ဆရာလေးကိုပဲ အသည်းစွဲအောင်ချစ်မိပြီ(Complete)

Part 18

Unicode

မျက်စိရှေ့တွင်မြင်နေရသည့် အမှောင်ထု။ပိန်းပိတ်အောင်မှောင်မနေသော်လည်း ရှေ့မှမြင်ကွင်းတွေသည် ဝေဝေဝါးဝါး ။သူနှစ်လရှည်များ ခရီးရှည်ကြီးတစ်ခုကိုဖြတ်သန်းခဲ့ရသူလို အလွန်ပင်မောဟိုက်ပင်ပန်းလျက်ရှိနေသည်။ဘာမျှမရှိ၊ဘာအရောင်အဆင်းမှမရှိသည့် အဆုံးမဲ့မှောင်မိုက်နေသည့် ကွင်းပြင်ကျယ်ကြီးထဲမှာ ဖိနပ်မပါရေမပါဖြင့် ဆက်သွားနေသည်။ ‌ဆက်သွားနေရင်း သူ့အာခေါင်တွေခြောက်ကပ်လာသည်၊ခြေလှမ်းတွေက ယိုင်နဲ့နဲ့ပျော့ခွေချင်လာသည်။ထို့နောက် အကြားအာရုံထဲသို့ တစစတိုးဝင်လာသည့် ရေကျသံလော သို့တည်းမဟုတ် အခြားတစ်ခုခု၏အသံလော၊ သီချင်းငြီးသံလော ဝေခွဲမရစွာ သူခံစားနေရတယ်။ထို့နောက် နှစ်လရှည်များအိပ်မက်ဆိုးထဲမှ သူလှုပ်နှိုးခံလိုက်ရသကဲ့သို့ သူနိုးထလာခဲ့တော့သည်။

သူ့လက်ဖျားကလေးများကို အသာလေးလှုပ်ကြည့်သည် သို့သော်သိပ်ပြီးလှုပ်မရ အနည်းငယ်လေးလံနေသကဲ့သို့။ထို့နောက် လေးလံနေသည့် မျက်ခွံများအား ဖြည်းဖြည်းချင်းဖွင့်မိပြန်တော့ အလင်းရောင်နှင့်ကျင့်သားမရ၍ထင် ချက်ချင်းပင်ပြန်မှိတ်ကျသွားကြသည်။ဦးခေါင်းတစ်ခုလုံးဗလာဖြစ်နေပြီး ခေါင်းကလည်းထိုးကိုက်နေသေးသည်။တဆစ်ဆစ်ဝေဒနာကြောင့် သူအသံထွက်ညည်းညူမိသွားသည်ထင် ဘေးဘက်နားဆီမှ ကြည်လင်နေသည့်အသံဝဲဝဲအားကြားလိုက်ရသည်။

"နန်းဖြား ရေ ဒီမှာ ကမ်းစပ် နိုးလာပြီထင်တယ် လာကြည့်ပါဦးဝေ့"

သူမျက်လုံးကိုနောက်တစ်ကြိမ်အားယူကာပြန်ဖွင့်လိုက်သည်။ပထမဦးဆုံးဘာကိုမျှရှင်းရှင်းလင်းလင်းမမြင်ရ။အလင်းတွေလျော့ကျသွားတော့မှ တဖြည်းဖြည်းကြည်လင်လာသည့် မြင်ကွင်း။သူ့ဘေးတွင်ရှိနေသည်က ဖြူဖြူသေးသေးဖြင့် ကောင်ငယ်လေးတစ်ယောက် ပိတ်သားဖြူဖြူကလေးကိုရေညှစ်နေသည်။ထိုတော့မှ ခန္ဓာကိုယ်ကချမ်းစိမ့်စိမ့်ခံစားချက်နှင့်အတူသူ့ကိုယ်သူငုံ့ကြည့်မိတော့  ပေါ်ပိုင်းကအဝတ်ဗလာ။တစ်ချို့နေရာတွေကတော့ နွေးနေသလိုခံစားရသည်။သူအနှီကောင်ငယ်လေးအား ဇဝေဇဝါဖြင့် စူးစမ်းကြည့်မိသည်။ထိုကောင်ငယ်လေးက သူ့မျက်စိရှေ့ လက်ကိုဘယ်ညာဝှေ့ယမ်းပြနေပြီး လက်ကိုလည်းနှစ်ချောင်းထောင်ပြလိုက်ပြန်သည်။