بتعجب؛ماقلتليش عليها هادي سارة..!
سارة ابتسمت بالغصب وقالت؛جعانه نبي نطلب حاجه ناكلوها مانبيش قهوة..
دانيه استغربت تجاهلها الرد ع سؤالها...
رتاج؛انتوا كولوا كان بتاكلوا اني نبي قهوة..
من بعيد..
من ورا الستار...
زهير:هونهم غادي ومانحكيلكش ع شبحات مرت خوي يخوفوا...ربي يكون في عونك..
فاتح بتذمر ؛الواحد يرقع فيها ترقيع الحكايه..استغفر الله واتوب اليه..خدي نفس..بعدين مشالهم..
زهير بضحكه؛حكومه...
وصل فاتح فيهم وقال؛السلام عليكم مساء الخير..
كلهم ردوا السلام..
بس كلهم ردوا" مساء النور'" ماعدا سارة...
فاتح؛آنستوا.....
رتاج؛الله يأنسك..جديات فرحانه اللي شفتك وجه لوجه..
فاتح؛وجهك مش غريب عليا..
رتاج بإبتسامه؛رتاج المجذوب زوجتة عبدالحميد كعبار..
فاتح بضحكه؛زبطتكم واللي يزبطكم اكثر اسيد الشيباني خوي..
رتاج وهي متفاجئه؛اسيد الشيباني خوك! هدا يكون من اصحاب عبدالحميد المقربين..
فاتح؛ايوه...هو ديما يدوي عليك حتى مرة جابلنا خبر عنكم مكتوب في جريده انجليزيه..
رتاج بآبتسامه؛مزبوط..
فاتح؛ع هكي اللي ينزل للطاوله هادي ع حسابي..
رتاج ودانيه بآعتراض؛لالا..عيب مايجيش..
فاتح؛عيب ناخد منكم انتم من طرف خوي وجايين مع المدام ولاماواخد منكم قرش
دانيه وجنان قعدوا يشبحوا لسارة رتاج؛ع عيون المدام بنمشوها هالمرة..بس ياريت ناخد معاك صورة..
فاتح؛مافيش مشكله...
عطت رتاج الهاتف لجنان:صورينا جنو..
فاتح؛جنان شن جو..
جنان بإبتسامه خجل:الحمد لله..
فاتح؛وين مايكل جوردن!
جنان وهي تنوض من كرسيها قالت بضحكه؛عندهاتدريب اليوم..
فاتح بضحكه؛اها..
وجت رتاج وقفت جنبه بمسافه وبإحترام..
وجنان صورتهم..بعدين مدت التليفون لرتاج..
خداته رتاج وشافت للصورة وقالت؛تمام...صحيتي جنو..
جنان؛سلمك..
ولت لكرسيها وهي تقول؛شكرا استاذ فاتح..
فاتح؛العفو..ايه قولوا شن تحبوا تاخدوا..
رتاج؛قهوة واي حلو زمني لو عندكم..
فاتح؛موجود..
دانيه؛عندكم حاجه لجماعة السكري..
فاتح؛اكيد عندنا الصحي زي كيكه اللوز الخزايني وحلو الشوفان ..
دانيه؛تمام مع قهوة ساده..
فاتح؛تمام..
جنان؛ميلك شيك وشيز كيك..
فاتح بإبتسامه؛حاضر...وشبح لسارة..
وهي تشبح لتليفونها..
هما شبحولها...
ودانيه قالت؛سارة...
شبحتلها..
دانيه؛ماتبي شي؟!
سارة شبحتله شويه بعدين قالت؛ميه..
هو غمض عيونه وهز راسه بعدين قال؛حاضر...شويه ويكون اللي طلبتوه عندكم..
ومشي من حداهم..
وهما يشبحولها بإستغراب..
ماعدا جنان اللي كانت تشوفلها بضيق...
🍁🍁🍁🍁
"دار ايتام!؟"
ياسر بحسرة؛ايه والحق اقتنعت بكلامه مافي حد مايعرفش قصته مافي حد من اهله طايقه...وغدوة لما يكبر يبدوا يعزروا فيه بيها عزارة ياحنان وربي وحده يعرف شن بيصير فيه..
مريم تسمع في خوها وهي متألمه..
حنان بألم؛ياروحي عليه مسكين..
ياسر بندم؛ذنب هالولد في رقبتي لين نموت مش مسامح روحي..
مريم:علاش انت شن دخلك..
ياسر؛كنت شيطان اخرس يامريم عارف كل شي وساكت
حنان؛وشن تستفيد كان فضحتهم!؟ مرات كان صار احرف من هكي..
ياسر؛مش لازم نفضحهم...كنت هددتها ولاهددته..وخليتهم يخافوا ويولوا ع تالياتهم..لو كنت من هداكا اليوم اللي سمعتهم يحكوا مع بعض فيه تكلمت راهو هالمسكين ماجاش لهالدنيا وولى ضحيه..
مريم قعدت ساكته ومن داخلها قلبها موجوع ع الاخر..
للحظه ركبت روحها ذنب حتى هي لولا دعاها ماصارش هكي هدا اللي قاله عقلها..
🍁بس الحقيقه هدا العقاب المنصف لامثال ضرار....
وهالضحيه هدا حيديرله سبحانه طريق...هو مولاه ومش حينساه حتى وان كان ابن حرام...لكن ماليشي اي ذنب..والله عدل وارحم الراحمين...🍁
حنان تنهدت بألم وقالت؛لاحول ولاقوة الا بالله...لاحول ولاقوة الابالله....
🍁🍁🍁🍁🍁
"ان شاء الله راضيين علينا مافيش عندكم ملاحظات"
رتاج؛عندي ملاحظه وحده بس..
فاتح؛اللي هي..
رتاج؛افتحوا فرع في عين زارة مش معقوله كل مايبدا خاطرها في حاجه منكم نضربوه مشوار من غادي لهني..
فاتح بضحكه؛قريب ان شاء الله...قريب..
رتاج بإبتسامه:ربي يفتحها عليكم.
فاتح:بارك الله فيك..في عندنا عصير جديد الفترة الاخير حنزلوه نبي نخليكم اول من يجربه..وصحي ع فكره..
رتاج؛جيبه خل نجربوه..
فاتح بإبتسامه؛لحظه....شبح لسارة لقاها تشبح لتليفونها ومتجاهله..
مشي وهو مضايق ع الآخر..
جنان؛سارة معليش نمشيله ونسأله ع طريقة الشيز كيك..
ماقدرتش سارة تمنعها قدام دانيه ورتاج وقالت؛بري..
ناضت جنان وهي مبتسمه ومشت لحقت فاتح..
وسارة تلحق فيها بعيونها....
🍁وصلت جنان في فاتح لما خش داخل وهي تنادي فيه..
جنان؛فاتح..
وقف والتفتلها وقال بإبتسامه؛جنو .
جنان بإبتسامه؛بنعطلك شويه معليشي..
فاتح وهو مبتسم؛مش مشكله..
جنان بلعت ريقها وقالت؛فاتح بنقولك..ماتعدلش ع تصرفات سارة..سارة راهو مش هكي بكل..هي حنونه وطيبه لين خلاص..تعرف اول مرة لماروحت وين طلعت معاك ..بعد روحت قعدت تبكي هلبه....وفي مرة نذكر فيها في الليل كلنا في الحوش قعدنا نسمعوا في صوت بكاها ومايقدر حد فينا يديرلها شي..
فاتح يسمع فيها وقلبه يعتصر الما عليها..
جنان؛سارة يوم الفاتحه كانت خابفه هلبه اني شفتها من الخوف وين تسمع نقال يرن تنخلع ...سارة ديما خايفه ديما...تعرف..في الليل تخش ع بابا في الدار وهو راقد وتشوف فيه يتنفس ولالا..
نزلوا دموع جنان ومسحتهم وهي تقول..حني تقعد تتصل بصاحب الباص متاعنا وابلاتنا هلبه بش تطمن علينا كان تلقى الشوكه ماتنخصنا...زياد لما يعطل مرات بابا يرقد ومايراجيشي هي تقعد نايضه وماترقدش لين يروح...
فاتح غير عيونه عن جنان وهو يفتح في عيونه ع اخرهم بش يشد دموعه...ووجع قلبه زاد..
حنان مسحت دموعها وقالت؛فهمت عليا فاتح..ساره خايفه تصيرلك حاجه زي ماصار لمجاهد زمان نذكر فيها لما كانت تبكي زمان وتقول كل اللي نحبهم يخلوني....
شبح فاتح لجنان وهو متفاجئ ع الاخر..
جنان هزت راسها وقالت؛اصبر عليها وخليك معاها وتحمل شويه وماتزعلش منها اللي دير فيه كله غصب عليها..
تنهد فاتح من وسط قلبه بعدين مسح ع لحيته وهز راسه وقال بإبتسامه:صابر وراضي ومتحمل...نحبها هلبه اختك هادي راهو .
ابتسمت جنان بخجل ونزلت راسها..
هو ضحك وقال؛ربي يحفظك ياجنان..
قامت راسها وشبحتله وقالت؛رد بالك تلمحلها اني جيتك وكلمتك عليها بالله عليك مانتحملش نخسر سارة هادي امي مش اختي بس..
فاتح بإبتسامه؛مستحيل تعرف مهما صار جنان بإبتسامه؛شكرا...وتوا عطيني طريقة الشيز كيك متاعكم مانبيش نكذب..
ضحك وقال:حاضر..
عطاها الطريقه..
بعدين مشتلهم..
وصلت فيهم ...وقعمزت في مكانها...
وسارة تشوفلها وهي تسمع في هدرزة دانيه ورتاج وجنان تهرب بعيونها عنها...
🍁شويه وجابلهم فاتح العصير..
رتاج؛منظره روعه..
فاتح؛والطعم مازال اروع...
رتاج؛خل نذوقوا..
وشربت منه...
وفاتح يشوف لسارة وهو يفكر في كلام جنان..
《 ساره خايفه تصيرلك حاجه زي ماصار لمجاهد زمان نذكر فيها لما كانت تبكي زمان وتقول كل اللي نحبهم يخلوني....》
رتاج؛اممم..الله يبارك مش عادي...
دانيه؛روعه حق...
جنان؛محلا طعمته مانقدرش نسألك من شن درته متأكده انه سر.
فاتح بضحكه:صح...
وسارة تشوف للطاسه..
فاتح؛شن ماخاطركش حتى في العصير..
شبحتله.. وهو يشوف لعيونها...
قلبها قعد يدق بقوة رهيبه..
نزلت عيونها وخدت الطاسه وقعدت تشرب...لين وصلت لنص الطاسه..
وكلهم متفاجئين..
حطت الطاسه وقالت ببرود:قنين...
وخدت كلينكس وقعدت تمسح في فمها...
رتاج تنحنحت وقالت؛امتى بتنزلوه؟
فاتح وهو يشوف لسارة؛ع قرب رمضان..
رتاج؛ع عرس اختي معناها العصير منكم.
فاتح بإبتسامه؛لعيون المدام خودوه هديه..
هي قامت عيونها وشبحتله..
ابتسملها مع غمزة عين..
نزلت عيونها طول...
وهما شدوا ضحكتهم....
🍁وشويه وروحوا البنات..
وبعدهم بشويه..خشوا زياد وخليل ومعاهم مراد..
صديقهم اللي كان معاهم في السجن وطلع من فتره...
وكان لقائهم جميل جدا وحميمي استرجعوا فيه ذكريات السجن المر منها والحلو...
••مراد تنهد وقال؛ايام...
خليل؛كيف خليته...
مراد:الوضع كويس بشكل عام مرات تصير تجاوزات بس محدوده...لكن الحراسه والقوانين تشددت اكثر من قبل...
فاتح؛حتى هو حبس لازم يكون هكي..
سكتوا شويه وهما يتفكروا في ايامهم فيه..
بعدين قال مراد بإبتسامه؛فاتتنا فاتحتك ياشيف لكن فاتحه الدكتور لحقنا عليها..غدوة ان شاء الله ولا.
زياد بإبتسامه؛ايه بعد الظهر..
فاتح؛قدمتها!؟.
زياد؛في عمليه لازم نحضروها العصر..
خليل:ضروريه مانقدروش نفوتوها...
فاتح هز راسه وقال؛تمام تو نعاود نرتب اموري بش نحضر..
زياد؛بتحضر غصب عنك...
فاتح بضحكه؛باهي ياودي...باهي...
🍁🍁🍁🍁
الساعه الحادية عشر ليلا...
مقعمزة ع سريرها وحاطه ع رجليها اللاب توب وتكتب..
فجأة رن تليفونه..
خداته من جنبها وشافت المتصل لقاته رقم غريب...
رداته لمكانه وخلاته يرن لين فصل..
شويه جتها رساله...
قامت التليفون
وفتحتها وقرت..
(ردي راجلك...وحي عليك ديري حضر)
سارة:حضر!!؟ مفروض نديرلك الحظر ع هالحضر..
رن تليفونها..
فتحت الخط وردت بقوة واندفاع؛حظر ..بالظاء اللي عليها خط اوعصا زي مانقولوا...الحضر بضاد اللي عندها سن وماعليهاش عصا هادي كلمة تانيه تعطي معنى تاني..
هو قعد يضحك..
سارة بنرفزة؛مافي شي يضحك ع فكره..معقوله ماتفرقش بيناتهم!!؟
"نقولك حاجه ..اني كنت نكره العربي كله املا خط تعبير قراءة نكرههم.."
سارة بتهكم؛حلو عطيتني سبب جديد بش مانطيقكش..
هو سكت..
وهي سكتت وقعدت تراجي في رده..
شويه وقال..
"بكري في المطعم حسيت صار زي سوء الفهم بنوضحلك اللي صار"
قاطعاته وقالت؛مافيش سوء فهم ومافيش مشكله بالنسبه ليا اساسا مااستغربتش ولاصدمتني...ولايهمني من الأساس..
هو قعد ساكت..
سارة؛وتوا معليشي بنصكر مش فاضيه عندي ماندير...وسكرت عليه...
ودموعها بدوا ينزلوا..وهي تشوف في التليفون وتقول؛خلي عندك دم وحس مانبيكش اني..
تتكلم ودموعها ماوقفوش..
شويه ووصلتها رساله...فتحتها طول.
"رغم كل الضروف...نحبك"
هي طول بدت تكتب في الرد وبعتاته..
(الظروف)
شويه وجتها رساله تانيه.
(نحبك)
غلبتها ابتسامه ومطت شواربها للأسفل...
جتها رساله تانيه فتحتها طول..
(ع العموم لو مظايقه مني ع الموقف هداكا اسف)
بعتتله..
(مضايقه)
شويه وبعتلها..
(آسف)
حطت يدها ع فمها وقعدت تضحك...
بس فيسع مااختفت ضحكتها لما رجع هداكا الشعور مخيف تجمع في صدرها...
سكرت تليفونها وحطاته جنبها...
وشبحت للاب توب متاعها...
خدت نفس عميق...بعدين بدت تكتب ودموعها يطيحوا دمعه وراها دمعه.....
🍁🍁🍁🍁🍁
وجي اليوم اللي بعده..
وع الظهر...
صار عقد قران تهاني وزياد...
والشارع تصدح فيه اصوات اهازيج النساوين بالشتاوات والاغاني..
وتهاني فرحانه هلبه...
بس امها فرحانه اكثر منها..هداكا اليوم عفاف شتت ورقصت وفرحت من جدها....
والاجواء بشكل عام كانت حلوة بالمرة...
••في الكوجينه..
عفاف؛جنونه ريحونه بالله اطلعوا اكنسوا الجنان فيسع فيسع قبل يجوا التريس..
الزوز قالوا؛حاضر..
لبسوا حجابهم وطلعوا للجنان..
وخدوا مكانس وقعدوا يكنسوا...
جنان؛من غادي يابنتي مش غادي..
ريحان؛وواك منك درهتيلي كبدي..
جنان؛ماتبيش خشي تو نكمله اني..
ريحان؛خليك في حالك..
وقعدت تكنس وجنان حركت راسها يمين ويسار وقعدت تكنس..
شويه وريحان وهي تكنس رجلها انعكفت وطاحت..
ع خشة عرفه للحوش..
شافها عاطيه بالظهر وفي يدها مكنسه يحسابها جاها يجري وهو يقول بخوف؛ياستار...خيرك.!
جنان ضايقت هلبه مشت وخلتهم. وريحان وقفت ع حيلها وهي تقول؛مافي شي عرفه طيحه عاديه..
عرفه:هو انتي...لاماينخافش عليك..
ضحكت ريحان وقالت:روحوا الرجاله!؟
عرفه؛في الطريق جيت بنشوف امي كان ناقصها شي..
ريحان؛تو نكلمهالك...
ومشت...وهو مشي قعمز ع الكرسي وقعد يراجي..
🍁ريحان وصلت في الكوجينه اللي كانت معبيه قالت؛خالتي عفاف عرفه يبيك برا..
عفاف؛وصلوا التريس!
ريحان؛لا قال قريب يجوا..
حطت عفاف ملايه ع راسها ومشت طلعت طول..
وريحان قعدت دور في توأمها بعدين قالت؛وين جنان..
نسيبه وهي تعول؛قالت بتمشي للحمام..
ريحان:تمام..حطت المكنسه ومشت خشت داخل...
🍁🍁🍁
وشويه وجو بالنوبه..
اللي قلبت الشارع ع راسها...
وهالمرة سارة كانت تتفرج وقلبها مقبوض..
وتراجي امتى يكملوا...
وماارتاحتش لين تمت وخشوا للحوش....
🍁وتهاني تراجي..
اهو حد يجبها ويقول اطلعي لراجلك...
وراجت وراجت...لين جي الوقت اللي روحوا فيه الرجاله من العزومه...
وتوقعت ينادوها لكن..
••نسيبه؛ماتحسبيش خليل وزياد عمتي مشوا للمستشفى..
انصدمت تهاني وسارة تشبحلها..
عفاف؛ايه قالي بكري خليل عنده عمليه..باهي خلاص نحسب اللي قاعدين خوك وجهاد وعمامه وعرفه ورجالة خواتي..
نسيبه؛ايه هما هادم..
ومشوا الزوز وخشوا للكوجينه..
سارة؛تاهو..
تهاني بغضب؛والله لما نوريه ع الجو اللي يدير فيه تو يشوف..
••••••••••
سارة؛معقوله نهاري حتى مكالمه لا شن الجفاف هدا!؟
زياد وهو يتعشى:صبيلي عصير صبي..
سارة صبتله عصير وجاته بإزدراء قالت؛ربي يصبرها مسكينه..
خدي طاسه العصير وقال؛بري ارقدي..
سارة مطت شواربها للأسفل بإزدراء بعدين جت بتطلع..
وقفها زياد لما قال:ايه تعالي هني...شن هي الرشقه اللي لابستيها يومها..
سارة؛بروش شن رشقه هادي..
زياد؛شن هي قلت!؟
سارة؛شن هو يعني..واضح..عقرب..
زياد؛شن قصدك بيه ترا ومن امتى انتي نلبسي حاجات زي هكي...
سارة؛من هداكا اليوم..
زياد وقف وقدملها وقال:فاهم عليك كويس تمام..ولما ريتك لابستيها فهمت قصدك..لكن نقولك ياسارة فاتح هدا خوي اللي ماجاباته امي ومانرضاش فيه..الراجل كويس ع الاخر ومايستاهلش الا كل خير..والراجل شاريك ونيته معاك هدا توا زوجك..اتقي الله فيك..
هي شدت دموعها بقوه وهي تشوفله بحده...بعدين لفت ومشت وطلعت من حداه..
تنهد وقال؛ربي يهديك..
ورجع قعمز يتعشي..
ع خشة هيثم؛باهي اللي قاعد فايق..
زياد قعد يشبحله..
مدله بوه علبة مجوهرات صغيره وقاله؛غدوة تعطيها لمرتك وتجيبلها حاجه معاه ورد اي حاجه...
زياد خداه وقال:تعب في روحك..تو مش بنديرلها بيان ع رمضان علاش كترت المصاريف!؟
هيثم؛شن هيا!؟ قصدك بخيل انت!؟
زياد بضحكه؛لا مش هكي..بس يعني تعرف اني مش في بابه وقاعد نوتي للحوش..
هيثم؛والله باقة ورد مادايرة حاجه....سادك بخل..
ومشي من حداه..
زياد بضحكه؛تصبح ع خير..
هيثم من برا
"وانت من اهله..."
🍁🍁🍁🍁
تاني يوم..
في مستشفى الرازي..
كانت تهاني ماشية بروحها في الممر..
ومن الجهه التانيه زياد كان جاي..
لما شافاته دارت روحها ماتعرفاش..
جت بتفوته وقف قدامها..
زياد:وين ماشيه..
تهاني برفعة حاجب؛وانت شن علاقتك!؟.
زياد رفع حواجبه وقال؛شن علاقتك!؟ زعما راجلك!
تهاني؛زعما!؟ ياودي مازعماش..
زياد وهو مضيق قال بضحكه:شن مازعماش هادي!
تهاني وهي حامقه؛حول لوسمحت..
زياد؛ماسمحتش..
تهاني؛باهي شن تبي.
طلع من جيبه هدية بوه ومدهالها وقال؛خودي..
هي قالت؛شن هدا!؟؟
زياد بنفاد صبر:تي خوديها وشوفيها بروحك..
هي خدت الباكو وقالت؛معاش تكشخ عليا لوسمحت..
زياد؛ماسمحتش..
شبحتله بطرف عينها..
وهو ملامحه قمة البرود والاستفزاز..
غيرت عيونها عنه وشبحت للعلبه وهو شاد ضحكته..
فتحت العلبه لقت فيها خاتم جميل وناعم..
تهاني بإبتسامه؛الله!يجنن..شبحتله وقالت..ذوقك..
زياد:ذوق بوي..
تهاني بضحكه؛يابارد جديات ذوقك..
زياد؛اقسم يالله بوي هو اللي خداه..هديه منه هو..
تلاشت ضحكة تهاني وهي تقول:مغباتي حتى اني اللي حسبتها جت منك..
زياد؛ماعنديش فلوس نبزقعهم ع الدوة الفاضيه اللي عندي نحط فيهم ع حوشك اما خير نحطمهم في الحاجات هادي ولانصرف ع الحوش!؟
تهاني وهي تحاول تتمالك نفسها؛قولي لعمي هيثم شكرا..
ومشت من حداه..
زياد وهو يشوفلها ويهز في راسه:هدا العام اللي تبي تقريه في حوش بوك ..
🍁🍁🍁🍁
"ماتخافش عليه خوي هو هني في حوشه"
ياسر وهو موجوع ع الولد؛بارك الله فيكم..
المديرة:هي تعالى معاي حبيبي..
ومشت بالولد اللي كان يمشي معاها وهو متلفت يشوف لياسر اللي قلبه تقطع..
لما اختفي من قدام عيونه قال؛حسبي الله ونعم الوكيل..
ومشي طلع من دار الأيتام وهو متألم واحساسه بالذنب مسيطر عليه..
والجاني الحقيقي ع هالطفل..
عايش حياته في بلاده ولاكأنه دار حاجه وغارق في تجارته وملذاته..
🍁🍁🍁🍁
في احدي شركات الانتاج المعروفه..
كان موجود واحد من اهم مخرجين الاعلانات في البلاد .
ومعاه...فاتح...وزياد وخليل..
والاربعه كانوا يسمعوا لحنين شن تقول..
حنين؛يبدا الاعلان بشاب ماشي في طريق وكأنه محبط ومعصب في نفس الوقت...وفي اصوات تنادي. فيه وتقوله في العبارات اللي يقولوا في المدمنين لبعض...
جرب وتولي فوق الريح جرب وتوتعيش ملك..ومن هالكلام..
هو يحاول يقاوم بس بعدين يستسلم ويبدا رحلة الموت..
فجأة وكأن الدنيا اسودت حواليه وهو مش مركز ع شي لأنه عايش اللحظه..
هني يجي دور الدكتور زياد..
حتكون في مجموعة بورتيرهات تبان وتختفي وكلها رسم ع الرمل..يرسم فيهم الدكتور اللي كان يحس بيه بعد ماتنتهي فترة النشوة هادي..
زياد هز راسه بإيجاب ..
حنين كملت تقول؛والولد مكمل في الطريق وهو مازال عايش هاللحظه..
بيفوت من قدام استاذ فاتح اللي يكون واقف يشوف لحاجات ترمز للماضي اللي عاشه مع المخدرات..ويعطي ماعنده من مشاعر وين يتفكر هالأيام...
بعدين يشوف للشاب وهو ماشي في نفس الطريق وهو متأسف علي حاله..
بعدين يوقف الشاب هدا ع واحد من المروجين اللي بيشري منه مخدرات..
ويكون جايب معاه ذهب او اي حاجه غاليه تبان مسروقه من عيلته تحديدا...
وهني يجي دور دكتور خليل اللي يقعد يتفرج عليهم وهو يتذكر في نفسه كيف كان زمان..
وكان فجأة تجي سيارة شرطه تخلي المروج والشاب يهربوا..
وهني انت حضرتك دكتور بتفوت وتبدا تتكلم وتقول في مقطع مكتوب..
المخرج؛انتي كاتبه الاغنيه..
حنين؛اني...
المخرج:كملي...
تنهدت حنين وقالت:بعد يكمل ماقال....مازال الشاب مستمر يمشي في الطريق هادي وهو عايش حالة هالنشوة..
لين فجأة...يرتطم بحاجز يرده..ويخليه يستاقظ..
ويشوف قدامه لقبر...قبر حقيقي..نزلوا دموعها وهي تقول..قبر مدمن قتلوه المخدرات..فؤاد الزايدي...خوي...
كلهم تأثروا هلبه..
حنين؛مانعرفش لعل وعسى بشي زي هدا ننقدوا هلبه ارواح وهلبه عايلات من التشتت والضياع..مانعرفش بس هدا اضعف الايمان فالنهي عن منكر...وممكن نكونوا زي اللي قال عنهم الله سبحانه وتعالى...
¤ومن أحياها فكأنما احيا الناس جميعا¤
زياد؛عن نفسي موافق نكون في عمل زي هدا واني ممنون..
خليل؛واني ماعنديش مشكله نكون في عمل صالح زي هدا ربي يجعله في ميزان حسناتنا جميعا..
المخرج:حندير جهدي بش نجيب رعاة للعمل...
حنين:في رابر معروف اغانيه ديما هادفه اسمه"التايب" هدا اتفقت معاه لو لقيت من يتبنى الفكره هو اللي يغني الكلمات..
فاتح:التايب نعرفه شخصيا راجل محترم..
المخرج؛حتى اللي بيمثل الدور الرئيسي حنكون حريص بش يكون نجم مشهور الفكرة لازم توصل بقوة للناس..
حنين وهي مبتسمه بأمل من بين دموعها؛إن شاء الله..
•••••••••••••
هيثم:ممتازة جدا الفكره..اني حنكلم الوزير الحالي للصحه صديق ليا ونقول يخلي الوزارة ترعى العمل..
زياد؛ياريت والله خير وخير..
وسارة تسمع فيهم وهي متأثره بالفكره وحاسه بغيرة شديده من حنين...
🍁فاتح؛اثرت فيا هلبه اقسم بالله يومي كله مشي خي..
نوال ودموعها في عيونها:ربي يرحم خوها ويغفرله..والحمد لله اللي نجاك ليا ولدي..
هو قام يدها وباسها..
هي ابتسمت وقالت؛حنساهم فيه حتى اني وحنغطي جزء من تكاليفه..
ضمها وقال؛نحبك هلبه عندك علم .
وامه تحضن فيه وهي تضحك بعدين قالت؛من تحب اكثر اني ولاست الحسن..
بعد وهو شادها بعدين قال:غيره هادي!؟
نوال؛طبيعي بنغار ع وليدي مصماص الكرشه زي مايقولوا..
ضحك فاتح وباس راسها بعدين قال؛مسماس الكرشاا صار..
ضرباته ع ذراعه وهو يضحك عليها..
فجأة رن جرس الحوش..
نوال؛زعما نرجس...!؟.
ع جية نوارة للباب وفتحاته وقالت بمفاجأة...
"حبيبي اسيد....ياألف نهار ابيض ياألف نهار مبروك"
