ပျောက်ဆုံးသွားသည့် အရာကို ပြန်ရှာတွေ့ကောင်းတွေ့နိုင်ပေမဲ့ ဆုံးရှုံးလိုက်ရတဲ့အရာကိုတော့ ပြန်မရတတ်ကြောင်းကို လက်တွေ့ဘဝကြီးက သက်သေပြနေသည် ။
မှောင်မဲနေသည့် ကောင်းကင်ယံတွင် လမင်းကြီးက ထိန်ထိန်သာနေသလို ကြယ်ရောင်စုံတို့ကလဲ လမင်းကြီးနှင့်အတူ တဖျက်ဖျက်နှင့်ပင် အမှောင်ထုကို အလှဆင်ထားပေသည် ။
ထိုကောင်းကင်းယံကြီးလိုပင်
အမှောင်ထဲမှာ လမ်းပျောက်နေသည့် လူတစ်ယောက်၏ဘဝကိုတော့ မည်သည့်အရာက အလှဆင် လမ်းပြပေးနိုင်မည်နည်း။အကြိမ်ကြိမ်ချလိုက်ရသည့် သက်ပြင်းတွေသာ သက်ရှိဖြစ်နေခဲ့ရင် အခုချိန်လောက်ဆို ငြိုငြင်လောက်ရောပေါ့ ။
ဘယ်လိုမှမတတ်နိုင်တော့သည့် အခြေအနေမှာ သက်ပြင်းချရုံ ၊ မျက်ရည်ကျရုံမှတစ်ပါး ဘယ်အရာကိုများ စွမ်းဆောင်နိုင်မည်နည်း ။" သမီး "
နောက်ကျောဘက်မှ ထွက်ပေါ်လာသောအသံဟာ များစွာသောအတွေးများကို ရပ်တန့်သွားစေခဲ့သည် ။
" ဖေဖေ... မအိပ်သေးဘူးလား "
" ဖေ့ဖေ့ကိုသာ မေးနေတာ သမီးကရော ဒီအချိန်ထိ မအိပ်သေးဘဲ အပြင်ထွက်ပြီး ဘာလုပ်နေတာလဲ "
" အိပ်မပျော်လို့ ဒီတိုင်း ခြံထဲလမ်းထွက်လျှောက်ရုံပါ "
" ဖေ့ဖေ့ကိုအမှန်တိုင်းပြောနော်... သမီးအခုတလောမျက်နှာသိပ်မကောင်းဘူး အဆင်ရောပြေရဲ့လား..
မိုးရိပ်ကလဲမေးနေတာ အခုတလောသမီးကို မတွေ့ရလို့တဲ့ "" သမီး အဆင်ပြေပါတယ် ဖေဖေ...
အခုကိုင်ထားတဲ့ project ကိုလက်စသတ်နေလို့ မိုးရိပ်နဲ့မတွေ့ဖြစ်တာပါ "" သမီးအဆင်ပြေရင် ရပါပြီ...သမီးက လူငယ်ဘဲရှိသေးတာ အလုပ်တွေဘဲ အရမ်းဖိလုပ်မနေနဲ့အုံး...
Company မှာဖေဖေလဲ ရှိနေသေးတာဘဲ
တစ်ခါတစ်လေတော့ လွတ်လွတ်လပ်လပ်နေပါအုံးလား "" ဟုတ်ကဲ့ပါ ဖေဖေ... ဒီ projectကို လက်စသတ်ပြီးရင်တော့ သမီးနားလိုက်ပါ့မယ် "
ဖြေးညင်းစွာ တိုက်ခတ်လာသည့် လေပြေတချို့ရဲ့ ထိတွေ့မှုဟာ အေးစက်သယောင်ယောင် ..
တစ်ယောက်ထဲ အတွေးများနှင့် ပင်ပန်းနေရသည့်အချိန်တွင် တစ်စုံတစ်ယောက်နှင့် စကားတွေပြောနေရသည့်အချိန်သည် ခံစားချက်တစ်ဝက်ကို သက်သာစေသည် ။