(Uni)
" မြေးလေး.. ဘာဖြစ်လို့လဲ "
ကျောင်းတက်ဖို့ကို တက်ကြွနေခဲ့တဲ့မြေးငယ်မှာ လက်ချင်းတွဲလို့ လမ်းအတူလျှောက်လာကြရင်းက လမ်းတစ်ဝက်လည်းရောက်ရော ခြေတစ်လှမ်းလှမ်းဖို့တောင် တွန့်ဆုတ်သွားတာကြောင့် ဒေါ်ခင်နှင်းကြည် အမေးပြုမိလေသည်။
ဘွားမေပြန်ချုပ်ပေးထားတဲ့ ဖိနပ်ဟောင်းလေးကို တွေတွေလေးစိုက်ကြည့်ပြီး မလှုပ်မယှက်ရပ်နေတဲ့ ခညောင်းဦးက ကျောင်းသွားရမယ့်ခြေလှမ်းတွေအတွက် ပေကပ်ကာ တွန့်ဆုတ်လို့နေရှာသည်။ ဒါ့အပြင်..၊ သက်ပြင်းမောရှိုက်စေမိသည်အထိ ဝတ်ထားရတဲ့ ကျောင်းဝတ်စုံဂါဝန်ပွပွက ၈နှစ်အရွယ် ကလေးတစ်ယောက်အပေါ်မှာ ဖိအားကြီးလွန်းလှသည်။
" မြေးလေး ဘာဖြစ်နေတာလဲကွယ်..။ ဘွားမေကိုပြောစမ်း "
" ဘွားမေ သမီး..အင့်.. သား ကျောင်းမသွားချင်ဘူး.. "
" ဟင်.. ဘာလို့လဲ ငါ့မြေးလေးရယ်။ စာတွေက မှတ်ရခက်လို့လားဟင် "
ခညောင်းဦးက ခေါင်းလေးကိုခါယမ်းပြလာပြီး ဘွားမေကိုလှမ်းဖက်လိုက်တော့ ဆံရစ်ဝိုင်းလေးက လှုပ်ခါသွားလေသည်။
" ကျောင်းမှာ သမီး..အင့်.. သားကို အရူးမကြီးသားဆိုပြီး ဝိုင်းပြောကြတယ်။ သူတို့နဲ့ကစားချင်တာကို..အင့်.. အနားမကပ်ဖို့.. ကျောက်ခဲတွေနဲ့လည်း ပစ်ပေါက်ကြတယ်..အင့်.. သဲတွေနဲ့လည်း ဝိုင်းပက်ကြတယ်.. အီးဟီးဟီး!!! "
ဗိုက်နားမှာမျက်နှာလေးဝှက်လို့ အော်ဟစ်ငိုကြွေးနေရှာတဲ့ မြေးဖြစ်သူကြောင့် ဒေါ်ခင်နှင်းကြည်ရဲ့ ရင်ဘတ်တစ်ခုလုံးမှာ နိမ့်ချည်မြင့်ချည်နဲ့ တင်းကျပ်လို့သွားရလေတော့သည်။ ဒီဒဏ်ရာတွေကို သူမေးစမ်းကြည့်တုန်းက သူငယ်ချင်းတွေနဲ့ကစားရင်း ချော်လဲလာတယ်လို့သာ မြေးလေးက ပြန်ဖြေပေးခဲ့သည် မဟုတ်ပါလား..။
အခုကျတော့..၊ တော်ရုံငိုခဲလှတဲ့မြေးငယ်လေးက စိတ်အားငယ်စွာနဲ့ရှိုက်ငင်ပြီးကို အော်ဟစ်ငိုကြွေးနေတာဖြစ်သည်။
" ပြီးတော့..အင့်.. ဆရာမကပြောတယ်..။ ဂါဝန်ဝတ်တာက မိန်းကလေးတွေပဲ.. ဝတ်ရတာတဲ့..။ သား.. ဂါဝန်မဝတ်ချင်ဘူး..အင့်.. ဘွားမေ.. "
YOU ARE READING
ငပြူးငလူး
General Fictionပဲပြုတ်သည်ငပြူးနဲ့ ဆိုက်ကားဆရာငလူးတို့ရဲ့ story လေးတစ်ပုဒ်
