#البطل_المغمور2 "زهور القمر"
#جمان_فريد
#الجزء_الخامس_والعشرين "بداية النهايه2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
يشبح لشاشة تليفونه وهو يقرا في رسالة جاته..
والزوز يشبحوله بترقب وخوف..
هو قال:كل شي ولى واضح حتى ليهم هما..رفع عيونه فيهم وقال..نهاية العمليه حتكون هني...
خليل هز راسه بإيجاب وهو يحاول يخفي خوفه..
زياد:مرات تصير حاجه يعني اشتباكات او حاجه زي هادي..
اللي معاهم هز راسه وقال:اكيد مش مرات..
خدي زياد نفس عميق بش يخفف التوتر..
وخليل يطبطب ع ظهره وهو يقول:قول...اعوذ بكلمات الله التامات التي لايجاوزهن بر ولافاجر من شر ماخلق وذرأ وبرأ
ومن شر ماينزل من السماء..ومن شر مايعرج فيها
ومن شر ذرأ في الأرض..ومن شر مايخرج منها..
ومن شر فتن الليل والنهار ..ومن شر كل طارق الاطارقا يطرق بخير يارحمن...الدعاء هدا من السنن المجهورة كان الرسول يقول فيه هلبه بش يحميه من كيد شياطين الجن...
وحتى من شياطين الانس وشرهم.....
:ترا عاوده خل نشده في راسي..
عاود خليل الدعاء...
الزوز يرددوا فيه وراه...وبعد ماكملوا مباشرة...
فجأه...سمعوا صوت جهاز الإنذار متاع السجن..
الثلاته انفجعوا..
زياد بخوف؛شن في!؟
:هذا جهاز الانذار متاع الحريق..
قعدوا التلاته مقعمزين وهما يسمعوا فيه..
وبعدين قعدوا يسموا في اصوات الجري والتدافع..
خليل:في حاجه صايره!
:نوضوا نوضوا بسرعه..
الثلاته ناضوا ومشوا طلعوا من الغرفه..
لقوا الدنيا منقلبه...
والبشر في هالمكان هاربين يجروا ويدافعوا...
هما بسرعه جو بيطلعوا..
وقفوا قدامهم جماعة اسعد اللي جو خاشين للمعجع في ايديهم اسلحه بيضاء..
واحد منهم قال:شن ديروا هني انت وياه!؟
وهما يشبحولهم بدون ماينطقوا بكلمه..
واحد تاني قال:ولي انت وياه ولي..
زياد؛شن تبوا!؟
:مش حني اللي نبوا ياجرو...
ع خشة اسعد وفيده مسدس وهو يقول؛تحسابوا الضحك عليا الساهل...كان غيركم اشطر...
وبعد ماخش هو تسكر باب المهجع...
ووقفوا عليه جماعه من برا شادين سلاح...
والمساجين والعناصر اللي طلعوا هاربين للساحه تسكر عليهم الباب كلهم وقعدوا برا..
بينما نائب مدير السجن كان في مكتبه ومعاه واحد من المساعدين...فهموا ان اللي صاير تمرد في السجن..
بسرعه اتصل بالدعم يجيهم....
وهالمعلومه وصلت لمكانها الصحيح...
••موكب سيارات شرطه متوجه لسجن بوسليم...
وزير الداخليه كان ع راسهم...
وصلوا للسجن...وخشوله...
وطول نزلوا من السيارات..وخشوا للمبنى داخل...
في مكتب مدير السجن...
:من بكري نتصل بالأفندي عمر مايردش..
فجأه انفتح الباب وخشوا ضباط من بينهم راجح...
وبعدهم خش رضوان بوكراع...
نائب مدير السجن بصدمه؛معالي الوزير؟!
رضوان بوبكراع؛شن اللي صار هني بالزبط!؟
قعد يشرحله اللي صار بالتفصيل وبوكراع وراجح زادو تأكدوا ان الرايس عرف بالخطه اللي انرسمت للإطاحه بيه هو وجماعته..
رضوان؛حجرة المراقبه وين؟
النائب مشي قدامه وقال؛تفضل معاي معاليك..
ومشوا كلهم بإتجاه حجرة المراقبه وخشولها..
وفي وحده من القوات الخاصه برا كانت تستنى في الأوامر بالإقتحام...
🕸وفي حجرة الرايس اللي كان واقف فيها يتكلم بالتليفون..
"هي هادي المعلومات اللي وصلتني عنه اليوم بس"
الرايس هز راسه وقال؛يحسابوا رواحهم بينجوا باللي داروه مازال مش عارفين من هو مسعود الرايس...
وسكر....ولوح التليفون ع السرير...
وقام المرتبه متاعه وطلع من تحتها المسدس..
وقف ع حيله وشبح للباب شويه...بعدين مشاله...
فتحه..وطلع....
فهاللحظه...
زياد وخليل والشخص اللي معاهم التفتوا شبحوله..
ونظرات عيونهم تبدلت للحدة...
هو قعد يمشي ويضحك ويحرك في راسه يمين ويسار..
وكل من مكان موجود في المهجع يشبحله..
وقف حدا وحده من الطاولات وقعد يشبحلهم هما التلاته بإبتسامه مخيفه....
يمرر في نظره عليهم بدون مايتكلم..
وهما يشبحوله بحقد...
الرايس؛شكلي كبرت ياأسعد خلاص وعقلي معاش زي قبل..
اسعد؛ماتقولش هكي ياغالي لتوا قاعد زي ماانت...
الرايس حرك راسه بالنفي وقاله؛لالالا...العمر دار فيا مايدير لكل الناس كان مش هكي..راهو ماقعدتش ثلاته سنين مخدوع في هدا..واشر عليه بالمسدس..وشبح لأسعد وقال...تعرف ياأسعد هدا شن طلع..ضابط شرطه سري هو هكي خدمته في الشرطه يكون سري..مافي حد يعرف عنه شي بش يخدم براحته...ممثل درجة اولى وعنده قدرة ع اقناعك بدوره بشكل رهيب...
اسعد يشبح بحده للشخص المقصود وهو يقول؛تعرف اكبر عيب عندي وعندك وهو اللي طيحنا شن هو..
الرايس؛الرحمه..عيبك مش عيبي...اني تغاضيت عنه لأني كنت هازي عليه..نشوف فيه واحد ساذج وبسيط وهني تبان احترافيته...اللي قدر يولي هالإحساس..عندك علم انه الشرقاوي...
اسعد رفع حواجبه بإندهاش..
الرايس؛من جماعتكم ومازبطتاش يا اسعد
اسعد قعد يشبح للي قدامه وقال:لكن والله صحه ليه..بان قدامنا واضح لدرجة ماتخلي حد يشك فيه...
الرايس؛هي هادي واضح لدرجة انعدام الشك...النقيب معتز المشيطي..ولا...صبري العجيلي...
معتز؛ناديني بيش مايعجبك..معتز..صبري..عجيلي..بورا..المهم عندي ان خليتك مضحكه مش غير انت بس تعرف تضحك ع خلق ربي..
مسعود:تباهى بروحك تباهي..اخر لحظاتك هادي مسموحلك بكل شي ماتخلي في خاطرك شي...
معتز بضحكه؛مش بروحي..
اسعد بضحكه؛اها انت وهديما..واشر بمسدسه ع زياد وخليل..وثبت يده ع خليل وقال...بالذات انت ياشيطان يارجيم...
مسعود؛مش قتلك كبرت خلاص..كان هدا كيف يعدي عليا الجو اللي دايره الولد هدا..
وخليل يشوفلهم بإمتعاض وهو ساكت..
ضيق مسعود عيونه وهو يشوف لزياد وقال:الا انت قولي شن عرفت!؟..
خليل ومعتز شبحوا لزياد...
وزياد وهو يشوفله تشجع وقالت؛عرفت انك ابليس مصور..
ضحك وشبح لأسعد بعدين رجع شافله وقاله؛خسارة والله مازال صغير..شن عشت فيها الدنيا وشن شفت منها...مط شواربه للأسفل بأسف مصطنع وقال...طايش ولعبت بعداد عمرك...
خليل؛هو ماليه علاقه بشي كان في عندك حساب لحد ليا اني ومعتز..
مسعود؛عيني دمعت..
اسعد؛لحمي ناض شوك شوك..
ضحكوا الزوز..
بعدين تبدلت ملامح الضحك ع وجه لملامح غضب مخيفه وهو يقول بنبرة تخوف اكثر؛اليوم...الكل يتحاسب....
🍁🍁🍁🍁
من القلق ماقدرتش ترقد..
لبست شالها الشتوي الثقيل وطلعت للبلاكونه بش تاخد نفس..
وقفت برا وقعدت تاخد في النفس..
فجأه...سمعت صوته وهو يقرا في القرآن..
نزلت عيونها وجو ع المربوعه اللي كان طالع منها الصوت..
قعدت تسمع في الآيات اللي يتلى فيها...
كانت من سورة آل عمران..
اكثر سورة محببة لهيثم...
وصل في آية قاعده في عقل وقلب نوال..
آيه بسببها التزمت بدعاء مذكور فيها..
حسبنا الله ونعم الوكيل..وكفاها الله سبب خوفها..
هيثم بعد ماكمل الآية سكت...
وهي قعدت تردد همسا..
حسبنا الله ونعم الوكيل...
تردد فيها في هالليله الشتويه البارده..
تشبح للسمي المظلمه واللي كاسر ظلامها النجوم..
وتحس بشعور عمرها ماحست بيها في حياتها..
شعور اللي يحس بأن ربه اقربله من وتينه...
قعدت حاسه بهالشعور لحظات..
لعند ماسمعت باب المربوعه انفتح..
نزلت عيونها...شافاته طالع...
وهو لابس بالطو شتوي اسود وحاط ايديه في جيوبه...
طلع من واحد من جيوبه التليفون...
قعد تشوفله كيف دار بيه حاجه بعدين حطه ع الطاوله قدامه..وقعمز ع الكرسي...وبدي يسمع في صوت قارئ جميل جدا وكله خشوع...
كان يتلى في سورة آل عمران..
شبحت جنبها لقت كرسي..
مشت قعمزت عليه وضمت نفسها وغمضت عيونها وهي تسمع....
🍁وفي حوش الجيران..
كان السهر من نصيب عفاف...
اللي كانت مقعمزة في مصلاها تدعي...
واكبر نصيب من دعائه واخده خليل...
اللي كانت مرته راقده ع سريرها وجنبها شخشير "جورب" اطفال تخيط فيه..رقدت وهي تشتغل عليه...
رقدت براحه فهالليله بعد ماقرت عينها بشوفه حبيب القلب...
لكن...
في شقة سلفها...
كانت سلفتها مريم...مش قادره ترقد غمضه وهي تبكي بألم ووجع كبير...
وهو..راجلها...ماقدرش يرقد..بعد قضى يومه كله وهو يفكر في اتخاد قرار...قاسي..لكنه في صالح الجميع..
ناض من ع الكنبه ومشي للدار..
وقف قدامها شويه...بعدين خش..
قعمز ع السرير وهو يشوفلها كيف راقده وعاطيه بالظهر..
جهاد؛مريم...
هي تفاجئت...والتفتت طول..
شاف وجهه الباكي..وعيونها المتورمات وجعه قلبه..
وزاد تأكد ان القرار اللي خداه في صالحها هي اكثر شي...
جهاد؛قعمزي نبيك شويه..
بلعت ريقها..وقعمزت وهي تمسح في دموعها وتساوي في شعرها..
هو تنحنح وقال؛اول شي اني اسف ع اللي قلته امس..كلامي كان حقير وندمت عليه كله..وطبعا نقصد الكلام اللي قلته في حقك انتي بس...
مريم بصوت مبحوح؛حتى اني اسفه ع اللي داره معاذ..مش عارفه..
قاطعها وهو يقول؛مانبيش ندوي فيه الموضوع هدا يعصب فيا..
هي هزت راسها وهي ترشف وقالت؛باهي..
هو تنهد بعدين قالت؛شوفي مريم..يشهد عليا الله ان الكلام اللي بنقوله توا..لافيه كذب ولامجامله طالع من قلبي...
بلعت ريقها وهي تشوفله بخوف..
جهاد؛مريم انتي بنيه ماشاء الله عليك...قدعه وشهلوليه وطيبه هلبه ومحترمه...وهالشي عرفته بعد عاشرتك...وانتب عارفه كويس ان وجودك معاي ليه وقت محدد..بصراحه صعب عليا هلبه نكمله..
قلبها مكسور من قبل ..وروحها محروقه من وقت..ومشاعرها مجروحه من زمان وتنزف للآن...
واللي يقول فيه هو توا....زاد ع الالام آلام.....ومع هذا كله..
كان متوقع..
جهاد؛انتي لو بتقعدي معاي اكثر من هكي حتدمري اكثر من قبل..اني توا عايف الدنيا باللي فيها ومش طايق شي والله..
حنتعبك معاي يامريم..وانتي والله ماهاينه عليا..بلع ريقها وقال..هدا علاش قررت نطلقك..
ارتسمت ع وجهها ابتسامة بؤس وهي تشوفله...
جهاد؛ونبي نقولك حاجه مهمه اني نمشي في ستين نمشي ويجوا غيري هلبه احسن مني..ردي بالك تخسر دنيتك واخرتك ع خاطري ولا ع خاطر اي بنادم في الدنيا فاهمه عليا..
هزت راسها وقالت:فاهمه...وبش نريحك اني هيئت نفسي للحظه هادي...وحتى اني رايي من رايك هدا احسن حاجه تصير من بعد الموقف متاع امس..ريح قلبك وضميرك وماتخافش عليا..فهمت وعرفت كويس..بمن لازم نعلق قلبي ولمن نعيش..
جهاد ابتسم وقال؛هدا اللي كنت نراجي نسمعه منك..
مريم هزت راسها وقالت؛غدوة ان شاء الله تونلم حاجتي وترفعني لحوش اهلي العشيه..
هو شبحلها شويه بعدين قال؛واني حنكون معاك ونفهمهم السبب اللي انفقنا عليه كانك متفكرتيه..
مريم هزت راسها وقالت؛اكيد متفكراته..
تنهد بعدين ابتسم بحزن وقال:تمنيت لو قدرت نكون معاك راجل لأخر لحظه..بس صدقيني اني توا منتهي بالمرة ومانبيش ننهيك معاي..
مريم مسحت دموعها وقالت بإبتسامه:وانت قعدت معاي راجل لأخر لحظه واللي درته مايديره حد جهاد..
جهاد؛معروفك سبق معروفي واللي عشته معاك علمني هلبه حاجه..كنتي فرصتي بش وليت ع تالياتي..وليت لربي..وان شاء الله نكون فرصتك اللي تخليك تبدي حياه جديده الماضي فيها كله ملوحتيه وراك.
مريم بإبتسامه مكابرة؛ان شاء الله..تنهدت بعدين قالت..هي تصبح ع خير بنرقد.
ابتسم وطبطب بيده ع يدها. بعدين قال؛قدامك كل خير...
وناض ومشي طلع من الدار...
وهي بعد طلع رقدت وغمت روحها بالبطانيه وبدت تبكي بحرقه بكاء مكتوم وهي حاطه يدها ع فمها..
وعبراتها قعدت مكبوته في داخلها...
🍁🍁🍁🍁🍁
"مسعود الرايس"
اسعد بضحكه؛اوووووو
مسعود؛وزير الداخليه بطوبته..لينا الشرف والله...
اسعد؛فات وقت طويل..
مسعود؛قول عمر اللي فات..
"مسعود انت واللي معاك اللي ديروا فيه مش لصالحكم عارفين شن حيكون مصيركم كويس.."
مسعود؛والله مش بالزبط معاليك.لان عندي خيارات تحددلي مصيري..مش انتم اللي تحددوه..
🍁في غرفة المراقبه..
راجح لواحد من الضباط؛بيساوم..
؛واضح...
رضوان بوكراع؛شن تقصد؟!
"نقصد معاليك..ان ارواح الناس اللي همي غاليه عليك اكيد بالذات الثلاته اللي معاي هادي..زي ماتشوف اني مسلح اسعد مسلح اللي معاي كلهم مسلحين..هدا غير اللي يراجي في الجماعه اللي برا واقفين في الساحه..شي عقلك مايستوعباش.."
رضوان وخر وهو يحاول يهدي اعصابه..
شافه راجح قدام وخدي جهاز الصوت وقال:شن تبي؟!
مسعود؛ايوه هدا اللي نبي نسمعه من الاول....اللي نبيه ياحكومه..انكم تخلوني نطلع من هني من غير مايتعرضلي اي حد من هني..
"تعرفه حلم ابليس بالجنه"
مسعود؛ياعيني..
"هو نفس تبينا نديروه"..
مسعود؛زيد غادي زيد وخلي الراس متاعك هو اللي يدوي معاي عشرة عمري وحني الزوز نعرفوا بعضنا كويس..
راجح؛انت توا مش موقف املاء الشروط انتهيت خلاص يارايس اقبل هالحقيقه..
شبح لأسعد..
بعدين الزوز اشروا باسلحتهم ع معتز وزياد وخليل..
معتز؛تحساب روحك بتخوفني...ولاانا مهتم واجد لحياتي!؟ انا لما قلبت المهمه هذي حطيت روحي ع يدي ونفدتها والموت ع شي كيف هذى هو اقصى مراحل الشرف اللي نبي نوصلها..
اسعد بتهكم؛حلو حلو...
خليل؛مانزيدش كلام فوق كلامك يامعتز الموت في حالة زي هادي شرف
مسعود؛وانت ياولد الكاتب..
زياد وهو يحاول يتغلب ع خوفه قال؛كان ربي كاتبلي نموت ع ايديك معناها هدا قضائه وقدره واني راضي بيهم.
معتز وخليل شبحوا لزياد بإبتسامه...
مسعود شبح لأسعد بحزن مصطنع وقال؛مؤثر.
اسعد؛واجد..لين عيوني دمعوا...اهو شوف..وفتح عينه بأصابعه..
مسعود ضحك نص ضحكة بعدين على وصوت وقال:هاه يارضوان شن قلت...؟!
🍁🍁🍁🍁
"ياأيها الذين ءامنوا اصبروا وصابروا ورابطوا واتقوا الله لعلكم تفلحون"
وقف المقطع الصوتي..فجأة رن تليفون هيثم..
نوال فتحت عيونها بخوف...
وهو اللي انفجع كذلك لما شبح المتصل..
تنهد وفتح الخط وقال؛السلام عليكم.....................لالا فايق فايق.................لالا ماعندكش مشكله تعالى اني اساسا نبي نحكي معاك........تمام نستنى فيك....وسكر ورد التليفون لمكانه...
لحظات...
وجاه جهاد...استقبله وقعمز هو وياه..
وجهاد بدي يحكيله في اللي صار..
ونوال تسمع وهي مصدومه..وقلبها وجعها ع مريم..
هيثم بإبتسامه؛تصدقني كان قتلك ان جيتك هادي متوقعها وعارف هدا اللي حيصير من البدايه..الوضع صعب هلبه واني راجل وفاهم وعارف الحاجه هادي كويس...المهم من هدا كله اللي بيصير بعد خطوة الطلاق..اللي تعلموته من اللي عشتوه مع بعض يبان بعدين..وينعرف الفاشل في الاختبار من الناجح فيه واني نتمنى من الله تكونوا الزوز ناجحين فيه
جهاد تنهد وهز راسه وقال؛ان شاء الله...
سكتوا شويه بعدين جهاد قال؛ايه لما كلمتك قتلي انك تبي تحكي معاي في شني بالزبط؟
هيثم خدي نفس عميق وزفر..بعدين شبح لجهاد...
🍁🍁🍁🍁🍁
وفهالوقت في السجن...
الوضع كان خطير للغايه...لحظات تحبس الأنفاس..
الكل بين خيارين وكل خيار اصعب من التاني..
وسط غرفة المراقبه...
راجح:مش حيتراجع هدا الابشروطه..
رضوان بوكراع وهو يشوف للشاشات قدامه..قدم للمايك وقال؛اسمع ...اللي دير فيه مافيش منه فايده وانت عارف عارف مصيرك شن هو..هادي نهايتك خلاص مهما درت مش حتقدر تغيرها مش حتجبرنا نغيروها..
ضحك تهكما وقال:عارف انها نهايتي بس مش حتكون نهايتي بروحي يابوكراع.. خليك مذكر يابوكراع...راك تنسى اني عطيتك فرصه زي ماعطيتها لبوك زمان وولاانت ولابوك عرفتوا تستغلوها..
:سيدي بيديرها...!
راجح والموجودين في غرفة المراقبه كلهم نصبوا عيونهم المتوسعه بترقب وخوف شديدين ع الشاشات..
وبوكراع كان يشوف للشاشات وهو يمسح ع لحيته بتوتر شديد...
:هاه يابوكراع...شن قررت...اخر مرة نسأل...
جي بين عيون رضوان بوكراع منظر خوه وهو ميت بجرعة زايده من المخدرات في وحده من اوكارهم....
غمض عيونه وحط يده ع جبهته وهو يفرك فيها بقوة...
:واحد....
:سيدي وجه عليهم السلاح...
راجح ضرب بقبضة يده اليمين يده ع اليسار بغضب وعجز...
:اتنين..
فتح بوكراع عيونه وقعد يشبح للشاشات..
:ثلاته.......اربعه.....
غمض بوكراع عيونه مرة تانيه وهو يحاول يفكر ومش قادر تشتت تماما....
:اني اللي عليا درته يابوكراع.....خمسه...
اضربوا...
وكان من غرفة التحكم عيونهم ع الشاشات والدم جمد في عروقهم..
.مسعود بضحكه ساخره؛عوجتك...
واسعد والرايس بدو يضحكوا هما وجماعتهم...
اسعد زاد ضحك وهو يقول...حلوة....حلوة والله..
والزوز يضحكوا بإستفزاز ..
وزياد وخليل ومعتز يشبحولهم بإمتعاض...
في غرفة المراقبه..
رضوان بوكراع جاه اتصال فتح الخط بدون مايتكلم.
قعد يسمع في المتصل شن يقول..
وبعد نهي كلامه سكر...
راجح قعد يشبحله يراجي يقول حاجه..
رضوان قدم وهدي جهاز لاقط الصوت وقال؛قاعد نقولك يارايس اللي دير فيه كله ع فاضي..وشرطك مرفوض ومستحيل يصير حتى في الحلم..
الرايس:معناها انت اللي اخترت يارضوان زمان زي مااختار بوك..مجرد مانعطي امري حتصير المذبحه الثانيه في السجن هدا...
زياد كان يردد همسا في الدعاء اللي قاله عليه خليل...
وخليل ومعتز يشبحوا للرايس بنظرات تحدي واضحه..
وهو يمرر عليهم في سلاحه..يعذب فيهم نفسيا..
فجأة..
جاهم صوت مرتجف وهو يقول..
"بوي"
كل شي في الرايس وقف ممكن حتى قلبه لما سمع هالصوت..
واسعد يسمع وهو مستغرب..مش هو بس كل الموجودين..
شويه وجاه صوت رضوان وهو يقول؛هالمرة حني بنعطوك الفرصه يارايس...ولدك اللي بين ايدينا موجود هن معاك من فترة ويساعد فيك..يعتبر مروج للمخدرات داخل السجن..
ولدك ممكن ياخد حكم مخفف ويطلع بعد كم سنه...لكن في حالة انك استمريت ع عنادك..حتعطينا مبرر نديروا فيه اللي درته في هلبه غيره...وبالقانون...
اسعد قعد يشوف للرايس...
كان يبان مصدوم... وحاله اللي هو فيه توا ماتعودش يشوفه..
حس هني ان مسعود شبه فقد السيطره ع نفسه..
"بوي"
جاه نفس الصوت مرة تانيه..
صوت ولده وهو يقوله؛بوي مادورهمش ماتعدلش عليهم ماتخليهمش يكسروك بيا...نموت ولانكون سبب كسرك يابوي..
ومسعود يسمع ويتفكر في كلام ورده في الزيارة..
《كلام الحق ينرفز مالاشنو..هدا كله لأنه تكلمت ع ولدي اللي هو ولدك اللي ديما دايره كبش فداء طبعا ماهو هو ولد ورده..مش ولد نادرة بنت العيلة..نادرة اللي باعاتك وتزوجت غيرك وخلاته يربي صغارك اللي ناكرين وجودك.
ولدك اللي هو ولدي مايصيرله شي وبوه معاه..》
زياد؛الصوت هدا نعرفه...!
معتز؛مار عليا حتى انا..
"بوي تسمع فيا نموت ولانكون سبب كسرك"
زياد بصدمه؛وائل!
خليل ومعتز شبحوله بعدين شبحوا للرايس اللي قاعد ع نفس حاله..
رضوان بوكراع؛رايس...استغل الفرصه صح وماديرش زي مادار اللواء عبد القادر بوكراع....
وائل وهو يبكي؛رد بالك تسمعله يابوي...
"بوي"
ووقع كلمه بوي عن مسعود اشد من وقع السيف بالجسد.
عاش سنين طويله من عمره محروم يسمع هالكلمه من صغاره اللي نسوه..
وبعد وقت رجع سمعها مرة تانيه لما جاه وائل بعد تزوج ورده.
تعلقوا بعض هلبه..
وائل كان يعشق بوه مش بس يحبه..
والدنيا كلها توقف بالنسبه لمسعود او عبدالكريم عند ولده وائل...
غير عيونه عن الفراغ اللي يشبح فيه..وشبح لأسعد..
واسعد قعد يشبحله...
هو غمض عيونه وفتحهم اشارة منه لتنفيد امر ما..
اسعد فهم عليه...مرر نظره ع الموجودين قدامه..
بعدين قام سلاحه...واطلق من رصاصه...
استقرت في راس...عبدالكريم عبدالجبار...او مسعود الرايس..
كل من حجره الكنترول انفجعوا لما شافوا شن دار...
والفجعه نفسها كانت لخليل وزياد ومعتز والموجودين معاهم...
واسعد يشوف للراس كيف طاح قدامه جثه هامده وهو يتفكر في اخر وصيه ليه..
《لو شفتني بحالة عمرك ماشفتها عليا..اقتلني...ايه ايه.
اقتلني طول》
غير عيونه عنه وشبح للي قدامه..
وعيون الكل في غرفة المراقبة عليه..
في لمح البصر ..وجه السلاح ع راسه واطلق عليه..
زياد غير عيونه عنه هالمرة مش قادر يتحمل اللي يشوف فيه..
وخليل يشبحلهم الزوز بأسف ع خاتمه كانت من اسوأ مايكون...وحمد ربي اللي انقده وانقد بوه في اخر لحظه..
بينما معتز طلع سلاحه ووجهه لجماعتهم وقال؛اللي يدير فيكم حركة ناقصه يجني ع روحه..نزل سلاحك انت وياه..
هما من هول ماشافوا طول نزل اسلحتهم البيضاء واستسلموا...
••في غرفة الكنترول..
كان الكل قاعد في حالة صدمه...
لكن وائل فاق منها وبسرعه خطف سلاح واحد من العناصر وجي ييصوب ع رضوان..
بس راجح سبقه واطلق عليه...
ورضوان يشوف لوائل كيف قاعد يطيح قدامه
وبين عيونه كان يشوف في خوه..
قلبه وجعه ع شاب في ربيع عمره كانت هادي نهايته...والسبب...اكثر شخص كان مفروض يحميه حتى من نفسه..بوه...
🍁🍁🍁🍁🍁
في هديكا الليله القوا القبض ع كل روس المنظمه الموجودين في البلاد وع راسهم وردة....
وبهكي تكون انتهت مهمه خليل.....
وقعدت مهمه خوه جهاد...
في اليوم التالي..
الساعه السادسه والنصف مساءا..
جهاد؛مانبيش نظلمها معاي بنت الناس من حقها دير عيله ويكون عندها صغار ...اني معاش ننفعها بشي خلاص..
اب مريم وهو مصدوم؛معقوله ياولدي مافيش علاج بكل!
جهاد بأسف مصطنع؛الدكتور قال مافيش مني امل بكل..
بوها قعد ساكت ومش عارف شن يقول وجعاته بنته هلبه اللي كيف خشت سته شهور زواج روحتله مطلقه...
جهاد:الله غالب نصيب..ونصيبنا شكله مش في بعض..ناض وهو يقول..حقها كامل قدامك ياعمي..وسامحوني ع اللي ريتوه مني..وان شاء الله نسمعوا ع بعضنا كل خير
ومشي طلع من حداه..
وبوها مازال مصدوم ومش مصدق..
اما امها..
فكانت تشبحله كيف غامه روحها في سريرها وهي تبكي بالعبرة..
وهي تبكي معاها حسرة عليها...
🍀وبعد اسبوع مباشرة جهاد طلقها رسمي....
#صلوا_على_الحبيب
#البطل_المغمور2
....يتبع....
