#البطل_المغمور2 "زهور القمر"
#جمان_فريد
#الجزء_السادس "فاتح"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
"هي تعالي افطري سرو"
سارة وهي شاده كتاباتها:فطرت بعد الفجر خويله افطروا انتم صحتين..
ماجده:باهي..
نسيبه:هيا يافرادي الشخشير ابدوا هي..
كانوا مقعمزين قدام الكوجينه يفطروا..
اما سارة اللي عطلت هالأسبوع عن المدرسه بش تقرا للإمتحانات مشت قعمزت ع الطاوله اللي قدام الحوش..
حطت كتاباتها..ومشت للورد قطفت زوز ورفعتهم للطاوله حطتهم في طاسة مية موجوده ع الطاوله..
قعمزت وفتحت كتابها وكراسه وخدت بيرو وبدت تقرا..
🍁وماكانش عندها علم عن الزائر اللي جي ع غفله...
كان واقف قدام باب الحوش..
وهو لابس تيشرت ازرق غامق..ع سروال جيينز من نفس اللون..
وطاقيه زرقاء..ونظارات سود مدرقات عيونه..
يشبح للجرس وهو يقول بهمس:مش عارفه علاش حاسها بتفتح الباب...لالا حتى انت تحلم هلبه...ان شاء الله قاعده بس..
ورن الجرس...
هي شبحت للباب بآستغراب..
بعدين ناضت ومشت للباب وقالت؛مني..
🍁هو فنص عيونه قريب طلعوا مع قلبه..
ضحك وعض ع شاربه بعدين تنحنح وقال...اني جاي من طرف زياد صاحبه..
سارة اندهشت..من صاحب زياد اللي جاي من طرفه!؟
خافت ولفت ومشت تجري وين مافي عمتها وخالتها..
وصلت فيهم وقالت؛سمعتوا الجرس..
ماجده:نحساب روحي نتخيل..
نسيبه:مني..
سارة؛مش عارفه لما قلت مني قالي من طرف زياد..
ناضت نسيبه وقالت؛من طرف زياد!..
ماجده؛كيف يعني من غادي جاي ولاكيف..
نسيبه؛خليكم هني..
ومشت خشت داخل..
سارة؛حسني خفت!
ماجده فنصت فيها واشرت بحواجبها ع البنات..
سارة شبحتلهم لقتهم يشبحولها سكتت..
جنان:خيره زياد..
ماجده؛ماخيره شي حبيبتي..
رن الجرس مرة تانيه..
سارة زادت خافت..
ع طلعت نسيبه وهي لابسه الملايه وفي يدها التليفون؛حتى خليل نتصل بيه خارج التغطيه..نمشي نشوف اني وخلاص..
ماجده:وكان يطلع مجرم ويديرلك حاجه..
نسيبه؛يدير عينه...
ومشت طول..
وماجده ساوت وشاحها ومشت لحقتها..
وخلوا سارة مع البنات والثلاته كانوا خايفات..
🍁وصلت نسيبه في الباب وقالت:شكون؟
"اني مبعوت من زياد...فاتح فاتح"
ضيقت نسيبه عيونها وقالت:مار عليا الإسم..
وطول فتحت الباب...
ماجده؛علاش تفتحي فيه..وسكتت لما شافاته..
فاتح خش طول وحول نظاراته..
نسيبه:هو انت!؟
فاتح :ايه سكري الباب..
نسيبه رداته ردان وقالت؛شن في..
فاتح مرر نظره عليهم وقال:طلعت من المصحه الفجر وراجيت لين الصبح يطلع بش جيتكم باعتني زياد يبي كم حاجه..الدكتور ربي يهديه وصاه عليهم وهو ياينسى يامايبيش يجيبهم..
ماجده؛حاجات شني..
نسيبه:انت طالع وبتولي ولاكيف..
فاتح كاذبا؛طلعت نعاين الفجر طلعوني..
ماجده؛لاباس عليك..
فاتح بإستعجال؛الحق اني مستعجل هلبه وماعنديش وقت..نبي شال...وصورة لخالتي اسيمه الله يرحمها..وحاجه حاجه من التوامه الصغار هو قال...
ع طلعت ساره كانت لابسه الحجاب ومعاها البنات..
لما شافاته قالت بصدمه؛هدا شن يدير هني!؟.
هو شبحلها طول...وقلبه كاد يطير من مكانه..
نسيبه وعيونها معبيات دموع:باعته زياد يبي حاجات..
سارة؛وزياد علاش مايقولش لبابا يجيبله؟
ماجده وهي متأثرة؛قال يقوله وهو مايجيبش فيهم..
سارة؛شن هما ترا؟..
نسيبه:الشال اللي دارته اسيمه وصورة ليها وحاجه من جنان وريحان شكله مستاحشهم هلبه..
ريحان؛انت صاحب زيزو..
حول فاتح عيونه عن سارة لريحان ابتسم وقال:ايه ياحلوة صاحبه..
جنان؛علاش ماجاش معاك...
فاتح رفع حاجبه اليسار وقال؛عنده عمل..
ريحان؛هو مش في الحبس ولا؟
صدمهم بقوة سؤال ريحان..
جنان:في المدرسه هكي يقولوا حني نقولوا هو مسافر وهما يقولوا يكذبوا عليكم محبوس خوكم..
دموع نسيبه نزلوا..
وسارة قعد تشبح لخواتها بحزن..
وفاتح يشبحلها..
ماجده شدت روحها وقالت؛هما الكذابين معاش تصدقوا حد يقوللكم هالقطاف الفارغ...
فاتح؛زياد مش فالحبس ياحلوة اني معاه كان في الحبس مايخلونيش نطلع..
ماجده؛ها ريتي..
ابتسم فاتح وقال:هيا بالله مستعجل...
نسيبه مسحت دموعها وقالت؛شويه بس..
ومشت خشت تجري..
ماجده:فطرت وليدي..
فاتح بإحراج؛تو نفطر لما نولي للمصحه..
ماجده:مال راجي شويه..
ومشت بسرعه جهة جنان الكوجينه..
هو شافها مشت شبح لسارة..
غيرت عيونها عنه وهي تقول لخواتها:تعالوا خشوا هيا..
فاتح :استني شويه بس..
شبحتله برفعة حاجب..
هو جي للطاوله خدي بيرو مغطي حول المغطى بفمه وطبس وقعد يكتب في رقم تليفون ع الكراسه..
وهي تشوفله بصدمه..
كمل وشبحلها وحول المغطى وقال:وقت تحتاجي اتصلي..
وسكر البيرو وحطه ع الطاوله ووخر وهو يشوفلها بإبتسامه..
~~~~~~
♡خبطت كفوفها ببعض وقالت بضحكه..الموقف هدا مذكراته بأدق تفاصيله..صدمني صراحه..اني اساسا ماكنتش طايقاته وهو يتجرأ ويدير معاي حركة زي هادي!..
امم..اني اكثر شي ضايقني وقتها ان دار هكي مع اخت صاحبه..والحركه هادي قعدت نقطة سودا في صفحة فاتح خلتني ناخد عنه فكرة سيئة انه يعني واحد مش مزبوط..وفي نفس الوقت سألت نفسي علاش نتعرض لمواقف زي هادي ومع هالنوعيات بالذات..يعني شن يشوفوا فيا وحده مش مزبوطه بش يتجرئوا يديروا معاي حركات زي هادي ومتوقعين نستجيب!؟
هو اني بصراحه مش جميله عاديه جدا...شكلي عادي جدا مافيشي ميزة...وهالشي خلاني نشك في نفسي ان فيا حاجه غلط...
ضحكت وقالت..وطبعا كانت عندي ردة فعل ع تصرفه مانخليشي يعدي هكي..حركت سبابتها مع يدها كامله وهي تقول بضحكه...ابدا..
~~~~~
قدمت بغضب ناحية كراساتها شركت منها الورقه كمكمتها ولوحتها وولت لخواتها خدتهم من ايديهم ودخلتهم داخل..
ع طلعة عمتها وجية خالتها..
مدتله نسيبه كيس هدايا وقالت:اهما...
هو كان في حالة خلاته يرتبك وهو يكلم فيهم:اها كويس..
خدي الكيسه..
ماجده؛خود وليدي كوله في الطريق..
ضحك بإحراج وقال:صحيتي..وخدي منها سندويتش ملفوف في كيسة..بعدين لبس نظاراته وقال..ماتبو شي..
نسيبه:سلم عليه هلبه..
فاتح بإبتسامه:يوصل..السلام عليكم..
ومشي طول للباب فتحه وطلع ونسيبه سكرت وراه الباب..
ماجده:كان يندري هيثم شن يدير..
نسيبه:مش ضروري يعرف ياخويله..رشفت وقالت..مقطعلي قلبي زياد..
ماجده بحزن؛ربي يفرج عليه وعلينا..
🍁🍁
وبرا..
فاتح كان ماشي وهو يبتسم مع روحه وين يذكر سارة..
وكلام سارة..
واسلوب سارة..
واخر حركه دارتها..خلتها كل مالها تزيد تسيطر ع قلبه اكثر...
طلع من الزنقه..وفات من حدا الورشه ع طلعة رفيق وين شافه استغرب..قعد مركز معاه لين شافه ركب في سيارة مع واحد وتحركت طول..
••في السيارة
زهير:وين توا ياباشا..
فاتح؛زي مااتفقنا بكري..
زهير هز راسه وقعد ساكت...
🍁🍁🍁🍁
"هات اقنعني..اقنعني انك ماتعرف شي"
زياد قعد ياكل في شاربه تحتاني ومايبيش يتكلم..
هيثم بعصبيه؛عندك علم واضح ومش بعيد تكون مخطط انت وياه..
زياد؛لا والله نهائي..مع الفجر بس عرفت وماقدرتش نمنعه..
هيثم؛وعلاش ماعطتنيش علم!
زياد؛مانقدرش..الحركه هادي مانديرهاش..
هيثم بتهكم:ع اساس صاحبك وماتبيش تحرش فيه..تحساب روحك بتنفعه هكي..انت ضريته وضريت المركز كله وضريتني اني..مافكرتش فيا بكل وفي الموقف اللي انحطيت فيه..
زياد نزل عيونه وقال بضيق:مافكرت في شي وقتها اني عارف شن صاير معاه..
هيثم؛معناها تعرف انه بيهرب..
شبحله وقال:حلفتلك اني اقسم بالله مانعرف ولافي حد يعرف.
هيثم هز راسه وقال؛تمام الشرطه بتحقق في اللي صار وانت اول واحد بش يكون عندك علم..قالها وهو يأشر عليه بسبابته..
زياد هز راسه وقال؛ماعنديش مشكله..
هيثم بحده:قدامي..
زياد لف ومشي وبوه مشي وراه...
🍁فهالوقت..
زهير وصل بسيارته لفيلا اهل فاتح..
نزل من السيارة..لما شافوه الحراسات تفاجئوا..وخلوه يخش طول...
في الفيلا..
كانوا موجودين خوته كلهم نوفل واسيد ونرجس..
يفطروا مع بعض..لكن امهم مش معاهم طالعه بكري..
نوفل:من البدايه كنت رافضه زواجك هدا لكن انتي تمسكتي بيه..
اسيد؛كلب وافتكيتي منه..
نرجس تنهدت وقالت؛غيروا السيرة خلاص..
نوفل هز راسه وقال:ماتعرفوش بوي علاش دار هكي..
اسيد؛في شني بالزبط الطلاق ولا الورثه؟..
نوفل:لا الطلاق متوقعه من وقت..نحكي ع تقسيم الورث وهو حي..
اسيد؛بوك كبر خلاص ومعاش حمل دوشه ومشاكل خلا كل شي وراه وهرب..
نوفل:فاتح السبب..
اسيد تنهد وهز راسه..
ونرجس تسمع فيهم وهي ساكته وقلبها واجعها ع خوها..
فجأة سمعوا الجرس رن..
شبحوا لبعض بإستغراب..
نوفل؛نوال اشبح شن نست..
🍁لوطا..
مشت نوارة فتحت الباب..
من المفاجأة شهقت وقالت:فاتح ياحبيبي..
فاتح ضحك وخش..قرب باس ع راسها بعدين قال؛شن جو ماما..
وسكر الباب..
نوارة؛والله فاتح..يالهوي قلبي حيوقف..
فاتح بضحكه:بعيد السو عليه قلبك اللي ماريتش احن منه..
نوارة؛خرجت ازاي!؟
فاتح:خليك توا من الأسئله وقوليلي ؛نرجس قاعده..
نوارة:اه فوق هي ونوفل واسيد..
استغرب وجودهم مع بعض بس ماباش يسأل ومشي طول للدروج وركب..
ونوارة وراه ومازال مش مصدقه..
🍁وصل فوق شافهم مقعمزين حوالين الطاولة يفطروا..
اول من شافه اسيد قال بصدمه؛-فاتح..
كلهم شبحوا وين مايشبح..
نرجس طول ناضتله وجاته تجري وهي تقول:فاتح..
وضماته وهو ضمها بقوة..
نرجس بدت تبكي..
هو قعد يمسح ع شعرها ويقول:اسكتي خلاص..
وخوته يشبحوله وهما مصدومين
فاتح بعدها وباس راسها وقال؛ماعنديش وقت نبيك في كلمتين تعالي..خدي يدها ومشي بيها
ونوارة جت للبنات الصغار قعمزت حداهم بتفطرهم
نوفل:ولاكأنه شافنا..
نوارة؛لاليكوا حق تلوموا ولاتعاتبوا ولاتستغربوا..
الزوز سكتوا وهما منحرجين...
••••••••••
شدت يده وقالت؛فاتح ماضرش روحك بسبب القذر هدا بالله عليك لو تصير فيك حاجه مش مسامحه روحي..
هو حط يده ع خدها وقال:ماتخافيش مايصيرلي شي..قرب باس جبينها...بعدين طلقها ومشي بسرعه..
وهي طلعت وراه وخوتها يشبحولهم....
نزل من الدروج وهي وراه تقول:ردبالك يافاتح.
وهو بدون مايرد عليها بكلمه طلع بسرعه..
وهي تشبح للباب اللي تسكر ودموعها ينزلوا...
🍁هو مشي طلع من الفيلا وركب سيارة زهير وقال..
فاتح؛توكل..
زهير هز راسه وتحرك طول..
🍁في الوقت اللي دنيا فيه مقلوبه رأس ع عقب في المركز..
والشرطه تحقق في الموضوع..
اكتشفوا ان واحد من افراد الأمن ساعده ع الهروب مقابل مبلغ مالي..
وبش يعرفوا وين ممكن يكون توا بلغوا كل من توقعوا يعرف ادنى معلومه..
واولهم..امه...نوال..
🍁🍁🍁🍁🍁
فهالوقت..
كان زهير مدرس سيارته قدام المكان اللي يخدم فيه طليق نرجس..
وفاتح يراجي فيه بفارغ الصبر..
لعند ماشافوا سيارة درست..
وهو نزل منها بأحسن قيافه..اللي يشوفه يحترمه..
ومش عارفين هالهيئة المحترمه قداش مدرقه وراها من قذارة..
فتح باب السيارة ونزل..
زهير:تبي مساعده..
فاتح:تس..
ومشاله طول...
فاتح؛سراج يا...واطلق لفظ نابي..
وقف طليق اخته والتفت ولما شافه انصدم..
وفاتح ماعطاشي فرصة يستوعب اللي شافه..
طول جبده من دجاكته وطاح فيه ضرب وين مايجي..
والناس تتفرج ومابي حد يدخل..
وفاتح يضرب والغضب عاميه والكلام اللي كان يقول فيه فهم طليق اخته انه عارف كل شي..
من قوة الضرب كان حيفقد وعيه..لولا زهير اللي جي في الوقت المناسب وجبد فاتح وهو يقول؛خلاص ياراجل خلاص قتلته..
فاتح قال لفظ نابي بعدين دفل عليه..ونفض نفسه من زهير ومشي للسيارة...
وزهير لحقه..
وخلوا طليق نرجس ملوح..والناس يتفرجوا عليه بس واحد من زملائه في الخدمه اتصل بالإسعاف..
🍁زهير:وتوا وين..
فاتح وهو داهش:للمركز ..
زهير :تم..
وشغل سيارته وتحرك..
🍁🍁🍁🍁
رافعه سبابتها في وجهه وهي تقول:اني حذرتك وقتلك تصير في ولدي حاجه المركز هدا نسكره..
هيثم يشبحلها برفعة حواجب وهو ساكت..
نوال نزلت يدها وقالت؛ونتيجه اهمالك حتتحملها..
وهيثم مازال محتفظ بصمته..
نرفزها بسكوته ونظراته البارده..
نوال:مانهددش اني توا..حنفد طول يكون في علمك..
هيثم:ديري اللي تشوفيه مناسب..
نوال قعدت تشبحله بغيظ..بعدين هزت راسها بوعيد..
الضابط ادخل وقال:التصرف فردي يااستاذه...
هيثم؛لاعندها الحق اني نتحمل جزء من المسؤوليه..
هي شبحتله من فوق لتحت..
شويه وجي واحد من عناصر الشرطه وقال؛فاتح بشر جي للمركز سيدي..
هيثم غمض عيونه وتنفس بقوة بعدين قال بهمس:الحمد لله..
الضابط؛وينه؟
العنصر:في ساحة المركز سيدي..
الضابط هز راسه ومشي..ونوال وهيثم لحقوه..
نوال:ياويلك مني لو لقيت ولدي منضر..
هيثم مط شواربه بملل وحرك راسه يمين ويسار..
•••••••
فاتح ببرود؛درت دورة ووليت..
الضابط:من خداك من هني؟
فاتح؛تاكسي..
الضابط:وين مشيت بالزبط؟
فاتح تنهد وقال:لحوشنا..
الضابط؛من يشهدلك..
فاتح؛اللي في الحوش كلهم..
الضابط؛سواق التاكسي مش مذكر شكله..
فاتح؛شن بندير بشكله حافظه!؟
هز الضابط راسه وهو يشوفله بشك..
ع خشة واحد من العناصر..جي للضابط طبس عليه وقاله شي..
الضابط شبح طول لفاتح..
بعدين هز راسه وقال:في من شافك يافاتح قدام ****** تعتدي بالضرب ع واحد من الموظفين..
فاتح ؛كان في من شافني معناها اني..
الضابط حرك راسه يمين ويسار بعدين ناض ومشي طلع من المكتب..
لاقى هيثم والنائب متاعه ونوال يستنوا برا..
الضابط:للأسف تسجلت عليه قضية اعتداء ع شخص يخدم في ******
نوال انصدمت..
الضابط؛الراجل توا في العنايه المشدده..
غمضت نوال عيونها بشده...
هيثم وملامح الامتعاض باديه ع وجهه قال؛قاعد ماكملش فترة علاجه..
الضابط:عندي علم..وتوا فوق عقوبة الإدمان حتكون عنده عقوبة تانيه اقسى واشد..
ومشي ووراه العنصر اللي جاي معاه...
وخلا نوال في حالة صدمه...بعدين التفتت ع هيثم وقالت؛هدا هو اسلوبك في الادارة..هكي دير مركز لعلاج الإدمان يادكتور هكي!...
هيثم قعد يشبحلها بنفس نظرة الامتعاض وماباش يرد..
نوال:انت مش كفؤ للمسؤوليه هادي لازم تخلي المكان لغيرك..
طلع فاتح من الغرفه ع كلام امه الأخير..
جاها وقال:اني شن قتلك قبل مش قلت معاش تجي هني معاش نبي نشوف وجهك..
نوال:هدا هو المكان اللي تبي تقعد فيه وعاجبك ولا!؟ طبعا مادام في تسيب واهمال..
النائب؛استاذة نوال زودتيها راهو..
فاتح بإنفعال:امشي روحي امشي..جاها وشدها من مرقفها ودفها وقال..روحي..
الحركه صدمت هيثم بقوة واستفزاته بصوت عالي قال؛فاتح...
جاه وضربه ع صدره وقال بغضب:والله ماتجي راجل..
فاتح غير عيونه عنه وهو معصب ومضايق ومحرج..
ونوال تشوفله بصدمه وحزن..
شده من ذراعه وقال:تعال..
ومشي بيه وهو يقول:ياريت تروحي...
هي قعدت معاهم بعيونها ودموعها ينزلوا لين ادرقوا من قدامها..
غيرت عيونها لنائب هيثم اللي كان يشبحلها وهو رافع حواجبه..
هي تماسكت ولفت ومشت وقعدت تمسح في دموعها وتحاول ادرق ضعفها وانكسارها بتصنعها للقوة كالعاده...
🍁وهيثم اللي كان وقتها في أقصى مراحل الغضب..
قرر يعاقب الزوز فاتح وزياد...
فاتح يقعد في المطبخ اليوم كامل ومايطلعش منه الا للنوم في الليل..وزياد في المرسم وكذلك مايطلعش منه الا للنوم ليلا...وعند النوم فصلهم كل واحد في جناح...ومدة العقاب مش معروفه...
كان يبي يأدبهم بدون مايتعب نفسيتهم لأنهم في النهاية هما في حكم المرضى...
🍁🍁🍁🍁
الساعه الخامسة عصرا..
مقبوله كانت في شقة ضرتها سدينه جايه بتفتح معاهم موضوع بس قبلها..
مقبوله:هدا اسراف ياسدينه إن المبذرين كانوا اخوان الشياطين..مفروض تمشي ع النظام اللي درناه..
سدينه:هدا جايبه ولدي وقال خاطري درته..
مقبوله:حتى هو هداه الله مش شاب مقبل ع الزواج ووراه مستقبل مفروض ياسدينه تنصحيه يلم يده مش هكي عاد حتى هادي اني بنوقظك فيها!؟
ع طلعة دانيه قالت:حني اللي نوفروله خوي والمرتب متاعه يحطه في يد امي ماتاخد منه في شي كان اللي هو يسمح بيه والحمد لله بسبب محافظة امي ع فلوسه ولى عنده مبلغ كبير حطه في المصرف..وقعمزت..
مقبوله وهي تشوفلها من فوق لتحت:كان هكي كويس..
سدينه بضيق:مانستغلش في ولدي يامقبوله..
مقبوله:تو اني قلت هكي الله المستعان!؟
دانيه؛كلام هو اللي يقول..
مقبوله تنهدت وقالت؛ياودي اسفه كان فهمتوا هكي اني تكلمت من باب حرصي عليه حتى هو في حكم ولدي شرعا..
سدينه هزت راسها وقالت؛بارك الله فيك..
مقبوله:المهم توا خل نسكروا ع الموضوع هدا ونتكلموا في اللي جاية ع خاطره..
سدينه استغربت..
لكن دانيه بطنها بدت تمغص فيها لأنها شبه عرفت في شن جاية تحكي..
ابتسمت وقالت؛جايه في موضوع خير بإذن الله تعالى..بصراحه اني ياسدينه اني عاجبتني تربية مجيد في بناته وكيف محافظ عليهم بالذات دانيه الله يبارك عليها حباها الله حسن صورة وخلق..واللي زيها يتمنوها زوجة لأولادهم..
دانيه قلبها بدي يدق بخوف..
مقبوله:واني عندي خوي..هو مش متلزم هلبه لكن مستقيم صلاي اوقاته في الجامع يخاف الله وخدام ع راسه...
سدينه شبحت لدانيه بضيق..
دانيه قاطتعها وقالت:اني مريضة سكر ماننفعش للزاوج..
مقبوله بضحكه:من قالك الدوة الفارغه هادي!؟ اللي عنده السكر يتزوج ويجيب الصغار واللي نعرف ان السكر متاعك مش من النوع الأول يعني مش هديكا الأزمه..
دانيه بضيق؛اني مانبيش نتزوج توا..
ابتسمت مقبوله ع جنب ورفعت حاجبها وقالت:امم..ماتبيش تتزوجي توا..ولااا....
دانيه شبحت لأمها بعدين شبحتلها وقالت:ولاشنو؟!
مقبوله:ولاتراجي فيه!؟
سدينه؛تراجي في مني!؟
رفعت حواجبها وقالت؛قصدك امك ماتعرفش..
سدينه شبحت لبنتها بعيون متوسعه وقالت؛شن في يادانيه تكلمي!؟
دانيه بتوتر؛مافي شي يام الموضوع ومافيه في واحد كلمني وقال يبي يخطب واني مابيتش نقول لين نعرف صدقه من كذبه..
مقبوله؛وعرفتي توا صدقه من كذبه..شن قتلك اني قبل النماذج هادي مافيهمش امان..
تعبوا عيونها بالدموع وقلبها وجعها...
مقبوله: مرات تلقيه سأل عن عليك وعرف بمرضك ووخر..بينما خوي اني ماعنداش فيه مشكله بكل مش متخلف هو وعنده خلفيه عليه..
سدينه شبحت لمقبوله وقالت؛كم عمره خوك؟
مقبوله:28سنه..
سدينه؛وشن يخدم؟
مقبوله:زي ماتعرفي خوتي وبوي يخدموا ع الطانطات ونفل البضايع وحاجات زي هكي وهو منهم...والحمد لله رازقهم من فضله الواسع...غير بس هو توا قاعد يبني في الأول بيسكن في اجار لين يكمل حوشه..
سدينه؛فتحتي الموضوع مع مجيد..
مقبوله:اكيد..
سدينه:خلاص يروح خوها وندوي معاه..
دانيه بصدمه:يام!
سدينه بحده؛اسكتي انتي..
مقبوله؛مش حتندمي يادانيه بالعكس حتحمدي ربي ليل نهار اللي خداك خوي..
دانيه ناضت ومشت من حداهم وهي بتبكي..
سدينه:ماتعدليش بعدين ترضى..
مقبوله:حاولي تقنعيها..
سدينه هزت راسها وقالت؛ان شاء الله..
••••••••••
"عجبك الموقف اللي حطتيتي فيه قدامها طلعتيني زي الأطرش في الزفه هي تعرف واني لا"
دانيه ببكي؛مابيتش نفتحه معاك خفت تحسابي في بينا شي قلت لين يجيب ماليه بعدين نقولك..
سدينه:قداش ليها الحكايه هادي..
دانيه:سبوع..
سدينه؛ووينه لتوا..
دانيه سكتت وهي تبكي..
سدينه جتها وحطت يدها ورا ظهرها وقالت؛اسمعي بنتي..اني موضوع خو مقبوله تريحتله عزري ومرتاح ماديا وعارف بمرضك وراضي بيه..
دانيه ببكي:كلامك يقهر يام..
سدينه بحزن:سامحيني يابنيتي لكن هدا الحق..
دانيه زادت في البكي..
وامها ضمتها وبدت تبكي معاها وهي تقول:حسبي الله ونعم الوكيل...
🍁ومن هم دانيه لهم رتاج..
اللي بتخلص منه اليوم...خلاص همانه بتروح...
همانه؛تو نجي نقعد معاكم في عطلة الصيف..وقعدت تضحك..
رتاج بإبتسامه صفرا:مرحبتين بيك..
عادل بإبتسامه؛ان شاء الله بابا ان شاء الله..هيا بنتي..
خداها من يدها..وهي التفت لرتاج وشبحتله بإبتسامة كلها شر وقالت..باي توجي..
رتاج بنفس الإبتسامه الصفرا رفعت يدها وحيتها وهي تقول؛باي..
وسكرت وراهم الباب بقوة وقالت؛جعلها هادي اخره مرة نشوف فيها..
🍁وعادل طلع ببنته من الحوش..
في الطريق..
همانه؛تعرف بابا ابله رتاج كويسه هلبه بس صغيرونه وحلوة هلبه اسفه بابا صغيرونه هلبه..
ابتسم وقعد ساكت..
همانه؛اغلب وقتها ع النقال ديما شادته وماتلقاها الا تكتب وتضحك واتصالات هلبه تجيها تخش للدار وتقعد بالساعات..هدا علاش ماكلتها ديمه شايطه..
هو عقد حواجبه وقال: قصدك لماتجيها اتصالات ماتحكيش قدامك..
همانه؛تس تس..في دار النوم تحكي..
هو هز راسه وقال:اللي قلتيه توا مانبي حد يعلم بيه..
همانه ببراءة مصطنعه:علاش بابا؟
عادل:هكي وخلاص بابا..عطيني وعد..
همانه:خلاص وعد..
وكمل الطريق وعادل ساكت ويفكر وافكار ترفعه وافكار تجيبه..
وهمانه فرحانه اللي وصلت لمبتغاها...
🍁🍁🍁🍁
وكذلك نرجس كانت فرحانه اللي طليقها ماصار فيه شي ولااضرر ضرر كبير من اللي دار فيه خوها..
لكنه قرر يرفع عليه قضيه ومايخليشي ينجى بعملته...
ورجعوا حققوا مع فاتح تاني واعترف عادي جدا انه ضربه عن قصد...
وبهكي حيتحددله يوم للمحاكمه...
🍁وخلال هالأيام...
انفتح موضوع خو مقبوله مع مجاهد..ماكانش متقبله بس لما خدي راي اخته لقاها موافقه ماباش يدخل في قرارها خصوصا انه حتى هو شافه فرصه مناسبه للي زي دانيه..
والفرصه المناسبه ماعنداش علم بمرضها من اصله...
وهو جاي يوم النظرة الشرعيه...
••خشت دانيه وهي تتمنى ربي يجيب آجلها قبل لتشوفه..
هو لما شافها انطبس فيها وقعد فاتح عيونه فيها وخلاص..
بعدين قال:كيف حالك..
دانيه وهي منزله راسها:الحمد لله..
:ترا ارفعي راسك شويه..
بالسيف قامت عيونها فيه وشبحتله..
كانت تشبح فيه غوله مش طايقاته..
وهو قريب يهبل عليها قعد يجبد منها في الدوة جبد..
وهي مش طايقه ترد عليه وطول انسحبت وطلعت من حداه..
وتلقتها مقبوله:هاه شن رايك..
دانيه:مش عارفه..ومشت من حداها...
سدينه؛متحشمة بس..
رتاج؛مرات ماعجبهاش..
مقبوله:علاش مايعجبهاش خوي الله يبارك عليه ياما منهم يتمنوه..
رتاج؛شكار العروس..
فنصت سدينه في رتاج وقالت؛بري لأختك..
رتاج شبحت لمقبوله من فوق لتحت بعدين مشت لحقت دانيه..
سدينه:معليشي مادوريهاش ديما هكي هي..
مقبوله؛حتى اني مش مدورتها لاني حفظت طبعا..المهم توا موضوعنا يتم...
سدينه تنهدت وقالت:ربي يجيب اللي فيه الخير...
🍁🍁🍁🍁
"فرضاته فرض علينا"
عادل؛فرصة مناسبه لأختك..
رتاج؛ع خاطر مرضها يعني..
عادل:ايه..
رتاج تنهدت وقالت؛حني اللي بخوتنا بالهون..
هو عقد حواجبه وقال:وخيره بختك!؟
رتاج استاقظت لروحها شن قالت:مش قصدي اللي فهمته قصدت بوي..لو عندنا بو باهي ماصارش فينا هكي..
هو هز راسه وقعد ساكت..
ورتاج قعدت تقول في نفسها..
"ارفسي يارتاج ارفسي"..
🍁🍁🍁🍁🍁
"هاه شن رايك"
هادي مقبوله تكلم في خوها بالتليفون
"الله يبارك عليها مانحسبهاش هكي ماهو شايف بوها ماتقولش بنته بكل"
مقبوله بضحكه؛بش تعرف اختيارات اختك..المهم توا خلاص نتموا الموضوع..
"خلاص"
مقبوله بإبتسامه؛ع خير ان شاء الله ع خير...
🍁ودانيه لوطا
تبكي في دارها بتموت من البكي..
سدينه:يابنتي حرام عليك تو يرقى عليك السكر..
دانيه ببكي:ان شاء الله يرقى ونموت ونفتك من هالعمر الأسود..
"شن العياط هدا"
سدينه بخوف:اسكتي ياهمي اسكتي..
ويخش مجيد ووراه رشيد يشبح لاخته بضيق..
مجيد:خير دعوتك انتي خير بلاك..
دانيه ناضتله وجت شدت يده وباستها وقالت:مانبيش نتزوج يابوي بالله عليك..
نفض يده وقال:مالا بكيفك هو..احمدي ربك اللي في من رضي بيك بهمك..فوق من اللي بيخسره عليك يقعد يصرف ع مرضك ودواك..
دانيه قعدت تشبحله وهي مصدومه..
وسدينه تشوفله بكره وعيونها غارقات بالدموع..
"ماقالك حد اصرف ع دواها"..
رشيد التفت لقي مجاهد واقف في الباب..
مجاهد وهو عاقد حواجبه بغضب:من قالك اصرف ع دواها بش تلوحه ع غيرك...
مجيد عقد حواجبه بإحراج؛مش هدا قصدي يامجاهد..اني قصدي مش اي راجل يرضى ياخد مريضة بمرض اختك..
مجاهد؛وان شاء الله مايرضوا...اني لو نندري عليها والله ماخليته يجي ويشوفها..
مجيد؛مجاهد استهدى بالله..
مجاهد بنفاد صبر:لحظه يابوي لحظه..دانيه..اشبحيلي هني .
قعدت تشبحله ودموعها ينزلوا..
مجاهد:ماتبيش..
دانيه هزت راسها وهي تمسح في دموعها وقالت:ايه مانبيش.
مجاهد خبط ايديه في بعض وقال:خلاص تمت..برا قول لمرتك ماعجبهاش وماتبيش..
مجيد؛ماتوقفش في نصيبها تندم انت بعدين..
مجاهد؛نندم لو جبرتها ع حاجه ماتجيش بالغصب..من اليوم يابوي معاد دخلك بمصاريفها طلعه من راسك موالها..واني حي اختك ماتعتاز لحد...
مجيد هز راسه وقال بعدم رضا؛دير رايك..
ومشي طلع من حداهم..
مجاهد شبح لدانيه وقال:علاش ماقلتيش مانبيش لما سألتك..
هي جاته طول رمت روحها في حضنه وشدت فيه بقوة وقعدت تبكي وخلاص..
سدينه ودموعها ينزلوا؛خلاص سادك بكي هلكتي روحك..
مسح ع راسها وقال:خلاص معاش تبكي وانسي..وهي انتي وياها يام..ورشيد وتوا رواحكم...
رشيد بفرحه:بنطلعوا!
مجاهد التفت وقال بإبتسامه؛ايه..
رشيد بحماس:خمسه بس...وطلع يجري من حداهم..
هما ضحكوا..
سدينه وهي تشوف لولدها بحب؛ربي مايغيبك ياراجلنا .
دانيه حطت راسها في حضنه وقالت؛يارب..
هو ابتسم ومسح ع شعرها بلمسته الحنونه اللي تعطي فيها في امان ماقدرش بوهم يعطي ربعه...
🍁🍁🍁🍁
"روح من غير كلوف"
راجح؛مش مروح..
"امك روحت من السفر تحساب بتلقاك قدامها خوتك كلهم جو الا انت..عيب عليك.."
راجح؛بوي من الاخير مانيش مروح لين يصير من موضوعي..
"باهي انت روح واني ندخل فيه موضوعك.."
راجح؛كلمني لما تقول باهي وتوا اعذرني ياحاج مجبور نسكر عندي مهمه بنطلع توا..
تنهد و قال
"ع راحتك.."
وسكر..
وراجح زفر بعصبيه بعدين فتح باب مكتبه وطلع...
🍁🍁🍁🍁🍁
"كيف هكي يامجيد نلعبوا حني"
مجيد:اسمعي مجاهد بالذات مانحبش نكسرله كلمه..
مقبوله:تنكسر كلمتك انت عادي!
مجيد؛من الاول يامقبوله مقايل ولدي مجاهد سعره بسعري في العيله..
مقبوله هزت راسها وقالت وهي تكتم في عصبيتها؛باهي..باهي..قدر الله وماشاء فعل...
مجيد؛كله نصيب وربي يعطي خوك اللي خير منها...
هزت راسها وقالت:الله المستعان..
مجيد يبي يرطب الأجواء بش يرضيها قال؛شن رايك نطلعك تتعشي برا..
هي شبحتله شويه بعدين قالت؛باهي..لكن راهو مش زي االمطعم هداكا غالي..
مجيد بإبتسامه؛حاضر...غير سقدي وتي روحك..
هي يدوب ابتسمت وناضت ولما جت ماشيه تبدلت ابتسامتها بملامح الحده...وفي نفسها تتوعد في دانيه اللي رفضت عريس الهني خوها...
🍁🍁🍁🍁
فهالوقت...
كانت مريم في حوش عمها..
انجبرت تمشي وتحضر فاتحه ولد عمها اللي اجرم في حق عرضها..
كانت مخنوقه بس تجامل بالسيف...
وتعول معاهم من فم ساكت...
بعد عقد القران..روح ع حوش اهله بالزكرة اللي دارت شوط حلو...
وبعد ماروحوا..
هو كان مفروض يمشي يشوف مرته..
بس لما عرف ان مريم موجوده تغيرت مخططاته...
يتبع…
